1 Ịsamụwẹrị 2 - IWE ỌNỊNỊ

Aduwa ọnị Ịhaana mẹ

¹ Ịhaana ộ mẹ̀ aduwa dị ọ kà, “Ẹnẹyịmavara ọ raà mẹ̀ ka maa jẹ ịrajẹ; Ayị amị vị ana nyayịnẹ hine agụvị ịsa ọnị ọ mẹ̀ yị mị. Ma nyẹngụ jẹẹ ọvịdị ọnịvị amị, di mee nyi wa unyi. Mâ dà jẹ kẹnẹ ka Ohomorihi ọ raà dọ mị tụ́.

² Ẹ yị nyị ọza ikonya ana vị ọnịnị anka Ẹnẹyịmavara. Ẹ yị nyị ẹngụ anị. Ẹ yị rẹ nyị ọza ẹnẹsa ene zu sere ọza anka Ohomorihi ayị.

³ Asị ụ rẹ maanị nyị irenu nịnị. Asị ụ re wo oto nịnị. Ẹnẹyịmavara ana vị Ohomorihi ộ yẹ avaba ịsa, ọnị ọọ̄ mẹ̀ ọkarẹyị avaba ịsa ọnị yaa mẹ̀ nị.

⁴ Ohomorihi o reè che ọkịta ọkụrẹkụ nịnị ana nyị ụkata. Dị ọ sị aza ana vịdị vị ọkụmị dị ọ vara wa ọnụkata nị.

⁵ Aza anaā vịdịị nyị dị ịnẹ aa ha wa vị ana kụkụ ya ahụ ọza dị ẹ̀ va rị ịsa. Dị ịnẹ aa ha aza ọnị ụngwẹẹ̄ vịdịị kụ̀, dị ayị hi wa ka ụngwẹ ộ vịdị kụ̀ ẹnị da nị. Ọnẹẹ ana vịdị vị ọbọrị vaa ma ezi ịhịmba, dị ọnyị ezi ọrụrụ vaa vara ọbọrị.

⁶ Ẹnẹyịmavara ọ zụ mẹ ka ọza ò sú, dị ọ rẹ zụ mẹ ka ọza ọ̀ yàra nị. Ọ zụ mẹ ka ọza ọ̀ nọ ini ikuta, dị ọ rẹ zụ mẹ ka ọza ọ̀ ha hụụnị ikuta jịnẹ vẹ nị.

⁷ Ẹnẹyịmavara ọ zụ mẹ ka aza ẹnyị ẹ̀ vị onosiye, dị ọsa ẹ̀ vị ọzọbanyị nị. Ọnị ọ kà aza ẹnyịị chi, dị ọ kà ọsa hịrẹ nị.

⁸ Ọ nyẹngụ sị oniruwa kwẹẹtẹ hụụnị eteesu, dị ọ vara a ọza obooro. Dị ọ mẹ ka ẹnịrị aza ẹbanyị è dudu yaayịtẹ, dị ẹnị rẹ nyị udi ọbanyị. Ẹnẹyịmavara ọ ká ẹhẹ ọnọnị ẹtẹ, dị ọ sị ẹhẹ jẹẹ ịrẹsụ anị nị.

⁹ Ohomorihi vi ene vee sere aza ana sị ayị tụra a. Aza ana aa mẹ̀ ebira edivi vị ọnị ọ vaa mẹ ka è vu tụ́ ịnị ịrahụ; ọza ẹ yị zụ sị ụkata anị ụvọta sị nyị ehuna ọnịvị anị.

¹⁰ Aza ana kwẹẹtẹ tù Ẹnẹyịmavara vị ọnị ọ vaa garaa ha. Apaana ihinẹba ọ vaa tụ́ụ hi wa nị. Ẹnẹyịmavara vaa mẹ̀ ọkarẹyị avaba anẹhẹ. Ọ vaa sị ụkataa yị ọza ọnị ọ sị mẹ ohinọyị, mị ka ọza ọnị ọ̀ọ nyị mẹ ohinọyị, vị ọnị ọ vaa sị ụkataa yị.”

¹¹ Ịjị ẹ sị mẹ ta, di Erikana si hu aa nọ eehi anị ana vị Iraama, dị Ịsamụwẹrị yà ahụ Eri dị aa mẹ ụkọrọọ yị Ẹnẹyịmavara nị.

Ebira odivi ezi Eri

¹² Ezi Eri vị ana aa mẹ̀ ebira odivi. Ẹnịnị ẹ yị hị́ ịrẹyị Ẹnẹyịmavara ịrẹyị.

¹³ Ịnị ụmẹ ọnọọ â nyị ịsa ọnya ọnị ohirẹsụ irehi Ohomorihi nịnịị beri azaa mẹ. Aza ẹ̀ẹ maanị sị uye va mẹ̀ ịsọvọ yị Ohomorihi dị aa chịnẹ ẹ nị, di ezi ịda ohirẹsụ irehi Ohomorihi sị osi ọnyị agẹgẹnẹ ẹẹta vẹ.

