1 Ịtọpa 16 - IWE ỌNỊNỊ

 sị apoti oto tụ́ ịnị ajẹngụ

¹ Ịjị ẹ raà sị apoti oto ọnọnị vẹ, dị ẹ sị ọ na tụ ịnị ajẹngụ ọnị Idevidi mẹ tịtẹ yọ nị. Ẹnịnị ệ mẹ̀ ịsọvọ ana aā rị ịra ọnịrị ịsọvọ ọ̀yị pe Ohomorihi mẹ uzee hi Ohomorihi ịzọọ.

² Ídevidi mẹ̀ sị ịsọvọ ẹnẹnị mẹ ta, dị ọ mẹ̀ aduwa yị avaba aza ana gụ ịnị ịrẹha Ẹnẹyịmavara nị.

³ Ọ́ mẹ̀ sị aduwa mẹ̀, dị ọ gà ụbụrẹẹdị vaka akara idevina ọnịrị uye ene e wu yị Anisirẹrị nịnị ikonya-ikonya nị; anọrụ ọnịrị anẹẹ.

⁴ Idevidi ộ nyị Anireevi ẹnyị ka ẹ̀ kụ aza hẹkẹ Ẹnẹyịmavara, Ohomorihi Anisirẹrị ọvịdị apoti oto ịzọọ. Ọ kà ẹnịnị ẹẹ mẹ̀ aduwa, ẹẹ jị ahẹ, dị ẹẹ sị ụgaa yọ.

⁵ Ọ nyị Asahwi ka ọ̀ vị ohirẹsụ ẹnịnị, Ịzakaraya ọ̀ vị ọgwọhụva anị beri ẹnị ana vọ: Ịjeyiyẹrị, Isemiramọtị, Ijehiyẹrị, Imatitiya, Eriyabi, Ịbẹnaya, Obẹdị-Edomi, ọnịrị Ijeyẹrị. Ẹnịnị vị ana a ka ee hú igita irenyi-irenyi, dị Asahwi ọọ kụ́ ịchachaa nya ẹngụ.

⁶ Ohirẹsụ Irehi Ohomorihi ẹnẹnị: Ịbẹnaya ọnịrị Ijahaziyẹrị vị ana a ka ee hú ịkakanchị pooro kẹnẹ ọvịdị apoti oto.

⁷ Ịhị ọnọọ ọ vị ịpaapa ọnị Idevidi nyị Asahwi ọnịrị anda ẹnịnị Anireevi ana vọ ka ẹnịnị ẹẹ jị ahẹ, dị ee gono Ẹnẹyịmavara nị.

Ahẹ ene si gono Ohomorihi

⁸ Waa kụ́ Ẹnẹyịmavara avọ, dị waa kà ịrẹkụkụ anị nịnị, waa kà ịsa ọnị ọ mẹ yị aza nịnị.

⁹ Waa jị ahẹ gono o nịnị, waa kà ịtọmatapa ọnị ọ mẹ yị aza nịnị.

¹⁰ Waa jẹ nịnị ka yâ vị aza anị nịnị. Avaba aza ana aa hẹkẹ Ẹnẹyịmavara ẹ̀ẹ jẹ.

¹¹ We nee tu Ẹnẹyịmavara kà ọ̀ gụ wụ nịnị ụvọ, dị waa hẹkẹ ẹ nịnị pooro.

¹² Tamayị ụkọrọ ịvọpa ọnị Ohomorihi mẹ nịnị, ịvọpa ọnị ọ mẹ, ọnịrị ọ mẹ mẹ jị ịvị yị aza.

¹³ Ẹwụ nịnị ezi Abụrahamị, ozi ahụ Ohomorihi; ẹwụ nịnị ezi Ijekọvụ, ẹwụ nịnị ọnị ọ nyị.

¹⁴ Ẹnẹyịmavara ọ vị Ohomorihi ayị nị, ọda anị vị ọnị ọ mẹ yị avaba anẹhẹ.

