1 Ịsamụwẹrị 25 - IWE ỌNỊNỊ

Usu Ịsamụwẹrị

¹ Ịnị ụmẹ ọnya, dị Ịsamụwẹrị wusu nị, dị avaba Anisirẹrị kụ́ gụ, dị ẹ jị òrèrè anị nị. Dị ẹ sị ọ, di e ne e tụ́ ini eehi anị Iraama nị. Di Idevidi kwẹẹtẹ, di o si hu aa nọ ịnị ụnọmị ịzị aā hị́ Ịparanị nị.

Ịrẹyị Idevidi ọnịrị Abigẹrị

² Â nyị ọnọrụ ọnya aanị ana yà Imawoni. Ộ nyị ogu ẹtẹẹtẹrẹ tụ́ ịzị aā hị́ Ịkamẹrị. Opisa ọbanyị ọnọrụ ọnọọ vị nị. Ẹvụ ọnị ọ nyị vị akahị, dị ọ nyị atẹmẹ akawụ rị akahị nị. Atẹmẹ ọnọọ vị ọnị ọọ̄ yẹrẹ ẹyị anị Íkameri.

³ Ịrẹha ọnọrụ ọnọọ ọ rị Ịnabarị nị. Di ose anị ọnị rị Abigẹrị nị. Abigẹrị oni ô zoza, avọọ ọ mẹ̀ rẹ yẹ ịrẹyị nị. Ama ọva anị ana vi Anịkarẹbị ọnị vị ọza kẹnẹ-kẹnẹ, dị ọ rẹ vị ọnọyịha nị.

⁴ Ẹkụhị ọnya Idevidi mẹ̀ yà ịnị ụnọmị ịzọọ, dị ọ wụ́ ka Ịnabarị yà ịnị aarẹ aa yẹrẹ ẹyị atẹmẹ anị nị.

⁵ Di Idevidi hí ezida anị ẹẹwụ dị ọ tụ́ wa nọ ịda Ịnabarị nị. Ọ kà è ne tù ọ Ịkamẹrị dị ẹ̀ kụ́ ọ yị ọnị.

⁶ Ọ kà ẹ̀ kà a yọ ka Ohomorihi ọ̀ sị ụhwẹ ọgọdọ ọnịrị ẹngwọọrọ yọ beri aneehi anị. Ọ kà ẹ̀ rẹ kà a ka Ohomorihi ọ̀ sị ẹngwọọrọ yị avaba ịsị ọ̀ọ nyị.

⁷ Di Idevidi rẹ ka ezida anị ẹnẹẹ ẹ̀ kà a yọ ka ọnị ộ wụ́ ka ụmẹ ọnị ọ sịị̄ yẹrẹ ẹyị atẹmẹ anị o si tù. Ọ kà ẹ̀ rẹ kà a ka ọọ̄ yẹ ka aza ana aā kụ́ ịsụpa anịị rị mẹ̀ yà pè ọnị, ọnị ọ yị mẹ wa eyingwẹngwẹ. Dị ẹ rẹ kà a ka aza anị mẹ̀ hụrẹ yà Ịkamẹrị, ẹ yị nyị ịsụpa anị ikonya ene vu.

⁸ Idevidi ka ẹ̀ kà a ka Ịnabarị ọ̀ họ̀ ezi ahụ anị use ka ẹ vaa kà a yọ. Di Idevidi rẹ ka ezida anị ẹ̀ kà a ka aarịhịnị Ịnabarị ọ̀ vayị ẹnịnị, ẹ̀ mẹ vẹ ịnị ụmẹ eche aanị, di ịsị òo re kẹnẹ ọ sị yị wa va yị ọnị.

⁹ Ezida Idevidi mẹ̀ na sị ngụ ịda Ịnabarị, dị ẹ kà ụtụ Idevidi yọ, dị ẹ jẹẹ nị.

¹⁰ Di Ịnabarị tụ́ ezida Idevidi ohi dị ọ ka, “Ẹnẹ ẹ vị Idevidi kẹ? Ẹ̀nị aā hị́ ozi Ijeese? Ezida vị ana kụkụ ee zwee huu ịda ọga ẹnịnị ịnị ụmẹ ọnọnị.

