1 Ịsamụwẹrị 6 - IWE ỌNỊNỊ

 sị Apoti Ohomorihi varẹma nị Isirẹrị

¹ Apoti Ẹnẹyịmavara ộ yà Ihwirisitiya mẹ ụhwẹ ịhịmba.

² Ẹkụhị ọnya dị Anihwirisiti nịnị va hi ọga ori ẹnịnị ọnịrị ẹnị ana aā há ẹva dị ẹ họ̀ wa ka ẹnị mẹ̀ vaa mẹ apoti Ẹnẹyịmavara aanị kẹ. Ẹ ka aza ẹnẹẹ ẹ̀ kà a yị ẹnị, ẹnị mẹmẹ vaa sị ọ varẹma nọ aha anị.

³ Dị ọga ori ẹnịnị ẹnẹẹ ka ẹ̀ẹ yaà sị apoti oto Ohomorihi Anisirẹrị varẹma, asị ẹ vavọọ sị ọ na kẹnẹ. Ẹ ka asị a nyị ka ẹ yị sị ịsa saasa a na ana a vaa sị naa mẹ ịsọvọọ yị Ohomorihi. Ẹ ka ẹ̀ẹ vavọọ sị ịsa saasa a na, ẹngụ ẹnịnị nịnị vaa ta. Ọnọọ vaa mẹ ka ẹ̀ yẹ iruvo ọnị Ohomorihi vịdị vavọọ sị tana ụvọ za wa.

⁴ Dị Anihwirisiti ẹnẹẹ va họ̀ ọga ori ẹnịnị ẹnẹẹ use dị ọ ka ye re ẹngụ ịsa ịsọvọ ana a vọrọ ka ẹnị ẹ̀ sị na yi Ohomorihi. Dị ọga ori ẹnẹẹ ka ẹ̀ sị igooru dị ẹ̀ vavọọ si tụ́ ẹngụ ịtahụ ana tụra wa avọọ ẹẹhị, dị ẹ̀ rẹ sị igooru tụ́ ẹẹhị ẹnị ẹ vaa sịị na. Ọga ori ẹnẹẹ ka igooru ene èe tụ́ ọ̀ gụ ịrịka ohinọyị Anihwirisiti nịnị, agụvị ka ụkụ ọnya-ọnya ọ za ẹnịrị ohinọyị ẹnịnị nị.

⁵ Ọga ori ẹnẹẹ rẹ ka Anihwirisiti nị ẹ vavọọ tụ́ igooru anka ịtahụ ana tụra wa, dị ẹ̀ rẹ vavọọ sị igooru tụ́ usu ene du aarẹ ẹnịnị ha, dị ẹ̀ sị na sị ụbanyị yị Ohomorihi Anisirẹrị. Ọga ori ẹnịnị ẹnẹẹ ka Anihwirisiti nị ẹ̀ vavọọ mẹ, ịsavọọ dị Ohomorihi ọ̀ za ụvọọ jẹẹ dị asị ọ kụkụ rẹ pa ịva yị ẹnịrị ori ẹnịnị ne beri ẹtẹ ẹnịnị.

⁶ Dị ọga ori ẹnẹẹ ka asị Anihwirisiti nị nịnị na mẹ akamawụ anka Anijipiti ẹnịrị ohinọyị ẹnịnị mẹ̀ na mẹ ịyẹẹyẹ. Ẹ ka Ịjị Ohomorihi tana ụvọ za Anijipiti vị ẹ wụsẹ si oze yị Anisirẹrị ka ẹ̀ jịnẹ dị ẹ̀ẹ na nị.

⁷ Dị ọga ori ẹnẹẹ rẹ ka Anihwirisiti nị ẹ̀ mẹ ịkẹkẹ ọwọọwa ọnị imaaruū tura, dị ẹ̀ rẹ sị imaaru ẹẹva ene vee tura a. Ẹ ka ẹ̀ sị imaaru ọnị ọza ọ̀ọ́ọ yị sị kụ́ ịrịkụ da dị ẹ̀ rẹ vị ọnyị ozi. Dị ọga ori ẹnẹẹ rẹ ka à du ozi imaaru ẹnẹẹ na và hi ịnị ọba, di è kuru imaaru ẹnẹẹ za ịkẹkẹ ọnọọ.

⁸ Dị ọga ori ẹnẹẹ ka ẹ̀ẹ vavọọ sị ọ mẹ, dị ẹ̀ va sị apoti Ẹnẹyịmavara tụra ịkẹkẹ ọnọọ. Dị ẹ̀ rẹ kụ́ igooru ene e tụ́ avọọ ẹnẹ ẹ yaa sị naa mẹ̀ ịsọvọ, dị ẹ̀ kụ́ ọ hi ịnị ẹnya ana yà akaha apoti ọnọọ. Ọga ori ẹnẹẹ ka ẹ̀ẹ vavọọ sị ọ mẹ, ẹ̀ sị imaaru ẹnẹẹ và tụra oze, dị ẹnị ụvọta ẹ̀ẹ na.

⁹ Ọga ori ẹnẹẹ ka ama Anihwirisiti nị nịnị ẹ̀ si eyi pè e ẹ màa na. Ọga ori ẹnẹẹ ka èe re ka imaaru ẹnẹẹ ệ va tụra oze ẹkụra Ịbẹtị-Isemesi dị ẹ̀ yẹ ka Ẹnẹyịmavara ọ kụ́ ụkụ odivi ẹnẹẹ ve tù ẹnị nị. Ẹ ka ama imaaru ẹnẹẹ ẹ̀ yi zi avọọ, dị ẹnị yị ka vị ụkụ vẹ kẹnẹ nị, ẹ yị vị Ẹnẹyịmavara ọ kụ́ ọ vẹ.

