Yosua 6 - AHYERƐLƐ KRONGRON

Yisraelfoɛ tua Yeriko

¹ Ɔnate Yisraelfoɛ ti, né Yerikofoɛ bafa nikyee babrambram kuro berɛ pambim nemɔ asi batoto nu, bɔ ebiala ngora mvi nu mvite anaakyɛ onwura nu ɔ.

² Na AWURADE sele Yosua kyɛ, “Tie, mafa Yeriko ne ye hene ne ye koɛhonɛfoɛ mɔ mawura wɔ sa.

³ Ɛlɛho biala, ɔsɛ kyɛ ɛne Yisrael koɛhonɛfoɛ ne amukoraati bɛbɔ kuro ne anwo nzra bɛbra beyia komapɛ. Yɔ sɔ alaa elesia.

⁴ Ma asɔfo nzoo bɛfa boaen mmɛen totorobɛndo nzoo beli alaka ne nyunu moa. Na kyẽa bɔ ɔtɔ so nzoo nen, ɔsɛ kyɛ ɛmɔbɔ kuro ne anwo nzra bɛbra beyia pɛen nzoo, wɔ mmerɛ bɔ asɔfo nemɔ koso béhu totorobɛndo nemɔ ɔ.

⁵ Sɛ behu boaen mmɛen ne anu tendetende ko, ná sɛ ɛmɔte totorobɛndo ne nga pɛ a, ɔsɛ kyɛ mmenia ne amukoraati bɛbɔ ese serɛserɛ. Kuro ne anwo fasue kodwiri kogua gyirigorɔɔ, na ɛmɔ amukoraati bɛ́hɔ bɛ nyunu tee beewura kuro ne anu.”

⁶ Yiti Nun awa Yosua frɛfrɛle asɔfo nemɔ, na osele bɛ kyɛ, “Ɛ́mɔsoa apam alaka ne, ná ɛ́mɔma asɔfo nzoo bétiratira boaen mmɛen totorobɛndo nzoo beli AWURADE alaka ne nyunu moa.”

⁷ Afei osele mmenia ne kyɛ, “Ɛmɔhɔ ɛmɔ nyunu moa bɛɛbɔ kuro ne anwo nzra bɛbra beyia; ná ɛ́mɔma koɛhonɛfoɛ nemɔ bɛse beli AWURADE alaka ne nyunu moa.”

⁸ Na kyɛbɔ Yosua ha hyirele mmenia nemɔ nen, asɔfo nzoo bɔ betiratira boaen mmɛen totorobɛndo nzoo wɔ AWURADE nyunu ne, bɛse belili moa, na bɛhɔle so behuli awɛen ne. Né AWURADE apam alaka ne li bɛ si.

⁹ Koɛhonɛfoɛ nemɔ lili asɔfo mɔ bɔ né béhu totorobɛndo ne nyunu moa; na koɛhonɛfoɛ ne biemɔ lili alaka ne si, wɔ mmerɛ bɔ né totorobɛndohulɛ ne la so ɔ.

¹⁰ Na mmenia ne de, Yosua hyɛle bɛ kyɛ, “Nnɛma ɛmɔbɔ ese, nnɛmɔma bɛte ɛmɔ nga, yeɛ nnɛma ɛmɔtɛ bɛ noa nu, kɔpem kyẽa bɔ ngɔhã ngohyire ɛmɔ kyɛ ɛ́mɔbɔ ese ɔ, koraka ná ɛmɔabɔ ese.”

¹¹ Yiti AWURADE alaka ne fale kuro ne anwo bra yiale. Ɔfale ye nwo yiale komapɛ, na besa bɛwale asikyeleɛ ne anu bɛɛlale berɛ.

¹² Ye alehyeleɛ nu ne, Yosua dwɔsole ngyerɛmɔ tutututu, na asɔfo nemɔ soale AWURADE alaka ne.

¹³ Asɔfo nzoo bɔ betiratira boaen mmɛen totorobɛndo nzoo, bɔ né beli AWURADE alaka ne nyunu moa ne, bɛtoale so bɛhɔle, na bɛhɔle so behuli totorobɛndo ne. Koɛhonɛfoɛ nemɔ lili bɛ nyunu moa, na koɛhonɛfoɛ bɔ beli nziɛ bɛbɔ bɛ nwo waen ne lili AWURADE alaka ne asi. Sɔ mmerɛ ne amukoraa, né totorobɛndohulɛ ne la so.

¹⁴ Kyẽa bɔ ɔtɔ so nyɔ ne, bɛbɔle kuro ne anwo nzra bɛbra beyiale komapɛ, na besa bɛwale asikyeleɛ ne anu. Bɛyɔle sɔ alaa elesia.

¹⁵ Kyẽa bɔ ɔtɔ so nzoo ne, bɛpɛle aleɛ bedwɔsole, na bɛbɔle kuro ne anwo nzra bɛbra beyiale, kyɛbɔ bɛyɔle ye daa ne ala, sɔ alaa pɛen nzoo. Sɔ kyẽa ne angome de, bɛbɔle kuro ne anwo nzra bɛbra beyiale pɛen nzoo.

