Yosua 9 - AHYERƐLƐ KRONGRON

Gibeonfoɛ lakalaka Yosua

¹ Ahemvo amukoraa bɔ bɛwɔ Yɔɔdan si dɔ mmokaa aseɛ so, yeɛ bɛ bɔ bɛwɔ aseɛ frɛtɛɛ so, bɔ bɛ mukoraa bɛwɔ Ɛpo Piri noa, bɔ ɔkwaadwu Lebanon ne, bɛtele sɔ dwirɛ ne: bɛ ole Hitifoɛ, Amorifoɛ, Kanaanfoɛ, Perisifoɛ, Hiwifoɛ ne Yebusifoɛ ahemvo mɔ.

² Beyiale bɛbɔle porɛ kyɛ bɛ ne Yosua ne Yisrael bɛkwaaho.

³ Nakoso mmerɛ bɔ Gibeonfoɛ tele nikyee bɔ Yosua afa ayɛ Yeriko ne Aye nen,

⁴ bɛ de bɛfale nnakannaka atee so: bɛfale aleɛ, na bɛfale mmɔtɔ teterewaa, ɔne nzaa ngotoku daa bɔ nu asunzua bɔ bapomba ɔ bɛsoale b’afunum mɔ.

⁵ Bewurale mbaboa daadaa bɔ bapombapomba ɔ, ɔne ndaadeɛ teterewaa. Né b’aleɛ ne amukoraa wayɛ wosee, yeɛ né wasa wali ature.

⁶ Bɛhɔle Yosua berɛ wɔ asikyeleɛ ne anu wɔ Gilgal, na besele ye ne Yisraelfoɛ kyɛ, “Yɛfi maen bie anu dedeede yeɛ yawa ɔ, yiti ɛ́mɔma yɛ́yɛ apam.”

⁷ Nakoso Yisraelfoɛ buale Hiwifoɛ nemɔ kyɛ, “Ebiaa né ɛmɔte bepingye yɛ; ɔkɔyɛ sɛɛ né yɛ ne ɛmɔ yayɛ apam?”

⁸ Na Gibeonfoɛ buale Yosua kyɛ, “Yɛte wɔ ngoaa.” Na Yosua bisale bɛ kyɛ, “Ɛmɔ ole nwa mɔ, yeɛ ɛmɔfi nisua?”

⁹ Na bebuale ye kyɛ, “AWURADE wɔ Nyameɛ dumaa bɔ watrɛ wahɔ dede ne, ɔnate ye ti yeɛ wɔ ngoaa yafi maen dedeede bie aso yawa ɔ; ofikyɛ yate ye nwo dwirɛ, bɔ ɔyɔle ye wɔ Misraim amukoraa,

¹⁰ ɔne nikyee biala bɔ ɔfa yɔle Amorifoɛ ahemvo nyɔ nemɔ: Sihon ne Hesebon bɔ né bɛwɔ Yɔɔdan si dɔ ne, ɔne Basan hene Ogo bɔ né ɔte Astarote ne.

¹¹ Yiti yɛ mbanyi mɔ ne yɛ maen ne anu ama mukoraa ha hyirele yɛ kyɛ, ‘Ɛ́mɔfa aleɛ ná ɛ́mɔsi nu beeyia bɛ, ná ɛmɔhã behyire bɛ kyɛ, “Yɛte ɛmɔ ngoaa, yiti ɛ́mɔma yɛ́yɛ apam.” ’

¹² Ɛ́mɔnea yɛ paanoo ye. Kyẽa bɔ yɛsili nu kyɛ yɛba ɛmɔ wa nen, yeɛ yɛfa yɛwurale yɛ nningyein nu wɔ awuro, kyɛ yɛbaali ye atunu ɔ, na né ɔyɛ hye. Nakoso afei de, ɛ́mɔnea, wayɛ wosee, na wali ature.

¹³ Sɔ nzaa nwomaa ngotoku hemɔ, yɛfale nzaa yɛguale nu maa beyiyili ne, né bɛte monɛ, nakoso ɛ́mɔnea, basunzuasunzua. Yeɛ ɔnate kyɛ atee ne wale soma ne ati, yɛ ndaadeɛ ne yɛ mbaboa hemɔ atete.”

¹⁴ Yiti Yisraelfoɛ lili b’aleɛ ne bie, na bammisa AWURADE bandie ye noa dwirɛ.

