1 Ịsamụwẹrị 20 - IWE ỌNỊNỊ

Ijonatani ộ gụ Idevidi ụvọ ka o zwe

¹ Ịhị ọnọọ di Idevidi oni sị zwe hụrẹ Inayoti ana yà ịnị ẹtẹ Iraama, di o ne tù Ijonatani nị. O mè tù ịzọọ, dị ọ tụ́ Ijonatani dị ọ ka, “Sị mị mẹ̀ ada awụ di ee sì ka ọnị ọ̀ wụ̀ mị? Sị ẹ vị ebira odivi ọnị mị mẹ̀ ẹ?”

² Di Ijonatani ka, “Ọchọnọyịrẹsụ ada amị, ọ yị kà a ka ọnị aa wụ̀ wụ. Mâ yẹ ka ẹ yị nyị ịsị ada amị vaa mẹ, ọ̀ọ banyị òo weyi ka ọ yị kà a zụ̀ mị. Sị ẹ vaa vẹ ka ada amị ọ̀ sị ịrẹyị ọnọnị re mị te? Ọsọnị vi ireche, ọ yị kà a ka ọnị aa wụ̀ wụ!”

³ Di Idevidi rẹ hị́ eku dị ọ ka, “Ịzẹyịza m maa kà nị. Ada awụ ộ yẹ ịnị ayị anị ka wee sì ịrẹyị amị ẹtẹẹtẹrẹ. Agụvị avọọ ọ yị zẹẹ ka wa yẹ ịsị ọnị vaa mẹ̀ ka ayị va kụ́ wụ. Maa sị Ẹnẹyịmavara tẹ ivenu, dị mị rẹ sị ịrẹsụ awụ hị́ eku ka owu ihihine ọnya kẹnẹ ọ jị ọnịrị isu ịnẹ aanị nị.”

⁴ Di Ijonatani va ka yi Idevidi ka ịsị òo sì kẹnẹ ọnị vaa mẹ̀ ẹ yọ nị.

⁵ Di Idevidi tụ́ ohi dị ọ ka, “Wáā yẹ ka ụhwọọ ọ vị eche ụhwẹ ọwọọwa nị? Â vọrọ ka ma yaayịtẹ pè ohinọyị dị ẹmịrị ọ ọ̀ rị ịsa. Jẹẹ ma na tẹ̀ ịnị avị pooro ne tù oruva uhurenyi.

⁶ Àa vị ada awụ ee sì mị nị, dị ụ kà a yọ ka mâ dá ịpẹ wụ ka aarịhịnị mị wụsẹ ee zwee nọ Ịbẹtịrẹhẹmị ịdị ayị, ka ịsọvọ ana avaba anda ayịị mẹ ịrayị-ịrayị o si tù.

⁷ Ọ̀ọ kà ka ooho, dị ụ yẹ ka mẹ yị kụkụ nyị ịrẹyị anị. Ana àa vị aa kụ́ ayịị hi wu nị, dị wa yẹ ka ọ sị ẹngụ tenyi ka ọnị ọ̀ sị ịsa odivi mẹ mị.”

⁸ Di Idevidi rẹ ka, “Navọ wa gụ mị ụvọ. Wâ yẹ ka wâ mẹ ka ya hị́ eku yị ẹngụ ọvịdị Ẹnẹyịmavara. Àa nyị ebira odivi ọnị mị mẹ, ẹwụ ụvọta ọ̀ wụ̀ mị. Me yi sì ka wa sị mị na yị ada awụ ka ọ̀ wụ̀ mị.”

⁹ Di Ijonatani ka, “Navọ asị ụ rẹ maanị kà. Màa sị ụtọ kụ́ ịpa anị ka ada amị ee sì ka ọnị ọ̀ wụ̀ wụ, m maa kà a wụ nị.”

¹⁰ Di Idevidi rẹ kà a yị Ijonatani dị ọ ka, “Àa vị ada awụ ò yi ne tụ́ ohi ẹtẹẹrẹ nị, ẹnẹ vaa kà a mị?”

¹¹ Di Ijonatani kà Idevidi ọ̀ vẹ dị ẹnị ẹ̀ jịnẹ nọ ịnị avị nị. Dị ẹnị ẹyịva si hu aa nọ ịnị avị nị.

¹² E mè tù ịzọọ di Ijonatani kà a yi Idevidi dị ọ ka ọnị ộ sị Ẹnẹyịmavara ana vị Ohomorihi Anisirẹrị tẹ ivenu, ka â nyị ọnị mẹmẹ vaa họ̀ ada anị irenu wụ, ịnị ụmẹ aanị uhurenyi. Ọ kà ada anị ọ̀ọ ka ọyịza Idevidi, dị ọnị tụ́ na kà a yọ.

