1 Ịsamụwẹrị 10 - IWE ỌNỊNỊ

Ịsamụwẹrị ộ nyị Ịsọọrụ ka ọ̀ vị ohinọyị

¹ Ịsọọrụ mẹ̀ jẹẹ ee zi Ịsamụwẹrị, dị Ịsamụwẹrị na sị angwẹ tụ́ ịnị ịsa vẹ nị. Ọ mẹ̀ vẹ, dị ọ và angwẹ ọnọọ hi Ịsọọrụ ịrẹsụ nị. Ịjị ọ vavọọ sị angwẹ và hị́ ọ ịrẹsụ, dị Ịsamụwẹrị kụ́ ọ anka a mẹ̀ẹ kụ́ ohinọyị nị, dị ọ ka Ẹnẹyịmavara ọ sị ọ nyị ka ọ̀ vị ohinọyị Anisirẹrị ana vị aza ọnị Ohomorihi.

² Dị Ịsamụwẹrị rẹ ka Ịsọọrụ ọ̀ sị hụụ ịda anị ajịnị, ọ va naa gẹrị aza ẹnị ẹẹva ọgụrị ikuta Irechẹrị ana yà Izeriza. Ịzọọ vị ana yà ụtọ ẹtẹ Ịbẹnjamịnị. Ọ kà aza ẹnẹẹ vaa kà a yị Ịsọọrụ ka a sị ịkẹrịkẹtẹ eni e nee sì re. Ọ kà ẹ rẹ vaa kà a yọ ka ada anị o yi kuku ro ịrẹyị ịkẹrịkẹtẹ ẹnẹẹ, ama ịrẹyị Ịsọọrụ nịnị ọ kụkụ jị ọ areyi nị.

³ Ịsamụwẹrị ka Ịsọọrụ ọ̀ọ sị hụụ ịzọọ, dị ọ̀ nị na pooro dị ọ̀ na ngụ ịzị ọchị ooki ọbanyị ọnya yà ịnị ẹkụra ana aā hị́ Ịtabọ. Ọ kà â nyị ọnọrụ ẹẹta ana aa nọ ịnị irehi Ohomorihi Ịbẹtẹrị ana vaa gẹrị Ịsọọrụ ịzọọ. Ọ kà ọnya ịnị aza ẹnẹẹ vaa kụ́ ozi ẹvụ ẹẹtaa za, dị ọsa kụ́ ịbụrẹẹdị ẹẹta rị ụvọ, dị ọsa ọnị rẹ za eche ana a sị tụ́ ịnị ịtụmpaha uye.

⁴ Dị Ịsamụwẹrị rẹ ka aza ẹnẹẹ vaa kụ́ Ịsọọrụ, dị ẹ sị ịbụrẹẹdị ẹẹva yọ. Ọ kà ẹ̀ẹ vavọọ sị yị Ịsọọrụ, Ịsọọrụ, dị ọ̀ dọ ọ.

⁵ Dị Ịsamụwẹrị ka Ịsọọrụ ọnịrị aza ẹ̀ẹ vavọọ si gẹ, dị Ịsọọrụ ọ̀ọ nọ ịnị ataba Ohomorihi ana yà Igibiya. Ọ kà Anihwirisiti nịnị ệ kụ́ udi tụ́ ịzọọ. Ọ kà Ịsọọrụ àa vaa ngụ ẹkụra ọnọọ, ọ vaa gẹrị ọnịsẹ ẹnyị aanị ana hụrẹ aha ịsọvọ aa vẹ. Ọ kà aza vee hú agidibo irenyi-irenyi, okokoro ọnịrị ọkangga tụ́ ọvịdị ẹnịnị, dị ẹ rẹ yàa kà ịsẹ.

⁶ Di Ịsamụwẹrị rẹ ka ịjọnọọ Ẹnẹyịmavara vaa tụ́ Ụhwẹ anị dị ọ na ngụ ịnị Ịsọọrụ, dị ọ mẹ ka Ịsọọrụ ọ̀ nyị ụkata, dị ọnịrị ọnịsẹ ẹnẹẹ kụkụ aa kà ịsẹ. Ịsamụwẹrị ka Ohomorihi vaa mẹ ka Ịsọọrụ ọ̀ vara, dị ọ vị ọza irenyi.

⁷ Dị Ịsamụwẹrị rẹ ka ịjị avaba ịrẹyị ẹnẹẹ ẹ̀ẹ sị sẹ tụ́ ịrẹsụ Ịsọọrụ ịsa tụra ịsa oni Ohomorihi ọ̀ọ́ ka ọ̀ mẹ, ọ̀ mẹ̀ ẹ, ka Ohomorihi vaa yàa pè e.

