1 Ịjọọnụ 4 - IWE ỌNỊNỊ

Ụhwẹ Ọnịnị Ohomorihi ọnịrị Ụhwẹ Echu

¹ Ẹwụ nịnị anda ayị, asị ụ dọ avaba aza ana kà a ka ẹnị ẹ́ẹ nyị Ụhwẹ Ọnịnị wụ́. Ama zama wa re, dị ụ wa yẹ ịzẹyịza àa vị Ụhwẹ Ọnịnị Ohomorihi ẹ nyị nị, agụvị ka ọnịsẹ onireche ẹ sị gara hi ẹhẹ.

² Ịsị a nyẹngụ sị yẹ ọza ọ̀ọ nyị Ụhwẹ Ọnịnị Ohomorihi yị: Ọza tụra ọza anaa dọ ka Ijeesu Ikirisiti ộ vẹ ẹhẹ anka ozi ọza, ọ̀ nyị Ụhwẹ Ọnịnị Ohomorihi nị.

³ Ama ọza tụra ọza ẹnị ẹ̀ yị dọ ka Ijeesu Ikirisiti ộ vẹ ẹhẹ anka ozi ọza, ẹ́ yị vị Ụhwẹ Ọnịnị Ohomorihi ọza ọnọọ nyị. Ụhwẹ ọnịvị Ikirisiti ẹ́ngụ ọza ọnọọ nyị nị. Wâ vịdị wụ́ nịnị ka ọ vaa vẹ ịnị ẹhẹ, ịzẹyịza, ọ yà ịnị ẹhẹ booro aanị.

⁴ Ẹwụ nịnị ezi emi, àa vị ẹwụ nịnị yọ, ẹwụ nịnị vị ezi Ohomorihi, wa sị ọnịsẹ onireche ẹnẹẹ huna nịnị, agụvị ka, Ụhwẹ Ọnịnị ana yà ịnị ayị awụ nịnị, o huna ụhwẹ ana yà ịnị ayị anẹhẹ nị.

⁵ Ọnịsẹ onireche ẹnẹẹ vị ẹ́ẹhẹ, ịsa ẹhẹ ẹ́ rẹ yaa kà nị, agụvị avọọ anẹhẹ sị ụtọ pe wa nị.

⁶ Àa vị ẹyị yọ, ẹyị vị ezi Ohomorihi. Ọza ana àa yẹ Ohomorihi ẹtẹẹrẹ vaa sị ụtọọ pe yi. Ama ọza ẹnẹ ẹ̀ yị yẹ Ohomorihi, ẹ́ yị sị ụtọ pe yi. Avọọ ị mẹmẹ zụ yẹ ọza ana nyị Ụhwẹ Ọnịnị ịzẹyịza ọnịrị ọza ana àa nyị ụhwẹ echu nị.

Ohomorihi vi eneē sì ịrẹyị ọza

⁷ Ẹwụ nịnị anda ayị, à navọ yee sì ịrẹyị ẹngụ nịnị, agụvị ka ịrẹyị ọza ò yi sì vị ana hụụ ịdị Ohomorihi vẹ. Ọza ene èe sì ịrẹyị ọza vị ozi Ohomorihi, ọnị ọ yẹ Ohomorihi nị

⁸ Ọza ene è yi sì ịrẹyị ọza, ẹ́ yị yẹ Ohomorihi, agụvị ka Ohomorihi vị eneē sì ịrẹyị ọza.

⁹ Aanị Ohomorihi mẹmẹ sị zụ̀ yị gedebee ka oni ô sì ịrẹyị ayị nị: Ọ́ tụ́ Ozi anị ikonya gene-gene vẹ ẹhẹ agụvị dị ya nyẹngụ yara ịnị oze anị.

¹⁰ Ịsị aā hị́ ịrẹyị ọza oyisì yị: Ẹ́ yị vị ka vị ẹyị sì ịrẹyị Ohomorihi nị, ama Ohomorihi o sì ịrẹyị ayị nị, dị ọ tụ́ Ozi anị vẹ ẹhẹ ka ọ̀ va sị ẹngụ anị mẹ̀ ịsọvọ, dị à zụ vagu yị ịnị ịvị ayị nị.

¹¹ Ẹwụ nịnị anda ayị, Ohomorihi ọ̀ọ maanị sì ịrẹyị ayị, áa vọrọ ka e yè re sì ịrẹyị ẹngụ.

¹² Ẹẹ̀ yị nyị ọza ana sị eyi re Ohomorihi da, ama yèe sì ịrẹyị ẹngụ, ẹyịrị Ohomorihi vị ọnya. Oyisì anị ọ sị gụ tụ́ ịnị ayị ayị.

¹³ Ịsị ẹ zụ sị zụ̀ ka ẹyịrị Ohomorihi vị ọnya ọnịrị ka ẹyịrị Ohomorihi ọ sị vabẹ, ọ vị ka ọ raà sị Ụhwẹ Ọnịnị anịị yị.

¹⁴ Ẹyị nyẹmba ô sị eyi ayị ree, ya rẹ dọ ivenu tụ́ ọ ka Ohomorihi Ada ayị ộ tụ́ Ozi anị vẹ ẹhẹ ka ọ̀ va dọ anẹhẹ há hụụnị ịvị ẹnịnị.

¹⁵ Ọza ana àa há irenu anị kà a ka Ijeesu vị Ozi Ohomorihi, ọnịrị Ohomorihi vị ọnya; Ohomorihi ọnịrị ọza ọnọọ ọ sị vabẹ.

¹⁶ Ẹyị nyẹmba ộ yẹ, ya rẹ dọ wụ́ ka Ohomorihi ô sì ịrẹyị ayị, Ohomorihi vị eneē sì ịrẹyị ọza. Ọza eneē sì ịrẹyị ọza, ọnịrị Ohomorihi vị ọnya, Ohomorihi ọnịrị ọza ọnọọ ẹ sị vabẹ.

¹⁷ Aanị oyisì Ohomorihi mẹmẹ vaa gụ tụ́ ịnị ayị ayị nị, ọnị ọ vị ka ịnị ẹkụhị ọkarẹyị, ị vaa nyị ayọnẹtẹ agụvị ka ebira ayị ịnị ẹhẹ óo véné Íjeesu Ikirisiti.

¹⁸ Ịrẹyị ọza oyisì ọ mā nyị angwahi. Oyisì Ohomorihi ọ̀ọ sị gụ tụ́ ịnị ayị ọza, vaa dụ angwahii jịnẹ nị. Ọza ọ̀ọ yẹ ka a vaa sị ụyaa rị ọnị, dị ee hí angwa. Ọza èe yii hí angwa, oyisì Ohomorihi ọọ̀ yị gụ tụ́ ịnị ayị anị.

¹⁹ Yée sì ịrẹyị Ohomorihi agụvị ka ọnị ọ vịdị sì ịrẹyị ayị nị.

²⁰ Ọza ọ̀ọ kà a ka oni óo sì ịrẹyị Ohomorihi, dị aa yịị kụ́ ayị ọnọhụva anị nị, onireche ọza ọnọọ vị nị. Ọza è yi sì ịrẹyị ọnọhụva anị ene ee re, ọ mẹmẹ zụ sì ịrẹyị Ohomorihi ene è yi re?

²¹ Ọda ọnị Ohomorihi mẹ yị yị: Ọza ene èe sì ịrẹyị Ohomorihi, ò re sì ịrẹyị ọnọhụva anị bẹẹ.