1Ipita 2 - IWE ỌNỊNỊ

Ịrẹta ana yára ọnịrị Aza oni Ohomorihi nyị tụ́ irenyi

¹ Agụvị avọọ, hụụnị avaba ịsa odivi! Asị u ré vene ọza nịnị vụrụ-vụrụ! Asị ụ rẹ̀ mẹ ogevegeve nịnị! Asị ụ rẹ̀ mẹ eyọhụrẹ nịnị! Asị u rè du ọza nịnị.

² Ama waa mẹ nịnị anka ozi ọwọọwa eneē sì ịrẹva oyi hú. Ẹwụ nịnị ọ̀ rẹ vavọọ sì ịrẹyị Ohomorihi ọ̀yị wụ́, agụvị dị ụ waa vịraa tụ́ ịnị ẹdọha nịnị,

³ agụvị ka wa sị ayamva Ohomorihi dá ree nịnị.

⁴ Vẹ ịdị Ijeesu Ikirisiti ana vị Ịrẹta ana yára nịnị. Aza ê yi ọ tịtẹ, ama Ohomorihi ọ sị ọ nyị, ịsa obooro ọ vị̀ yị Ohomorihi nị.

⁵ Ẹwụ nịnị nyẹmba vị ana rẹ yà anka ịrẹta ana yára avọọ. Ohomorihi aa sị wụ nịnịị dà irehi anị ana yára. Ohomorihi ọ raà sị wụ nịnị tụ́ irenyi yị ẹngụ anị anka ohirẹsụ irehi Ohomorihi nịnị, ka wa sị ụkata Ụhwẹ Ọnịnịị hẹkẹ Ohomorihi nịnị. Ọnọọ ọ vị ịsọvọ ọnị waa mẹ̀ ẹ hi Ohomorihi ini oze Ijeesu Ikirisiti nị. Ịsị Ohomorihi sì ọ vị ọnọọ nị.

⁶ Wáa yẹ ka â chẹrẹ ẹ tụ́ ini Iwe Ohomorihi, ọ mẹ kà a ka, Re, Maa nyị ịrẹta ọnya, ịsa obooro ọ vị mị nị. Mâ sị ịrẹta ọnọọ ká irehi ẹtẹ tụ́ Ịzayọnị. Ọza tụra ọza ana àa sị ayị tụra a, ọ́ yị vaa mẹ ụhịị nyị ọ vụrụ-vụrụ.

⁷ Yị aza ana sị ayị tụra a, ịsa obooro ọ vị yị wa nị. Ama yị aza ẹnẹ ẹ̀ yị sị ayị tụra a, e vee re ka, ịrẹta ọnị ọtụrarehi nịnị yi tịtẹ, ọ vana vị ọọnyị ịnị ịrẹta ana aā sịị da irehi nị.

⁸ Ịrẹta ọnị ọzaā tụ́ ahụ ịnị anị dị ọ hyẹdụ ọ vị nị. Ệ vavọọ hyẹdụ, agụvị ka ẹnịnị ẹ́ yị dọ ịrẹyị Ohomorihi wụ. Avọọ Óhomorihi mẹ̀ vịdị mẹ eto anị tịtẹ nị.

⁹ Àa vị ẹwụ nịnị yọ, ẹwụ nịnị vị aza oni Ohomorihi sị nyị. Ẹngụ ohirẹsụ irehi Ohomorihi ana aa hẹkẹ Ohomorihi Ohinọyị, ụ vị nịnị nị. Anẹkụra oni Ohomorihi nyị tụ́ irenyi yị ẹngụ anị, ụ vị nịnị nị. Aza Ohomorihi obooro ụ vị nịnị nị. Ộ nyị wụ nịnị ka waa kà a yị aza ịsa ẹbanyị-ẹbanyị oni Ohomorihi mẹ, ọ mẹ̀ hị́ wụ nịnị hụụnị ịrahụ va ngụ ini ẹtohweyi anị ene hí ọza irenu.

¹⁰ Ịyẹẹyẹ wẹ́ yị vịdị vị aza Ohomorihi nịnị, ama booro aanị wa sị vara aza anị nịnị. Wẹ́ yị rẹ vịdị yẹ ayamva Ohomorihi nịnị, ama wa sị ọ yẹ nịnị booro aanị.

Sị ụbanyị yị ohirẹsụ nịnị

¹¹ Ẹwụ nịnị ọnị mi sì, wâ yẹ nịnị ka ọzọga ụ vị hi ịnị ẹhẹ nịnị nị. Agụvị avọọ, maa dá ịpẹẹ wụ nịnị: Và hụụnị ịsa edivi ọnị ọchẹngụ awụ nịnị sì. Ịsa ẹnẹẹ vị ana và eyi ịrazị kà ayị awụ nịnị.

