1 Ịsamụwẹrị 1 - IWE ỌNỊNỊ

Erikana ọnịrị anovwoovu anị

¹ Â nyị ụmẹ ọnya, dị a nyị ọnọrụ ọnya aanị ana aā hị́ Erikana ana ra Iraama. Iraama vị ọnyara ịnị ẹkụra ana yà ịrẹsụ ataba ịnị ẹtẹ Ehwireemi. Ada anị ọbanyị ịrẹmị-ịrẹma ọ rị Izuhwi nị. Ada Erikana ọ rị Ijerohami nị. Ijerohami vị ozi Erihu ana ada anị rị Itohu. Ada Itohu ọ rị Izuhwi nị. Ẹnịnị vị Anehwireemi.

² Erikana ộ nyị ọnẹẹ ẹẹva. Ọnyara ọ rị Ịhaana, dị ọsa ọnị rị Ipenina nị. Ipenina ọnị ộ ma ozi, ama Ịhaana ọnị vị ọbọrị.

³ Erikana vị ana aā hụrẹ ẹkụra anịị nọ Isiro ịrayị-ịrayị naa hẹkẹ Ẹnẹyịmavara Ochẹtẹẹngụ dị ọ rẹ mẹ̀ ịsọvọ. Eri ọnịrị ezi anị ẹyịva ana aā hị́ Ihohwini ọnịrị Ihwinehasi vị ohirẹsụ irehi Ohomorihi.

Ayamụkụ ọhịnị

⁴ Ịrayị-ịrayị Erikana ọọ̄ mẹ̀ ịsọvọ, dị ọ dà uye yi Ipenina ọnịrị avaba ezi anị ọnọrụ ọnịrị ọnẹẹ.

⁵ Ịjị òo tu ka ọ̀ dà uye yị Ịhaana, dị ọ vara ụvọ dà a irenyi agụvị ka ọ nyayịnẹ sì ịrẹyị anị Ẹnẹyịmavara mẹ daka mẹ̀ ẹ ka ọ̀ vị ọbọrị nị.

⁶ Ọhịnị anị Ipenina vị eneē sii ka ọnị ọọ̄ sune ayị ka ọ vị ọbọrị.

⁷ Avọọ oō mee du ọ ayị ịrayị-ịrayị ẹnịnị ẹẹ nọ ịnị irehi Ẹnẹyịmavara nị. Dị ahịka Ịhaana ee sụ ùnè, dị ọ yị rị ịsa nị.

⁸ Ọ̀ọ vavọọ ee sụ ùnè, di Erikana ọva anị re ne tù ọ dị ọ ka, “Ịhaana, sị ẹ vẹ di wee sụ ùnè dị wẹ̀ yị rị ịsa? Úú mee re? Aanị ka ẹmị ọnọnị o yi huna ezi ẹẹwụ yị wụ?”

Ịhaana ô pa ozi hụụnị Ohomorihi

⁹ Ịjị ịsọvọ ta mẹ̀, dị ệ sị ịsa rị Isiro, dị Ịhaana kwẹẹtẹ dị ọ na mẹ̀ aduwa ọvịdị Ẹnẹyịmavara nị. Eri ana vị ohirẹsụ irehi Ohomorihi vị ana yaayịtẹ ịnị aga ọgụrị enoze irehi Ẹnẹyịmavara.

¹⁰ Ayị Ịhaana vị ana nyayịnẹ du, di ee sụ ùnè ọ maa mẹ̀ aduwa hi Ẹnẹyịmavara.

¹¹ Ọ kà, “Ẹnẹyịmavara Ochẹtẹẹngụ, wèe re ụya ọnị maa rị aanị, dị ụ sị ozi ọnọrụ ọnyaa yị mị, ẹwụ mị vaa varẹma sịị yị pooro ịnị avaba ẹhẹ anị nị. Mẹ yị vaa kụ́ ọ ịrẹsụ pooro.”

¹² Ịhaana mẹ vavọọ tangwa aa mẹ̀ aduwa, di Eri ee re e nị.

¹³ Eri ô re e ka irenu anị aa ha peepee ama ẹ yị kà ịrẹyị tụ́ ẹhẹ, di o ro ka vị Ịhaana sị eche hú nị.

¹⁴ Di Eri va hí Ịhaana dị ọ ka, “Áá vọrọ ka we hu eche va ngụ ịzẹnị? Wẹ rẹ hụụnị eche ọyị hú ọgọnị.”

