1 Ịtọpa 17 - IWE ỌNỊNỊ

Ụtụ ọnị Ịnatanị na kà yị Idevidi

¹ Idevidi vị ana ra ini irehi ohinọyị ọnị ọ́ da. Ẹkụhị ọnya dị ọ tụ na hị́ ọnọrụ ọnya ana aā hị́ Ịnatanị nị. Ịnatanị vị ọnịsẹ. Idevidi ộ kà a yọ ka, wée re, áá vọrọ ka ọnị ọ̀ ra ini irehi ohinọyị ana a sị ọchị isida da, ama dị à sị apoti oto Ẹnẹyịmavara tụ ịnị ajẹngụ?

² Dị Ịnatanị tụ́ ohi ka, ịsị ọ̀ọ nyị tụ ịnị ayị ka ọnị aà mẹ, ọ̀ na mẹ̀ ẹ, agụvị ka Ohomorihi yà a ịrẹma.

³ Ama ịrahụ ịhị ọnọọ, dị Ohomorihi kà a yị Ịnatanị ka,

⁴ Ọ̀ na kà a yị Idevidi, ozi ahụ anị ka, ẹ́ yị vị ọnị ọ vaa da irehii yị ọnị, ọnị ọnị aa rá ịnị anị.

⁵ Ẹnẹyịmavara kà hụrẹ ụmẹ ọnị ọnị sị kụ Anisirẹrị nịnị hụrẹ Ijipiti avọọ, pooro va ngụ ọyaanị, ọnị ệ yị ra ini irehi da. Ịnị ajẹngụ ọnịị̄ ra hụrẹ aha ọnya naa ngụ aha ọsa nị.

⁶ Ọ kà, ọnịrị Anisirẹrị nịnị mẹ̀ hụrẹ aa zịịzị, ọnị ẹ yị họ̀ ọdọvịdị ọnyọọnyị ọnị ọnị nyị ka, sị ẹ vẹ dị ẹ̀ yị sị ọchị isida dà irehi yị ọnị da.

⁷ Avọọ ọ ka ọnị ọ̀ kà a yị Idevidi ozi ahụ anị ka ọnị, Ẹnẹyịmavara Ochẹtẹẹngụ ka, vi u wee sere atẹmẹ dị ọnị va sị wụ ka wa va vị ohinọyị aza anị Anisirẹrị nịnị nị.

⁸ Ẹnẹyịmavara kà aha tụra aha ọnị ụ nọ, vị ọnị ọnị yàa wụ ịrẹma. Dị ọnị dọ ọvịdị anị, dị ọnị hu ọnịvị awụ nịnị ẹtẹ yị wụ. Ọ kà ọnị vaa mẹ ka wa ngụrẹyị anka ohinọyị ene hu keekere ịnị ẹhẹ.

⁹ Ẹnẹyịmavara kà ọnị ọ raà nyị aha yị aza anị Anisirẹrị nịnị, ọnị ọ raà kụ wa ve hi ịzọọ ka ọ̀ vị eehi ẹnịnị, dị a sị e kuku zigi wa. Ọ kà aza edivi ẹ yị ma vana mẹ ehuna yị wa anka ẹ mẹ̀ mẹ wa ẹnịnị mẹ va ngụ ịzẹnị kẹnẹ.

¹⁰ Avọọ ọnịvị ẹnịnị ẹnẹnị mẹ vịdị ịị mẹ̀ ọnị mẹ hụrẹ nyị ohinọyị yị aza anị nị. Ẹnẹyịmavara kà ọnị ộ wo oto ka ọnị re vee hú ọnịvị awụ nịnị ẹtẹ yị wụ, dị ọnị mẹ ka wa ma ezi gwẹtẹ.

¹¹ Ịjị wèe wusu, dị ụ zị và ka ohiku awụ nịnị na nị, ọnị vaa sị ozi ewu ọnya rị ohinọyị, dị ohinọyị anị nyị ụkata.

¹² Ọ kà ozi ewu ọnọọ ọ vaa dà irehii yị ọnị nị. Ọnị vaa mẹ ka ịpa ezi anị ẹẹ rị ohinọyị pooro zịna-zịna.

¹³ Ẹnẹyịmavara kà ọnị vaa vị ada anị, dị ọ vị ozi anị. Ọnị ẹ yị vaa và ịrẹma anị anka ọnị mẹ̀ và ịrẹma Ịsọọrụ, ọ ka ọnị ọ hụrẹ Ịsọọrụ ka a sị ọ kụkụ rị ohinọyị nị.

¹⁴ Ẹnẹyịmavara kà ọnị vaa sị aza anịị chire e ụvọ, dị aà mẹ ohinọyị yị aza anị pooro zịna. Ọnị vaa mẹ ka ezi anị ẹ̀ẹ rị ohinọyị pooro.

