1 Ịjọọnụ 1 - IWE ỌNỊNỊ

Ijeesu vị Ịrẹyị anaā mẹ ka ọza ọ̀ yara

¹ Yaa chẹrẹ iwee tụ́ụ hi wu nịnị ịnị oze ịrẹyị ana yà ịzọọ hụrị ụmọrụmọ, dị a va yẹ ka aa mẹ ẹhẹ. Ẹyị ụvọta ộ wụ́ Ịrẹyị ọnọọ, yáa sị eyi ré e, ya raà jị eyi ngụ ọ, dị ị raà sị ụvọ kanyị ọ nị. Ọnị ọ vị ịrẹyị anaā sịị ụhwẹ yị aza nị.

² Ịrẹyị ọnọọ anaā mẹ ka ọza ọ̀ yara ộ sị ẹngụ zụ̀ gedebee; Yê ré e, dị ị raa dọ ivenu ani nị. Ị raa kà a wụ nịnị ini oze ịrẹyị ọnọọ anaā mẹ ka ọza yara ịdị Ohomorihi pooro zịna-zịna. Ịrẹyị ọnọọ ana vịdị yà ịdị Ohomorihi Ada ayị ộ sị ẹngụ zụ̀ yị.

³ Ịsa ẹnẹnị ẹnẹ ẹyị ụvọta sị re, dị ị raà sị ụtọ ayị wụ́, ọnị ị yaà kà a wụ nịnị agụvị ẹyịrị ẹwụ nịnị ọ̀ zụ rị vabẹ.

⁴ Yaa chẹrẹ ịsa ẹnẹnịị tụ́ụ hi wu nịnị agụvị dị ịrajẹ avaba ayị ọ̀ zụ gụ.

Ohomorihi vị ẹtohweyi

⁵ Enube ọnị ị wụ́ hụụnị irenu ozi anị ọnọọ ọnị ị raa kà yị wụ nịnị yị: Ohomorihi vị ẹtohweyi, ẹ́ yị nyị etohozi ịdị anị vụrụ-vụrụ.

⁶ Yàa kà a ka ẹyịrị Ohomorihi ọ́ọ rị vabẹ dị yaā yịị zị ụsẹ ịnị ịrahụ nị, ireche i yee che nị, yẹ́ yị mẹ ịzẹyịza.

⁷ Ama yàaa zị ụsẹ ini ẹtohweyi anka Ohomorihi ọnị mẹ̀ rẹ yà ini ẹtohweyi, ọnị ọ vị ka yaa mẹ̀ uze vaabẹ beri ẹngụ. Anya Ijeesu Ikirisiti Ozi anị aa nyịna yị; yaa nị hụụnị avaba ịvị.

⁸ Yàa kà a ka yẹ yị nyị ịvị, i yee vene ẹngụ ayị, yẹ yị nyị ịzẹyịza vụrụ-vụrụ.

⁹ Ama yàa dọ irenu ịvị ayị, Ọ vaa vagu yị ịnị ịvị ayị, dị ọ nyịna yị, dị ị nị hụụnị avaba ịsa odivi. Agụvị ka ọ́ọ nyị ịzẹyịza, a zụ sị ayị tụra a.

¹⁰ Yàa kà a ka yẹ yị mẹ ịvị, yáa za Ohomorihi onireche, ịrẹyị anị ẹ́ yị yà ịnị ayị ayị.