Yosua 5 - AHYERƐLƐ KRONGRON

¹ Amorifoɛ ahemvo amukoraati bɔ bɛwɔ asue Yɔɔdan si eyia atɔleɛ bue nu dɔ ne, bɛ ne Kanaanfoɛ ahemvo amukoraa bɔ bɛwɔ mboanoa ne, mmerɛ bɔ bɛtele kyɛ AWURADE ama Yɔɔdan nu nzue wawewe wama Yisraelfoɛ, kɔpem kyɛ bɛpɛle ye nen, ahunundetelɛ tɔle bɛ so, na ɔnate Yisraelfoɛ ti bɛ nwo ngaka nwatili.

Bienzuapɛlɛ wɔ Gilgal

² Sɔ mmerɛ ne, AWURADE sele Yosua kyɛ, “Fa twerɛboɛ yɛ dɛmaa, na Yisraelfoɛ bɔ bennya bɛppɛle bɛ bienzua ne, pɛ bɛ bienzua. Ɛhe te bienzuapɛlɛ bɔ ɔtɔ so nyɔ ɔ.”

³ Yiti Yosua fale twerɛboɛ yɛle dɛmaa, na ɔpepɛle Yisraelfoɛ bienzua wɔ Gibeate Haaralɔte.

⁴ Nikyee ti bɔ ɔmaa Yosua pepɛle bɛ bienzua ɛhe: Mmienzua mukoraati bɔ befili Misraim bɛwale ne, bɔ né baso kyɛ bɛkɔ koɛ ne, bewuwuli atunu wɔ ɛserɛ ne aso, mmerɛ bɔ befili Misraim bɛwale ne asi ne.

⁵ Bɛ bɔ befili Misraim bɛwale ne, né bapɛ bɛ mukoraa bɛ bienzua; nakoso ye si ye bɔ befili Misraim bɛwale ne, bɛ bɔ bɛwole bɛ atunu amukoraa wɔ ɛserɛ ne aso de, né bennya bɛppɛle bɛ bienzua.

⁶ Afoɛ aburanna yeɛ Yisraelfoɛ tuli atee fale ɛserɛ ne aso ɔ, kɔpem kyɛ maen ne amukoraa ne bɛ koɛhonɛfoɛ amukoraa bɔ befi Misraim bɛwale ne bewuwuli ɔ, ofikyɛ bandie AWURADE dwirɛ. Na AWURADE tale ndaen hyirele bɛ kyɛ, ɔngɔma bengonwu aseɛ bɔ ɔtale ndaen hyirele bɛ nana mɔ kyɛ ɔkɔfa kɔma yɛ ne, aseɛ bɔ nyɔfonesue ne woɛ tengyɛ wɔ so ne.

⁷ Yiti bɛ mma bɔ Nyameɛ maa beesili bɛ gya nu ne yeɛ Yosua pɛle bɛ bienzua ɔ. Né bennya bɛppɛle bɛ bienzua, ofikyɛ bambɛ bɛ bienzua wɔ atunu.

⁸ Yosua pɛle mmenia ne amukoraa bɛ bienzua yiele nen, bɛtenane asikyeleɛ ne anu berɛ kɔpem kyɛ bɛ ngena ne hɔle ɔ.

⁹ Na AWURADE sele Yosua kyɛ, “Ɛnɛ kyẽa ye, maprapra Misraim animguaseɛ mafi ɛmɔ so.” Yiti bɛfrɛ berɛ Gilgal maa waadwu ɛnɛ.

¹⁰ Mmerɛ bɔ né Yisraelfoɛ wɔ asikyeleɛ berɛ wɔ Gilgal nen, bosome ne anu kyẽa bɔ ɔtɔ so buru ne nna ne, ye nɔsoa ne, belili Abɔtra ne wɔ Yeriko aseɛ frɛtɛɛ ne aso.

¹¹ Beyiele Abɔtra ne di ne, ye alehyeleɛ ne ala, belili aseɛ ne aso aleɛ bɔ ɔte taterɛ kabrɛdi ne ngyeweɛ.

¹² Kyẽa bɔ belili aseɛ ne aso aleɛ ne, mana ne yakyili tɔlɛ, yiti Yisraelfoɛ annya mana ko; na mmom belili Kanaan aseɛ ne aso aleɛ sɔ afoɛ ne.

Yosua ne AWURADE lɔen so safohene ne

¹³ Ɛlɛho bie, né Yosua wɔ nekaa bie bɔ opingye Yeriko. Ɔmane ye ti so, na mvum nu, onwuni biaa bie bɔ wahwe ngrandɛ watira ɔ kyɛ ogyi ye nyunu berɛ. Na Yosua hɔle ye nwo berɛ oobisale ye kyɛ, “Ɛboka yɛ so, anaa ɛboka yɛ pɔfoɛ nemɔ so?”

¹⁴ Na obuale kyɛ, “Nna nu biala ɔ, na mmom nde AWURADE lɔen so safohene bɔ afei mawa ɔ.” Yosua fale ye nyunu butuli berɛ sɔnene ye, na obisale ye kyɛ, “Me mene, nzikyɛ dwirɛ yeɛ ele ye ma w’akoaa ɔ?”

¹⁵ Na AWURADE lɔen so safohene ne buale Yosua kyɛ, “Puropuro wɔ gya nu mbaboa ne, ofikyɛ nekaa bɔ egyi ne te krongron.” Na Yosua yɔle sɔ.