1 Ịsamụwẹrị 29 - IWE ỌNỊNỊ

Anihwirisiti ka eni e yi sì Idevidi

¹ Anihwirisiti nịnị ẹ raà kụ́ isoja ẹnịnị gụ tụ́ ịzị aā hị́ Ahwẹkị, dị Anisirẹrị ẹnị rẹ kụ́ udi ẹnịnị tụ́ ọgụrị ịkangga ana yà ịzị aā hị́ Ijezirẹẹrị nị.

² Anihwirisiti ệ gà isoja ẹnịnị, dị ẹnyị vị ọnị ẹchẹhị, dị ẹnyị vị ẹnị akahị nị. Dị ẹnịnị tara aa na nị. Di Idevidi ọnịrị aza anị ne beri Akisi ẹnị hi ịrẹma aa dụ wa nị.

³ Dị ọga isoja Anihwirisiti nịnị ve họ̀ use dị ẹ ka Anihiburu ẹnẹnị yọ, ịzị ẹ yàa nọ? Dị Akisi ka Idevidi ana vị ọza ịnya ịnị ọga isoja Ịsọọrụ yọ nọ ọ. Ọ kà ọ sị para ịrayị ọnya ọnị ọ hụrẹ yà ịda anị. Dị ọ rẹ ka ọ mẹ hụrẹ hụụ ịda Ịsọọrụ dị ọ va yà pè ọnị, ọnị óò yi re ebira odivi ịnị ụvọ anị da.

⁴ Ayị ọ sị kụ́ ọga isoja Anihwirisiti, dị ẹ ka, “Ka a ka ọnọrụ ọnọọ ọ̀ varẹma dị ọọ nọ ịzị ụ sị yọ. Ọ yị saasa yị nọ ịrẹkụ o, ka ọ vana vara eyi tù yi yèe tù eyi ịrẹkụ. Wáā yẹ ka ọ̀ọ wụ̀ aza ayị ọnị ọnọọ zụ mẹ ka ọga anị ọ̀ varẹma sì ịrẹyị anị?

⁵ Wáá tamayị ka Idevidi ọnọnị ẹ yaa nyị ẹzẹ, dị ẹ yaa jị ahẹ gono o ka Ịsọọrụ ộ wụ̀ aza ẹnị akahị, ama Idevidi ọnị vị ana wụ̀ aza ẹnị otomiroku!”

⁶ Di Akisi va hị́ Idevidi dị ọ ka, “Mâ sị Ẹnẹyịmavara tẹ ivenu ka wa rụra sị ayị tụra. Ẹmị yaanị sì ka wa yà ịnị isoja amị. Ụ mẹ̀ hụrẹ vẹ ịda amị pooro ve tù ajịnị, me yi re ebira odivi ịnị ụvọ awụ. Ama ọga isoja amị ka asị ụ saasa ayị.

⁷ Aarịhịnị varẹma dị waa na, ka ẹ yị nyị ịrẹyị. Asị ụ na mẹ ịrẹyị ana vaa kụ́ ọdọvịdị Anihwirisiti ayị, o!”

⁸ Di Idevidi ka ọnị mẹ̀ mẹ aanị? Ọ kà sị ẹ vị ebira odivi ọnị Akisi re ịnị ụvọ anị ọnị mẹ̀ hụrẹ va yà ịda anị pooro ve tù ajịnị. Dị ọ rẹ ka, “Taarụ, sị ẹ vẹ dị wẹ̀ yị zẹẹ ka me ne pe ọnịvị awụ kụ́ ịrẹkụ?”

⁹ Dị Akisi ka ọnị ộ yẹ ịzẹyịza ka ebira Idevidi vi ene zoza anka ebira anggẹẹrị Ohomorihi avọọ. Ọ kà ama ọga isoja Anihwirisiti nịnị ka asị ọ saasa ẹnị nọ ịrẹkụ.

¹⁰ Dị ọ ka Idevidi ọnịrị aza ọga anị ana dụ ọ vẹ ẹ̀ kwẹẹtẹ ẹnẹnẹ viri-viri, ẹtẹ ọ̀ọ maanị ee hu eyi kẹnẹ, dị ẹ̀ẹ na nị.

¹¹ Ẹnẹnẹ viri-viri, di Idevidi ọnịrị aza anị kwẹẹtẹ dị ẹ sị varẹma aa nọ ịnị ẹtẹ Anihwirisiti nị. Di Anihwirisiti ẹnị si hu aa nọ Ijezirẹẹrị nị.