¹³ Ọ kà àa vị ada anị èe sì ka ọnị ọ̀ mẹ̀ ẹ ịrẹyị odivi ịzẹyịza nị, ọnị vaa tụ́ naa kà a yị Idevidi, dị ọnị ọ̀ mẹ ka ò zwe dị asị a nyị ịsị ẹ mẹ̀ ẹ. Ọ kà ọnị ọ̀ yị vavọọ mẹ dị asị Ẹnẹyịmavara zẹẹ ka ò zoza yị ọnị. Dị ọ rẹ ka Ẹnẹyịmavara ọ̀ yà pè Idevidi anka ọ mẹ̀ yà pè Ịsọọrụ ada anị nị.

¹⁴ Di Ijonatani rẹ ka, “Màa yị yà ẹhẹ, navọ wa tamayị eku ọnị ị hị́ yị ẹngụ dị wa vayị amị, dị asị ụ wụ̀ mị.

¹⁵ Àa vị mi ne wusu nị, dị ụ navọ wa tamayị eku ọnị ẹmịrị ẹwụ hị́ yị ẹngụ, dị asị u hi ayị aneehi amị pooro. Ẹnẹyịmavara ọ̀ọ daka raà wụ̀ avaba ọnịvị awụ hụrẹ ẹhẹ.”

¹⁶ Di Ijonatani hị́ eku yị aneehi Idevidi dị ọ ka, “Ẹnẹyịmavara ọ vaa sị họ̀ ọnịvị Idevidi nị.”

¹⁷ Dị Ijonatani ka Idevidi ọ̀ rẹ hị́ eku ka ọnị ô sì ịrẹyị ọnị Ijonatani nị. Ijonatani vị ana nyayịnẹ sì ịrẹyị Idevidi anka ẹngụ anị ụvọta.

¹⁸ Di Ijonatani kà a yị Idevidi dị ọ ka wâ yẹ ka ụhwọọ ọ vị eche Ụhwẹ Ọwọọwa nị. Ẹ yị nyị ọza ana vaa yà ịzị ụụ̄ yà, agụvị avọọ e vee sì wụ.

¹⁹ Uhurenyi dị ụ sẹ chi nọ ịzị ụ tẹ tụ́ ịhị ọnọọ. Dị wụ vaka gụrị Ịrẹta Azeeri.

²⁰ Mi vee ne ọpa ẹẹta nọ akaha ịrẹta ọnọọ, dị ọ sị mẹ̀ ẹ ka vị a nyị ịsị mee sì ka me si che nị.

²¹ Dị mị kà a yị ozi ahụ amị ka ọ̀ na kụ́ ọpa ẹnẹẹ va mị. Màa ka ẹ yị ozi ọnọọ ka ọpa ẹnẹẹ hi akaha anị ịzẹnị kụ́ wa va mị, dị wụ yẹ ka ẹ yị nyị ịrẹyị, dị waa vẹ.

²² Ama màa kà a yọ ka ọpa ẹnẹẹ hi ọvịdị awụ ịzọọ, di waa na ka vị Ẹnẹyịmavara raà mẹ ka we zwe avọọ nị.

²³ Ịnị ịrẹyị ẹnị ẹmịrị ẹwụ kà aanị yẹ ka Ẹnẹyịmavara vị onivenu ẹmịrị ẹwụ.

²⁴ Di Idevidi tẹ tụ́ ịnị avị ịzọọ nị. Ịhị ẹkụhị eche ụhwẹ ọwọọwa si tù, di ohinọyị va yaayịtẹ dị aa rị ịsa nị.

²⁵ Ohinọyị vị ana yaayịtẹ ịzị ọ vịdị yịị yaayịtẹ ọgụrị ugene. Di Ijonatani ọnị kwẹẹtẹ, dị Abịna ọnị yaayịtẹ akaha Ịsọọrụ nị. Ama ẹ yị nyị ọza ana yaayịtẹ aha Idevidi,

²⁶ nyị ịsị Ịsọọrụ kà ịhị ọnọọ. Ô ro ka â nyị ịsị ẹ mẹ̀ Idevidi ana vị ịrẹyị enyisi. Ọ kà a yị zụ nyị ka ẹ yị vị a nyị ịrẹyị enyisi ene tù Idevidi.

²⁷ Eyinẹhẹ eni eche hụrẹ, ọza o yi rị re Idevidi, dị Ịsọọrụ va họ̀ Ijonatani ozi anị dị ọ ka sị ẹ vẹ di ozi Ijeese ọ̀ yị vẹ ini eche ọnọnị ẹẹrị ọnịrị ajịnị bẹẹ?

²⁸ Di Ijonatani kà a yị Ịsọọrụ dị ọ ka Idevidi ộ da ịpẹ yị ọnị ka aarịhịnị kwogwo à navọ dị ọnị ọ̀ nọ Ịbẹtịrẹhẹmị.