¹⁰ Ịzẹyịza dị Anihwirisiti mẹ ịsị a ka ẹ̀ mẹ nị. Ệ kụ́ imaaru ẹẹva, di e kuru wa gẹ ịkẹkẹ ọnọọ nị. Dị ẹ kụ́ ozi imaaru enee ne hi ịnị ọba nị.

¹¹ Dị ẹ sị apoti oto Ohomorihi tụra ịkẹkẹ ọnọọ nị. Dị ẹ rẹ kú igooru ene e si tụ́ ịtahụ ọnịrị usu, dị ẹ kụ́ ọ hi ịnị ẹnya di e si pè apoti ọnọọ nị.

¹² Di imaaru ẹnẹẹ và tụra oze taara dị ẹ yaa nọ Ịbẹtị-Isemesi nị. Ẹ́ mẹ̀ vavọọ và tụra oze aa na, di eyee nowu nị. Ẹnịnị ẹ yị ha hụrẹ oze vụrụ-vụrụ. Dị ọdọvịdị Anihwirisiti nị vavọọ saasa wa pooro dị ẹ na ngụ ụtọ ẹkụra Ịbẹtị-Isemesi nị.

¹³ Ụmẹ ọnọọ Anịbẹtị Isemesi ẹnị vi ene hi ini ozi dị ẹ yaa mẹ akụ. Ẹ́ mẹ̀ kana eyi tụ́ ẹba di e re apoti oto Ohomorihi, dị ẹ yaa jẹ nị.

¹⁴ Di imaaru ene ee tura ịkẹkẹ ọnọọ va ngụ ịnị aarẹ ọnọrụ ana aā hị́ Ijosuwa, dị ẹ na jẹẹ pè ịrẹta ọbanyị ọnya aanị ịzọọ nị. Dị aza ẹnẹẹ sị ịkẹkẹ ọnọọ ana a sị ọchị mẹ, di e che e nị, dị ẹ rẹ za imaaru ẹnẹẹ dị ẹ wụ̀ wa dị rị wa ịra mẹ̀ ịsọvọ yị Ẹnẹyịmavara nị.

¹⁵ Di Anireevi nịnị vẹ, di e ve chi apoti Ẹnẹyịmavara hi ẹtẹ ọnịrị ẹnya ana a kụ́ igooru ene e si tụ́ ịsa hi ịnị anị nị. Dị ẹ kụ́ ọ tụra ịrẹta ọbanyị ọnọọ nị. Ịhị ọnọọ di Anịbẹtị Isemesi nịnị mẹ̀ ịsọvọ dị ẹ rị ọ ịra yị Ẹnẹyịmavara nị. Ịsọvọ irenyi-irenyi ọsa vị ẹnị ẹ rẹ mẹ.

¹⁶ Ọdọvịdị Anihwirisiti nịnị ẹẹhị ana dụ apoti ọnọọ na ngụ ịzọọ ê re avaba ịsa ana a mẹ, dị ẹ rẹ varẹma ịhị ọnọọ dị ẹ yaa nọ Ekironi nị.

¹⁷ Anihwirisiti nị nịnị ệ sị igooru dị ẹ vavọọ tụ́ ọ anka ịtahụ ana tụra wa avọọ oze ẹẹhị nị, ẹ yaa sị naa dá ịpẹẹ yị Ẹnẹyịmavara agụvị ịsa odivi ẹnẹ ẹ mẹ hi ọ. Igooru ẹẹhị ẹnẹ ẹ vavọọ tụ́ avọọ vị ana jẹẹ yị ọnya ọnya ịnị ẹkụra ẹyịhị ana vị ẹkụra Anihwirisiti nị nịnị. Ẹkụra ẹnẹẹ ẹ vị Asidodi, Igaza Asikeroni ne beri Igati ọnịrị Ekironi.

¹⁸ Anihwirisiti nị nịnị ẹ rẹ si igooru tụ́ usu na vaka Igooru ọsa ẹnẹ ẹ kụ́ na. Ịrịka usu igooru ẹnẹẹ vị ana rẹ gụ ịrịka ẹkụra ana a jị ọvọ kara ọnịrị ẹkụra oweyi ana kara wa ana Anihwirisiti ẹẹhị rị ohinọyị tụra. Ịrẹta ọbanyị ọnọọ ene e chi apoti Ẹnẹyịmavara tụra yị yà ịnị aarẹ Ijosuwa Anịbẹtị Isemesi pooro ve tù ajịnị. Ọza ọ̀ọ nọ ịzọọ o vee re e.

¹⁹ Anịbẹtị Isemesi mẹ̀ jịnẹ vẹ di eyee re Apoti Ẹnẹyịmavara ọnọọ goro-goro, dị Ẹnẹyịmavara wụ ẹnị ẹtarẹwụ ịnị aza ẹnẹẹ nị. Ịjị Ẹnẹyịmavara vavọọ tana ụvọ za Anịbẹtị Isemesi, di eyee sụ ùnè ẹtẹẹtẹrẹ nị.

Apoti oto Ohomorihi Ikiriyati Ijeyarimi

²⁰ Dị ẹ ka ẹnị ẹ nyayịnẹ jẹẹ zi Ẹnẹyịmavara ana vị Ohomorihi ọnịnị ọnọnị. Dị ẹ rẹ ka ẹnẹ ẹnị aa sị Apoti ọnọọ naa yị aanị.

²¹ Dị ẹ va tụ́ na hị́ Anikiriyati-Ijeyarimi dị ẹ ka, “Anihwirisiti ẹ raà sị apoti Ẹnẹyịmavara vẹ, o; vẹ dị wa va sị ọ na tụ́ ịda awụ nịnị.”