¹¹ Sị ẹ zụ mẹ ka ma sị ịsọyịrị ọnịrị enyi ne beri uye ọnị mị wụ yị aza ana yẹrẹ ẹyị atẹmẹ amị dị ma sị na yị ọza ọnị mẹ̀ yị yẹ ịzị ọ hụrẹ vẹ?”

¹² Di ezida Idevidi sị varẹma dị ẹ yaa na nị. E mè tù ịda Idevidi, dị ẹ kà avaba ịsị Ịnabarị kà nị.

¹³ Di Idevidi hí aza anị dị ọ ka ọzọza ọ̀ kụ́ ụhwọ anị nị. Ịzẹyịza dị ọzọza kụ́ ụhwọ anị, di Idevidi ọnị rẹ sị aanị nị. Ẹhụ aza ẹnị akava avọọ ộ saasa Idevidi aa na, dị ẹnị ịrẹka jẹẹ pè ẹnya nị.

¹⁴ Â nyị ozida Ịnabarị ọnya aanị, dị ọ va na hị́ Abigẹrị ose Ịnabarị dị ọ ka, “Wáá yẹ ka Idevidi ộ tụ́ aza hụụ ịnị ụnọmị ve tù ọga ayị ka ẹ̀ va kụ́ ọ yị ọnị. Dị ahịka vị Ịnabarị aa kụ́ aza ẹnẹẹ ụhụ nị.

¹⁵ Aza ẹnẹẹ ệ mẹ̀ ebira ozoza hi yi ẹ́yịrị wa mè hi aha ọnya ịnị ụmẹ ọnya. Ẹnịnị ẹ̀ yị mẹ yị eyingwẹngwẹ, ẹ yị rẹ nyị ịsa ayị ene vu.

¹⁶ Ọọdụ ọnịrị ịrahụ vi ene yee sere yi pooro ị màa kụ́ ịsụpa ayịị rị ọgụrị wa.

¹⁷ Ro o ịsị wàa zụ mẹ tụ́ ịnị ịrẹyị ọnọnị agụvị ka ịrẹyị odivi, tụra ọga ayị ọnịrị aneehi anị ịrẹsụ. Wâ yẹ ka ọga ayị vị ọza odivi, ọza ọ mā zụ kà ịrẹyịị yọ.”

¹⁸ Di Abigẹrị wụsẹ na, dị ọ na kụ́ ịbụrẹẹdị ịrẹka ọnịrị eche ini okoko ịtụmpaha ẹẹva ne beri atẹmẹ ẹẹhị ọnị ọ chịnẹ, dị ọ kụ ọ tụra ịkẹrịkẹtẹ anị nị. Dị ọ rẹ kụ́ apaapa ẹnya ịrẹsụ ọnya ọnịrị ẹtụtụ ẹchẹhị ne beri Ịbụrẹẹdị ịrẹka ana a sị ẹtụtụ ihwigi ohuru-ohuru jị tụ́ ọ nị.

¹⁹ Dị ọ ka ozida anị ọ̀ dọ ọvịdị dị ọ̀ọ na zị ọnị ka ọnị aa vẹ nị. Ama ọ yị kà a yi Ịnabarị ọva anị.

²⁰ Ọ mẹ̀ tụra ịkẹrịkẹtẹ anị aa na, o ne si tù ịzị oze yá ịnị ataba, di o re ka Idevidi ọnịrị aza anị ẹnị ree chii vẹ, dị ẹ na gẹ nị.

²¹ Idevidi ọnị vị ana vịdị aa kà a ka vi ọnị sere ịsụpa Ịnabarị ọọhẹ kẹnẹ ịnị ụnọmị, dị ọnị ọ̀ yị zẹẹ ka à nyị ene vu nị. Ọ kà ọyịza ọnị ọnị mẹ̀ ẹ, odivi o ve si si ọnị atọ nị.

