Yosua 8 - AHYERƐLƐ KRONGRON

Belili Aye so ngonim

¹ Afei AWURADE sele Yosua kyɛ, “Nnɛsuro, yeɛ nnɛma wɔ kunu tete wɔ. Fa koɛhonɛfoɛ ne amukoraati boka wɔ nwo so, na fo kɔ Aye. Tie, mafa Aye hene ne ye mmenia, ye kuro ne, ɔne ye aseɛ mawura wɔ sa.

² Nikyee bɔ ɛfa yɔle Yeriko ne ye hene nen, sɔ ala yeɛ fa yɔ Aye ne ye hene ɔ. Koɛ nu nzesadeɛ ne nyɛmmoa bɔ bɛwɔ nu ne, bɛ ngome yeɛ ɔsɛ kyɛ ɛmɔfa ɔ. Ma mmenia bɛɛtɛ kuro ne wɔ ye si dɔ.”

³ Yiti Yosua ne koɛhonɛfoɛ ne amukoraati betuli bɛ bo kyɛ bɛkwaafo bɛkɔ Aye. Yosua yele koɛhonɛfoɛ apee aburasa, na ɔmaa bɛhɔle kɔngɔen.

⁴ Na ɔhyɛle bɛ kyɛ, “Ɛ́mɔtie! Ɛmɔɔtɛ kuro ne wɔ ye si dɔ. Nnɛma ɛmɔfi kuro ne anwo bɛkɔ dede biala, na mmom ɔsɛ kyɛ ɛmɔboa bɛ nwo kyɛ ɛmɔkwaagyina koɛ noa ɔ.

⁵ Na me ne mmenia bɔ bɛboka me so ne yɛkopingye kuro ne. Sɛ befite bɛba yɛ so, kyɛbɔ daa ne bɛyɔle ne a, ye de yɛkɔnwati yɛkofi bɛ nyunu.

⁶ Bɛkɔfoa yɛ alaa kɔpem kyɛ yɛkɔmaa bekofi kuro ne anu bekofite ɔ; ofikyɛ bekosusu kyɛ, ‘Bɛ́nwati béfi yɛ nyunu, kyɛbɔ daa ne bɛyɔle ne.’ Yiti yɛkɔnwati yɛkofi bɛ nyunu,

⁷ na ɛmɔ koso, odi kyɛ ɛmɔfi nekaa bɔ ɛmɔtetɛ ne befite, ná ɛmɔkɔfa kuro ne; ofikyɛ AWURADE ɛmɔ Nyameɛ kɔfa kɔma ɛmɔ.

⁸ Na sɛ kuro ne badi ɛmɔ sa nu a, ɔsɛ kyɛ ɛmɔfa see bɛto nu; ɛ́mɔyɔ kyɛbɔ AWURADE ahyɛ ne ala. Ɛ́mɔtie! Bɔ menwa ɛ́mɔyɔ hɔ ɛne.”

⁹ Yiti Yosua guale bɛ ate, na bɛhɔle bɛɛtetɛle. Bɛɛfeale Betel ne Aye b’afia, wɔ Aye eyia atɔleɛ; nakoso Yosua de, ɔne mmenia ne bɛlale asikyeleɛ berɛ kɔngɔen ne.

¹⁰ Yosua dwɔsole ngyerɛmɔ tutuutu boaboale mmenia ne noa, ɔne Yisrael mbanyi bɛfo belili mmenia ne nyunu, na bɛfale bɛ nye behyirele Aye.

¹¹ Koɛhonɛfoɛ bɔ né bɛboka ye so ne, bɛ mukoraati bɛfole bokaa ne bɛhɔle, bepingyele kuro berɛ pambim ne, na bɛkyekyele asikyeleɛ wɔ Aye sorɔ dɔ. Né bɔnza la bɛ ne Aye b’afia.

¹² Yosua fale mmenia kɔyɛ apee nnu, na ɔmaa bɛɛtetɛle Betel ne Aye b’afia, wɔ kuro ne eyia atɔleɛ.

