1 Itimoti 1 - IWE ỌNỊNỊ

Ụkụ

¹ Ẹma vị Ịpọọrụ ana vị odeyi Ijeesu Ikirisiti nị. Ohomorihi, Ọdọzaha ayị, ọnịrị Ijeesu Ikirisiti oni i sị eyi tụra, ọ mẹ ọda ka ma vị odeyi nị.

² Maa chẹrẹ iwe ọnọnịị tụ́ụ hi wu Itimoti, ana vị ozi emi ini oze ka ẹma sị ọọ vẹ ka ọ̀ va sị ayị tụra Ohomorihi nị. Ohomorihi Ada ayị ọnịrị Ijeesu Ikirisiti Ananyị yị ẹ̀ mẹ ọyịza wụ, ọ vayị awụ, dị ẹ̀ rẹ mẹ ẹngwọọrọ yị wụ.

Ịpọọrụ ọ́ọ kà Itimoti ọnọ agụvị onireche nịnị

³ Mee sì ka wa yị jẹẹ Ẹhwẹsọsị, anka m mẹ̀ vịdị kà a wụ, m màa parahuu nọ Imasedoniya. Aza hi ịzọọ ana aa sị ịsa irechee zụ̀ aza. Re ka wee hú wa ụvọ ka asị ẹ rẹ̀ vavọọ mẹ!

⁴ Rẹ kà a yị wa ka ẹ̀ và hụụnị ịtọpa kẹnẹ-kẹnẹ ọnịrị ịrẹha ohiku nịnị ọyịtara hi ẹtẹ pooro! Ahankata kẹnẹ ẹ́ngụ ẹnẹ ẹẹ̄ kụ́ụ vẹ nị. Ẹyị zẹẹ ka aza ẹ̀ sị ayị tụra Ohomorihi, dị Ohomorihi ọ̀ va mẹ ọgụvọ yị wa.

⁵ Iruvo ọnị maa sịị kà wụ ọnọ ọnọnị ọ vị ka ọ̀ mẹ ka anị ịzọọ ẹ̀ zụ nyị ịrẹyị ọza oyisì ana hụụnị ayị aza ana sị ayị tụra Ohomorihi obooro vẹ.

⁶ Aza ẹnyị ẹ sị há hụụnị oze ọnọọ, dị ẹ kụkụ aa nyị ahankata kẹnẹ-kẹnẹ nị.

⁷ Eyee sì ka ẹnị ẹ̀ vị aza anaā sịị ọda Ohomorihii zụ̀ aza. Ama ẹnị nyẹmba ẹ yị yẹ ịsị ẹyaa kà, ẹ yị hyakụ yẹ ịrẹyị ẹnẹ ẹyaa sị ụvọọ kanyị ịrachịị tụ́ ịnị anị.

⁸ Yáa yẹ ka ọda óo zoza, àa sị mẹ̀ ịsa a mẹ̀ vọrọ.

⁹ Ama à vẹ ya tamayị ka Ohomorihi ọyị hụ agụvị aza ana aa mẹ̀ ịsa ana vọrọọ mẹ ọda. Ọda vị ọnị ọ mẹ agụvị aza anaā jịnẹ ọda, ọnịrị anakamawụ. Ọ rẹ mẹ ọda agụvị aza ẹnẹ ẹ̀yị yẹ Ohomorihi ọnịrị ọnịvị nịnị beri aza ẹnẹ ẹ̀yị nyị ebira ọnịnị. Ọ rẹ mẹẹ agụvị aza anaā mẹ̀ ebira kẹnẹ-kẹnẹ, aza anaā wụ ada ẹnịnị ọnịrị ọnyị ẹnịnị, ọnịrị ọwọza.

¹⁰ Ọ rẹ mẹ ọda agụvị enebira ịdọtị ọnịrị onireche beri aza anaā dọ ivenu ireche, ọnịrị aza anaā mẹ̀ ịsa ana vọ ana jị ịrẹyị Ohomorihi ana a raà sị zụ̀ wụ nịnị nyee.