¹⁴ Dị ọ jị osi ọnọọ nyị ịnị ụnọkọ uye ọnọọ. Uye oni osi ọnọọ ọ̀ọ sị jịnẹ vẹ kẹnẹ dị ahịka ọnị ohirẹsụ irehi Ohomorihi sị nị. Avọọ ẹnịnị maa mẹ̀ avaba Anisirẹrị ana aa nọ Isiro nị.

¹⁵ Ana hyakụ divi hu ọ vị ka dị à va kụ́ ụhị uye ịsọvọ ka à na rị ọ ịra yị Ohomorihi, di ezi ịda ohirẹsụ irehi Ohomorihi ve tù aza ana aa mẹ̀ ịsọvọ dị ẹ ka aza ẹnẹẹ ẹ̀ sị uye yị ẹnị dị ẹnị è hù ọ na yị ohirẹsụ irehi Ohomorihi. Ẹ ka ohirẹsụ irehi Ohomorihi ọ yị vaa dọ uye ana a chịnẹ à yị vị ẹrẹẹrẹ.

¹⁶ Aza ana aa mẹ̀ ịsọvọ ẹ̀ẹ va kà ka ẹ̀ navọ de di à kụ́ ụhị uye ẹnẹẹ dị à rị ọ ịra da dị ẹ̀ va sị ẹnẹ ẹ̀ẹ ka ẹnị aa sị di ezi ịdị ohirẹsụ irehi Ohomorihi ẹnẹẹ ka ẹnị ẹ yị dọ. Dị ẹ ka ọza ọ̀ yị sị uye yị ẹnị, vị ẹnị aa sị ọ ụkata-ụkata nị.

¹⁷ Ebira odivi eni ezi Eri ẹnẹẹ vavọọ aa mẹ ộ nyị Ẹnẹyịmavara ịhyẹrẹ ẹtẹẹtẹrẹ. Ezi ẹnẹẹ ẹ raà sị eyi ịyẹyẹ re ịsọvọ ana aa mẹẹ yị Ẹnẹyịmavara.

¹⁸ Ịsamụwẹrị ọnị vi ene chire ịhamịra ana a sị ịta ozoza hi, dị aa mẹ ụkọrọọ yị Ẹnẹyịmavara.

¹⁹ Ịrayị-ịrayị ọnyị anị ọnịrị ọva anị vị ana aa zịị nọ Isiro dị ẹ na mẹ̀ ịsọvọ ana aā mẹ ịrayị-ịrayị. Ẹ̀ẹ vavọọ aa na, dị ọnyị Ịsamụwẹrị jị awuru oweyi chee aanị dị ọ sị za naa yọ.

²⁰ Èe tù ịzọọ di Eri mẹ̀ aduwa yị Erikana ọnịrị ose anị, dị ọ ka Ẹnẹyịmavara ọ̀ navọ ose anị ọ̀ ma ezi ọsa dị ọ sị dọ ịrẹsụ ọnị ọ pa hụụnị ụvọ Ẹnẹyịmavara dị ọ rẹ varẹma sị yọ. Àa maanị sị aduwa mẹ̀ yị wa, dị ẹ rẹ yaa nọ eehi nị.

²¹ Ẹnẹyịmavara ộ nyị Ịhaana iyi ẹtẹẹtẹrẹ. O re zyẹẹ tụra ẹngụ tụra ẹngụ dị ọ ma ezi anọrụ ẹẹta ọnịrị ezi anẹẹ ẹẹva. Ama Ịsamụwẹrị ọnị yị ya ịda Ẹnẹyịmavara, aa vịra.

²² Eri ana aa kà aanị o si bo ẹtẹẹtẹrẹ. Ộ wụ́ avaba ebira ẹnị ezi anị aa mẹẹ hi Anisirẹrị. Ọ rẹ wụ́ ka ezi anị vị ana aa za anyẹnẹẹ ana aa mẹ̀ ụkọrọ enoze ajẹngụ ịzị a yaà gụ, di e yee pè wa sụ.

²³ Dị ọ va hị́ ezi anị dị ọ ka, “Sị ẹ vẹ dị ụ maanị aa mẹ ẹngụ ebira ọnọnị nịnị aanị? Avaba aza aa kà a mị ẹngụ ebira odivi ọnị waa mẹ nịnị.

²⁴ Na za avọhi ezi emi! Ịrẹyị awụ nịnị ọnị avaba aza Ẹnẹyịmavara aa kà, e yi zoza vụrụ-vụrụ.

²⁵ Ọza ọ̀ọ mẹ ọza ebira odivi, Ohomorihi ọ zụ ba ọza ene e sì ịrẹyị owu. Ama ọza ọ̀ọ na mẹ̀ ebira odivi hi Ẹnẹyịmavara, ẹnẹ kụkụ vaa dá ịpẹ anị?” Ama ezi anị ẹ yị sị ụtọ tụ́ ịnị ohuvọ ana ada ẹnịnị aa tụ́ wa agụvị ka Ẹnẹyịmavara ọ raà nyị ọ tụ ịnị ayị ka ọnị ọ̀ wụ̀ wa.

