1 Ịsamụwẹrị 28 - IWE ỌNỊNỊỊrẹyị Ịsọọrụ ọnịrị ọpọchị Anẹndọ 1 Ụmẹ ọnya yà ịzọọ, di Anihwirisiti nịnị kụ́ isoja ẹnịnị gụ ka ẹnịrị Anisirẹrị aa naa kụ̀ ịrẹkụ nị. Dị Akisi hị́ Idevidi dị ọ kà a yọ ka ọ̀ yẹ ka ọnịrị aza anị vaa saasa ọnịị nọ ịrẹkụ o. 2 Di Idevidi ka ooho. Ọ kà ọnị ụvọta vee re ịsị ọnị vaa mẹ. Dị Akisi ka ộ mẹ̀ ẹ ẹtẹẹrẹ, ọ ka Idevidi o kuku vee sere ọnị pooro nị. 3 Ụmẹ ọnị yaa kà aanị, Ịsamụwẹrị ọnị ô wusu. Dị avaba Anisirẹrị jị òrèrè anị, dị ẹ sị ọ di e ne ne e tụ́ Iraama ịda anị nị. Ụmẹ ọnọọ Ịsọọrụ ọ kụ́ avaba ọpọchị ọnịrị ẹnẹbẹ dụ hụụnị ẹtẹ Anisirẹrị. 4 Ịjị Anihwirisiti nịnị sị ẹngụ tenyi, dị ẹ na kụ́ udi tụ́ ịzị aā hị́ Isunemi nị. Dị Ịsọọrụ ọnị rẹ kụ́ avaba Anisirẹrị, dị ẹnị ra na kụ́ udi tụ́ Igiribowa nị. 5 Ịsọọrụ mè re isoja Anihwirisiti, angwa ee hí ọ, ẹngụ anị ọ sị sụ ẹgahị. 6 Ịsọọrụ o ne sì ụvọ tụ́ ọ ka ọnị ọ̀ yẹ ịsị Ẹnẹyịmavara ọ̀ọ kà, ama Ẹnẹyịmavara o yi tụ́ ọ ohi. Ọ yị sị ịrẹyị zụ̀ ọ ịnị ụra, ọ yị rẹ sị ịrẹyị zụ̀ ọ ini Urimi ana a sịị zama ẹtẹẹ tụ́ ịnị ịrẹyị. Ọnịsẹ nịnị ẹnị ẹ yị re re ẹtẹ dị ẹ̀ va kà a yọ. 7 Dị Ịsọọrụ va hị́ ezi ahụ anị dị ọ ka è ne sì ọnẹẹ ana vị ọpọchị ene zụ pe oku kà ịrẹyị, dị ọnị ò ne tù ọ nị. Di ezi ahụ Ịsọọrụ ka â nyị ọnya ịzị aā hị́ Ẹndọ nị. 8 Dị Ịsọọrụ mẹ ẹngụ anị anka ọza ẹnẹsa, dị ọ sị awuru ọsa chire, dị ọnịrị aza anị ẹẹva si hu aa nọ ịda ọnẹẹ ọpọchị ọnọọ ịrahụ nị. E mè tù ịzọọ dị Ịsọọrụ ka â nyị oku ọnị ọnị ee sì ka ò pè ọnị họ̀ use ịrẹyị ịnị ụvọ anị nị. Ọ kà ọza ọnị ọnị ọ̀ọ hị́ ịrẹha anị, dị ọ̀ hị́ ọza ọnọọ jịnẹ hụụnị eku tụ́ ẹhẹ yị ọnị. 9 Dị ọnẹẹ ọnọọ ka, “Aanị ka wẹ wụ́ ịsị Ịsọọrụ mẹ? Wáá yẹ ka ọ raà kụ́ avaba ọpọchị ọnịrị ẹnẹbẹ eneē pè okuu kà ịrẹyị hụụnị ẹtẹ ọnọnị? Sị ẹ vẹ di wee be mi ka wa wụ̀ mị?” 10 Dị Ịsọọrụ si Ẹnẹyịmavara hị́ eku yị ọnẹẹ ọnọọ, dị ọ ka, “Ọnị ộ sị Ẹnẹyịmavara hị́ eku ka ẹ yị nyị ịrẹyị odivi ene vee tù ọ agụvị ịrẹyị ọnọọ nị.” 11 Dị ọnẹẹ ọnọọ ve họ̀ use ka, “Ẹnị ọ ka ọnị ọ̀ hí jịnẹ vẹ yị ọnị nị.” Dị Ịsọọrụ ka, “Hị́ Ịsamụwẹrị jịnẹ vẹ yị ọnị nị.” 12 Ọnẹẹ ọnọọ mè yi re Ịsamụwẹrị kẹnẹ, di o nowu zẹtẹ, dị ọ hí Ịsọọrụ dị ọ ka, “Ma sị yẹ ka ẹwụ Ịsọọrụ yọ nọ! Sị ẹ vẹ di u wee vene mi?” 13 Di ohinọyị kà, “Asị ụ hí angwa, kà a ịsị ụ re.” Dị ọnẹẹ ọnọọ ka, “Mê