1 Ịtọpa 14 - IWE ỌNỊNỊ

Ịsị Idevidi mẹ Íjerusarẹmị

¹ Â nyị ụmẹ ọnya, dị Ihurami ohinọyị Ịtaya tụ ọnụtụ anị nịnị ve tu Idevidi nị. Ộ kụ ọchị isida, dị ọ rẹ kụ aza anaā sịị ịrẹtaa tụra irehi ọnịrị Ikahunta nịnị ve tu Idevidi ka ẹ̀ va da irehi yọ nị.

² Ọsọnị ộ mẹ̀ ka Idevidi ọ̀ yẹ́ ka vị́ Ẹnẹyịmavara ra sị ọnị yaatụ ka ọnị ọ̀ vị ohinọyị Anisirẹrị nịnị aanị nị. Dị ọ rẹ sị yẹ ka Ohomorihi ộ hụ agụvị aza anị Anisirẹrị nịnị sị nyima aa mẹ ka oo zee yị ọnị anka ohinọyị nị.

³ Idevidi ộ yà Ijerusarẹmị ịzọọ nyị ọnẹẹ hu avọọ, dị ọ mà ezi ọnọrụ ọnịrị anẹẹ tụ́ ọ nị.

⁴ Ịrẹha ezi ọnị ọ vana ma Íjerusarẹmị yị: Ịsamuwa, Isobabi, Ịnatanị, Isoromọnị,

⁵ Ibiha, Erisuwa, Eripereti,

⁶ Inoga, Ịnẹhwẹgị, Ịjahwịya, Erisama, Ibeeriyada

⁷ ọnịrị Erihwẹrẹtị.

Idevidi ộ nyị ẹbẹẹba Anihwirisiti nịnị

⁸ Ịjị Anihwirisiti nịnị wụ ka á raà sị Idevidi rị ohinọyị avaba ẹtẹ Isirẹrị, dị avaba isoja ẹnịnị kụ ẹnya ka ẹnị aa naa za a nị. Idevidi ộ wụ ọ, dị ọ́ kụ ẹnya ịrẹkụ anị aa na gẹrị wa nị.

⁹ Anihwirisiti nịnị ệ va ngụ inozi ịzị aā hị́ Irehwayimi, dị ẹyaa kụ́ wa ẹnya nị.

¹⁰ Dị Idevidi ộ họ̀ Ohomorihi ka: ọnị ọ̀ọ kụ́ ịrẹkụ ne tu Anihwirisiti nịnị, ọ́ọ́ vaa sị ọnị nyị ẹbẹẹba? Dị Ẹnẹyịmavara tụ́ ọ ohi ka, ọ̀ kụ́ ịrẹkụ ne tu wa ka ọnị vaa sị ọ nyị ẹbẹẹba nị.

¹¹ Ịzẹyịza, dị Idevidi kụ ịrẹkụ ne tu wa ịzị aā hị́ Ịbaarị-Iperazimi, dị ọ nyị ẹbẹẹba ẹnịnị nị. Dị Idevidi ka Ohomorihi ọ́ raà sị ọnị gara ọnịvị anị ha anka ọhaara enyi mẹẹ̄ kụ́ ịsa avọọ. Avọọ, dị a kụkụ aa hị́ ịzọọ Ịbaarị-Iperazimi nị.

¹² Ịjị Anihwirisiti nịnị ee zwè, ori ẹnịnị vị ẹnị ẹ vana hụrẹ ụvọ hị́ ẹtẹ, di Idevidi mẹ ọda ka à rị wa ịra, dị a rị wa ịra nị.

¹³ O nee kù chee, dị Anihwirisiti nịnị rẹ kụ ịrẹkụ vavẹ inozi ịzọọ, dị ẹ́ rẹ vaa kụ wa ẹnya nị.

¹⁴ Idevidi ộ rẹ varẹma na họ̀ Ohomorihi ka sị ọnị ọ̀ọ mẹ. Dị Ohomorihi kà a yị ọ ka, a sị ọ yà ịzọọ kụ́ ịrẹkụ ne tu wa. Ama ò jesi kara ẹtẹ na ngụ ọ̀ sị gụrị ọchị ana aā hị́ Ịbarịsamị. Òo tu ịzọọ, dị ọ̀ kwẹẹtẹ tu wa nị.

¹⁵ Ohomorihi ka Ịjị Idevidi àaa wụ́ ahụụ ịrẹyị ịrẹsụ ọchị Ịbarịsamị ọnọọ, ọ̀ kụ́ ịrẹkụ ne tu wa ọgọnị; agụvị ka ọnị Ohomorihi ọ vaa tụ ọvịdị Idevidi, nee hú isoja Anihwirisiti nịnị ẹtẹ nị.

¹⁶ Idevidi ọ́ mẹ ịsị Ohomorihi kà yọ, agụvị avọọ dị ẹnịnị dụ isoja Anihwirisiti nịnị hụrị Igibiyọnị huuu na ngụ ẹtẹ Ịgẹzẹrị nị.

¹⁷ Ịrẹyị Idevidi ộ ngụrẹyị na ngụ avaba aha, dị Ẹnẹyịmavara mẹ ka avaba anẹkụra nịnị ee hí angwa Idevidi nị.