²⁶ Ịsamụwẹrị ọnị vị ana aa yịị hụ. Aza ê sì ịrẹyị anị, avọọ Ẹnẹyịmavara ọnị mè re sì ịrẹyị anị nị.

 kà ovwoovu Eri ọ̀nọ̀

²⁷ Ẹkụhị ọnya ọza Ohomorihi ọnya aanị ộ va kà ụtụ ọnị Ẹnẹyịmavara tụ́ hi Eri. Ọ kà ụmẹ ọnị óhiku ẹnịnị sị vị ọrịhị tụ́ ịnị ụvọ ohinọyị Anijipiti, ọnị ộ sị ẹngụ anị zụ̀ wa.

²⁸ Ọnị ộ nyị ohiku ẹnịnị tụ́ irenyi hụụnị avaba Anisirẹrị ana vọ ka ẹ vị ohirẹsụ irehi anị nị. Ohomorihi ka ẹnị ọnị kà a ka ẹ vaa rị eturare ịraa yị ọnị ịnị ụta, dị ẹ̀ ree chire ịharamịra ene e siī sì iruvo ịrẹyị ịnị ụvọ anị. Dị ọnị rẹ ka avaba ịsọvọ ana aā rị ịra ana Anisirẹrị ẹ̀ẹ va mẹ, ohiku ẹnịnị a vaa kụ́ ọ yị nị.

²⁹ Sị ẹ vavẹ dị ụ maanị aa sị eyi ịyẹyẹẹ re ịsọvọ ọnị ọnị kà a ka aza ẹ̀ẹ sị vẹ di ahịka ezi ewu ụ sị ụbanyị yị hu ọnị Ohomorihi nị, dị ụ navọ ka ezi ewu ẹ̀ẹ kụ́ ene zoza hu ịnị ịsa ana Anisirẹrị sị va yị ọnị dị waa chakaa rị nịnị?

³⁰ Ebira ọnị ụ maanị mẹ nịnị aanị, Ẹnẹyịmavara ana vị Ohomorihi Anisirẹrị ka vị ọnị vịdị kà a ka obooro awụ nịnị ọ vaa mẹ ụkọrọọ yị ọnị ini eehi anị pooro nị. Ama Ẹnẹyịmavara kà ọnị ọ yị kụkụ vavọọ zẹẹ. Ọ kà ọza ana àa sị ụbanyị yị ọnị, dị ọnị rẹ sị ụbanyị yị ọza ọnọọ. Ama ọza ana àa sị eyi oweyi re ọnị vị ọnị ọnị rẹ vaa tẹ.

³¹ Ohomorihi ka â nyị ụmẹ ọnị ọnị va sị wụ̀ avaba ozwọọmụha ene hi ini ovwoovu awụ, dị ẹ yị kụkụ nyị ọza ana vaa vị ọzọkụ tụ́ ini ovwoovu awụ.

³² Ịjị mèe re ka ọnị aa mẹ ka ò zee yị Anisirẹrị ana vọ, ọ vaa vá wụ, dị ayị awụ ee du. Ama anovwoovu awụ e mē vene kú orubo pàá.

³³ Ọza ịnya kẹnẹ ini aneehi awụ ọnị vaa navọ nị ka ọ̀ọ mẹ ụkọrọọ yị ọnị dị ọ̀ vị ohirẹsụ irehi Ohomorihi. Ama ọnọọ vị ana vaa mẹ ka we sụ ùnè uhu pooro di eyi awụ nini kụ́ gu. Vị ọ vaa mẹ ka ayị awụ nịnị ò du ẹtẹẹtẹrẹ nị. Avaba anovwoovu awụ vi ene venee sú ẹ̀ẹ ta jẹẹ ịnị ụmẹ.

³⁴ Ezi ewu ẹyịva, Ihohwini ọnịrị Ihwinehasi vi ene vee sú ịnị ẹkụhị ọnya. Ọnọọ vaa sị zụ̀ wụ ka ịrẹyị aa vẹ ịrẹsụ awụ nịnị.

³⁵ Ohomorihi ka â nyị ọza ẹnẹsa ọnị ọnị vaa nyị ka ọ̀ vi ohirẹsụ irehi anị. Ọza ọnọọ vaa sị ayị ọnyaa mẹ̀ ụkọrọ ọnọọ. Avaba ịsa oni Ohomorihi òo sì ọ vaa mẹ nị. Ọ kà ọnị vaa mẹ ka ọza ọnọọ ọ̀ na ozi, di ezi ẹnẹẹ aa mẹ̀ ụkọrọ pooro ịda ọza ọnị ọnị Ohomorihi vaa nyị ka ọ̀ vị ohinọyị.

³⁶ Àa na nyị anovwoovu awụ ana vọ tụ́ ẹhẹ, ẹnịnị vị ana vaa nọ ịda ohirẹsụ irehi Ohomorihi ọnị maa kà aanị, dị ẹ naa pà ẹkẹhị ọnịrị ịsọyịrị. Ẹ va naa dá ịpẹ ka à navọ ẹnị ẹ̀ẹ mẹ ọgụvọọ yị ohirẹsụ irehi Ohomorihi ịsavọọ ẹnị è zụ re ịsa rị.