1 Ịtọpa 12 - IWE ỌNỊNỊ

Aza ene jintu saasa Idevidi ini Ezi Ịbẹnjamịnị

¹ Idevidi ộ ra ịzị aā hị́ Izikiragi. Ịzọọ o zwe na tẹ̀ agụvị ohinọyị Ịsọọrụ ozi Ikisi nị. Â nyị isoja ọkọọka ana na yà ịzọọ pe e.

² Isoja ẹnẹnị vị ana hụrẹ ovwoovu Ịbẹnjamịnị. Ẹnịnị vị anda Ịsọọrụ. Ẹnịnị ẹ zụ́ sị ụvọrị àa vị ụvọha ne ọpa ọnịrị ịrẹta.

³ Â nyị ọnọrụ ana aā hị́ Ahiyẹza. Ọnị ọ vị ohirẹsụ ẹnịnị nị, dị ọnọrụ ana aā hị́ Ijowasi và tụra a nị. Ẹnị ẹyịva vị ezi Ịsẹmaa ana vị Anigibiya; Ẹnị ana vọ ẹ vị Ijeziyẹrị ọnịrị Ịpẹrẹtị ana vị ezi Azimaveti; Iberaka, ọnịrị Ijehu ana vi Anatọtị.

⁴ Isimaya ana vị Anigibiyọnị; ộ nyị ụkata ẹtẹẹtẹrẹ ịnị ẹnị isoja ohurẹẹwụ ẹnẹẹ, dị ọ́ rẹ vị ọdọvịdị ẹnịnị nị. Ijeremaya, Ijahaziyẹrị, Ijohananị ọnịrị Ijozabadi ana vị Anịgẹdẹra.

⁵ Eruzayi, Ijerimoti, Ibiyariya, Ịsẹmarịya, ọnịrị Ịsẹhwatịya ana vị Aniharuhwi.

⁶ Ẹrịkana, Isihiya, Azarẹrị, Ijoweza, ọnịrị Ijahobiyami. Ẹnịnị vị Anikora.

⁷ Ijowẹra ọnịrị Ịzẹbadịya, ezi Ijerohami ana vị Anịgẹdọ.

Anigadi ana saasa Idevidi

⁸ Â nyị ẹnị isoja ohi-ohi ana yara kụ́ ịrẹkụ ẹtẹẹtẹrẹ ana hụụnị ovwoovu Igadi na yà pe Idevidi ịzị ọ tẹ̀ ịnị ụnọmị. Ọka ẹ vị ịnị ogonto ọnịrị ọha ọ̀ yị sị kụ ịrẹkụ nị. Eyirẹsụ ẹnịnị vị ana sị mẹẹ anka idu avọọ. Ẹnịnị ệ rẹ́ anka akọnọ ịrẹsụ ataba.

⁹ Ezeri ọ vị ohirẹsụ ẹnịnị nị. Ọbadaya ọ vị ọgwọhụva anị nị, dị Eriyavị vị ọgwọhụta nị.

¹⁰ Imisimana vị ọgwọhụna dị Ijeremaya vị ọgwọhụhị nị.

¹¹ Atayi vị ọgwọhụhịnọnyị, dị Eriyẹrị vị ọgwọhụhịmba nị.

¹² Ijohananị vị ọgwọhụhịnta, dị Erizabadi vị ọgwọhụhịịna nị.

¹³ Ijeremaya ọ tụ́ ọ ẹẹwụ nị, dị Ịmakịbanayị ọ tụ́ ọ ẹwụrọnya nị.

¹⁴ Avaba Anovwoovu Igadi ẹnẹnị vị ọdọvịdị ịnị isoja ẹnịnị. Ẹnị ẹnị udi anị ẹ̀ẹ yị vavọọ ka hịrẹ vị ana sị eyi pe isoja ẹchẹhị-ẹchẹhị, dị ẹnị ẹnị udi ẹnịnị sị ka hịrẹ si eyi pe isoja akahị-akahị nị.

¹⁵ Aza ẹnẹnị ẹ jịnẹ okuha Ijodani ịnị ụhwẹ ịpaapa nị. Ụmẹ Ijodani o si hi, aa káa ha. Ẹnịnị ệ dụ aza ene hi inozi zi oze ọnị ọyịị̄ zị naa ngụ ẹtẹ.

Anịbẹnjamịnị ọnịrị Anijuda ana saasa Idevidi

¹⁶ Â nyị aza ẹnyị hụụnị ovwoovu Ịbẹnjamịnị ọnịrị ovwoovu Ijuda ene ve tu Idevidi ịzị ọ na tẹ̀.

