1 Itimoti 5 - IWE ỌNỊNỊ

Ịsị a vọrọ ka a mẹ ka aza ana dọ wụ́

¹ Asị ụ na sị ọyịkụ tụ́ ọzọkụ ohuvọ! Ama tangwaa dá ịpẹẹ yọ anka ada awụ avọọ! Waa mẹẹ hi ọpa ezweyi anka ẹyịnyara awụ avọọ!

² Wa rẹẹ mẹẹ hi anẹẹ ana sị vịra anka ọnyị awụ avọọ, dụ wa rẹẹ mẹẹ hi anẹẹ ana vị ezweyi anka ẹyịnyara awụ ọnẹẹ avọọ! Waa mẹ̀ ebira ọnịnịị hi wa!

Ịrẹyị osoku nịnị ene hi ịnị ịragụ Ohomorihi

³ Osoku nịnị ana àa vị osoku obooro, re ka waa tẹsị ẹnịnị!

⁴ Osoku ana àa ma ozi, à vị ka dị ọ nyị aazị nị, áa vọrọ ka ezi ẹnẹẹ ẹ̀ vịdị tẹsị aneehi ẹnịnị, anka Óhomorihi mè sì ọọ. Avọọ ẹ mẹ̀ zụ mẹ sí aza ana ma wa ụta nị. Ịsị Ohomorihi sì ọ vị ọnọọ nị.

⁵ Ama ọnẹẹ ana àa vị osoku obooro, dị ọ̀ yị kụkụ nyị ọza vụrụ-vụrụ nị, vị ana kụkụ sị eyi tụra Ohomorihi kẹnẹ; dị aa mẹ̀ aduwa ọọdụ ọnịrị ịrahụ ka Ohomorihi ọ̀ọ gụ ọnị ụvọ.

⁶ Ama osoku ana ahịka ịsa ẹhẹ kẹnẹ ọ sị ayị tụ́ ịnị anị, óo wusu, vị ọ kụkụ yà ẹhẹ kẹnẹ nị.

⁷ Maanị mẹ ịrẹyị ẹnẹnị ọda yị wa, agụvị asị ẹ na nyị ohuvọ!

⁸ Ọza ẹnẹ ẹ̀yị mā tẹsị aza anị, hu keekere aneehi anị, ọ́ọ sị zụ̀ ka ọyị dọ Ohomorihi wụ́. Ọ́ọ hyakụ kuku divi huna ọza ẹnẹ ẹ̀ yị vị ọdọwụ.

⁹ Asị ụ dọ osoku tụ́ ini osoku nịnị, àyị vị ọ sị gụ ịrayị ẹbẹẹta (60), dị ahịka ụpẹ ọnya kẹnẹ ọ nyị ọnọrụ da nị.

¹⁰ Dị à va dọ osoku, a rẹ vọrọ ka aza ẹ̀ẹ kà ịrẹyị ọyịza anị, agụvị ka aa mẹ̀ ịsa ozoza. A rẹ vọrọ ka ọ̀ vị ọnẹẹ ana pá ezi anị ẹtẹẹtẹrẹ, dị ò reē sì ọzọga. A rẹ vọrọ ka ọ̀ vị ọza ana raà nyịna aza Ohomorihi ahụ da, dị ọ̀ vị ọza anaā mẹ ọgụvọọ yị aza ana aa rị ụya, dị ọ̀ rẹ vị ọza ana ahịka ịsa ozoza ọọ̄ mẹ̀ pooro nị.

¹¹ Asị ụ chẹrẹ ịrẹha ezweyi ana vị osoku nịnị tụ́ ọọ, agụvị ka Ịjị èe si nyima aa kụ̀ụ hịrẹ Ikirisiti, dị ẹ ka ẹnị aa naa nyị ọnọrụ.

¹² Ẹ̀ẹ vavọọ mẹ, dị ẹ sị ịvị rị, agụvị ka ẹ sị và hụụnị ịsa ẹnẹẹ vịdị dọ wụ́.

