1 Ịsamụwẹrị 15 - IWE ỌNỊNỊ

Ịsọọrụ ọnịrị Anamarẹkị ệ kụ̀ ịrẹkụ

¹ Ẹkụhị ọnya dị Ịsamụwẹrị hị́ Ịsọọrụ dị ọ kà, “Wâ yẹ ka ẹmị ọnọnị Ẹnẹyịmavara tụ́ ka ọ̀ va sị wụ rị ohinọyị tụ́ ịrẹsụ Anisirẹrị aza anị nị. Batọ dị wa wụ́ ụtụ ẹnị Ẹnẹyịmavara tụ́ mị hi wu.

² Ẹnẹyịmavara Ochẹtẹẹngụ ka ọnị vaa sị ụyaa rị Anamarẹkị agụvị ịsị ẹ sị mẹ Anisirẹrị ózee ẹ mẹ̀ hụrẹ Ijipiti aa vẹ. Anamarẹkị vị ana na jẹẹ ózee zi wa.

³ Kwẹẹtẹ booro aanị dị wa kụ́ ịrẹkụ ne tù Anamarẹkị di u we du avaba ịsị ẹ̀ẹ nyị va ha. Za avaba ẹnịnị saka-saka dị wa wụ̀ wa, asị a nyị ọnị ụ navọ. Ọnọrụ ọnịrị anẹẹ vị ọnị ụ vaa wụ̀. Dị ụ rẹ wụ ezweyi ọnịrị ezinụvọ ne beri imaaru, atẹmẹ, ọnịrị ịnyaakụmị ne beri ịkẹrịkẹtẹ.”

⁴ Ịzẹyịza dị Ịsọọrụ hị́ isoja anị dị ọ kụ́ wa gụ ịzị aā hị́ Ịtẹrayimi nị. Ẹnịnị vị akawụ-akawụ oze ẹchẹhị. Ẹnị ẹnẹẹ vi isoja ẹnẹ ẹ̀ yị nyị umaata. Ẹnị isoja ana hụrẹ Ijuda vẹ vị ẹnị akawụ-akawụ oze ẹẹhị.

⁵ Dị Ịsọọrụ ọnịrị isoja anị nọ Amarẹkị, dị ẹ na tẹ̀ ini ozi aha ọnya ịzọọ nị.

⁶ Dị Ịsọọrụ kà a yị Anikenani nịnị dị ọ ka ẹ̀ hụụ ịda Anamarẹkị nịnị ka à yị vị avọọ ọnị va wụ̀ wa beri wa. Ọ kà Anikenaani ệ mẹ̀ ebira ẹtẹẹrẹ hi Anisirẹrị ẹnịnị mẹ̀ hụrẹ Ijipiti aa vẹ. Ịzẹyịza dị Anikenani nịnị hụụ ịda Anamarẹkị nị.

⁷ Ịsọọrụ nịnị ọnịrị Anamarẹkị ệ gẹ ịrẹkụ dị ahịka Ịsọọrụ nịnị o huna wa nị. Ịrẹkụ ọnọọ vị ẹnị ẹ kụ̀ hụrẹ ịzị aā hị́ Ihavira pooro na ngụ ọgụrị Ijipiti.

⁸ Ịsọọrụ ộ za ohinọyị Anamarẹkị ana aā hị́ Agagị, ọ yị wụ ọ. Ama avaba aza ohinọyị ana vọ vị ọnị ọ sị ụ̀hwọ̀ wụ̀ va ha bemi-bemi.

⁹ Ịsọọrụ ọnịrị isoja anị ẹ rẹ vaa wụ̀ Agagị ọnịrị atẹmẹ ne beri imaaru ẹnịnị ene zoza dị ọ banyị. Avaba ịsa ene zoza vị ẹnị ẹ navọ, ẹ yị zẹẹ ka ẹnị ẹ̀ wụ̀ wa va ha saka-saka. Ama avaba ịsa ẹnẹ ẹ̀ yi zee ọza eyi ana ahịka ọkụmị ẹ vị nị vị ẹ wụ̀ va ha saka-saka.

Ohomorihi ộ sị Ịsọọrụ hụụnị ohinọyị

¹⁰ Dị Ẹnẹyịmavara va hị́ Ịsamụwẹrị dị ọ ka,

¹¹ “Ộ zị mị ẹngụ ka mâ sị Ịsọọrụ rị ohinọyị. Ộ raà vara ayị anị tu mị. Ộ yị mẹ ịsị mị ka ọ̀ na mẹ.” Ịrẹyị ọnọọ ô du Ịsamụwẹrị ayị, dị ahịka vi o ji orere pooro hi Ẹnẹyịmavara ẹngụ ịrahụ ọyịvụrụ nị.