re ori ọnya ana aa jịnẹ hụụnị eteesu vẹ.” 14 Dị Ịsọọrụ rẹ họ̀ ọ ka, “Ọ mẹmẹ yà?” Dị ọnẹẹ ọnọọ ka, “Ọzọkụ ọnya aanị yọ nị. Ô chire awuru dị aa hịrẹẹ vẹ nị.” Ịsọọrụ ọ sị yẹ ka Ịsamụwẹrị yọ, dị ọ tana tụra ẹtẹ ka ọnị ọ̀ kụ́ ọ nị. 15 Dị Ịsamụwẹrị hị́ Ịsọọrụ dị ọ ka, “sị ẹ vẹ dị wẹ̀ yị navọ mị hẹẹ dị ụ sị mị jịnẹ aa vẹ?” Dị Ịsọọrụ ka, “Ộ kata mị ẹngụ ẹtẹẹtẹrẹ booro aanị. Anihwirisiti nịnị ee pè emi kụ̀ ịrẹkụ, dị Ohomorihi ọ sị và ịrẹma amị. Màa kụkụ họ̀ Ohomorihi use ịrẹyị, ọ yị kụkụ tụ́ ọnịsẹ hi mi. Ọ yị rẹ pe mi kà ịrẹyị ịnị ụra. Agụvị avọọ mị va hị́ Ịsamụwẹrị ka wa kà a yị mị ịsị a vọrọ ka ma mẹ nị.” 16 Di Ịsamụwẹrị ka, “Ẹhẹẹ, sị ẹ vẹ dị ẹwụ vaa hị́ ẹmị Ẹnẹyịmavara mẹ̀ raà và ịrẹma awụ dị ahịka ọnịrẹyị awụ ọ kụkụ vị aanị nị. 17 Ịsị ẹnị Ẹnẹyịmavara kà ma kà wụ ụmẹ ọnọọ ka ọnị vaa mẹ, aa mẹ avọọ nị. Ẹnẹyịmavara ọ raà sị wụ hụụnị ohinọyị Idevidi ana vị anẹkụra awụ ọ kụkụ sị mẹ ohinọyị nị. 18 Wụ ka wẹ mā wụ́ ịrẹyị Ẹnẹyịmavara. Ayị ộ kụ́ ọ tù Anamarẹkị, ọ ka wa aa mẹ ọyịkụ ọnọọ yị wa, ama wê yi. Agụvị avọọ Ẹnẹyịmavara maanị kụ́ ọ tù wu aanị nị. 19 Ẹnẹyịmavara va me; ka Anihwirisiti è huna ẹwụrị Anisirẹrị nịnị. Ụhwọọ ẹwụrị ezi ewu ee su nị. Ẹnẹyịmavara rẹ vaa mẹ ka Anihwirisiti è huna isoja Anisirẹrị.” 20 Ịsọọrụ mẹ̀ maanị yị wụ́ ịrẹyị Ịsamụwẹrị kẹnẹ, dị ọ mẹ babaraba éteesu nị, angwa mè hi ọ. Ẹwụ ọ sị ọ za agụvị ka ọ yị rị ịsa pooro ọọdụ ọnịrị ịrahụ ịhị ọnọọ. 21 Ọnẹẹ ọnọọ mè ve tù Ịsọọrụ, di o ve tù ka ẹgahị ọ sị ngụ ọ ẹngụ, dị ọ ka, “Taarụ, wâ yẹ ka mị sị ịrẹsụ tụ́ isu dị mị zị ụtụ ọnị ụ tụ́ mị nị. 22 Aarịhịnị nda, navọ ma sị ịsa wụ dị wa rị ọ; dị wa sị nyị ụkata dị waa nọ eehi.” 23 Ịsọọrụ ô yi, ọ ka ọnị ọ yị rị ịsa. Dị aza ọnị ọnịrịị zị ve pè ọnẹẹ ọnọọ dá ịpẹ yọ, dị ọ va dọ ka ọnị aa rị ịsa nị. Dị Ịsọọrụ va kwẹẹtẹ hụụnị eteesu, dị ọ yaayịtẹ ịnị ịbẹẹdị nị. 24 Â nyị imaaru ọnị ọnẹẹ ọnọọ pá ana banyị tụ́ ini eehi anị. Dị ọ wụsẹ na sị ọ dị ọ wụ̀ ọ nị. Dị ọ rẹ ká ayị ana kụ́ ọ ohuru-ohuru, di o po o, dị ọ sị jị Ịbụrẹẹdị ẹnẹ ẹ̀ yị nyị owu nị. 25 Dị ọ kụ́ ịsa ọnọọ na yị Ịsọọrụ ọnịrị aza anị, dị ẹ rị ọ nị. Dị ahịka ịrahụ ịhị ọnọọ Ịsọọrụ ọnịrị aza anị varẹma nị. |
Ebira First Bible © Bible Society of Nigeria, 2014.
Bible Society of Nigeria