¹⁷ Idevidi ộ na gẹrị wa, dị ọ kà a yị wa ka, àa vị ẹ vẹ ka ẹnị è ve pe ọnị za ọta dị ẹnị ẹ̀ gụ ọnị ụvọ nị, ẹnịnị ẹ̀ nyaasẹ. Ama àa vị ẹ vẹ ka ẹnị ẹ̀ va kụ́ ọnị ahụ yị ọnịvị anị nịnị, Ohomorihi ohiku ộ yẹ. Ọ vaa sị ụyaa rị wa, ka ọnị ẹ yị mẹ wa ọhịmị.

¹⁸ Dị ụhwẹ Ohomorihi dọ Amazayị ana vị ohirẹsụ isoja ohurẹẹwụ ẹnẹẹ ayị nị. Dị ọ kà yị Idevidi ozi Ijeese ka, aanị ẹnị vị nị, ẹnị jẹẹ ịrẹma anị nị. Ẹngwọọrọ ọ vaa vị yọ nị, dị ọ vị ẹngwọọrọ yị aza ana àa gụ ọ ụvọ nị. Agụvị ka Ohomorihi aa gụ ọ ụvọ nị. Dị Idevidi dọ wa vaka ẹngụ dị ọ mẹ wa ọdọvịdị isoja anị nịnị nị.

Animanasẹ ana saasa Idevidi

¹⁹ Aza ẹnyị ini ovwoovu Ịmanasẹ ê zwe và ka Idevidi na. Ụmẹ ọnọọ Idevidi saasa Anihwirisiti nịnị vẹ ịrẹkụ Ịsọọrụ nị. Ama Idevidi ẹ yị rẹ và kụ ịrẹkụ yị Anihwirisiti nịnị. Ọdọvịdị ẹnịnị e geyi dị ẹ ka Idevidi ọ̀ varẹma nị. Ẹ ka Idevidi ọ zụ́ vàka ọga anị na, dị ọ kụ ẹnị ahụ yọ. Agụvị avọọ, dị ẹ ka, ọ̀ varẹma ọọ nọ ịzị aā hị́ Izikiragi nị.

²⁰ Isoja Anịmanasẹ ẹnẹnị e zwe saasa Idevidi ọ mẹ̀ varẹma aa na nị: Adina, Ijozabadi, Ijediyayeri, Ịmayịkẹẹrị, Ijozabadi ọsa, Erihu, ọnịrị Iziretayị. Ẹ́ mẹ̀ yà Ịmanasẹ, ẹnịnị vị ana sị eyi pe isoja akahị-akahị.

²¹ Idevidi ộ nyị wa mẹ ọdọvịdị isoja anị nịnị, agụvị ka ẹnịnị vị isoja ọkọọka. Ẹnịnị ệ vana yị vị ọdọvịdị isoja Anisirẹrị nịnị.

²² Eyinị-eyinị aza ọwọọwa aa sị vaa ngụ ini isoja Idevidi nị. É yi kù dị isoja anị ta rụrụ tatarata.

Ịrẹha aza ene hi ini isoja Idevidi

²³ Ịrịka uche isoja ẹnẹnị ê vee tụ Idevidi Ihebirọnị nị. Ẹnịnị ệ gụ Idevidi ụvọ ka ọ̀ rị ohinọyị tụ́ udi Ịsọọrụ anka Ẹnẹyịmavara mẹ wo oto o yọ.

²⁴ Hụrẹ ovwoovu Ijuda: aza ẹnị akawụ-akawụ oze ẹẹta tụra akana (6,800). Ẹnịnị vị aza ana yara sị ogonto ọnịrị ọha kụ́ ịrẹkụ ẹtẹẹrẹ.

²⁵ Hụrẹ ovwoovu Isimiyọnị: aza ẹnị akawụ-akawụ oze ẹẹta tụra akahị rị ẹchẹhị. Ẹnịnị vị isoja ana yẹ eyirẹkụ ẹtẹẹrẹ (7,100).

²⁶ Hụụ ịdị Anireevi nịnị: aza ẹnị akawụ-akawụ oze ẹẹva tụra akata (4,600)

²⁷ Ijehoyada ana hụrẹ ovwoovu Eerọnị ọnịrị ezirẹma anị vị ẹnị akawụ rị akahị tụra akatarẹchẹhị (3,700).

