1 Ịsamụwẹrị 5 - IWE ỌNỊNỊ

Ẹngụkata Apoti oto ene tu Anasidodi ọnịrị Anigati

¹ Ánihuristi nịnị mẹ̀ sị apoti oto Ohomorihi ọnọọ dọ hụụnị ụvọ Anisirẹrị, dị ẹ sị ọ hụrẹ Ẹbẹnẹza na tụ́ Asidodi nị.

² É mè tù Asidodi, dị ẹ sị apoti ọnọọ na ini irehi ori ẹnịnị ana aā hị́ Ịdagọnị, dị ẹ si pè ori ẹnịnị ọnọọ nị.

³ Ẹnẹnẹ viri-viri eyinẹhẹ anị, dị Anasidodi kwẹẹtẹ dị ẹ nọ ini eehi ori ẹnịnị nị. Di e ne tù ka Ịdagọnị, ori ẹnịnị ọ sị hyẹdụ dị ọ và eyi kú ẹtẹ tụ́ ọvịdị Apoti Ẹnẹyịmavara nị. Dị ẹ sị Ịdagọnị, dị ẹ sị ọ vọrọ jẹẹ tụ́ aha anị nị.

⁴ Ẹnẹnẹ eyinẹhẹ anị, dị ẹ rẹ nọ ini eehi Ịdagọnị ori ẹnịnị nị. Di e re ne tù ka Ịdagọnị ọ rẹ sị hyẹdụ, di o và eyi kú ẹtẹ tụ́ ọvịdị Apoti Ẹnẹyịmavara nị. Dị ịrẹsụ anị ọnịrị ụvọ anị kụ́ swẹ va hi enoze nị. Dị ahịka igugu ori ọnọọ kẹnẹ ọ kụkụ vọ nị.

⁵ Hụrẹ ụmẹ ọnọọ, ọdọvịdị irehi Ịdagọnị ọnịrị aza ana vọ ẹ mā kụ́ ahụ hi enoze irehi Ịdagọnị ana yà Asidodi.

⁶ Ẹnẹyịmavara ộ tana ụvọ za Anasidodi ọnịrị aza ana ra gụrị wa. Ộ sị ụya rị wa ẹtẹẹtẹrẹ, dị ọ mẹ ka ụkụ ọ̀ za wa di iruvo ẹnịnị ọ̀ọ tụra nị.

⁷ Ịjị Anasidodi vavọọ re ka ịrẹyị ô tù ẹtẹ, dị ẹ ka ẹ yị vọrọ ka ẹnị ẹ̀ si apoti oto Ohomorihi Anisirẹrị tịtẹ pè ẹngụ. Ẹ ka ụvọ Ohomorihi aa za ẹnị ọnịrị Ịdagọnị ana vị ori ẹnịnị.

⁸ Dị ẹ va hị́ ọdọvịdị Anihwirisiti nị gụ, dị ẹ họ̀ wa ka ẹnị mẹ̀ vaa mẹ Apoti Ohomorihi Anisirẹrị aanị kẹ. Dị ọdọvịdị Anihwirisiti nị tụ́ ohi, dị ẹ kà a yị wa ka ẹ̀ sị apoti ọnọọ na tụ́ ịzị aā hị́ Igati nị. Ịzẹyịza dị ẹ sị apoti ọnọọ na tụ́ Igati nị.

⁹ Ịjị ẹ raà sị apoti ọnọọ na tụ́ Igati, dị Ẹnẹyịmavara rẹ tana ụvọ za Anigati nị. Dị ọ mẹ ka angwa oo hi avaba ẹnịnị ẹtẹẹtẹrẹ nị. Dị ọ rẹ mẹ ka ịtahụ ọ̀ tụra hi avaba ẹnịnị iruvo saka-saka nị. Ọzọkụ ọnịrị ozweyi vị ọnị ịtahụ ọnọọ vavọọ tụra hi iruvo.

¹⁰ Dị Anigati ẹnị rẹ sị apoti oto Ohomorihi ọnọọ, dị ẹ ka à sị ọ na tụ́ ịzị aā hị́ Ekironi nị. Anekironi mè re ka aā sị apoti ọnọọ aa ngụ ịnị ẹkụra ẹnịnị, di e nowu za ẹtẹ dị ẹ ka, “A raà sị apoti oto Ohomorihi Anisirẹrị vẹ ka à sị va wụ ẹyịrị aza ayị và ha ộ!”

Anihwirisiti ệ sị apoti oto tụ́ varẹma

¹¹ Dị Anekironi va hị́ avaba ọdọvịdị Anihwirisiti nị anda ẹnịnị ene hi ịzọọ gụ dị ẹ ka à sị apoti oto Ohomorihi Anisirẹrị ọnọọ hụụ ịda ẹnịnị. Ẹ ka à sị ọ nọ eehi anị ka à yị vị avọọ vị aa wụ ẹnịrị aza ẹnịnịị vaa ha nị. Avaba anẹkụra ọnọọ ê re ka Ohomorihi aa tana ụvọọ za ẹnị, dị angwahi ta ngụ wa ẹngụ nị.

¹² Aza ene è yi sú vị ọnị ịtahụ tụra hi iruvo, dị ẹnịnị ee nowu ka Ohomorihi ọ̀ dọ ẹnị tụ́ nị.