¹⁵ Dị Ịnatanị vavọọ na ka avaba ịrẹyị oni Ohomorihi maanị sị zụ̀ ọ aanị yị Idevidi nị.

Aduwa oni Idevidi mẹ

¹⁶ Idevidi ộ ngụ ịnị ajẹngụ ọnị Ẹnẹyịmavara yà, dị ọ yaatụ dị ọ mẹ̀ aduwa ka, Ẹnẹyịmavara Ohomorihi, ọnịrị ovwoovu anị ẹ yị hwọọ ọnị ọọ mẹ avaba ịsa ọnị ọ mẹ aanịị yị.

¹⁷ Ama dị ọ kụkụ aà yịị mẹ̀ ẹ tụ ọ hu avọọ nị. Ọ kà Ohomorihi ọ sị ọ ka ịsị ọ́ vaa mẹẹ yị ezi anị ịnị ụmẹ ana aa vẹ. Dị Ẹnẹyịmavara Ohomorihi aa sị eyi ọza okumi-okumii re ọnị nị.

¹⁸ Idevidi ka, sị ọnị kụkụ zụ kà da, ọ ka Ohomorihi ộ yẹ ẹngụ ọza ọnị ọnị vị, ama dị ọ maanị yị sị ụbanyị yị ọnị ozi ahụ anị nị.

¹⁹ Ọ kà Ohomorihi me sì ọ, ọ́ mẹ hi ọnị aanị nị, dị ọ sị zụ ọnị ka ọnị vaa banyị ụhwọọ nị.

²⁰ Ẹnẹyịmavara, ẹ ị nyị ọza anka ẹngụ awụ. Ọ kà o sị ku ẹnẹ ẹnị hụrẹ yẹ ka ọnị ịnya ọ vị Ohomorihi nị.

²¹ Idevidi ka ẹ yị nyị anẹkụra ọsa ịrẹsụ ẹtẹ anka Anisirẹrị nịnị. Ẹnị ịnya kẹnẹ Ohomorihi dọha ka a sị ẹ kụkụ vị ọrịhị, dị ọ́ mẹ wa ka ẹ̀ vị aza anị nị. Ịtọmatapa ọbanyị ọnị ọ mẹ yị wa ộ mẹ̀ ka ịrẹyị Ohomorihi ọ̀ ngụrẹyị ngụ avaba ẹhẹ zịịzị. Ọ kà Ohomorihi ọ̀ dọ wa hụrẹ Anijipiti nịnị ụvọ dị ọ dụ anẹkụra ana vọ kwooze aza anị màa vẹ nị.

²² Ọ kà ọ sị Anisirẹrị nịnị mẹ ka ẹ̀ vị aza anị pooro zịna, dị Ẹnẹyịmavara kụkụ vị Ohomorihi ẹnịnị nị.

²³ Idevidi ka, aarịhịnị, Ẹnẹyịmavara ọ̀ navọ ọ̀ mẹ avaba ịsa ọ kà a ka ọnị vaa mẹẹ yị ọnịrị ezi anị pooro aanị o. Ọ̀ ka ọ̀ navọ ọ̀ mẹ̀ ịsa ọ ka ọnị vaa mẹ de.

²⁴ Ọ kà Ẹnẹyịmavara vaa daa ngụrẹyị kẹnẹ, dị avaba aza aa kà a pooro ka Ẹnẹyịmavara Ochẹtẹẹngụ ọ vị Ohomorihi Anisirẹrị nịnị nị. Ọnị ọ ka ọnị vee sere ezi anị yị ọnị nị.

²⁵ Ọtụtụrụma ọnị aà sịị mẹ̀ aduwa ọnọnịị hi Ohomorihi aanị nị, agụvị ka ọ raà sị avaba ịsa ọnọnị zụ ọnị, ozi ahụ anị. Dị Ohomorihi sị ọ kà ka ọnị vaa sị ezi anịị rị ohinọyị nị.

²⁶ Ọ kà Ẹnẹyịmavara, ọ vị Ohomorihi nị. Ọnị ọ kà a ka ọnị vaa mẹ̀ ịsa ọyịza-ọyịza ẹnẹnịị yị ọnị ozi ahụ anị nị.

²⁷ Ọ kà ọnị aa mẹ̀ aduwa ka Ohomorihi ọ̀ mẹ ọyịza yị ezi anị, dị ẹnịnị ẹ̀ vaa rị aha anị pooro. Ọ́ sị ọyịza mẹ yị wa, avọọ ọ mẹ vaa mẹ ọyịzaa yị ẹnị ana vọ pooro zịna-zịna nị.