1 Ịtọpa 29 - IWE ỌNỊNỊ

Ẹyịza ana a ka asị da Irehi Ohomorihi

¹ Ohinọyị Idevidi ộ kà a yị avaba aza ana gụ ka: Ozi anị Isoromọnị Óhomorihi va nyị nị, ama ozweyi ọ vị nị; ẹ yị nyị ịsa ọ yẹ. Ụkọrọ ana nyị ka à mẹ aanị ọ́ọ dẹngụ ẹtẹẹtẹrẹ, agụvị ka ẹ yị vị irehi ohinọyị ọzarẹyịrẹsụ irehi ọnọnị vị, Irehi Ẹnẹyịmavara Ohomorihi ọ vị nị.

² Ọ kà, ọnị ộ sị vụrị, ọnị o ree tenyi ịsa a vọrọ ka a sị da Irehi Ohomorihi tịtẹ. Ọnị ộ sị igooru, isiriva, enyusẹ irenyi-irenyi, ọchị ọnịrị ịrẹta ọkatarihi irenyi-irenyi tịtẹ yọ.

³ Ene hu keekere ịnị avaba ịsa ọnị ọnị tenyi tịtẹ aanị, ọ vị ka, ọnị ộ sị isiriva ọnịrị igooru hụụnị ogu anị ụvọta ka a sị mẹ̀ ụkọrọ ọnọnịị; agụvị ka oni oò sì ịrẹyị irehi Ohomorihi ọnọnị ẹtẹẹtẹrẹ.

⁴ Idevidi ka ọnị ọ́ raà sị igooru ịtọọnụ ẹchẹhị (100 tons) ọnịrị isiriva obooro-obooro ịtọọnị ịrẹka tụra ẹbẹẹva (240 tons) ka a sị mẹ ugene irehi Ohomorihi ọvị.

⁵ Dị à rẹ sị mẹ avaba ịsa ọnị ọnụkọrọ ụvọ nịnị ẹẹ vaa mẹ. Ọ kà booro aanị áá nyị ọza enee sì ka ọnị ọ̀ sị ẹyịza va yị Ẹnẹyịmavara ịnị ẹnịnị?

⁶ Ịjọnọọ, dị ẹnị ọdọvịdị ovwoovu nịnị, ẹnị ọdọvịdị ịrẹsụ-ịrẹsụ, ẹnị ọdọvịdị isoja nịnị ẹnịrị ẹnị ene pe ohinọyị sị eyi pe ụkọrọ va sị ẹyịza ẹnịnị vẹ nị. É mè sị ọ, ẹ sị ọ vẹ nị.

⁷ Ẹnịnị ệ kụ avaba ẹnya ẹnẹnị vẹ ka à sị mẹ̀ ụkọrọ irehi Ohomorihi; Igooru ịtọọnụ ẹchẹhị ịhịnta tụra ẹẹwụ (170) Isiriva, ẹ̀hụ ịtọọnụ ịrẹkẹẹchẹhị tụra ẹbẹẹva (340). Enyusẹ ọkatarihi ọsa, ẹ̀hụ ịtọọnụ akata tụra oohu (620) Enyusẹ kẹnẹ vị ẹ̀hụ akawụ rị akahị tụra akava (3,400).

⁸ Aza ana nyị ịrẹta ọkatarihi ệ kụ ọ ka a sị tụ́ ini aku ana aa kụ oguu hi ini irehi Ohomorihi. Ijehiyẹrị o si eyi pe ịzọọ nị. Anị ịrẹsụ ana aā hị́ Igerisoni ịdị Anireevi nịnị ọ vị nị.

⁹ Aza mè sì ọ, ẹ sị ẹyịza va yị Ẹnẹyịmavara nị. Ayị ẹnịnị ô hine ka â vavọọ kụ́ ịsa va yị Ẹnẹyịmavara. Avọọ ayị ohinọyị Idevidi ọnị mè re hine ẹtẹẹtẹrẹ nị.

