1 Anịkọrịntị 4 - IWE ỌNỊNỊ

Ụkọrọ odeyi nini

¹ Agụvị avọọ, yẹ nịnị ka ezi ahụ Ikirisiti ị vị nị, oni Ohomorihi raà sị ịrẹyị anị oni iruvo anị nyịnẹ chire yi ụvọ ka ya sị eyi pee.

² Àa sị ịsa chire ọza ụvọ, eē sì ka ọza ọnọọ ọ̀ọ mẹ ịzẹyịzaa tụ́ ịnị anị.

³ Isu wèe ro ini oze amị nịnị, ẹ yị nyị ịzị ọnọọ ọnị gẹ ẹmị. Àa vị ọza kẹnẹ aa mẹ̀ ọkarẹyị mị nị, me yi ree ịrẹyị. Ẹmị ụvọta ọyị hyakụ zụ mẹ̀ ọkarẹyị yị ẹngụ amị.

⁴ Ẹ yị nyị ịsa odivi ọnị mị sị eyi jị ka máa mẹ, ama ọnọọ ọyị sị zụ̀ ka mẹyị rị ịvị, oo. Ananyị yị aa mẹ̀ ọkarẹyị amị nị.

⁵ Agụvị avọọ, asị ụ mẹ̀ ọkarẹyị yị ọzọnyị-ọzọnyị nịnị, ama jẹẹ tù ụmẹ ana Ananyị yị vaa vaa vẹ nịnị! Ọnị ọ vaa sị avaba ụkọrọ eweree vẹ ini eyigede nị, dị ọ rẹ sị ịsa ana aza sị tụ́ ịnị ayị tụ́ ẹhẹ. Ịhị ọnọọ, Ohomorihi vaa ga ọzọza, ọ mẹ̀ vọrọ.

⁶ Ẹwụ nịnị ẹyịnyara amị, agụvị awụ nịnị mị sị ẹngụ amị ọnịrị Aporo aa mẹ apojuwe ịrẹyị ẹnẹnị aanị nị. Máa vavọọ mẹ, agụvị wa zụ yẹ iruvo ịsa anaa chẹrẹ nịnị ka, “Asị a nyị ọza awụ nịnị ana na sị aza ẹnyị mẹ eyi, dị ọ̀ọ sị eyii wụ ọsa!”

⁷ Ẹwụ ana ka ewee huna ọza ana vọ nị, sụ ụ hị́ ka wáa vị? Sụ ụ nyị ẹnẹ ẹ̀yị vị a sị wụ? Àa vị Ohomorihi ọ sị avaba ịsa ọnị ụ nyị yị wụ nị, sẹ vavẹ dị waa mẹ eyi anka ịsa ẹnẹ ẹwụ ụvọta mẹ avọọ?

Ịpọọrụ ka àa sị ahụ anịị hi ẹtẹ!

⁸ Wée ro ka wa sị avaba ịsa nyị nịnị! Ụ ka wa sị vị ọzọbanyị nịnị, ụ rẹ ka ohinọyị ụ vị nịnị nị, ẹyị ẹ̀yị daka vị ohinọyị. Àa yẹ à hị́ ka ohinọyị obooro ụ vị nịnị nị, dị ẹyịrị ẹwụ nịnị ọ̀ yaanị dudu rị ohinọyị!

⁹ Vị ọ sị mẹẹ ini eyi amị ka ẹyị odeyi, Óhomorihi sị tụ́ udi oweyi hu keekere ịnị avaba aza nị. Vị ị sị mẹẹ anka aza ana a sị ọkarẹyị isu mẹ yị avọọ nị. Yáa jẹẹ ịnị ịnọyị-ịnọyị ka avaba ịsa, àa vị anggẹẹrị nịnị, àa vị aza dị èe re yi.

¹⁰ Agụvị Ikirisiti, ya sị vị ọnụra. Ama ẹwụ nịnị ọnị ọnịrị Ikirisiti sị vị ọnya, wáa sị ẹngụ awụ nịnị vara ọyẹrẹyị. Ẹyị ẹ yị nyị ụkata, ama ẹwụ nịnị ọ́ọ nyị ụkata. Áa sị ụbanyị yị ẹwụ nịnị, ama ẹyị vị ana aa sị eyii wụ.