¹⁵ Ộ tamayị ịrẹyị ọnị ọ ka tịtẹ ka ọnị vaa mẹ. Ịrẹyị o mē jesi pooro. Ịrẹyị ọnọọ vana jẹẹ yi ezi ịrẹma-ịrẹma ana vanaa vẹ.

¹⁶ Ịrẹyị ọnọọ vị ọnị ọ vịdị kà yị Abụrahamị, dị ọ rẹ hị́ eku anị yị Ayiziiki ka ọnị vaa mẹ̀ ẹ nị.

¹⁷ Ộ vana tenyi ahụ ịrẹyị ọnọọ jẹẹ yị Ijekọvụ, dị ọ mẹ̀ ẹ ọda ka Anisirẹrị nịnị ẹ̀ sị eyi pe e pooro zịna-zịna nị.

¹⁸ Ộ kà a yị wa ka ẹnị ọnị vaa sị ẹtẹ Ikenanii yị nị, dị ahịka ẹnị ẹ kụkụ nyị ịzọọ nị.

¹⁹ Anisirẹrị nịnị vịdị aa chee aanị, ẹ yị nyị ẹ yà, dị ahịka azọga ẹ vị̀ hi ịzọọ ụmẹ ọnọọ nị.

²⁰ Ẹnịnị vị anaa ngụ ẹkụraa zị. Ẹnịnị vị anaā hụụnị ẹtẹ ọnyị naa ngụ ịnị ẹtẹ ọsa.

²¹ Ohomorihi ọ yị zẹẹ ka ọza ọnyọọnyị ọ̀ mẹ ehuna yị wa. Ộ hụ ụvị ẹnịnị kà ohinọyị ọ̀nọ̀ ka:

²² asị ẹ sị ụvọ kanyị aza anị. Ọ rẹ ka asị a nyị ịsị ẹ sị mẹ ọnịsẹ anị o.

²³ Avaba ẹwụ nịnị anẹhẹ, waa jị ahẹ gono Ẹnẹyịmavara nịnị. Waa kà a nịnị eyinị-eyinị ịsị ọyịza ọnị ọ mẹ. Waa kà a nịnị ka ọ sị yị dọha.

²⁴ Wàa yà ịnị akakana anẹhẹ, waa kà ịrẹyị ụbanyị anị nịnị ọnịrị ịtọmatapa ọnị ọọ̄ mẹ̀.

²⁵ Ẹnẹyịmavara ộ banyị, ọnị a vọrọ ka àa kụ́ avọ nị, ọnị a vọrọ ka aza ẹ̀ẹ sị ụbanyịị yị huna avaba ori nị.

²⁶ Avaba ori anẹhẹ nịnị vị ọchị kẹnẹ ana a bẹ, ama Ẹnẹyịmavara ọ mẹ ẹbẹẹba nị.

²⁷ Ẹnẹyịmavara vị ana nyayịnẹ nyị ụbanyị; avọọ ụkata ọnịrị ayohine me hi ini irehi anị nị.

²⁸ Ẹwụ nịnị aza, waa sị ụbanyịị yị Ẹnẹyịmavara, dị waa kà a ọ mẹmẹ nyị ụkata nịnị.

²⁹ Wàa wụ́ ịrẹha Ẹnẹyịmavara, waa sị ụbanyị ana vọrọ tụra a yọ nịnị. Sị ịsa va mẹ̀ ẹ ẹyịza ịnị ohweje anị nịnị. Tana tụra ẹtẹ dị waa kụ́ Ẹnẹyịmavara nịnị anka ọ mẹmẹ nyị ụbanyị.

³⁰ Ẹwụ nịnị avaba anẹhẹ òo hí angwa anị ẹtẹẹtẹrẹ. Ọ raà sị ẹhẹ jẹẹ nganganga, o yi zụ henyi.

³¹ Ẹwụ nịnị ẹbẹẹba ọnịrị ẹtẹ ọ̀ọ jẹ. Waa kà a yị aza nịnị ka Ẹnẹyịmavara ọ vị ohinọyị nị.

