1 Anịtẹsaronika 2 - IWE ỌNỊNỊ

Ị́pọọrụ meme nyima ụkọrọ Ị́tẹsaronika

¹ Ẹwụ nịnị ẹyịnyara amị, wáa yẹ nịnị ka ịdị awụ nịnị ọnị ị vẹ, o yi vị osusu kẹnẹ.

² Wáa yẹ nịnị, ị mẹmẹ vịdị rị ụya dị a kụ̀ yị ụhụ Íhwiripi. Ama Ohomorihi ọ sị sị ọtụtụrụma yị ka ya kà enube ọyịza anị yị wụ nịnị, aza ẹ̀ẹ daka sì ka ẹnị ẹ̀ dọ yị oro.

³ Ị mẹ̀ vavọọ aa kà a wụ nịnị, yẹ yị saasa ịrẹyị ireche, yẹ yị mẹ̀ ebira ịdọtị, ye yi re vene wu nịnị.

⁴ Ohomorihi ộ dọ ka yáa vị aza ana a vọrọ ka ọnị ọ̀ sị enube ọyịza chire ụvọ. Agụvị avọọ, avọọ ị màa kà ịrẹyị nị. Yẹ yị kà ịrẹyị ene zé aza eyi; ama ịrẹyị ene zé Ohomorihi eyi, ị yaa kà nị. Ọnị ọọ̄ zama ayị ayịị re nị.

⁵ Wáa yẹ nịnị ka ẹ yị nyị ụmẹ ọnị ị sị kà eyi ọza; yẹ yị rẹ mẹ apẹ há ọhọha. Ohomorihi vị onivenu ayị.

⁶ Yẹ yị kà ka ọzọnyị-ọzọnyị ọ̀ ga yị, ọ̀ọ vị ẹwụ nịnị, ọ̀ọ vị aza ẹnẹsa. Anka odeyi Ikirisiti, ya yaanị re oze kà a ka wa sị ịsa ana vọrọ yị nịnị.

⁷ Vị yaa mẹ hẹẹ-hẹẹ ịdị awụ nịnị anka ọnyị ozi mẹ̀ẹ̄ mẹ ozi anị hẹẹ-hẹẹ avọọ nị.

⁸ Yê sì ịrẹyị awụ nịnị ẹtẹẹtẹrẹ. Ẹ yị vị enube ọyịza Ohomorihi kẹnẹ i yee sì ka ya kà wụ nịnị; yee sì ka ya hyakụ sị ẹngụ ayịị wụ nịnị bẹẹ, agụvị ka vị ị nyayịnẹ sì ịrẹyị awụ nịnị nị.

⁹ Ẹwụ nịnị ẹyịnyara amị, wáa tamayị, ị mẹmẹ mẹ̀ ụkọrọ, di i re osiye. Yáa mẹ̀ ụkọrọ ọọdụ ọnịrị ịrahụ, agụvị asị ị na vị ẹnya yị ọzọnyị-ọzọnyị awụ nịnị, ị màa kà enube ọyịza Ohomorihii yị wụ nịnị.

¹⁰ Ẹwụ nịnị vị onivenu ayị, Ohomorihi rẹ vị onivenu bẹẹ, ka yáa mẹ̀ ebira ọnịnị ọnịrị ịsa ana vọrọ. Yẹ yị rẹ nyị ohuvọ ịnị akakana awụ nịnị ana vị ọdọwụ.

¹¹ Wáa yẹ nịnị ka vị yaa mẹ ọza ịnya ọza ịnya awụ nịnị anka ada mẹ̀ẹ̄ mẹ ezi anị avọọ nị. Yâ tụ́ wụ nịnị ọtụtụrụma; ya rẹ sị ayohunẹnẹ yị wụ nịnị. Yê hú wu nịnị ụvọ

¹² ka waa zị ụsẹ ana vọrọ tụra aza Ohomorihi nịnị. Ọnị ọ hị́ wụ nịnị ka wa va nyị tụ́ ịzị ọnị yà aa mẹ ịjọva ọnịrị ụbanyị anị nị.

¹³ Iruvo ọsa ọnị ị raa sịị kụ́ Ohomorihi avọ pooro yị: Ị mẹ̀ va kà ịrẹyị Ohomorihii wụ nịnị, wâ wụ́ ọọ nịnị, dị ụ rẹ dọ ọ nịnị nị. Wẹ yị dọ ọ nịnị anka ịrẹyị ọza kẹnẹ, ama anka ịrẹyị Ohomorihi. Ịzẹyịza, ịrẹyị Ohomorihi yọ nị, agụvị ka Ohomorihi aa mẹ̀ ụkọrọ ịnị ayị ẹwụ nịnị ana sị ayị tụraa ẹtẹẹtẹrẹ.

¹⁴ Ẹwụ nịnị ẹyịnyara amị, ịrẹyị óo tù wu nịnị, anka o mè tù anịragụ Ohomorihi ọnị ọnịrị Ijeesu Ikirisiti sị vị ọnya, ene hi Ijudiya. Anẹkụra awụ nịnị ệ sị ụya rị wụ nịnị anka anda ẹnịnị Aniju ẹnị mẹ̀ rẹ sị ụya rị ẹnị.

¹⁵ Aza ẹnẹẹ ệ wụ Ijeesu Ananyị yị ọnịrị ọnịsẹ ẹnịnị. Ệ rẹ dụ yị tụ́ ẹhẹ. Ịsa ẹnẹ mẹ, o yi zé Ohomorihi eyi. Avaba aza vị ẹnẹ ẹ rẹẹ̄ kụ̀ụ hịrẹ ẹtẹẹtẹrẹ.

¹⁶ Ẹ yị hyakụ zẹẹ ka ya kà ịrẹyị Ohomorihi yị aza ẹnẹ ẹ yị vị Aniju, ana zụ mẹ ka ẹ̀ zụ há. Ẹnịnị ẹ sị ịvị za ịrẹsụ. Ẹ mẹ̀ vavọọ mẹẹ pooro, ọyịkụ Ohomorihi ọ zị vẹ ịrẹsụ ẹnịnị.

Eyi Anịtẹsaronika ộ tụra Ịpọọrụ

¹⁷ Ẹwụ nịnị ẹyịnyara amị, a sị ẹyịrị ẹwụ nịnị há hi ịnị ụmẹ chee. Ama ayị ayị ọ yị yị hụụ ịdị awụ nịnị. Eyi awụ nịnị aa tụra ayị ẹtẹẹtẹrẹ. Yâ sị vụrị ẹtẹẹtẹrẹ ka ya sị eyi re wu nịnị.

¹⁸ Ị yaanị sì ka ye ve hee wu nịnị. Ẹmị Ịpọọrụ ộ hyakụ sì ka ma vẹ huni ụpẹ ọnya, ama Echu ọ sị mị dọ oro.

¹⁹ Sị ị daba sị eyi tụra? Sị aa mẹ ka yaa jẹ? Sị ẹ vị ọgụ ayị ọnị yaa sịị mẹ ụbanyị ọvịdị Ijeesu Ikirisiti Ananyị yị, ọ̀ọ vẹ? Ẹyị vị ẹwụ nịnịị?

²⁰ Ẹwụ nịnị ọ vị ụbanyị ọnịrị ịrajẹ ayị nị.