¹¹ Pipooro ve tù ọyaanị, ụngwẹ vị ana aa yịị kụ́ yị, dị enyi raa kụ̀ yị. Yẹ yị rẹ nyị ịta kú ẹngụ, aza vị ene ee tụ́ yi. Yẹ yị hyakụ nyị aha ana a vọrọ ka ya ra.

¹² Vị ị nyayịnẹ aa sị ụvọ ayịị mẹ̀ ụkọrọ nị. Aza àaa kụ̀ yị ụhụ, dị ẹyị aa mẹ̀ aduwaa yị wa. Aza àaa sị ụyaa rị yị, dị ị vavọọ yị nyị isuuru.

¹³ Aza èee du yi ịrẹsụ, dị ẹyị aa kà ịrẹyị ọyịzaa hi wa. Anẹhẹ vị ana aa mẹ yị anka ịsa ini itutu avọọ. Vi ve tù ajịnị, vị aza ee yii re yi anka ịhyẹrẹ kẹnẹ avọọ nị.

Ajuwe Ada

¹⁴ Ayị vị agụvị ụhị ọ̀ nyị wụ nịnị, mị sị chẹrẹ ịsa ẹnẹnị tụ́ hi wu nịnị. Ama máa chẹrẹẹ ka ma sị kà wụ nịnị ọ̀nọ̀ anka ozi emi ụvọta oni mi sì ịrẹyị anị.

¹⁵ Òo zee eyi ọza ana aa zụ̀ wụ nịnị oze Ikirisiti ẹ̀ gụ akahị-akahị oze ẹẹwụ (10,000), ama ọza ịnya kẹnẹ ọ vị ada awụ nịnị nị. Ịnị ụmẹ ọnị mị sị kà enube ọyịza wụ nịnị, ma sị vara ada awụ nịnị nị. Ịnị ụmẹ ọnị mị sị kà enube ọyịza wụ nịnị, ma sị vara ada awụ nịnị ini oze Ijeesu Ikirisiti.

¹⁶ Agụvị avọọ, maa dá ịpẹẹ wụ nịnị ka waa sị ahụ amịị hi ẹtẹ nịnị.

¹⁷ Agụvị avọọ, gẹdẹ-gẹdẹ, maa tụ́ Itimotii hi wu nịnị. Itimoti vị ozi emi oni mi sì ịrẹyị anị. Ayị ọnya aa sịị mẹ̀ ụkọrọ yị Ananyị yị nị. Ọ vaa tama wụ nịnị ayị ahụ oni mee sii hi ẹtẹ ini oze Ijeesu Ikirisiti ọnịrị ọnị mị raa sịị zụ̀ aza aha tụra aha ọnịrị ịnị ịragụ Ohomorihi tụra ịragụ Ohomorihi ọnị màa nọ.

¹⁸ Aza ẹnyị awụ nịnị kụkụ aa sị ẹngụụ tụ́ ẹba, ẹyịyara eyee roo ka mẹyị kụkụ vaa vẹ ịda awụ nịnị.

¹⁹ Ama Ohomorihi òo sì, oyi vee kù dị ma vẹ ịda awụ nịnị. Ịhị màa vẹ, mi vee re ịsị aza ana aa sị ẹngụụ tụ́ ẹba avọọ zụ mẹ, ayị vị ịrẹyị ẹnẹ ẹyaa kà kẹnẹ mị vaa wụ́.

²⁰ Oze oni Ohomorihi aa zịị mẹ ịjọva anị, ayị vị ịrẹyị ọyịkà kẹnẹ ọ vị, ịrẹyị ụkata ọ vị nị.

²¹ Ye re oni u sì nịnị? Ụ waa ka ma jị inori za vẹ nịnị nị? À vị ka ma sị ayohunẹnẹ vẹ beri ịrẹyị ọza oyisì?