¹¹ Ịrẹyị ọnọọ vị enube ọyịza Ohomorihi ana nyị avaba igirima ọnịrị avaba ụbanyị. Ọnị ọ sị ọọ chire mi ụvọ nị.

Ánanyị yị mẹmẹ vayị Ịpọọrụ

¹² Máa kụ́ Ijeesu Ikirisiti Ananyị yị avọ, agụvị ka aa sị ụkataa mị. Ma rẹ kụ́ ọọ avọ, agụvị ka ộ za mị ịrịka ka máa nyị ịzẹyịza, dị ọ sị mị tụ́ ịnị ụkọrọ anị nị.

¹³ Ịyẹẹyẹ vị ọnị mịị̄ vịdịị kà ịrẹyị odivii hi ọọ, dị maa sị ụyaa rị ọọ, dị mị raa kụ̀ ọọ ụhụ nị. Ama Ohomorihi ọ va vayị amị, agụvị ka ịnị ịyẹẹyẹ ọnọọ, eyi amị oyi vịdị hweyi, mẹ yị rẹ nyị ẹdọwụ.

¹⁴ Ananyị yị ọ va vayị amị ẹnẹmẹhị; ộ mẹ̀ ka ma zụ sị ayị tụra ọnị, di me ree sì ịrẹyị ọza. Ọza ọnị ọnịrị Ijeesu Ikirisiti sị vị ọnya, ọọ̄ vavọọ mẹẹ yị nị.

¹⁵ Ịrẹyị ọnọnị vị ịzẹyịza, áa vọrọ ka à sị avaba ayị dọ ọ; ka Ijeesu Ikirisiti vị ana vẹ ẹhẹ ka ọnị ọ̀ va dọ ọnịvị há. Eme divi hu keekere ịnị ọnịvị ẹnẹẹ nị.

¹⁶ Agụvị avọọ Ohomorihi va vayị amị nị, agụvị dị Ijeesu Ikirisiti ò re oze sị zụ̀ aza ka ọnị ọ́ọ nyị isuuru ẹtẹẹtẹrẹ, ịnị ka ộ nyị isuuru yị ẹmị ene divi hu avaba aza. Ọnọọ vaa mẹ ka aza anaa vanaa sị ayịị tụra, dị ọ̀ mẹ ka ẹ̀ yàra pooro zịna-zịna, ẹ̀ zụ kọ ịrẹyọyẹ hụụnị anị.

¹⁷ Aza ẹ̀ẹ sị ụbanyị ọnịrị igirimaa yị Ohomorihi pooro zịna-zịna! Ọnị ọ vị ohinọyị pooro zịna-zịna nị; o mē sú, ọza o mē ree. Ọnị kẹnẹ ọ vị Ohomorihi nị. Aamị.

¹⁸ Itimoti ozi emi, maa mẹ̀ ọda ịrẹyị ẹnẹnịị yị wu. Ịrẹyị ọnọọ ọ́ọ jịrị ịrẹyị ọnị ọnịsẹ nịnị vịdị kà ini oze awụ. Sị ịrẹyị ẹnẹẹ mẹ ẹnya ịrẹkụ ọnị ụ vaa sị kụ̀ ịrẹkụ ozoza!

¹⁹ Wa yịị sị ayịị tụra Ohomorihi, di u we re ka ivehu awụ ọ́ọ nị! Aza ẹnyị ẹyị kụkụ sị ụtọ pe ivehu ẹnịnị, agụvị avọọ ẹdọwụ ẹnịnị ọ sị gara ha.

²⁰ Ihimenawusi ọnịrị Arẹkịsanda yà ịnị ẹngụ aza ẹnẹẹ. Ma raà sị wa chire Echu ụvọ, agụvị ẹ̀ zụ yẹ ka ẹ yị vọrọ ka ẹnị ẹ̀ẹ kà ịrẹyị odivi hi Ohomorihi.