1 Ịsamụwẹrị 21 - IWE ỌNỊNỊ

Idevidi ô zwe yị Ịsọọrụ na yà Inobi

¹ Idevidi ọ na sị ngụ ịzị aā hị́ Inobi, dị ọ nọ ịda ohirẹsụ irehi Ohomorihi ana yà ịzọọ ana aā hị́ Ahimẹrẹkị nị. Ahimẹrẹkị mẹ̀ na gẹrị Idevidi, dị ẹngụ anị aa da ẹgahị nị. Dị ọ họ̀ Idevidi dị ọ ka, “Sị ẹ vẹ dị ahịka ẹwụ ịnyara aa vẹ nị? Sị ẹ vẹ dị ẹ̀ yị nyị ọza ana saasa awụ?”

² Di Idevidi tụ́ Ahimẹrẹkị ana vị ohirẹsụ irehi Ohomorihi ohi, dị ọ ka â nyị ụtụ oni ohinọyị tụ́ ọnị. Ọ kà ohinọyị ka asị a nyị ọza ọnị ọnị kà ụtụ ọnọọ zụ̀. Di Idevidi ẹ vara gẹrị ọnị aha ọnya aanị nị.

³ Di Idevidi rẹ kà a yị Ahimẹrẹkị dị ọ ka, “Sị wụ nyị rị ụvọ booro aanị, navọ wa sị Ịbụrẹẹdị ẹẹhị mị. À yị vị avọọ, ịsị wàa nyị kẹnẹ ụ sị mị.”

⁴ Di ohirẹsụ irehi Ohomorihi ọnọọ tụ́ Idevidi ohi dị ọ ka ẹ yị nyị Ịbụrẹẹdị kẹnẹ ana kụkụ tịtẹ, ama â nyị Ịbụrẹẹdị ana siī tụ́ ini eehi Ohomorihi. Dị ọ rẹ ka ezi ẹnẹnị yọ á vị ẹnịnị ẹ̀ yị kanyị ọnẹẹ?

⁵ Di Idevidi ka yẹ mā kanyị ọnẹẹ yàa maanị aa jịnẹ. Aza ẹnịnị ẹ̀ẹ hyakụ aa jịnẹ kẹnẹ, vị ẹẹ̄ za ido nị, dị ma va na kà ụsẹ ẹnị ẹ yaa zị ajịnị aanị.

⁶ Di Ohirẹsụ irehi Ohomorihi ọnọọ sị Ịbụrẹẹdị ọnọọ ana a sịị̄ tụ́ ini irehi Ohomorihi yọ nị, agụvị ka ẹ yị nyị Ịbụrẹẹdị ọsa ịzọọ. Â nyị Ịbụrẹẹdị ana a sị vaa tụ́ ọdọvịdị Ohomorihi, ama a raà sị ọ kwooze ka a sị Ịbụrẹẹdị ọsa ana ngụ ịra va dọ ọ ịrẹsụ ịnị ịhị ana a sị ọ hụụ ịzọọ.

⁷ Ịhị ọnọọ â nyị ozi ahụ Ịsọọrụ ọnya aanị ana a za tụ́ ịzọọ. Ịrẹha anị ori Idowegi nị. Anedomi ọ vị nị, dị ahịka ọnị ọ vị ọga aza ana sị eyi pè ịsụpa Ịsọọrụ nị.

⁸ Di Idevidi họ̀ Ahimẹrẹkị ka ọ́ọ nyị ọha àa vị ụhwọ nị. Idevidi ka ọnị ọ yị za ọha anị ọnịrị ụhwọ anị rị ụvọ, agụvị ka ụtụ eyiha-eyiha ohinọyị tụ́ ọnị nị.

⁹ Di ohirẹsụ irehi Ohomorihi ọnọọ ka ụhwọ Igorayati Anihwirisiti ọnị ọ wụ ini ozi Era ịhị ọnọọ tịtẹ ịzẹnị. Â sị ịta para a tụ́ ịrẹma ịharamịra ịzọọ. Ọ kà òo sì ọnọọ dị ọ̀ sị ọ agụvị ka ẹ yị nyị ụhwọ ọsa ịzẹnị. Di Idevidi ka, “sị ọ mị, ka ẹ yị nyị ụhwọ ene huna ọnọọ.”

Idevidi yà Igati

¹⁰ Di Idevidi kwẹẹtẹ ịhị ọnọọ di o si zwe hụrẹ ịda Ịsọọrụ nị. Di o zwe nọ ịdị Akisi ana vi ohinọyị ẹkụra Igati nị.

¹¹ Di ezi ahụ Akisi hị́ Akisi dị ẹ ka, “wáá yẹ ka ohinọyị ẹtẹ ịhị ọnọọ yị? Wáá yẹ ka ọnị aza aa nyị ẹzẹ, dị ẹ yaa jị ahẹ gono o ka Ịsọọrụ ộ wụ̀ aza ẹnị akahị, ama Idevidi ọnị vị ana wụ̀ aza ẹnị otomiroku.”

¹² Di Idevidi ee ro ịrẹyị ẹnẹẹ ịnị ayị anị, dị angwa Akisi ana vi ohinọyị Igati kuku ee hị́ ọ nị.

¹³ Dị ọ kụkụ aa mẹ apẹ ka ọnụra ọnịvị éyi ẹnịnị nị. Ọ̀ọ sị vi eyi ẹnịnị dị aa mẹ anka ọnụra avọọ. Di aa chẹrẹ ịsaa hi ini ukere oze ana na ngụ ịnị ẹkụra, dị ọ raa và atẹẹ hi ịrẹwa nị.

¹⁴ Di Akisi va hị́ ezi ahụ anị dị ọ ka, “wéē re ọnọrụ ọnọnị, ọnụra ọ vị nọ! Sị ẹ vẹ dị ụ sị ọ vẹ ịda amị nịnị?

¹⁵ Aanị ka ọnụra ene hi ịzẹnị aanị ẹ yị hụ mị dị wụ rẹ na sị ọsọnị vẹ ka ọ̀ maanị vaa mẹ ịda amị ịzẹnị? Sị wụ daka sị ẹngụ ọza ọnọnị ve sì ịda amị nịnị?”