Idevidi ộ sị ụga yị Ohomorihi

¹⁰ Ohinọyị Idevidi ộ yà ọvịdị avaba ịragụ ana gụ, dị ọ sị ụga yị Ẹnẹyịmavara nị. Ọ kà, Ẹnẹyịmavara, Ohomorihi Ijekọvụ ohiku ayị, ẹwụ á vaa sị ụgaa yị pooro zịna-zịna nị.

¹¹ Wáa banyị, dị ụ nyị ụkata nị. Wáa nyị ụbanyị, wée zoza, dị ụ vị ohinọyị nị. Ẹwa nyị avaba ịsa ene hi ẹbẹẹba ọnịrị ẹhẹ nị. Ẹwa vị ohinọyị ene hu anaa mẹ ohinọyị tụra avaba anẹhẹ ịrẹsụ nị.

¹² Ẹwaā si ogu ọnịrị ụbanyịị yị ọza nị. Ẹwaa mẹ ohinọyịị yị avaba aza nị. Ẹwa nyị avaba ụkata nị, dị ụụ̄ mẹ ka ọza ọ̀ nyị ụkata dị ọ̀ ngụrẹyị nị.

¹³ Ọ kà yáa kụ́ Ohomorihi ayị avọọ ọyaanị. Yáa sị ụgaa wụ agụvị ka wáa nyị ụbanyị ẹtẹẹtẹrẹ.

¹⁴ Idevidi ka, ama ẹnẹ ẹ vị ẹmịrị aza amị, dị ị maanị zụ sị ịsa va wụ, ka ẹwaā sị avaba ịsaa yị ọza nị; ịsa ọnị ụ nyị ị́ sị hụụnị anị varẹma va wụ nị.

¹⁵ Ọ kà Ẹnẹyịmavara, wâ yẹ ka vi yee che oze parahu ịnị ẹhẹ anka ọzọga avọọ nị; avọọ ohiku ayị mẹ̀ ya nị. Ẹkụhị ayị ịnị ẹhẹ vị ana sị mẹẹ anka ụmọmọ avọọ, yẹ yị zụ mẹ ka ye yị vee sù.

¹⁶ Ọ kà, Ẹnẹyịmavara Ohomorihi ayị, ya raà kụ́ ogu ẹnẹnị vẹ ka à sị da irehi wu ịzị a vaa yaa hị́ ịrẹha awụ. Ama ẹwa sị avaba anịị yị nị. Ẹwa rẹ nyị avaba anị nị.

¹⁷ Máa yẹ ka ụụ̄ zama ayị avaba azaa re; ayị awụụ̄ hinee tù aza ene ebira ẹnịnị vọrọ. Ịzẹyịza mị sị avaba ịsa ẹnẹnị va wụ nị. Mê re avaba aza awụ ana wara gụ anị mee hine ayị ka ẹnị ệ sị ẹyịza va wụ.

¹⁸ Ẹwụ Ẹnẹyịmavara Ohomorihi Abụrahamị, Ayiziiki ọnịrị Ijekọvụ ohiku ayị nịnị. Navọ wa sị tụ́ ịnị ayị aza awụ vẹchị-vẹchị, dị ẹnịnị ẹ̀ maanị yịị kụ́ ẹngụụ hi ịrẹyị awụ pooro. Mẹ ka ẹnịnị ẹ̀ vaa sị ayịị tụra wụ pooro.

¹⁹ Ọ kà, Navọ wa mẹ ka ozi emi Isoromọnị ọọ sị avaba ayị anịị sị̀ ka ọnị ọọ saasa avaba ịrẹyị awụ; dị ọ̀ da irehi Ohomorihi ọnị mị hụvị anị tenyi avaba ịsa ẹnẹnị tịtẹ.

²⁰ Dị Idevidi kà a yị aza ẹnẹẹ ka; We gono Ẹnẹyịmavara, Ohomorihi awụ nịnị. Dị avaba ịragụ ana gụ ee gono Ẹnẹyịmavara, Ohomorihi ohiku ẹnịnị nị. Ẹnịnị ệ và ku ẹtẹ yị Ẹnẹyịmavara, dị ẹ́ rẹ và ku ẹtẹ yị ohinọyị Idevidi nị.