¹² Ẹnẹnẹ viri-viri eyinẹhẹ anị, dị Ịsamụwẹrị kwẹẹtẹ ka oni ò ne tù Ịsọọrụ nị. Dị a va kà a yọ ka Ịsọọrụ ọ zị nọ Ịkamẹrị nị. A ka ộ mẹ̀ ịsa ọnya tịtẹ ịzọọ ka a sịị tamayị anị, dị ọ va hụụ ịzọọ dị aa nọ Igirigari.

¹³ Ịjị Ịsamụwẹrị ne si tù Ịsọọrụ, dị Ịsọọrụ kụ́ ọ nị, dị ọ ka ụtụ ẹnị Ẹnẹyịmavara tụ́ ọnị, ọnị ọ sị ọ zị.

¹⁴ Dị Ịsamụwẹrị kà, “Wàa sị ụtụ ọnọọ zị, ẹnẹ va nyị atẹmẹ ọnị maa wụ́ owu aanị? Ẹ̀nẹ rẹ nyị imaaru ana maanị ee nowu aanị?”

¹⁵ Dị Ịsọọrụ ka, “Isoja nịnị ẹ navọ Imaaru ọnịrị atẹmẹ ene zoza hu ịnị ịsụpa Anamarẹkị nịnị, dị ẹ kụ́ wa vẹ ka à sị va mẹ̀ ịsọvọ yị Ẹnẹyịmavara ana vị Ohomorihi awụ nọ! Ama avaba ịsa ana vọ vị ọnị ị wụ̀ va ha.”

¹⁶ Dị Ịsamụwẹrị kà, “Ô zee! Jẹẹ ma kà a wụ́ ịrẹyị ẹnị Ẹnẹyịmavara kà mị ịrahụ ẹẹrị.” Dị Ịsọọrụ ka ọ̀ọ ka a nị.

¹⁷ Dị Ịsamụwẹrị ka, “Wáā yẹ ka wê yi vịdị ro o ka waa bẹrị ọza, dị Ẹnẹyịmavara sị wụ vị ọdọvịdị Anisirẹrị nị. Dị ọ nyị wụ ka wa vị ohinọyị Anisirẹrị.

¹⁸ Dị ọ va tụ́ wụ ụtụ dị ọ ka wa na wụ̀ avaba Anamarẹkị va ha nị, agụvị ka ebira ẹnịnị ẹ sị divi. Ọ kà wa kụ́ ịrẹkụ ne tù wa, dị wa wụ̀ wa va ha saka-saka.

¹⁹ Sị ẹ vavẹ dị ụ mẹ̀ akamawụ hi Ẹnẹyịmavara? Sị ẹ vẹ dị ụ maanị mẹ̀ ebira odivi ini eyi Ẹnẹyịmavara dị ụ na kụ́ ogu oni u re éyi ịrẹkụ?”

²⁰ Dị Ịsọọrụ ka, “mâ zị ụtụ ọnị Ẹnẹyịmavara tụ́ mị de! Mâ nọ ịzị ọ ka ma nọ dị mị na wụ̀ avaba Anamarẹkị nịnị, dị mị za Agagị ohinọyị ẹnịnị vẹ nị.

²¹ Isoja nịnị ệ kụ́ atẹmẹ ọnịrị imaaru ene zoza hu ịnị ịsụpa aza ẹnẹẹ vẹ ka à sị va mẹ̀ ịsọvọ yị Ẹnẹyịmavara ana vị Ohomorihi awụ Ígarigari.”

²² Dị Ịsamụwẹrị tụ́ ohi dị ọ ka, “Wáá yẹ ka Ẹnẹyịmavara o yi sì ịrẹyị ịsọvọ anka o mè sì ka ọza ọ̀ọ wụ́ ịrẹyị ọnị ọnị ọ̀ọ kà. Ọza ọ̀ọ mẹ̀ ịsa ẹnị Ẹnẹyịmavara kà ô huna ịsọvọ ẹbanyị-ẹbanyị ana azaā mẹ.