²⁹ Ọ kà aarịhịnị ma zẹẹ ọnị ọ̀ na, ka ẹnẹbẹnị anị a tụ́ hi ọnị ka â nyị ịsọvọ ana aa mẹ ịdị ẹnịnị, asị a nyị ka ọnị ọ yị vẹ. Ọ kà aarịhịnị emi èe nyị ọnị iyi, ẹ̀ ma navọ dị ọnị ò ne re ẹnẹbẹnị anị. Agụvị avọọ ộ yị vẹ ịzị ohinọyị yà aa rị ịsa nị.

³⁰ Ịsọọrụ ộ kụ́ ayị hi Ijonatani. Dị ọ ka, “Ẹwụ ozi ọnẹẹ kẹnẹ-kẹnẹ, ọnẹẹ anakamawụ ọnọnị. Maa yẹ ka ẹwụrị ozi Ijeese ọ ya nị. Ụhị ọ vaa nyị ẹwụrị ọnyị awụ nị.

³¹ Wáá yẹ ka ozi Ijeese ọ̀ọ yị yà ẹhẹ, wẹ yị va zụụ nyị ahụụ hi ẹtẹ, wẹ yị rẹ va zụụ rị ohinọyị. Tụ́ ne sị ọ va mị booro aanị dị ma wụ̀ ọ.”

³² Di Ijonatani rẹ tụ́ Ịsọọrụ ada anị ohi dị ọ ka, “Sị ẹ vẹ dị ụ ka waa wụ ọ? Sị ọ mẹ wụ?”

³³ Dị Ịsọọrụ ne ọha ana yarị ọ ka ọnị ọ̀ gu ọ chire Ijonatani nị. Di Ijonatani sị yẹ ka ịzẹyịza ada anị ọ sị ẹngụ tenyi ka ọnị ọ wụ Idevidi nị.

³⁴ Dị ahịka ọyịkụ-ọyịkụ Ijonatani sị kwẹẹtẹ hụrẹ ịzị a yà aa rị ịsa ịhị ọnọọ nị. Eyinẹhẹ eni eche hụrẹ aanị, ọ yị rị ịsa agụvị ka ayị aa kụ́ ọ ka ada anị aa zị ụsẹ ụtẹ agụvị ịrẹyị Idevidi.

³⁵ Ẹnẹnẹ viri-viri, di Ijonatani si hu ee nee tù Idevidi anka ẹ mẹ vịdị kà a tịtẹ nị. Ọ màa na, dị ọ sị ozweyi ọnya saasa ẹngụ nị.

³⁶ Di Ijonatani ka, “Aarịhịnị zwe echi na sì ọpa ọnị mèe ne.” Ozi ọnọọ mèe zwee aa na, di Ijonatani ne ọpa tụ́ ọvịdị anị nị.

³⁷ Ịjị ọ na ngụ ịzị Ijonatani ne ọpa nọ, di Ijonatani hị́ ọ dị ọ ka, “Ọpa ọnọọ yị ọvịdị awụ o!”

³⁸ Di Ijonatani nowu hị́ ozi ọnọọ dị ọ ka, “Wụsẹ buru, asị ụ jẹẹ.” Di ozi ọnọọ sị ọpa ọnọọ dị ọ sị va yị ọga anị nị.

³⁹ Ozi ọnọọ ọnị ọ yị yẹ ịsị a sị ịrẹyị ẹnẹẹ kà. Ama Idevidi ọnịrị Ijonatani kẹnẹ ẹnị ệ yẹ ịsị ẹ yaa kà nị.

⁴⁰ Di Ijonatani kụ́ ẹnya anị yị ozi ọnọọ dị ọ ka ọ̀ kụ́ ọ nọ ịnị ịda anị ịnị ẹkụra nị.

⁴¹ Ozi ọnọọ mẹ̀ si hu, di Idevidi kwẹẹtẹ hụrẹ akaha ịrẹta ịzị ọ tẹ tụ́ nị. Dị ọ tana tụra ẹtẹ kụ́ Ijonatani ụpẹ ẹẹta nị. Di e kú ẹngụ irenu di eyee sụ ùnè nị. Di ahịka Idevidi ee sụ ùnè hu nị.

⁴² Di Ijonatani ka Idevidi ọ̀ọ na ka ẹ yị vaa nyị ịrẹyị. Ọ kà ẹnị ẹ raà sị Ẹnẹyịmavara hị́ eku yị ẹngụ ka ọta ẹnị vị nị. Ọ kà Ẹnẹyịmavara ọ̀ vị onivenu tụ́ ịnị akakana ẹnịnị ọnịrị ozi ẹnịnị ịrẹma-ịrẹma pooro zịna-zịna. Di Idevidi sị hu, di Ijonatani ọnị re si hu aa nọ ịnị ẹkụra nị.