¹⁶ Ye pɛen nzoo ne aso, bɔ asɔfo nemɔ huli totorobɛndo nemɔ nen, Yosua sele mmenia ne kyɛ, “Ɛ́mɔbɔ ese, ofikyɛ AWURADE afa kuro ne wawura ɛmɔ sa.

¹⁷ Ɔsɛ kyɛ ɛmɔsɛkye kuro ne ɔne nu nningyein amukoraati bɔkɔɔ maa ɔyɛ afɔleɛ ma AWURADE. Sana gyanderaniɛ Rahabo ngome, ɔne mmenia bɔ bɛwɔ ye awuro berɛ amukoraati yeɛ bekonya bɛ ti bekodidi nu ɔ, ofikyɛ ye yeɛ ɔfale ɛbɔfoɛ mɔ bɔ yɛsomane bɛ ne feale ɔ.

¹⁸ Nakoso ɛ́mɔnea ɛmɔ nwo yé wɔ nningyein bɔ AWURADE atu asie berɛ kyɛ ɛ́mɔsɛkye ye ne anwo, ná wamma ye kyɛ ɛmɔkɔfa sɔ nningyein bɔ odi kyɛ ɛmɔsɛkye ye ne bie, bɔ ɔkɔmaa Yisrael asikyeleɛ ne kɔyɛ nikyee bɔ odi kyɛ bɛsɛkye ye ɔ, bɔ ɔkɔfa amaneɛ kɔbrɛ ye ɔ.

¹⁹ Nakoso nikyee biala bɔ bafa ɛdwetɛ anaa sikaa kɔkorɛ anaa kɔɔbere anaa buralɛ bayɔ de, ɔte krongron ma AWURADE; odi kyɛ yɛfa yɛkoogua AWURADE nningyein sua ne anu.”

²⁰ Yiti mmenia ne bɔle ese, na asɔfo nemɔ huli totorobɛndo nemɔ. Mmerɛ bɔ mmenia ne tele kyɛ bahu totorobɛndo nemɔ pɛ, bɛbɔle ese serɛserɛ, na fasue ne bu guale gyirigorɔɔ. Na mmenia ne amukoraa hɔle bɛ nyunu tee beewura kuro ne anu, na belili so ngonim.

²¹ Afei bɛfale ngrandɛ behuhuni kuro berɛ ama mukoraa bɔkɔɔ: mmienzua ne mmrasua, ngwadaa ne mbanyi, yeɛ behuhuni nandwie, mmoaen ne afunum amukoraa.

²² Na Yosua sele mmienzua nyɔ bɔ bɛɛtetɛle aseɛ ne besiele ne kyɛ, “Ɛmɔhɔ gyanderaniɛ n’awuro berɛ, ná ɛ́mɔfa braa ne bɛbra, ɔne ye nwo ama mukoraati, kyɛbɔ ɛmɔtale ndaen behyirele ye ne.”

²³ Yiti mmerandeɛ maentetɛlɛfoɛ ne hɔle berɛ, na bɛyele Rahabo befitele, ɔne ye baba, ye maame, oliɛma mɔ ne ye nwo ama mukoraati. Bɛyele ye abusuafoɛ mukoraati befitele, na bɛfale bɛ bɛhɔle Yisrael asikyeleɛ ne asi.

²⁴ Bɛtole kuro ne anu ɔne nu nningyein amukoraati nu see bɛyerale ye. Nu nikyee biala bɔ bafa ɛdwetɛ anaa esikaa kɔkorɛ anaa kɔɔbere anaa buralɛ bayɔ de, bɛsesale beeguale AWURADE awuro nningyein sua ne anu.

²⁵ Nakoso gyanderaniɛ Rahabo ne ye nwo ama mukoraa de, Yosua maa benyane bɛ ti bedidili nu. Na ye abusua ne atena Yisrael maa waadwu ɛnɛ ne ɛnɛ ye, ofikyɛ ɛbɔfoɛ mɔ bɔ Yosua somane bɛ maa bɛɛtetɛle Yeriko nen, ɔfale bɛ feale.

²⁶ Sɔ mmerɛ ne, Yosua payele kyɛ, “Sona biala bɔ ɔkɔkyekye Yeriko kuro he bieku nen, AWURADE prápra musue ógua ye so; sɛ ɔ́to kuro ne fapem a, ɔkɔfa ye bamuɛbaa yeɛ ɔkɔpɛ so ɔ, yeɛ sɛ ótuatua ye pambim mɔ a, ɔkɔfa ye kasiɛ yeɛ ɔkɔpɛ so ɔ!”

²⁷ Yiti AWURADE gyinane Yosua si, na bɛtele ye nga wɔ aseɛ ne aso nekaa biala.