1 Anịtẹsaronika 1 - IWE ỌNỊNỊ

Ụkụ

¹ Ẹmị Ịpọọrụ beri Isirivanọsị ọnịrị Itimoti aa chẹrẹ iwe ọnọnịị tụ́ụ hi anịragụ Ohomorihi ana yà ẹkụra Ịtẹsaronika nị. Ẹnịrị Ohomorihi Ada ọnịrị Ijeesu Ikirisiti Ananyị yị ẹ sị vị ọnya. Ohomorihi Ada ayị ọnịrị Ijeesu Ikirisiti Ananyị yị ẹ mẹ ọyịza wụ nịnị, dị ẹ rẹ sị ẹngwọọrọ yị wụ nịnị!

Ẹdọwụ ọnịrị ẹhẹ Anikirisiti ene hi Ịtẹsaronika

² Yaa kụ́ Ohomorihi avọ ụmẹ tụra ụmẹ agụvị avaba awụ nịnị; ị raa tamayị awụ nịnị ini aduwa ayị.

³ Ịị̄ tamayị awụ nịnị pooro ọ́vịdị Ohomorihi Ada ayị, anka ụ mẹmẹ aa sịị zụ̀ ka wáa sị ayị tụraa ini oze ụkọrọ awụ nịnị nị. Ịrẹyị ọza oni u sì raa mẹ ka waa mẹ̀ ụkọrọ nịnị ẹtẹẹtẹrẹ, vị ụ rẹ nyayịnẹ ee zí Ijeesu Ikirisiti Ananyị yị eyi nịnị.

⁴ Ẹwụ nịnị ẹyịnyara amị, yáa yẹ ka Ohomorihi óo sì ịrẹyị awụ nịnị, dị ọ rẹ nyị wụ nịnị mẹ áanị nị.

⁵ Ị mẹ̀ vịdị va kà enube ọyịza wụ nịnị, ayị vị ịrẹka kẹnẹ ị za vẹ. Ohomorihi ộ sị ụkata anị zụ̀ ini oze enube ọnọọ. Enube ọnọọ vị ana hụụnị ụvọ Ụhwẹ Ọnịnị vẹ. Ộ sị zụ̀ ka enube ọnọọ vị ịzẹyịza. Wáa yẹ, ị mẹmẹ aa mẹ̀ ebira, ị mẹ̀ yà ịdị awụ nịnị ịzọọ. Agụvị awụ nịnị ị vavọọ aa sịị mẹ nị.

⁶ Ẹwụ nịnị ọ́ rẹ sị ahụ ẹyị hi ẹtẹ, dị ụ raa sị ahụ Ijeesu Ananyị yịị hi ẹtẹ nịnị nị. Wàa daka rị ụya nịnị pooro, wâ dọ enube ọnọọ nịnị, dị Ụhwẹ Ọnịnị sị ịrajẹ wụ nịnị nị.

⁷ Agụvị avọọ avaba Anịragụ ene hi Imasedoniya ọnịrị Akaya ana vị ọdọwụ vị ana aa hama wụ nịnị.

⁸ Oze ịnị ụvọ awụ nịnị ị́rẹyị Ananyị yị sị zị gara na ngụ Imasedoniya ọnịrị Akaya nị. Ẹ yị hyakụ vị ịzọọ kẹnẹ, ọ sị ngụ ịrẹyị avaba aha ka waa sị ayị tụra Ohomorihi nịnị. Ịjọnọọ ẹ yị kụkụ nyị ịsị a vọrọ ka ẹ yà kà.

⁹ Avaba aza aa kà a, u meme sì yi ọzọga nịnị, i mè ve hee wu nịnị. Ẹ rẹ yaa kà a, ụ mẹmẹ và hụụnị ori ọyịhẹkẹ và ká Ohomorihi vẹ nịnị, dị ụ kụkụ aa hẹkẹ Ohomorihi obooro ana yára nịnị.

¹⁰ Dị ụ rẹ jẹẹ ee zí Ozi Ohomorihi nịnị ka ọ̀ và hụrị ẹbẹẹba vẹ nị. Ozi anị ọnọọ ọ ha hụụnị isu nị. Ọnị ọ vị Ijeesu ana dọ yị há hụụnị ọyịkụ Ohomorihi ana aa vẹ nị.