²⁸ Ozwọọmụha ọnya ana yara kụ ịrẹkụ ẹtẹẹrẹ. Ịrẹha anị ọ rị Ịzadọkị nị. Ọnịrị ọdọvịdị isoja ohurẹẹva hụrị eehi ada anị ẹ yà ini isoja Idevidi nị.

²⁹ Anda Ịsọọrụ hụrẹ ovwoovu Ịbẹnjamịnị vị ẹnị akawụ rị akahị (3,000). Anịbẹnjamịnị ọrụrụ-ọrụrụ vị ana yị vị aza Ịsọọrụ.

³⁰ Hụrẹ ovwoovu Ehwireemi: Aza ẹnị akawụ-akawụ oze ẹẹwụ tụra akana (20,800). Avaba ẹnịnị vị aza ọkọọka ịnị ịrẹkụ, dị eyi yẹ wa ini ovwoovu ẹnịnị nị.

³¹ Hụụ ịdị achẹva ezi Ịmanasẹ: Aza ẹnị akawụ-akawụ oze ịhịịna. Avaba ẹnịnị vị ana a hị́ ka ẹ̀ va sị Idevidi rị ohinọyị.

³² Hụụ ịdị ezi Iisaka: Aza ohi-ohi ịrẹka (200), beri avaba anda ẹnịnị ana a kụ́ chire wa ụvọ. Ezi Iisaka vị aza ana yẹ ụmẹ, dị ẹ yẹ ịsị a vọrọ ka Anisirẹrị nịnị ẹ̀ mẹ.

³³ Hụụ ịdị Anizeburuni nịnị: Aza ẹnị akawụ-akawụ oze ohurẹẹhị (50,000). Ẹnịnị vị akoyina aza. Ệ nyị avaba ẹnya ịrẹkụ ẹnẹ ẹ kụ ọ̀yị sị ayị ọnya gụ Idevidi ụvọ.

³⁴ Aza ana hụrẹ ovwoovu Inahwitari vị ẹnị ọdọvịdị isoja, ẹchẹhị beri aza ẹnị akawụ-akawụ oze ẹwụrịhịnta tụra akahị (37,000) Avaba ẹnịnị vị ana za ogonto ọnịrị ọha.

³⁵ Aza ana hụụ ịdị Ezi Ịdaanị vị ẹnị akawụ-akawụ oze ẹwụrẹna (28,000). Avaba ẹnịnị vị ene tenyi ẹngụ ịrẹkụ.

³⁶ Aza ana hụrẹ ovwoovu Aseri vị ẹnị akawụ-akawụ oze oohu (40,000). Avaba ẹnịnị vị isoja akoyina-akoyina ene tenyi ẹngụ ịrẹkụ.

³⁷ Aza ana hụụ idi ezi Irubẹnị, ọnịrị ezi Igadi beri achẹva Anịmanasẹ ene hi akẹnẹ Okuha Ijodani eyi ọsọọ vị ẹnị akawụ-akawụ oze ẹbẹẹta. Avaba ẹnịnị vị ana za ẹnya ịrẹkụ obooro.

³⁸ Avaba aza ana maanị tenyi ẹngụ ịrẹkụ aanị ệ vẹ Ihebirọnị ka ẹnị ẹ̀ va sị Idevidi rị ohinọyị avaba Anisirẹrị. Avọọ gẹdẹ-gẹdẹ avaba Anisirẹrị ana vọ mẹ̀ sị ayị ọnya sị ọ ka, ẹnị aà sị Idevidi rị ohinọyị nị.

³⁹ Ẹnịnị ệ yà ịzọọ pe Idevidi mẹ ẹkụhị ẹẹta. Dị ẹyaa rị dị eyee hú nị, agụvị ka anda ẹnịnị ệ mẹ̀ ịsa tẹ wa.

⁴⁰ Ọnọhụva ẹnịnị hụụ idi ezi Iisaka ọnịrị Anizeburuni, hùuu na ngụ idi ezi Inahwitari ệ kụ ịsọyịrị vẹ. Ẹnịnị vị ana kụ ịsa ẹnẹẹ tụra ịkẹrịkẹtẹ, ọnịrị ịnyaakụmị beri ezi ụnọ ọnịrị tụra ụnọ ana ta hụ. Ịsọyịrị irenyi-irenyi vị ẹnẹ ẹ kụ́ vẹ hyọvọ-hyọvọ. Ệ kụ́ eche ọnịrị angwẹ beri ụnọ ọnịrị atẹmẹ nịnị vẹ agụvị ka ayị avaba Anisirẹrị ee hine.