¹⁵ Di Ịhaana ka, “Nda, me yi hú eche o! Ịrẹyị ịnị ẹngụ amị ana va mị ẹngụ hi m maa kà zụ̀ Ẹnẹyịmavara nị.

¹⁶ Aarịhịnị asị u ro o ka ọnẹẹ odivi mị vị nị. Ịrẹyị ịnị ẹngụ amị ene ee du mi ayị ẹtẹẹtẹrẹ m maa dá ịpẹ anịị yị Ohomorihi nị.”

¹⁷ Di Eri va ka ọọ na, ka ẹ yị vaa nyị ịrẹyị. Ọ kà Ohomorihi Anisirẹrị vaa sị ịsị ee sìi yọ.

¹⁸ Dị Ịhaana kụ́ ọ avọ, dị ọ varẹma nọ ịnị eehi, dị ọ ngwara eyi hi, dị ọ rị ịsa nị.

Ịhaana ộ ma Ịsamụwẹrị

¹⁹ Ịnị ẹnẹnẹ viri-viri eyinẹhẹ anị, dị ẹ kwẹẹtẹ, dị ẹ na hẹkẹ Ẹnẹyịmavara, dị ẹ varẹma nọ Iraama ana vị eehi ẹnịnị nị. E mè tù eehi, di Erikana nọ ịda Ịhaana ana vị ose anị nị. Ẹnẹyịmavara ộ wụ́ aduwa Ịhaana,

²⁰ Ịjị ọ naa mẹ ụmẹ chee, dị Ịhaana zyẹẹ, dị ọ ma ozi ọnọrụ nị. Dị ọ ka ịrẹha ozi anị ọnọọ ọ rị Ịsamụwẹrị nị. Ọ kà ọnị ộ pa a hụụnị ụvọ Ẹnẹyịmavara.

Ịhaana ộ sị Ịsamụwẹrị na yị Ohomorihi

²¹ Ị́rayị mẹ̀ rẹ sị gẹ, di Erikana ọnịrị aneehi anị rẹ nọ Isiro ka ẹnị ẹ̀ na mẹ̀ ịsọvọ ẹnị ẹẹ̄ mẹ̀ ẹ yị Ẹnẹyịmavara ịrayị-ịrayị. Ọ̀ọ sị ịsọvọ ọnọọ mẹ, di o re sí ịzẹzẹ ọnị ọ zẹẹ Ohomorihi.

²² Ịhaana ọnị ọ yị nọ ịnị ịrayị ọnọọ. Dị ọ kà a yị ọva anị ka ozi anị ọ̀ọ sị jị irenu ịrẹva ọnị vaa sị ọ naa yị Ẹnẹyịmavara, dị ọ kụkụ yà ịzọọ pooro.

²³ Di Erikana ka ooho, ẹ yị nyị ọ mẹ̀ kà. Ọ kà ọ̀ yà ini eehi pooro di ozi anị ọ̀ jị ịrẹva. Dị ọ rẹ ka Ẹnẹyịmavara ọ̀ navọ ọ̀ mẹ̀ ịsa ọnị ọ ka ọnị vaa mẹ. Ịzẹyịza dị Ịhaana yà ini eehi dị aa pa ozi anị pooro dị ọ jị ịrẹva nị.

²⁴ Ísamuwẹrị mẹ̀ sị jị ịrẹva dị ọ yị vị ozweyi, dị Ịhaana sị ọ dị ọnịrị ọ zị nọ ịda Ẹnẹyịmavara Isiro nị. Ọ́ màa na, ộ sị imaaru ịrayị ẹẹta ne beri ayị ọgụvọ ẹẹhị ọnịrị eche okoko ọnya za nị.

²⁵ Ịjị a sị ịsa ịsọvọ ọnọọ wụ̀, dị ọ sị ozi ọnọọ nọ ịda Eri nị.

²⁶ Dị Ịhaana kà, “Nda, wáá kụkụ yẹ mị aanị? Ẹmị ma vị ọnẹẹ ana jẹẹ ịzẹnị aa mẹ̀ aduwa hi Ẹnẹyịmavara ịhị ọnọọ nị.

²⁷ Ozi ọnị mị mẹ̀ aduwa ka Ohomorihi ọ̀ sị mị ịhị ọnọọ yị. Ẹnẹyịmavara ọ raà sị yị mị.

²⁸ Mị sị ọ vẹ ka ma sị va yị Ẹnẹyịmavara nị. Ịda anị ọ́ kụkụ vaa yà pooro ịnị avaba ẹhẹ anị nị.” Dị ẹ yà ịzọọ dị ẹ hẹkẹ Ẹnẹyịmavara nị.