³² Oku ọnịrị avaba ịsa ene hi ịnị anị èe nowu ịrajẹ. Ụnọmị ọnịrị avaba ịsị e hi ịnị anị ẹ̀ẹ mẹrị.

³³ Avaba ọchị ene hi ini iriku ẹnị ẹ̀ rẹẹ jị ahẹ. Ẹnịnị vavọọ vaa jị ahẹ ịrajẹẹ kụ Ẹnẹyịmavara, agụvị ka aa vẹ, dị ọ va mẹ̀ ọkarẹyị yị anẹhẹ nịnị.

³⁴ Waa kụ́ Ẹnẹyịmavara avọ agụvị ka ịsa ene zoza ọ́ọ mẹ nị. Vị oō sị ịrẹyị ọza pooro nị.

³⁵ Kà a yọ nịnị ka: Ẹwụ Ohomorihi ana aā dọ yịị ha, navọ wa dọ yị tụ́. Dị wa tọ̀ọ yị hụụnị avaba ẹkụra vabẹ, dị ya zụụ kụ́ wụ avọ, dị yaa ga wụ.

³⁶ À vẹ yaa kụ́ Ẹnẹyịmavara ana vị Ohomorihi Anisirẹrị. A vẹ yaa kụ́ avọ pooro zịna-zịna. Dị avaba aza ka, “Aamị”, à vẹ yaa kú Ẹnẹyịmavara nị.

 hẹkẹ Ohomorihi Ijerusarẹmị ọnịrị Igibiyọnị.

³⁷ Ohinọyị Idevidi ộ nyị Asahwi ọnịrị anda ẹnịnị Anireevi ka ẹẹ kụ azaa mẹ ahẹkẹ ịzị a sị apoti oto tụ́ pooro. Ọ kà ẹnịnị vị ana vaa mẹ̀ ụkọrọ ẹnịnị eyinị-eyinị.

³⁸ Ộ rẹ nyị Obẹdị-Edomi ozi Ijedutuni ọnịrị anda ẹnịnị ẹnị ọ jị ẹẹva ha ịnị ẹtarẹwụ (68) ka ẹẹ gụ wa ụvọ. Â nyị ọnọrụ ana aā hị́ Ihosa ọnịrị Obẹdị-Edomi a ka ee sere oze ọbanyị-ọbanyị ene hi ịzọọ nị.

³⁹ Ama Ịzadọkị, ohirẹsụ irehi Ohomorihi ọnịrị anda ẹnịnị ohirẹsụ irehi Ohomorihi ana vọ ẹ sị eyi pe ahẹkẹ Ohomorihi ana aa mẹ Igibiyọnị nị.

⁴⁰ Ẹnị a ka ẹẹ rị ịsa ịsọvọ ịra ịrẹsụ ụta ịsọvọ ẹnẹnẹ-ẹnẹnẹ ọnịrị oruva-oruva. Ẹnịnị ẹ̀ vavọọ mẹ̀ ẹ anka avaba ịsa ana chẹrẹ tụ ịnị ọda ọnị Ẹnẹyịmavara sị yị Anisirẹrị nịnị.

⁴¹ Â nyị Ihemani ọnịrị Ijedutuni ẹnịrị aza ana vọ ka ẹẹ jị ahẹ gono Ẹnẹyịmavara agụvị ka vị oō sì ịrẹyị ọza pooro nị.

⁴² Ihemani ọnịrị Ijedutuni a ka ẹ̀ rẹ sị eyi pe ịkakanchị ọnịrị ịchacha ana aa kụ́ụ nya ẹngụ, beri ẹnya aahẹ ana vọ ene eē hú àa maanị aa jị ahẹ gono Ẹnẹyịmavara nị. Ẹnị ezi Ijedutuni a ka èe sere oze ọbanyị nịnị nị.

⁴³ Avaba aza ê hụụ ịzọọ, dị ọzọza và nọ ini eehi anị nị. Idevidi ọnị ọ rẹ và nọ ini eehi anị, dị ọ na mẹ̀ aduwa yị ovwoovu anị nị.