1 Ịsamụwẹrị 27 - IWE ỌNỊNỊ

Idevidi ộ nọ ịda Anihwirisiti nịnị

¹ Di Idevidi ve ro o, dị ọ ka wáá yẹ ka Ịsọọrụ vaa za ọnị ẹkụhị ọnya, dị ọ wụ ọnị. Dị ọ ka ịsị ẹ gụ hu ọ vị ka ọnị ò zwe nọ ịnị ẹtẹ Anihwirisiti nịnị nị. Ọ kà Ịsọọrụ ọ yị kuku vee sì ọnị aha ọnyọọnyị ịnị ẹtẹ Anisirẹrị ọ ka ịjọnọọ dị ọnị sị há hụrẹ ẹ ụvọ.

² Ịzẹyịza di Idevidi ọnịrị aza ẹnị akata ana aā dụ ọ zị si hu, dị ẹ ne tù Akisi ozi Imawoki ana vi ohinọyị Igati nị.

³ Di Idevidi ọnịrị aza anị nọ Igati, dị ẹ na yà ịda Akisi nị. Ọza-ọza vị ana kụ́ aza anị za na, di Idevidi ọnị rẹ kụ́ ese anị ẹyịva za nị. Ese anị ẹnẹẹ ẹ vị Ahinowamị ana vị Anijezirẹrị ọnịrị Abigẹrị ana vị Anikamẹrị ose onku Ịnabarị.

⁴ Ịsọọrụ mẹ̀ wụ́ ka Idevidi o si zwe nọ Igati, di ò yi kuku sì ọ nị.

⁵ Di Idevidi va hị́ Akisi dị ọ ka, “Aarịhịnị, wèe nyị mi iyi, wụ navọ wa dà aha ọnyaa mị ịnị ẹkụra ene hi ịnị aarẹ avọọ dị ma ra ịzọọ. Taarụ, mẹ yị hụ ọ ẹnị ẹmịrị ẹwụ sịị ra aha ọnya ini ubooro ịzị ẹwụ ohinọyị yà.”

⁶ Ịzẹyịza ịhị ọnọọ, di ohinọyị sị ịzị aā hị́ Izikiragii yị Idevidi nị. Ohinọyị Anijuda ẹ kụkụ nyị nyị ịzọọ pooro ve tù ajịnị nị.

⁷ Idevidi ọ ra ịnị ẹtẹ Anihwirisiti mẹ ịrayị ọnya tụra ụhwẹ ẹẹna.

⁸ Ẹkụhị ọnya di Idevidi ọnịrị Igirizite ne beri Amarẹkị nị. Dị ẹ kụ́ ogu hụụ ịzọọ nị. Ịnị ịyẹẹyẹ, aza ẹnẹẹ vị ana ra na ngụ ịnị ẹtẹ Isuri ọnịrị Ijipiti.

⁹ Ịzị Idevidi ọ̀ọ kụ́ ịrẹkụ nọ, ẹ yị nyị ọza ikonya ana aa navọọ tụ́ ịzọọ ọnị ọ̀ yị yàa wụ. Ọ̀ọ sị wa wụ, dị ọ kụ́ atẹmẹ ọnịrị imaaru ne beri ịkẹrịkẹtẹ ọnịrị ịnyaakụmị ẹnịnị. Ịta ẹnịnị vị ọnị ọ rẹẹ̄ kụ́, dị ọ raa vẹ Akisi.

¹⁰ Ohinọyị Akisi ọ̀ọ họ̀ ọ ka ịzị ẹ rẹ na kụ̀ ịrẹkụ ajịnị, di Idevidi ka eyi ụvẹtẹ Ijuda. Ịjị ẹnyị dị ọ ka eyi ụvẹtẹ Ijerahimẹẹrị. Ịjị ẹnyị dị ọ rẹ ka eyi ụvẹtẹ Ikeni.

¹¹ Avaba aza ẹnẹẹ vị ọnị ọọ̄ wụ, nyị ọnị ọ zẹẹ ka ọnị ọ̀ sị vẹ Igati. Ô ro o ka ẹ va na kà a ka ịsị ọnị Idevidi aa mẹ yị. Avọọ Idevidi màa mẹ pooro ọ mẹ̀ yà Ihwirisiti nị.

¹² Akisi ọnị vị ana nyayịnẹ sị ayị tụra Idevidi. Ọ kà aza Idevidi ana vi Anisirẹrị vi ana kụkụ aa nyị ịhyẹrẹ Idevidi. Ọ kà Idevidi vị ana kụkụ vaa yà ahụ anị pooro.