¹² Waa mẹ̀ ebira ọyịza, ụ mẹ yà ịnị akakana anarịmadọwụ nịnị aanị. Aza ẹnẹẹ ẹ̀ẹ daka aa kà ịrẹyị odivi awụ nịnị, áa vọrọ ka è zụ ré ebira ọyịza awụ nịnị, dị ẹ̀ zụ sị ụga yị Ohomorihi ịnị ẹkụhị oni òo ve tù wa.

¹³ Hụ agụvị Ananyị yị, waa sị ịrẹsụụ yị avaba aza ana a sị vị ohirẹsụ; ẹ̀ẹ vị ohirẹsụ keekere,

¹⁴ àa vị avaba aza ana vọ ọnị ọọ̄ tụ́ ka ẹ̀ sị ụya rị aza ana aa mẹ̀ ịsa odivi, dị ẹ rẹẹ ga aza ana aa mẹ̀ ịsa ozoza.

¹⁵ Ohomorihi ô sì ka waa mẹ̀ ebira ọyịza, agụvị dị ụ wa zụ mẹ ka ọnụra nịnị ẹnẹ ẹ̀ yị nyị ịsị ẹ yẹ, ẹ̀ sị irenu ẹnịnị kú oku.

¹⁶ Waa mẹ anka aza ana nyị ẹngụ anị nịnị, ama asị ụ sị ọnọọ kà eyi hi, dị ụ waa mẹ̀ ịsa odivi; ama waa mẹ anka ozi ahụ Ohomorihi nịnị.

¹⁷ Sị ụbanyị yị avaba aza. Sì ịrẹyị ọdọwụ anda awụ nịnị. We yii hí angwa Ohomorihi nịnị. Sị ụbanyị yị ohirẹsụ ẹkụra nịnị.

Ezida, sị ụbanyị yị ọga awụ nịnị

¹⁸ Ẹwụ nịnị ezida, ká ịrẹsụ hi yị ọga awụ nịnị, dị ụ wa nyị angwahi ẹnịnị ẹtẹẹtẹrẹ. Ẹ́ yị vị ọga anaā ngụ ayị awụ nịnị, dị e ree roo yị wụ nịnị kẹnẹ m maa kà, ama hi ọga anaā nyị ẹngụrẹyị bẹẹ.

¹⁹ Ọza aa rị ụya ọọhẹ, dị ọ hụ agụvị Ohomorihi dị ọ sị ẹngụ dọ ụya ọnọọ nị, ọza ọnọọ aa mẹ ịrẹyị ozoza nị.

²⁰ Àa vị agụvị ịsa odivi ọnị ụ mẹ, e si tụ́ wu, dị ụ daka yị sị ẹngụ dọ ọ nị, ọgụ ịsị ẹ kụkụ yà ịnị anị? Ama àa vị agụvị ịsa ozoza ọnị ụ mẹ, ụ waa rị ụya nị, wàa sị ẹngụ dọ ọ, ịnẹ Ohomorihi vee hinee hi wu.

²¹ Oze oni Ohomorihi hị́ wụ nịnị tụ́ ọ vị ọnọọ nị, agụvị ka Ikirisiti nyẹmba ộ rị ụya yị wụ nịnị. Ộ tụ́ oze tịtẹ yị wụ nịnị ka wa vavọọ sị ahụ anịị hi ẹtẹ nịnị.

²² Ẹ́ yị nyị ụmẹ ọnị ọ sị mẹ ịvị, ọza ộ yị rẹ wụ́ ịrẹyị ireche ini irenu ani da.

²³ Aza mẹ̀ kụ̀ ọ́ ụhụ ẹ́ yị và ụhụ yị wa. Aza mẹ̀ raa sị ụyaa rị ọ, ô yi wo hi wa, ama ô si chire Ohomorihi ụvọ, anaā sịị ịzẹyịzaa mẹ̀ ọkarẹyị.

²⁴ Ikirisiti ụvọta ộ sị ịrẹsụ dọ ụya ịvị ayị, a mẹ̀ kanyị ọ za ọchị apavahị, agụvị dị ya kụkụ sị mẹẹ oku avọọ dị asị kụkụ zụ mẹ ịvị, dị ya kụkụụ mẹ ịzẹyịza. Ini oze ụnava ana a tụ̀ ọ, ọ sị mẹ wụ nịnị ụkụ nị.

²⁵ Vị ụ vịdị sị mẹẹ anka atẹmẹ ene vú nịnị avọọ nị, ama booro aanị wa zị vavẹ ịdị Ọza ene ee sere wu nịnị, dị ọ raa tẹsị awụ nịnị.