1 Anịtẹsaronika 3 - IWE ỌNỊNỊ

¹ Ịjị yẹ̀ yị kụkụ zụ zaa, dị ị kụkụ ka à navọ yị tụ́ Atẹnị,

² dị ya tụ́ Itimoti hi wu nịnị nị. Itimoti vị ọyịnyara ayị, ẹnẹ ẹyịrịị aa mẹ̀ ụkọrọ Ohomorihi, dị yaa kà enube ọyịza Ikirisiti. Yâ tụ́ ọọ ka ọ̀ va mẹ ka wa jẹẹ geri-geri, dị ọ̀ tụ́ wụ nịnị ọtụtụrụma ka wa yịị sị ayịị tụra Ikirisiti nịnị,

³ agụvị asị ana nyị ọza ana vara ayị ịnị awụ nịnị agụvị ụya ọnị ụ waa rị nịnị aanị. Ẹwụ nịnị nyẹmba ọ́ọ yẹ ka ụyọrị yà ịnị ịsa oni Ohomorihi sì ka ò tù yi.

⁴ Ị mẹ̀ vịdị yà ịdị awụ nịnị, yée jintu kà a wụ nịnị ka ẹ yị zụ nyị ka ayị vaa sị ụyaa rị yị. Wáa yẹ nịnị ka avọọ gẹdẹ-gẹdẹ, ọ mẹ̀ yị va yà aanị nị.

⁵ Mẹ yị kụkụ zụ za ayị; agụvị avọọ mị tụ́ vẹ nị. Mée sì ka ò ve re, ụ mẹmẹ aa yịị sị ayịị tụra Ikirisiti nịnị. Angwa ee hí mi ka Echu ọ sị wụ nịnị zama re, dị ọ mẹ wụ nịnị nyeeyi, dị ụkọrọ ayị na sị vị osusu kẹnẹ.

Ayị Ịpọọrụ ọ sị nẹtẹ

⁶ Itimoti ọ va zị hụụ ịdị awụ nịnị ve tù yi. Enube ọnị ọ za va kà a yị, óo zoza ka vị ụ yị sị ayị tụra Ikirisiti nịnị, du u ree yii sì ịrẹyị ọza nịnị nị. Ọ kà waa tamayị ayị nịnị pooro, ọnịrị ka eyi ayị aa tụra wụ nịnị ẹtẹẹtẹrẹ, anka éyi ẹwụ nịnị ọnị mẹ̀ raa tụra ẹyị.

⁷ Ẹwụ nịnị ẹyịnyara amị, ịnị avaba ụyọrị ọnịrị akanya ayị, ayị ayị ộ nẹtẹ agụvị awụ nịnị, agụvị ka wa sị sị ayị tụra Ikirisiti nịnị.

⁸ Yáa yẹ ka yáa yàra ịzẹyịza, agụvị ka wa jị jẹẹ pe Ananyị yị geri-geri nịnị.

⁹ Yẹ yị nyị ẹngụ kụ́ Ohomorihi avọ booro aanị agụvị awụ nịnị. Yaa kụ́ ọọ avọ agụvị inohine ọnị ị nyị ọ́vịdị Ohomorihi agụvị awụ nịnị.

¹⁰ Ọọdụ ọnịrị ịrahụ, yaa sị avaba ayị ayịị mẹ̀ aduwa ka ya rẹ sị eyi gẹrị ẹwụ nịnị, dị ya zụ gụ wụ nịnị ụvọ ini oze ẹdọwụ awụ nịnị, dụ wa zụ gụ nịnị nị.

¹¹ Ohomorihi Ada ayị ọnị ụvọta beri Ijeesu Ananyị yị ọ̀ navọ ọ̀ mẹ oze yị, di ye zụ ve hee wu nịnị!

¹² Ananyị yị ọ̀ navọ wee sì ịrẹyị ẹngụụ hu avọọ, di u we ree sì ịrẹyị azaa hu avọọ, anka ẹ́yị mè ree sì ịrẹyị ẹwụ nịnị.

¹³ Ini oze avọọ, dị ụ wa vị ọnịnị nịnị ọ́vịdị Ohomorihi Ada ayị ịnị ụmẹ oni Ijeesu Ananyị yị vaa sị vaa vẹ beri avaba aza anị!