⁸ Dị Ịsamụwẹrị ka Ịsọọrụ ọ̀ dọ ọvịdị dị ọ̀ọ nọ Igirigarii zi ọnị, ka ọnị ee nee tù ọ ịzọọ. Ọ kà ọnị òo tù ịzọọ ọnị vaa mẹ̀ ịsọvọ ana aā rị ịraa yị Ohomorihi, ọnịrị ịsọvọ ana aā mẹ ka aza ẹ̀ nyị ẹngwọọrọ. Ọ kà Ịsọọrụ ọ̀ jẹẹ zi ọnị mẹ ẹkụhị ịhịmba dị ọnị ọ̀ va kà a yọ ịsị a vọrọ ka ọ̀ mẹ.

Ịsọọrụ ộ kà ịsẹ

⁹ Ịsọọrụ mẹ̀ yị hụụ ịda Ịsamụwẹrị ka ọnị ọ̀ọ na kẹnẹ, di Ohomorihi vara ayị Ịsọọrụ nị. Dị avaba ịrẹyị ọnị Ịsamụwẹrị kà sẹ tụ́ ịrẹsụ Ịsọọrụ ịhị ọnọọ nị.

¹⁰ Ịsọọrụ ọnịrị ozida ọnị ọnịrịị zị mẹ̀ na sị ngụ Igibiya, dị a nyị ọnịsẹ ẹnyị aanị ana wara aa vẹ, dị ẹ va gẹrị wa nị. Ịzẹyịza dị Ụhwẹ Ohomorihi dọ avaba ayị Ịsọọrụ, dị ọ sị ụkata yọ nị. Dị Ịsọọrụ ọnị rẹ na vaka ọnịsẹ ẹnẹẹ di e dudu aa kà ịsẹ nị.

¹¹ Â nyị aza enee hi ịzọọ ana vịdị yẹ Ịsọọrụ. Ịjị e re ka Ịsọọrụ ọnịrị ọnịsẹ nịnị dudu aa kà ịsẹ, dị ẹ ka, “Ẹwụ nịnị ẹyịnyara amị, ịrẹyị rẹẹ̀ yọ! Yere ene tu ozi Ikisi aanị? Vị Ịsọọrụ ọnị rẹ kụ́ ẹngụ anị na và hura ọnịsẹ nịnị nị?”

¹² Dị ọza ịnya ana vị anịzọọ ọnị rẹ ka, “Ẹnẹ vị ana vị ada ẹsẹnị kẹ?” Ịrẹyị Ịsọọrụ ọnọọ ọ mẹ ka à kụkụ sịị kà ịrẹyị ka, “Vị Ịsọọrụ ọnị raa kà ịsẹ bẹẹ nịị?”

¹³ Ịjị Ịsọọrụ sị kú irenu, dị ọ̀ yị kụkụ kà ịsẹ, di o si hu dị aa nọ aha ịsọvọ nị.

¹⁴ Â nyị ọyịnyara ada Ịsọọrụ ọnya aanị ene re e ịzọọ. Dị ọ họ̀ Ịsọọrụ ọnịrị ozida ọnị ọnịrị zị ụsẹ, dị ọ ka ịzị ẹ maanị yà hụrẹ ịhyọọ? Dị Ịsọọrụ ka ịkẹrịkẹtẹ ene vu eni ee sì nọ. Dị ọ ka ịjị ọnị è yi re wa, dị ẹnị va nọ ịda Ịsamụwẹrị nị.

¹⁵ Dị ọyịnyara ada Ịsọọrụ ọnọọ ka ọ̀ kà a yị ọnị ịsị Ịsamụwẹrị ọ̀ọ kà a yọ nị.

¹⁶ Dị Ịsọọrụ ka ộ kà a yị ẹnị ka a sị ịkẹrịkẹtẹ ẹnẹẹ re. Ama Ịsọọrụ ọ yị kà a yọ ka Ịsamụwẹrị ọ raà kà a ka ọnị vaa rị ohinọyị.

 sị Ịsọọrụ rị ohinọyị

¹⁷ Ẹkụhị ọnya dị Ịsamụwẹrị hị́ Anisirẹrị dị ọ ka ẹ̀ wara nọ Imizipa, ka ẹnị aa naa hẹkẹ Ẹnẹyịmavara ịzọọ nị.

¹⁸ Ịjị e tù ịzọọ dị Ịsamụwẹrị ka ẹ̀ wụ́ ịrẹyị ẹnẹ Ẹnẹyịmavara ana vị Ohomorihi Anisirẹrị kà. Ọ kà Ohomorihi ka ọnị ộ kụ́ Anisirẹrị nịnị hụrẹ Ijipiti, dị ọnị dọ wa hụrẹ ụvọ Anijipiti ọnịrị avaba anẹkụra ana aa chamayịị yị wa nị.

