1 Ịsamụwẹrị 19 - IWE ỌNỊNỊ

Ịsọọrụ aa bàrà Idevidi

¹ Ịsọọrụ ộ hị́ ozi anị Ijonatani ọnịrị avaba ezi ahụ anị dị ọ ka ẹnịnị ẹ̀ wụ Idevidi nị. Ama Ijonatani oni ô sì ịrẹyị Idevidi ẹtẹẹtẹrẹ.

² Dị ọ na kà a yị Idevidi dị ọ ka, “Ada amị ee sì ka ọnị ọ̀ wụ̀ wụ. Re ka waa sị eyi pè ẹngụ awụ, o! Ẹnẹnẹ ụhwọọ viri-viri zwe di we sì aha dị wa na tẹ̀ tụ́ ịzọọ.

³ Mị vaa jịnẹ dị mị na jẹẹ pè ada amị ịnị avị ịzị ụ yà. Mị vaa kà ịrẹyị awụ yọ, ịsị ọ̀ọ kà, dị mị va kà a wụ.”

⁴ Ijonatani ộ kà ọyịza Idevidi yị Ịsọọrụ ada anị. Ọ kà, “Taarụ, asị a nyị ịsị ụ sị mẹ Idevidi agụvị ka ẹ yị nyị ọ mẹ̀ kà wụ. Avaba ịsa oni Idevidi mẹ vị ọnị ọ nyayịnẹ sị mẹ ọgụvọ wụ.”

⁵ Dị ọ rẹ ka, “Idevidi vị ana sị ịrẹsụ tụ́ isu dị ọ na wụ Igorayati Anihwirisiti. Ọ kà Ịsọọrụ ô re e Ẹnẹyịmavara mẹ ka Anisirẹrị è huna ọnịvị ẹnịnị, dị ọnị ụvọta hyakụ aa jẹ nị.” Di Ijonatani rẹ ka, “Wàa wụ Idevidi dị wa yẹ ka ebira odivi ụ mẹ nị agụvị ka ẹ yị nyị ịsị ọ mẹ.”

⁶ Ịsọọrụ ộ wụ́ ịrẹyị Ijonatani, dị ọ sị Ẹnẹyịmavara hị́ eku ka ọnị ọ yị vaa wụ̀ Idevidi nị.

⁷ Di Ijonatani va na hí Idevidi dị ọ vavọọ kà avaba ịrẹyị ẹnẹẹ yọ nị. Di Ijonatani sị Idevidi nọ ịda Ịsọọrụ dị ọ rẹ yà ịda anị anka ịyẹẹyẹ nị.

⁸ Ẹkụhị ọnya ịrẹkụ ọ rẹ sị chi yị Anihwirisiti ọnịrị Anisirẹrị. Di Idevidi rẹ na, dị ọnịrị Anihwirisiti nịnị na kụ̀ ịrẹkụ nị. Idevidi ộ wụ̀ Anihwirisiti va ha ẹtẹẹtẹrẹ, dị ẹnị ana vọ si zwe nị.

Imikari ộ gụ Idevidi ụvọ ka o zwe

⁹ Ẹkụhị ọnya dị Ịsọọrụ yaayịtẹ ini eehi anị, dị ọ sị ọha anị rị ụvọ nị. Idevidi ọnị vị ana rẹ yà ịzọọ di ee hú agidibo anị Dị Ẹnẹyịmavara tụ́ ka ụhwẹ odivi ò chi kú Ịsọọrụ ịrẹsụ nị.

¹⁰ Dị Ịsọọrụ ka ọnị ọ̀ gụ ọha chire Idevidi na za ugene nị. Di Idevidi maanị ya yẹ dị ahịka ugene ọha anị va na za nị. Ịrahụ ịhị ọnọọ, di Idevidi si zwe nị.

¹¹ Dị Ịsọọrụ tụ́ aza nọ ịnị eehi ịda Idevidi ka è ne bè e, dị ẹ̀ wụ ọ ẹnẹnẹ nị Dị Imikari ana vi ose Idevidi va hị́ ọ dị ọ ka ò yi zwe ịrahụ ajịnị, òo nee tù ẹnẹnẹ ụhwọọ, a sị ọ wụ.

¹² Dị Imirikari sị Idevidi zị oze ini ozokete chi hi ẹtẹ, di Idevidi si zwe nị.

