1 Ịtọpa 10 - IWE ỌNỊNỊ

Isu ohinọyị Ịsọọrụ

¹ Â nyị ụmẹ ọnya ana Anihwirisiti nịnị ẹnịrị Anisirẹrị nịnị sị kụ́ ịrẹkụ ịrẹsụ ataba Igiribowa. Â wụ Anisirẹrị nịnị ọrụrụ-ọrụrụ ịzọọ, dị ẹnị ana vọ zwè nị.

² Ama dị Anihwirisiti nịnị kú chire Ịsọọrụ ọnịrị ezi anị, dị ẹ za wa, dị ẹ wụ̀ wa nị. Ịrẹha ezi ẹnẹẹ vị Ijonatani, Abinadabi, ọnịrị Imarichisuwa nị.

³ Ịrẹkụ ọnọọ ộ ta hịrẹ ẹtẹ kara Ịsọọrụ, dị e che e ọpa ana tọ ụnava divi-divi nị.

⁴ Ịsọọrụ ộ kà a yị ozwọọmụha ana kụ ẹnya ịrẹkụ anị gụ ọ ka, ọ̀ tụ̀ ụhwọ dị ọ̀ wụ ọnị. Ọ kà ọnị ée sì ka Anihwirisiti ẹnẹ ẹ̀ yị yẹ Ohomorihi aanị, ẹ̀ va wụ ọnị, dị è ve sii wo oto. Ama dị ivovo si ozwọọmụha ọnọnị za nị. Dị Ịsọọrụ tụ̀ ụhwọ anị ụvọta, tụ̀ ụhwọ anị, dị ọ hyẹdụ nya a dị ọ wụ ẹngụ anị nị.

⁵ Ịjị ozwọọmụha ọnọnị re ka Ịsọọrụ óo wusu, dị ọnị rẹ hyẹdụ nya ụhwọ anị dị ọ wụ ẹngụ anị nị.

⁶ Avọọ Ịsọọrụ ọnịrị ezi ọnọrụ ẹyịta meme sú, dị ẹ̀ yị vana nyị ịpa anị ana vana rị ohinọyị nị.

⁷ Ịjị Anisirẹrị nịnị ana ra hi inozi Ijezirẹẹrị wụ ka isoja ẹnịnị ẹ si zwè, dị ẹ rẹ wụ ka Ịsọọrụ ọnịrị ezi anị ê wusu, dị ẹnịnị zwè hụrẹ ẹkụra ẹnịnị huu nị. Dị Anihwirisiti nịnị vẹ dị ẹ va ra ịzọọ nị.

⁸ Eyinẹhẹ ana maanị kụ̀ ịrẹkụ, dị Anihwirisiti nịnị ẹ na kụ avaba ẹnya aza ẹnẹ ẹ wụ nị. Ẹnịnị ê re oku Ịsọọrụ ọnịrị oku ezi anị ka e hi ẹtẹ ịrẹsụ ataba Igiribowa.

⁹ Dị ẹ jị Ịsọọrụ ịrẹsụ, dị ẹ ngwa a ẹnya ịrẹkụ anị nị. Ẹnịnị ệ tụ aza ka ẹ̀ na kà a avaba ẹtẹ Ihwirisiti yị ori ẹnịnị ẹnịrị aza ẹnịnị ịrẹyị ịrajẹ ọnọnị.

¹⁰ Ẹnịnị ệ sị ẹnya ịrẹkụ Ịsọọrụ na tụ ịnị irehi ori ẹnịnị ọnya, dị ẹ sị ịrẹsụ anị na gẹ ịnị irehi ori ẹnịnị ana aā hí Ịdagọnị nị.

¹¹ Ịjị aza ene hi ẹkụra ana aā hị́ Ijabesi ịnị ẹtẹ Anigiriyadi wụ́ ịsị Anihwirisiti mẹ Ịsọọrụ,

¹² dị ẹnị ana ayị anị vị hu keekere ne sị oku Ịsọọrụ ọnịrị oku ezi anị, dị ẹ kụ wa vẹ Ịjabẹsị nị. Ẹnịnị ê ne wa hi iruvo ọchị ana aā hị́ ooki, dị ẹ ba awẹ ẹkụhị ịhịmba yị wa nị.

¹³ Ịsọọrụ ẹ́ yị sị ịzẹyịza saasa Ẹnẹyịmavara ọ vị isu ịrẹsụ anị nị. Ẹ yị saasa ọda ọnị Ẹnẹyịmavara mẹ yọ; dị ahịka oku ene su ée nee họ̀ ka ọ̀ zụ̀ ọnị oze nị.

¹⁴ Ẹnẹyịmavara a vọrọ ka ọ̀ vavọọ naa họ̀ ka ọ̀ zụ̀ nị oze nị. Agụvị avọọ Ẹnẹyịmavara sị wụ ọ, dị ọ sị Idevidi ozi Ijeese ka ọ̀ kụkụ rị ohinọyị tụ ẹkụra anị nị.