¹⁵ Yosua ne bɛ yɛle asomdwee apam, bɔ odi agyinamuɛ kyɛ ɔkɔmaa bekonya bɛ ti bekodidi nu ɔ; na Yisrael ɛlɔen ne anu mbanyi tale ndaen foale so.

¹⁶ Yisraelfoɛ ne bɛ yɛle apam ne, ye ɛlɛsa ne aso, yeɛ Yisraelfoɛ tele kyɛ bɛte bepingye bɛ ɔ, na befi porɛ ne anu berɛ ala.

¹⁷ Yiti Yisraelfoɛ tuli bɛ bo befili asikyeleɛ ne anu berɛ, na ye ɛlɛsa ne aso, beedwuli Gibeonfoɛ nguro nemɔ aso. Bɛ nguro nemɔ ole: Gibeon, Kefira, Beerote ne Kiriate Yearim.

¹⁸ Nakoso Yisraelfoɛ anguku bɛ, ofikyɛ né Yisrael ɛlɔen ne anu mbanyi bali moa bafa AWURADE Yisrael Nyameɛ bata ndaen bahyire bɛ. Afei ɛlɔen ne amukoraa penepenene bɛ komvi beguale mbanyi nemɔ so.

¹⁹ Nakoso Yisrael mbanyi amukoraa sele ɛlɔen ne amukoraa kyɛ, “Yafa AWURADE Yisrael Nyameɛ yata ndaen yahyire bɛ, yiti ɔnzɛ kyɛ yɛfa yɛ sa yɛkã bɛ.

²⁰ Bɔ yɛkɔyɛ bɛ hɔ ɛhe: Yɛkɔmaa bekonya bɛ ti bekodidi nu, amaa ɔnate ndaen bɔ yata yahyire bɛ ne ati Nyameɛ amvɛ yɛ so yaa.”

²¹ Na mbanyi nemɔ sele bɛ kyɛ, “Ɛ́mɔma bénya bɛ ti bédidi nu, nakoso yɛkɔmaa bɛkɔyɔ eyeinbubulɛ ne nzuehɔlɛ adwuma bɛkɔma ɛlɔen ne amukoraati.” Yiti ɛlɔen ne tiele bɔ mbanyi nemɔ hane ne.

²² Yosua frɛfrɛle Gibeonfoɛ maa bɛwale, na obisale bɛ kyɛ, “Nzu ati yeɛ ɛmɔlakalakale yɛ kyɛ, ‘Nekaa bɔ yɛfi ne, ɔne ɛmɔ wa wale paa,’ wɔ aberɛ bɔ ɛmɔte yɛ porɛ ye anu ala ɔ?

²³ Ofi ɛnɛ bɔ ɔkɔ ɔ, Nyameɛ apaye ɛmɔ: ɛmɔ nu biemɔ kɔyɛ ngoaa daa, na bɛkɔyɛ eyeinbubulɛ ne nzuehɔlɛ adwuma wɔ me Nyameɛ awuro.”

²⁴ Na bebuale Yosua kyɛ, “Ebie ha hyirele wɔ ngoaa mɔ pefee kyɛ, AWURADE wɔ Nyameɛ hyɛle ye somvoɛ Mose kyɛ ɔ́fa aseɛ ne amukoraa ɔ́ma ɛmɔ, ná ohuhu so mmenia amukoraa ofi ɛmɔ nyunu. Na ɔnate ɛmɔ ti, né yɛsuro paa kyɛ yɛ ngoa kofi yɛ sa ɔ; yiti yeɛ ɔmaa yɛyɔle sɔ ne.

²⁵ Na afei de, yɛwura wɔ sa. Bɔ ɛnea a ɔte paa ná ɔtengyɛ wɔ wɔ nye so ne, fa yɔ yɛ.”

²⁶ Na bɔ Yosua yɔ mane bɛ hɔ ɛhe: ɔbɔle bɛ nwo waen fili Yisraelfoɛ sa nu; yiti bangu bɛ.

²⁷ Nakoso ofi sɔ kyẽa ne, Yosua mane Gibeonfoɛ yɔle eyeinbubulɛ ne nzuehɔlɛ adwuma mane ɛlɔen ne, na bɛyɔle sɔ bɛmane AWURADE afɔleɛ bokyea ne koso, wɔ nekaa bɔ AWURADE aye asie berɛ kyɛ bɛsɔne ye ne, toonn maa waadwu ɛnɛ.