¹³ Dị Imikari sị ọchị ana a bẹ anka ọza avọọ ẹnị ẹ nyị tụ́ ini eehi, dị ọ sị ọ na tụ́ aha ọyịsụ, dị ọ sị ịta kú ọ nị. Dị ọ rẹ sị ụpa ẹvụ di o si kú ọ ịrẹsụ nị.

¹⁴ Ịjị Ịsọọrụ tụ́ ka à na za Idevidi vẹ, di Imikari ka vị ẹngụ aa zị Idevidi nị.

¹⁵ Dị Ịsọọrụ rẹ tụ́ ọnụtụ anị dị ọ ka ẹ̀ vavọọ na sị Idevidi ọnịrị aha ọyịsụ anị va yị ọnị dị ọnị ọ̀ wụ ọnị.

¹⁶ Ịjị ọnụtụ ẹnẹẹ ngụ ini eehi Idevidi di e ne tù ka ọchị ana a bẹ a sị tụ́ ịzọọ, dị a sị ịta kú ọ ịrẹsụ nị.

¹⁷ Dị Ịsọọrụ va hị́ Imikari dị ọ ka sị ẹ vẹ dị ọ maanị vene ọnị, dị ọ zẹẹ ka ọnịvị ò zwe. Dị Imikari ka vi Idevidi kà a ka ọnị ọ yị zẹẹ ka ọnị ò zwe, vị ọnị aa wụ ọnị nị.

Ịsamụwẹrị ộ gụ Idevidi ụvọ ka o zwe

¹⁸ Idevidi o si zwe, dị ọ na ngụ ịda Ịsamụwẹrị Iraama nị. O mè tù ịzọọ, dị ọ kà a yị Ịsamụwẹrị avaba ịsa ọnị Ịsọọrụ mẹ̀ ẹ nị. Dị ọnịrị Ịsamụwẹrị si hu, dị ẹ na yà Inayoti nị.

¹⁹ Dị a na sị ọ kà yị Ịsọọrụ, dị a ka Idevidi yà Inayoti ịnị ẹtẹ Iraama nị ộ!

²⁰ Dị Ịsọọrụ tụ́ ka à na za a vẹ nị. Ọnịtụ ẹnẹẹ ê re ka anyị ọnịsẹ ẹnyị aanị ana aa kà ịsẹ, dị Ịsamụwẹrị ọga ẹnịnị jẹẹ pè wa nị. Ọnịtụ Ịsọọrụ mẹ̀ vavọọ re wa, dị ụhwẹ Ohomorihi ngụ wa ẹngụ, dị ẹnị rẹ kụkụ aa kà ịsẹ nị.

²¹ Dị a va sị ọ kà yị Ịsọọrụ nị. Dị ọ rẹ tụ́ aza ẹnẹsa na, dị aza ẹnẹẹ ẹnị raa kà ịsẹ e mè tù ịzọọ nị. Ịsọọrụ ọ rẹ tù anọhụta na, dị ahịka vị ẹnị raa kà ịsẹ e mè tù ịzọọ nị.

²² Dị Ịsọọrụ ọnị ụvọta si hu aa nọ Iraama nị, dị ọ nọ ịnị ịkangga ọbanyị ana yà Iseku nị. O mè tù ịzọọ di o họ̀ use ka ịzị Ịsamụwẹrị ọnịrị Idevidi yà nị. Dị a kà a yọ ka ẹnịnị hi Inayoti ịnị ẹtẹ Iraama.

²³ Dị Ịsọọrụ si hu aa nọ Inayoti ịnị ẹtẹ Iraama nị. Ọ màa na ózee, dị ụhwẹ Ohomorihi rẹ ngụ ọnị ẹngụ dị ọnị ịnyẹmba ọnị raa ka ị́sẹ pooro, dị ọ va na ngụ Inayoti nị.

²⁴ Dị Ịsọọrụ yà eyi Ịsamụwẹrị dị ọ ngwa awuru anị dị ọnị raa kà ịsẹ nị. Dị Ịsọọrụ vavọọ hụtụ pooro ọọdụ ọnịrị ịrahụ nị. Ọnị ọ mẹ ana a sịị̄ kà a ka, “Anị ka vị Ịsọọrụ ọnị rẹ yà ịnị ọnịsẹ nịnị nị?”