²¹ Eyinẹhẹ anị, ẹnịnị ệ wụ̀ ịsụpa ẹnẹ ẹ sị mẹ̀ ịsọvọ yị Ẹnẹyịmavara, dị ẹnịnị gà ẹ yị aza ka ẹ̀ rị ọ nị. Ẹnịnị ệ rẹ sị ụnọ akahị ọnịrị ịdẹba akahị beri ezi atẹmẹ akahị mẹ̀ ịsọvọ vaka a. Dị ẹ rị avaba anị ịra ịrẹsụ ụta ịsọvọ. Ẹnịnị ệ rẹ sị eche vẹ va mẹ̀ ịsọvọ.

²² Ịhị ọnọọ dị ẹnịnị yà ọvịdị Ẹnẹyịmavara, dị ẹyaa rị ịsa, di eyee hú, dị ayị ẹnịnị ee hine nị. Ịhị ọnọọ ọ tụ́ ọ ụpọhụva ẹnẹ ẹnịnị nọ̀ ọ ka Isoromọnị ọ vị ohinọyị ẹnịnị nị. Ẹnịnị ệ nyị ọ ịnị ịrẹha Ẹnẹyịmavara, dị ẹ ka angwẹ hi ọ ịrẹsụ ẹnẹ ẹ sị sị ọ rị ohinọyị nị, dị ẹ rẹ nyị Ịzadọkị ka ọ̀ vị ohirẹsụ irehi Ohomorihi nị.

²³ Avọọ Isoromọnị mẹ dọ ada anị Idevidi ịrẹsụ anka ohinọyị, dị a sị ọ yaatụ ịnị aga ohinọyị ọnị Ẹnẹyịmavara si hi ẹtẹ yị wa nị. Ọ́ mẹ̀ vị ohinọyị, ụmẹ aanị ô zoza ẹtẹẹtẹrẹ, dị avaba Anisirẹrị nịnị saasa ịrẹyị anị.

²⁴ Avaba ẹnị ọdọvịdị ẹnịrị isoja nịnị beri avaba ezi ọnọrụ Idevidi ana vọ ê wo oto ka ẹnị vaa saasa Isoromọnị anka ohinọyị.

²⁵ Ẹnẹyịmavara ộ mẹ̀ ka avaba Anisirẹrị ẹ̀ sị ụbanyị Isoromọnị ẹtẹẹtẹrẹ. Dị ọ mẹ ka ọ̀ nyị ụbanyị huna ohinọyị ọnyọọnyị ana rị Ísirẹrị da nị.

Idevidi mẹmẹ mẹ ohinọyị anị

²⁶ Idevidi ozi Ijeese ộ rị ohinọyị avaba Isirẹrị mẹ ịrayị ẹbẹẹva.

²⁷ Ộ ya Ihebirọnị mẹ ohinọyị ịrayị ịhịmba, dị ọ yà Ijerusarẹmị mẹ ohinọyị ịrayị ohurẹẹwụ tụra ẹẹta.

²⁸ Ộ vịra ẹtẹẹtẹrẹ dị o ve su. Ộ nyị ogu ẹtẹẹtẹrẹ, dị a sị ụbanyị yọ nị. Ozi anị Isoromọnị ọ vana rị ohinọyị tụ́ udi anị nị.

²⁹ Â chẹrẹ ịtọpa ohinọyị Idevidi hụrẹ ụmẹ oni o si nyima na ngụ ẹzẹtẹ tụ ini iwe ọnịsẹ ẹẹta ẹnẹnị: Ịsamụwẹrị, Ịnatanị, ọnịrị Ịgaadị.

³⁰ Â kà a tụ́ ini iwe ẹnẹẹ Idevidi mẹmẹ mẹ ohinọyị anị, ọ́ mẹmẹ nyị ụkata, ịrẹyị ene tu ọ, ọnịrị ịrẹyị ene tu Isirẹrị, ọnịrị ịrẹyị ene tu ẹnị ohinọyị ẹkụra ana kara Isirẹrị.