²³ Ọza ana aa mẹ akamawụ vị ana rị ịvị anka ọza ana aa há ẹva. Aza ene re ẹngụ ẹnịnị hu ịsa ọsa ọnịrị aza ana aa mẹ ori vị ana rị ịvị ọnya-ọnya. Ụ ka wẹ yị kụkụ saasa ịrẹyị Ananyị yị, ọnị ọ rẹ raà sị wụ hụụnị ohinọyị.”

²⁴ Dị Ịsọọrụ va kà a yị Ịsamụwẹrị dị ọ ka, “Ma sị ebira odivi mẹ̀, ma raà jịnẹ ọda ọnị Ẹnẹyịmavara mẹ̀ ọnịrị ịrẹyị ọnị ụ kà yị mị. Aza ana saasa mị nọ ịrẹkụ mi ne hí angwa anị, dị mị na dọ ooho yị wa nị.

²⁵ Aarịhịnị navọ wa sị ayị hụụnị ebira odivi ọnị mị mẹ̀ dị wa saasa mị varẹma, dị ma na hẹkẹ Ẹnẹyịmavara.”

²⁶ Dị Ịsamụwẹrị tụ Ịsọọrụ ohi ka, “Mẹ yị zụ saasa wụ varẹma na agụvị ka we re yi ịrẹyị Ẹnẹyịmavara tịtẹ. Agụvị avọọ Ẹnẹyịmavara ọnị o rere yi wu ka asị ụ kụkụ vị ohinọyị Anisirẹrị.”

²⁷ Dị Ịsamụwẹrị vara eyi ka ọnị ọ̀ hụụ ịda Ịsọọrụ, dị Ịsọọrụ za ụtọ awuru anị dị ọ na tụ ọ ụvọ nị.

²⁸ Dị Ịsamụwẹrị kà a yọ dị ọ ka, “Hụrẹ ẹhụrẹhụ ajịnị, Ẹnẹyịmavara ọ raà hụrẹ wụ kwooze hụnị ohinọyị Anisirẹrị yị ọnọhụva awụ ana dahi huna wụ ka ọ̀ kụkụ vị ohinọyị.

²⁹ Wâ yẹ ka Ohomorihi Anisirẹrị ana nyị ụbanyị o mē cheeche. Ịsị ọ̀ọ ka ọnị aa mẹ aā mẹ nị. Ọ mā mẹ̀ ebira anka ọzarẹyịrẹsụ ana aā vara ayị pooro.”

³⁰ Dị Ịsọọrụ tụ́ ohi dị ọ ka, “Mâ yẹ ka ma sị akụvị mẹ, ama navọ asị ụ mẹ̀ ụhị nyị mị ịnị eyi ọdọvịdị aza amị ọnịrị Anisirẹrị. Navọ wa saasa mị varẹma dị ma na hẹkẹ Ẹnẹyịmavara ana vị Ohomorihi awụ.”

³¹ Ịzẹyịza dị Ịsamụwẹrị saasa Ịsọọrụ varẹma dị ọ na hẹkẹ Ẹnẹyịmavara nị.

Ịsamụwẹrị ộ wụ̀ ohinọyị Agagi

³² Dị Ịsamụwẹrị ka ọ̀ sị Agagị ohinọyị Anamarẹkị ve tù ọnị nị. Agagị ọnị màa vẹ, dị aa jẹ nị, di ee ro o ka ọnị ộ yẹ ka ẹ yị kụkụ nyị ịrẹyị isu ana vịdị maanị ee hí ọnị angwa ẹnẹmẹhị.

³³ Dị Ịsamụwẹrị kà a yị Agagị dị ọ ka, “Wa raà wụ̀ aza, wa sị ọnyị ẹnịnị vara ọbọrị. Avọọ ọnyị ẹwụ ọnị mẹ rẹ kụkụ vaa vara ọbọrị ịnị anyẹnẹẹ nị.” Dị Ịsamụwẹrị wụ Agagị ọvịdị Ẹnẹyịmavara Igirigari nị.

³⁴ Dị Ịsamụwẹrị si hu dị aa nọ Iraama nị. Dị Ịsọọrụ ọnị aa nọ eehi anị ịzị aā hị́ Igibiya Ịsọọrụ nị.

³⁵ Pooro dị Ịsamụwẹrị su, ọ yị vana si eyi gẹrị Ịsọọrụ. Ama Ịsamụwẹrị vị ana aa jị òrèrè Ịsọọrụ. Ộ zị Ẹnẹyịmavara ẹngụ ka ọnị ộ sị Ịsọọrụ mẹ ohinọyị Anisirẹrị.