¹³ Yiti bɛmane koɛhonɛfoɛ nemɔ gyinagyinane: koɛhonɛfoɛ bɔ bɛbaaho koɛ ne deinn ne, bɛwɔ sorɔ, yeɛ koɛhonɛfoɛ bɔ beli nziɛ bɛbɔ bɛ nwo waen ne koso bɛwɔ kuro ne atɔleɛ. Nakoso Yosua de, ɔhɔle bɔnza ne anu dɔ kɔngɔen ne.

¹⁴ Mmerɛ bɔ Aye hene nwuni edwirɛ bɔ ɔ́kɔ so nen, ɔne ye mmenia mukoraati, kuro berɛ mmienzua ne, bɛyɛle ndɛndɛ ngyerɛmɔ tutuutu kyɛ bɛkwaafa koɛ bɛtetale Yisrael wɔ Araba ndendeneɛ so, nakoso né ɔnze kyɛ Yisraelfoɛ baatetɛ ye wɔ kuro ne asi.

¹⁵ Yosua ne Yisrael amukoraati bɛboapa bɛyɛle kyɛ kuro berɛ ama ali bɛ so ngonim, na bɛnwatili bɛfale ɛserɛ so dɔ atee ne aso.

¹⁶ Yiti kuro berɛ ama teateane nu bɛfrɛfrɛle ebiala kyɛ ɔbra ma bɛfoa Yisraelfoɛ. Ayefoɛ foane Yosua, na ɔnate so maa Ayefoɛ fili bɛ kuro berɛ bɛhɔle moa.

¹⁷ Bienzua ko po wanga Aye anaa Betel bɔ wamvite wangɔamvoa Yisrael bie ɔ. Bɛyakyili kuro berɛ pambim ne bɛtole so bɛɛfoane Yisrael.

¹⁸ Na AWURADE sele Yosua kyɛ, “Buralɛ tendenn tworɔntworɔn bɔ otira wɔ sa nu ne, tengyɛ ye wɔ Aye so, ofikyɛ ngɔfa kuro ne ngowura wɔ sa.” Yiti Yosua tengyɛle buralɛ tendenn tworɔntworɔn bɔ otira ye sa nu ne wɔ kuro ne aso.

¹⁹ Ɔtengyɛle ye sa pɛ, yeɛ Yisraelfoɛ bɔ baatetɛ eburo ne hane bɛ nwo befitele ɔ, na bele amirika bewurale kuro ne anu beelili so ngonim. Na berɛ ne ala, bɛtole kuro ne anu see.

²⁰ Na mmerɛ bɔ Aye mmienzua tole bɛ nye bɛneane nziɛ nen, benwuni kyɛ kuro ne anu nwosina ótu kɔ anwuro. Yiti né bennwu nekaa horɛ bɔ bɛnwati bɛhɔ ɔ, ofikyɛ Yisraelfoɛ bɔ bɛnwatili bɛhɔle ɛserɛ so dɔ ne, bɛkakyili bɛ nwo bɛwale Ayefoɛ so.

²¹ Na Yosua ne Yisrael amukoraati benwuni kyɛ Yisraelfoɛ bɔ bɛɛtetɛle ne bali kuro ne aso ngonim, ná afei kuro ne anu nwosina koso ótu kɔ anwuro nen, bɛkakyili bɛ nwo beehuhuni Aye mmienzua nemɔ.

²² Yisrael koɛhonɛfoɛ fekue ko ne koso fili kuro ne anu fitele, na bɛwale Ayefoɛ so. Yiti Ayefoɛ hale Yisraelfoɛ afia, bɔ Yisrael koɛhonɛfoɛ nemɔ bie wɔ bue faen, ná ebiemɔ koso wɔ bue dɔ ɔ. Na Yisraelfoɛ huhuni bɛ, bɔ ko po wanga anaa wannwati ɔ.

²³ Nakoso Aye hene de, bɛhyele ye anyekaenn so, na bɛfale ye bɛbrɛle Yosua.

