1 Anịtẹsaronika 5 - IWE ỌNỊNỊ

Tenyi ẹngụ zi ụmẹ ana Ananyị yị va sịị vaa vẹ!

¹ Ẹwụ nịnị ẹyịnyara amị, ẹ́ yị nyị ka maa naa chẹrẹ tụ́ụ hi wu nịnị ini oze ẹkụhị ọnịrị ụmẹ ẹnị ịsa ẹnẹẹ vaa sị mẹ.

² Ẹwụ ụvọta ọ́ọ yẹ ẹtẹẹtẹrẹ ka ẹkụhị ana Ananyị yị vaa sị vaa vẹ vị ana sị mẹẹ anka ẹkụhị oni oyi sịị nọ aha ịrahụ avọọ.

³ Ịjị aza àa kà a ka ẹ́ yị nyị ịrẹyị vụrụ-vụrụ, dị ịrẹyị vana ngụ tù wa kẹnẹ anka ọnẹẹ ọnị ịrẹẹ aa zị avọọ. Dị ẹnịnị ẹ́ yị zụ há.

⁴ Ama ẹwụ nịnị anda ayị, ẹwụ nịnị ẹ́ yị yà ịnị ịrahụ. Ẹ yị nyị ka ẹkụhị ọnọọ ò ve tù wu nịnị asigiri anka oyi avọọ.

⁵ Agụvị ka avaba awụ nịnị ọ sị hụụnị ịrahụ, aza ẹtohweyi ụ kụkụ vị nịnị nị.

⁶ Agụvị avọọ, asị rẹ và ẹngụ hi ẹtẹ anka aza ana vọ. Ama à vẹ yee zí, dị ya sị ụvọ za ẹngụ ayị.

⁷ Ịrahụ aza sịị̄ sụ̀ ara nị, ịrahụ aza re siī hú eche ahaahara nị.

⁸ Ama ẹyị ana vị aza ẹtohweyi, À vẹ yaa sị ayịị tụra Ohomorihi pooro, di yee sì ịrẹyị ọza; ọnọọ vị ana sị mẹẹ awuru enyusẹ-enyusẹ ene e siī kú ịrachị avọọ. A vẹ ya sị eyi tụ́ ịnị ẹdọha ayị, ọnị vị ana sị mẹẹ amu enyusẹ-enyusẹ avọọ.

⁹ Ohomorihi ọ yị nyị yị ka ọnị ọ̀ va kụ́ ayị hi yi. Ama ee sì ka ya va nyị ẹdọha ọnị Ijeesu sịị̄ yị ọza.

¹⁰ Ijeesu ọnọọ ô sú yị ka, yèe sú yàa yára, ẹyịrị ọnị ò dudu zụ ra vabẹ.

¹¹ Agụvị avọọ, waa sị ayohunẹnẹẹ yị ẹngụ nịnị, dị ụ waa gụ ẹngụụ ụvọ nịnị, anka ụ màa yịị mẹ nịnị aanị.

Iwọjị ọnịrị ụkụ ọdịrẹma

¹² Ẹwụ nịnị ẹyịnyara amị, aarịhịnị, waa sị ụbanyị yị aza ana aa mẹ̀ ụkọrọ ịnị akakana awụ nịnị ẹnị ana vịra hu wu nịnị ini oze Ananyị yị, dị e re yee pe wu nịnịị juwe.

¹³ Re ka waa sị ụbanyị yị wa nịnị ẹtẹẹtẹrẹ, di u we sì ịrẹyị ẹnịnị agụvị ụkọrọ ẹnẹ ẹyaa mẹ. Asị ụ zyaazị nịnị.

¹⁴ Ẹwụ nịnị ẹyịnyara amị, aarịhịnị, aza ana aa mẹ̀ ebira jugu-jugu, re ka waa tụ́ wa ọhụva nịnị. Aza ana angwa ee hí, waa tụ́ wa ọtụtụrụma. Wa rẹẹ gụ ọkụmị nịnị ụvọ. Re ka waa nyị isuuru hi avaba aza.

¹⁵ Re ka ẹ́ yị nyị ọza ana sị odivi si atọ odivi yị ọzọnyị-ọzọnyị. Waa mẹ̀ ịsa ene zoza ịnị akakana awụ nịnị, dị ụ wa rẹẹ mẹ̀ ẹ hi avaba ọza nịnị.

¹⁶ Waa jẹ nịnị pooro.

¹⁷ Waa mẹ̀ aduwa nịnị pooro.

¹⁸ Ịsa tụra ịsa ana àaa mẹ, waa kụ́ Ohomorihi avọọ pooro. Ẹ́wụrị Ijeesu Ikirisiti mẹ̀ sị vị ọnya nịnị aanị, ịsị Ohomorihi sì ka wa kụkụụ mẹ nịnị ọ vị ọnọọ nị.

¹⁹ Asị ụ dọ Ụhwẹ Ọnịnị oro nịnị.

²⁰ Asị ụ sị eyi wụ̀ ịrẹyị ẹnẹnị.

²¹ Waa zama avaba ịsaa re nịnị, dị ụ wa sị ụvọ za ene zoza nịnị ẹtẹẹtẹrẹ.

²² Sị ụvọ hụụnị irima avaba ịsa odivi nịnị.

²³ Ohomorihi anaā sịị ẹngwọọrọọ yị, ọ̀ mẹ ka ayị awụ nịnị ọ nị saka-saka. Ohomorihi ọ̀ navọ ivehu awụ nịnị ọnịrị ariro awụ nịnị ne beri ọchẹngụ awụ nịnị ẹ̀ vị ọnịnị; dị asị ụ nyị ohuvọ nịnị vụrụ-vụrụ ịnị ẹkụhị ọnị Ijeesu Ananyị yị vaa sị vaa vẹ.

²⁴ Ohomorihi ọ nyị wụ nịnị nị. Ọ vavọọ vaa mẹẹ agụvị ka a zụ sị ayị tụraa.

²⁵ Ẹwụ nịnị ẹyịnyara amị, ẹwụ nịnị ọ̀ rẹẹ mẹ̀ aduwaa yị ẹyị.

²⁶ Kụ́ avaba anda ayị nịnị ini oze ana sị zụ ka wee sì ịrẹyị ẹngụ nịnị.

²⁷ Maa sị ụkata Ohomorihi hú nịnị ụvọ ka wa kà iwe ọnọnị yị avaba anda ayị nịnị.

²⁸ Ẹyịza ọọhẹ Ananyị yị, Ijeesu Ikirisiti ọ̀ ya pe wụ nịnị.