¹⁹ Dị Ịsamụwẹrị ka ẹ sị Ohomorihi ẹnịnị ọnọọ yi tịtẹ. Ọ kà Ohomorihi ọ dọ wa hụụnị akanya ọnịrị ụya nị. Ọ kà ama aza ẹnẹẹ ka ẹnị e yi kuku sì ka Ohomorihi ọ̀ vi ohinọyị ẹnịnị. Ọ kà ẹnịnị ka ẹnị ee sì ọza ẹnẹsa ana vaa vị ohinọyị ẹnịnị. Dị Ịsamụwẹrị va ka ẹ̀ kụ́ ẹngụ ẹnịnị vẹ ịrẹsụ-ịrẹsụ ọnịrị ovwoovu-ovwoovu dị ẹ̀ vavọọ va gụ ọvịdị Ẹnẹyịmavara.

²⁰ Ịsamụwẹrị mẹ̀ ka avaba ịrẹsụ Anisirẹrị ẹ̀ vavọọ vẹ, dị ahịka ịrẹsụ Ịbẹnjamịnị ụvọ zee ka à yà nyị ohinọyị nị.

²¹ Dị Ịsamụwẹrị rẹ kà ovwoovu-ovwoovu ịrẹsụ Ịbẹnjamịnị ẹ sị ọnyọọnya vẹ ọvịdị anị. Ẹ mẹ̀ vavọọ vẹ, dị ahịka ovwoovu Imatiri ụvọ za ka à nyị ohinọyị hụrẹ nị. A mẹ̀ rẹ sì ụvọ tụ́ ọ pooro ini ovwoovu Imatiri, dị ahịka Ịsọọrụ ana vi ozi Ikisi ụvọ ve zee ka à sị rị ohinọyị nị. Ịjị a ka Ịsọọrụ ọ̀ vẹ, ê sì ọ, ọza o yi re e.

²² Di e ve họ̀ use ịnị ụvọ Ẹnẹyịmavara kà ọza ana vọrọ ka à sị rị ohinọyị aanị ọ́ọ́ vẹ ịzọọ. Dị Ẹnẹyịmavara kà ộ vẹ ịzọọ, ama ọ na sị tẹ ịzị a kụ́ ẹnya hi avọọ.

²³ Dị a wụsẹ tụ́ nọ ịzọọ, dị a na sị ọ vẹ nị. Ịsọọrụ mẹ̀ vẹ dị ọ jẹẹ ịnị akakana aza ẹnẹẹ, ọ sị ẹhụụ ịza dà a vahịrẹ gọdọ hu avaba aza ana vọ.

²⁴ Dị Ịsamụwẹrị kà a yị aza ẹnẹẹ dị ọ ka wéé re ọza ọnị Ẹnẹyịmavara nyị ka ọ̀ vị ohinọyị awụ nịnị? Wê re ka ẹ yị nyị ọza ana vị ẹngụ anị ịnị avaba awụ nịnị. Dị avaba aza ẹnẹẹ nowu dị ẹ kà, “Taarụ Ohinọyị! U vee ku orubo ọcha orubo ẹya.”

²⁵ Dị Ịsamụwẹrị tangwa kà a yị aza ẹnẹẹ avaba ịsa ana a vọrọ ka ohinọyị ọ̀ọ mẹ nị. Ịjị ọ sị ọ kà yị wa, sị ọ rẹ chẹrẹ ẹ tụ́ ịnị ịsa, dị ọ sị tụ́ ini eehi Ẹnẹyịmavara nị. Dị Ịsamụwẹrị kà ọzọza ọ̀ọ nọ eehi anị nị.

²⁶ Dị Ịsọọrụ ọnị rẹ si hu aa nọ Igibiya ana vi eehi anị nị. Â nyị aza ẹnyị aanị ana nyị ụkata, Ohomorihi ộ sị tụ́ ịnị ayị ẹnịnị, dị ẹ kwẹẹtẹ dị ẹ saasa Ịsọọrụ aa na nị.

²⁷ Ama a va nyị aza ẹnyị aanị ịzọọ, ana ahịka enebira kẹnẹ-kẹnẹ ẹ vị nị. Dị ẹnịnị ka, “Aanị ka Ịsọọrụ ọnọnị ọnị ọ zụ̀ dọ ẹyị tụ́?” Ẹnịnị ệ sị eyi oweyi re Ịsọọrụ, ẹ yị nyị ịsị ẹ sị va yọ. Dị Ịsọọrụ mẹ anka vị ọ̀ yị sị ayị nọ ịnị ịrẹyị aza ẹnẹẹ nị.