¹³ Ẹ yị vị avọọ kẹnẹ, dị ẹyaa nyị uworo, dị ẹ rẹ yaa ngụ irehi-irehii zị. Ene divi hu ọ vị ka, dị ẹ kụkụ aa kụ́ ọza ịrẹkaa zị, dị ẹyaa jị eyii ngụ ịnị ịrẹyị ọnịrẹyị, dị ẹ rẹ yaa kà ịsa ẹnẹ ẹ̀ yị vọrọ.

¹⁴ Agụvị avọọ, mị yaanị sì ka ezweyi ana àa vị osoku, ẹ̀ na nyị ọnọrụ ọsa, dị ẹ̀ ma ozi, dị ẹ̀ sị eyi pe irehi ẹnịnị, agụvị asị ẹ sị oze yị ọnịvị ka ọ̀ọ kà ịrẹyị odivi.

¹⁵ Osoku ẹnyị ẹ sị vara ezirẹma Echu da.

¹⁶ Àa nyị ọdọwụ ọnẹẹ ana nyị osoku nịnị tụ́ ini eehi, ọnị a vọrọ ka ọ̀ọ mẹ ọgụvọ yị wa nị. Asị ẹ kụkụ na vị ẹnya yị ịragụ Ohomorihi, agụvị ịragụ ọ̀ zụ gụ osoku obooro nịnị ụvọ!

Azọkụ ịragụ Ohomorihi

¹⁷ Azọkụ ịragụ Ohomorihi ana àa mẹ̀ ụkọrọ ẹtẹẹrẹ, vị ana a vọrọ ka à sị ụbanyị yị, dị à rẹẹ sị ịsaa yị wa; hu keekere, aza ana aa sịị vụrị ka ẹnị ẹ̀ẹ kà ịrẹyị Ohomorihi, dị ẹnị ẹ̀ rẹẹ zụ̀ aza ịsa.

¹⁸ Agụvị ka áa vịdị chẹrẹ ẹ tụ́ ini Iwe Ohomorihi ka, “Imaaru ana aa sịị mẹ̀ ụkọrọ ịnị aarẹ, ẹ yị vọrọ ka à sụ́ ọọ irenu.” A rẹ chẹrẹ ẹ ka, “Aa vọrọ ka ọnụkọrọ ọ̀ dọ ẹkẹhị ụkọrọ anị.”

¹⁹ Àa nyị ọzọkụ ana sị ịrẹyị anị va tụ́ wụ ịrẹka, àa yị vị onivenu gụ ẹẹva, gụ ẹẹta, asị ụ tụ́ ohi!

²⁰ Ọza ana àaa mẹ ịvị, tụ́ ọọ ohuvọ éyi avaba aza, agụvị angwa ò hí aza ana vọ.

²¹ Ohomorihi ọnịrị Ijeesu Ikirisiti beri anggẹẹrị nịnị ọnị ọ nyị ee ree aanị; mee hú wu ụvọ ka wa sị ụvọ za ịrẹyị ẹnẹnị ẹtẹẹtẹrẹ! Asị ụ nyị ọza remeyi ịnị ịsa ọnyọọnyị ọnị ụ wàaa mẹ.

²² Asị ụ há eyi sị ụvọ tụra ọza, dị ụ wa mẹ̀ aduwaa yọ. Asị ụ na bẹ tụ́ ịnị ịvị ọza ẹnẹsa! Re ka wáa nyị ayị ọnịnị!

²³ Asị u rè kuku hú enyi kẹnẹ, wee hú eche chee-chee aanị agụvị ịnẹ awụ ọnịrị ịsa, ẹnẹ ẹ̀yị mā jẹẹ dị ọ̀ zị wụ.

²⁴ Ịvị aza ẹnyị ẹ yị sị ẹngụ tẹ vụrụ-vụrụ, dị ọ za wa na ngụ ịnị ọkarẹyị. Ama ịvị aza ẹnyị vị ana vaa tụ́ ẹhẹ ị́rẹma ụhwọọ.

²⁵ Avọọ ụ́kọrọ ozoza ọnị ọ̀yị mẹ̀ rẹ zụ sị ẹngụ tẹ nị. Àa nyị ọnị ọza ọyị zụ re, ọyị vavọọ vaa tẹ pooro.