²² Di Idevidi ka asị Ohomorihi zẹẹ ka ò zoza yị ọnịvị anị àa vị ka ọnị ọ yị wụ̀ avaba anọrụ ene hi ịdị Ịnabarị ẹnẹnẹ ụhwọọ.

²³ Abigẹrị mé re Idevidi kẹnẹ, dị ọ wụsẹ chi hụụnị ịkẹrịkẹtẹ anị hị́ ẹtẹ, dị ọ tana tụra ẹtẹ ọvịdị Idevidi dị ọ kụ́ ọ nị.

²⁴ Dị ọ vavọọ va kú ẹtẹ agada Idevidi dị ọ ka, “Nda aarịhịnị sị avaba ohuvọ ịrẹyị ọnọnị tụ́ mị. Navọ wa jẹẹ dị ma kà ịrẹyị dị wa wụ́.”

²⁵ Di Abigẹrị rẹ ka, “Nda, aarịhịnị asị ụ sị ayị nọ ịnị ịrẹyị Ịnabarị ọhịmị ọnọọ. Wâ yẹ ka vị ọ raa mịị mẹ̀ ebira anka ịrẹha anị nị. Ịrẹha anị ọ rị Ọnụra nị. Avọọ ụra ọnọọ mẹ̀ vaka a ẹngụ nị. Nda, wáá yẹ ka ẹmị ẹ yị hyakụ re aza ọnị ụ tụ́ vẹ?

²⁶ Nda, Ẹnẹyịmavara ộ vịdị sị sị ọ mẹ ka asị ụ na wụ̀ ọza dị wa va na rị ịvị. Ọ kà ẹ yị vị ẹwa vaa sị ụvọ awụụ si atọ ịrẹyị awụ, Ohomorihi ọ̀ọ yà ịzọọ, dị ẹwụ rẹ maanị yị yà ịzọọ nị, ọza ana àa ka ọnị aa mẹ wụ ịsa odivi vị ana vaa yà anka Ịnabarị avọọ.”

²⁷ Di Abigẹrị rẹ ka aarịhịnị ọ̀ dọ ịsa ọnị ọnị sị va yọ aanị dị ọ̀ sị yị aza ana saasa a nị.

²⁸ Di Abigẹrị rẹ ka ọnị ộ yẹ ka Idevidi vị ana aa kụ̀ ịrẹkụụ yị Ẹnẹyịmavara. Ọ kà Ẹnẹyịmavara vaa mẹ ka ovwoovu Idevidi ọ vaa vị ohinọyị pooro nị. Ọ kà aarịhịnị ọ̀ navọ ọ̀ vagu Ịnabarị. Ọ kà Ohomorihi ọ yị vaa zẹẹ ka Idevidi ọ mẹ ịrẹyị odivi pooro dị ọ̀ sị ẹhẹ tịtẹ.

²⁹ Ọ kà ọza ọ̀ọ daka ee sì ka ọnị ọ wụ Idevidi, ama Ẹnẹyịmavara ana vị Ohomorihi anị ọ yị vaa zẹẹ. Ọ kà ọnịvị Idevidi vị ẹnị Ẹnẹyịmavara vaa dọ ụhwẹ, di o ne e ta anka a mèe ne ịrẹta hụụnị irova avọọ.

³⁰ Di Abigẹrị aa kịị kà ịrẹyị dị ọ ka, “Nda, Ẹnẹyịmavara vaa mẹ avaba ịsa ozoza ọnị ọ ka ọnị vaa mẹẹ wụ. Ọ vaa sị wụ vị ohirẹsụ Anisirẹrị.

³¹ Ịjọnọọ ayị awụ ọ yị vaa jị pèe-pee ka wâ wụ̀ ọza da, à vị ka wê si atọ ịsị ọza mẹ wụ. Aarịhịnị ịjị Ẹnẹyịmavara ọ raà mẹ ka ò zoza wụ, dị wa tamayị amị.”

³² Di Idevidi tụ́ Abigẹrị ohi, dị ọ ka, “Mâ kụ́ Ẹnẹyịmavara avọ ọnị ọ vị Ohomorihi anị Anisirẹrị aa hẹkẹ nị. Ohomorihi ọ tụ́ wụ va gẹrị mị ajịnị nị.