²⁴ Yisraelfoɛ huhuni Ayefoɛ amukoraati wɔ ɛserɛ pralaa ne aso yiele. Berɛ yeɛ Ayefoɛ foane Yisraelfoɛ hɔle ɔ, na bɛ mukoraa bɛtotɔle ngrandɛ noa maa beyiele bɔkɔɔ nen, Yisraelfoɛ amukoraa sa wale Aye, na bɛfale ngrandɛ beehuhuni mmenia bɔ baha berɛ ne.

²⁵ Ayefoɛ amukoraa bɔ bɛtotɔle sɔ kyẽa ne: mmienzua ne mmrasua, bɛte apee buru ne nyɔ.

²⁶ Yosua sa bɔ ɔfa tengyɛle buralɛ tendenn tworɔntworɔn wɔ Aye so nen, wandwe wanza kɔpem kyɛ ohuhuni Ayefoɛ amukoraa bɔkɔɔ ɔ.

²⁷ Kuro ne anu nyɛmmoa ne koɛ nu nzesadeɛ ngome yeɛ Yisrael fale ɔ, kyɛbɔ AWURADE hyɛle Yosua ne ala.

²⁸ Yiti Yosua yerale Aye, na ɔkakyili ye kurofoen esire afebɔɔ maa waadwu ɛnɛ.

²⁹ Na Aye hene de, osinzele ye bakaa so maa oodwuli nɔsoa. Na eyia tɔle ne, Yosua mane Yisraelfoɛ yele ye fuin ne befili bakaa ne aso, befindini ye bɛtole kuro berɛ pambim ne anyunu, na ɔmaa bɛboaboale nyɔboɛ kure kandinga beguale ye so, bɔ ɔtɛwɔ berɛ kekesaala ye ɔ.

Yosua kenga mmeraa ne wɔ Ebal bokaa ne aso

³⁰ Afei Yosua sili afɔleɛ bokyea wɔ Ebal bokaa ne aso mane AWURADE Yisrael Nyameɛ,

³¹ kyɛbɔ AWURADE somvoɛ Mose hyehyɛle mane Yisraelfoɛ ne ala, kyɛbɔ bahyerɛ ye wɔ Mose mmeraa nwomaa ne anu kyɛ, “Afɔleɛ bokyea bɔ bafa nyɔboɛ mumua mumua basi ɔ, bɔ nna pɛwaa yeɛ bafa base ɔ.” Bɛbɔle naen yeralɛ afɔleɛ wɔ so bɛmane AWURADE, na bɛbɔle asomdwee afɔleɛ koso.

³² Na Mose mmeraa bɔ ɔhyerɛle ne, Yosua hyerɛle ɛhene ala bie guale nyɔboɛ ne aso wɔ Yisraelfoɛ nyunu berɛ.

³³ Yisraelfoɛ amukoraati, ɛwɔfoɛ ne maen mmaa, bɛ ne Yisrael mbanyi ne safohene mɔ ne ndɛenbualɛfoɛ mɔ, begyinagyinane apam alaka ne bue faen ne ye bue faen, wɔ Lewifoɛ bɔ bɛte asɔfo bɔ bɛsõ AWURADE apam alaka ne anyunu. Bɛ bue ko gyinagyinane Gerisim bokaa ndendeneɛ so, yeɛ bɛ bue ko wora gyinagyinane Ebal bokaa ndendeneɛ so, kyɛbɔ AWURADE somvoɛ Mose lili moa hyehyɛle ne; kyɛ, odi kyɛ beyira Yisrael.

³⁴ Na ɛhe asi ne, Yosua kengale mmeraa ne anu dwirɛ amukoraa: saleɛ ne musue ne, kyɛbɔ bahyerɛ ye mukoraa wɔ mmeraa nwomaa ne anu ne.

³⁵ Edwirɛ bɔ Mose hyɛle ne amukoraa, nu ko po nne berɛ bɔ Yosua wangenga ye wɔ Yisrael badwa ne amukoraa nyunu ɔ, mmrasua ne ngwadaa mɔ nyunu, yeɛ ɛwɔfoɛ mɔ bɔ baatena Yisraelfoɛ mɔ nu koso bɛ nyunu.