³³ Ẹwa ka asị mị wụ̀ ọza ajịnị, dị asị mị rẹ sị atọ ịrẹyị ẹngụ amị nị. Ohomorihi ọ̀ navọ ò zee wụ agụvị ịrẹyị ọnị ụ maanị yẹ aanị.

³⁴ À yị vị ẹnị Ẹnẹyịmavara ana vị Ohomorihi anị Anisirẹrị aa hẹkẹ ana mẹ ka asị mị kanyị wụ, mâ sị Ohomorihi hị́ eku ka wẹ̀ yị yaanị maanị va gẹrị mị, eyi ọ̀ọ yaanị naa nị, ẹ yị yaanị kụkụ nyị ọnọrụ ikonya ana yà ịda Ịnabarị ana yaanị aa tịị tụ́ ụhwẹ.”

³⁵ Di Idevidi dọ ịsa ana Abigẹrị kụ́ va yọ, dị ọ ka ọ̀ọ nọ eehi ka ẹ yị kụkụ nyị ịrẹyị nị. Ọ kà ọnị ộ wụ́ ịrẹyị ana Abigẹrị kà, ọnị ọ rẹ dọ.

³⁶ Abigẹrị mẹ̀ varẹma nọ ini eehi di o ne tù ka Ịnabarị aa rị eche anka ohinọyị avọọ nị. Ịnabarị aa mẹrị, eche ộ ta hụ ọ. Ẹ yị nyị ịsị Abigẹrị kà yọ pooro di eyi nị.

³⁷ Ẹnẹnẹ éyi Ịnabarị mè si hweyi, di ose anị va kà avaba ịrẹyị ẹnẹẹ yọ nị. Ịnabarị ọ yị kụkụ zụ tụ́ ụhwẹ, dị ọ kụkụ tịtẹ anka ịrẹta avọọ nị.

³⁸ Ịhị ẹ tụ́ ọ ẹkụhị ẹẹwụ, dị Ẹnẹyịmavara Ịnabarị ịsa, di o su nị.

³⁹ Idevidi ộ wụ ka Ịnabarị ô wusu. Dị ọ ka, “Ẹnẹyịmavara, avọ. Wa raà sị zụ̀ ka ẹ yị nyị m mẹ̀ mẹ Ịnabarị dị ọ vavọọ mẹ̀ ụhị nyị mị. Wẹ rẹ vaa zẹẹ ka ma mẹ ịrẹyị odivi. Ịsa odivi ọnị Ịnabarị mẹ ọ raà chị kú ọ ịrẹsụ.” Di Idevidi tụ́ hi Abigẹrị ka ọnị aa nyị ọ nị.

Idevidi ộ nyị Abigẹrị

⁴⁰ Di ezi ahụ Idevidi nọ Ịkamẹrị dị ẹ na kà a yi Abigẹrị ka Idevidi ộ tụ́ ẹnị hị́ ọ ka ọnị ee sì ka ọnị ọ̀ nyị ọ.

⁴¹ Di Abigẹrị tana tụra ẹtẹ dị ọ ka, “Ẹmị yị, mâ dị ka ma naa zị ụtụụ yị ozi ahụ ọga amị.”

⁴² Di Abigẹrị wụsẹ hịrẹ ịkẹrịkẹtẹ anị, di ezida anị ẹẹhị saasa a, dị ẹnịrị ezi ahụ Idevidi si hu aa na nị. Dị ọ na, dị ọ na vị ose Idevidi nị.

⁴³ Idevidi ọ rẹ nyị Ahinowamị Anijezirẹrị, dị ẹnịrị Abigẹrị kụkụ vi ose Idevidi nị.

⁴⁴ Ịsọọrụ ọ raà dọ Idevidi ose anị ana aā hị́ Imikari ana vi ozi Ịsọọrụ, dị ọ sị na gà Iparitiyeri nị. Iparitiyeri vi ozi Irayisi ana vị Anigarimi.