Yosua 4 - AHYERƐLƐ KRONGRON

Ngayeɛ nyɔboɛ buru ne nyɔ ne

¹ Maen ne amukoraati pɛle asue Yɔɔdan yiele nen, AWURADE sele Yosua kyɛ,

² “Ɛ́mɔyeye mmenia ne anu mmienzua buru ne nyɔ, abusua kure biala nu sona ko,

³ ná ɛmɔhã behyire bɛ kyɛ, ‘Ɛ́mɔsesa nyɔboɛ buru ne nyɔ béfi asue Yɔɔdan afia, nekaa bɔ né asɔfo nemɔ gyigyi pindinn ne. Ɛmɔfa bɛbra, ná ɛmɔɔfa begua nekaa bɔ ɛnɛ kɔngɔen ye ɛmɔkɔkyekye asikyeleɛ ɔ.’ ”

⁴ Afei Yosua tole ye sa frɛle Yisraelfoɛ nu mmenia buru ne nyɔ bɔ waye bɛ ne, abusua kure biala nu sona ko.

⁵ Na Yosua sele bɛ kyɛ, “Ɛ́mɔli AWURADE ɛmɔ Nyameɛ alaka ne nyunu moa bɛ́hɔ asue Yɔɔdan afia, ná ɛmɔ nu biala ɔ́fa nyɔboɛ ko ɔto ye kɔme anwo. Nyɔboɛ ko biala gyi berɛ ma Yisrael abusua kure ko,

⁶ amaa ɔnate so wayɛ ngayeɛ wama ɛmɔ. Na sɛ kyẽa bie ɛmɔ mma mɔ bisa ɛmɔ kyɛ, ‘Sɔ nyɔboɛ hemɔ, bɛ bo kyire sɛɛ?’ a,

⁷ ɛmɔhã behyire bɛ kyɛ, Yɔɔdan nu nzue pɛle wɔ AWURADE apam alaka ne nyunu. Mmerɛ bɔ né apam alaka ne ɔ́pɛ asue Yɔɔdan nen, Yɔɔdan nu nzue pɛle. Yiti sɔ nyɔboɛ hemɔ te ngayeɛ afebɔɔ ma Yisraelfoɛ.”

⁸ Yisraelfoɛ lili Yosua dwirɛ ne aso. Bɛsesale nyɔboɛ buru ne nyɔ wɔ asue Yɔɔdan afia. Nyɔboɛ ko biala gyi berɛ ma abusua kure ko, kyɛbɔ AWURADE ha hyirele Yosua nen. Bɛfa bɛpɛle nu bɛwale b’asikyeleɛ berɛ, na bɛfa beguale berɛ.

⁹ (Afei Yosua koso fale nyɔboɛ buru ne nyɔ penapenane asue Yɔɔdan afia, nekaa bɔ asɔfo mɔ bɔ bɛsõ alaka ne gyinagyinane ne; na ɔbaadwu ɛnɛ ye, nyɔboɛ nemɔ tɛ wɔ berɛ).

¹⁰ Asɔfo mɔ bɔ né bɛsõ alaka nen, begyinane Yɔɔdan afia toonn, kɔpem kyɛ edwirɛ bɔ AWURADE hyɛle Yosua kyɛ ɔha hyire mmenia nen, mmenia ne yɔle ye mukoraati yiele ɔ, kyɛbɔ Mose hyɛle kyɛ Yosua ɔyɔ ne amukoraa. Na mmenia ne hane bɛ nwo bɛpɛle asue ne.

¹¹ Mmenia ne amukoraati pɛle asue ne pɛ, yeɛ AWURADE alaka ne ne asɔfo nemɔ koso bɛpɛle ɔ, na beelili mmenia ne nyunu moa.

¹² Rubenfoɛ ne Gadefoɛ ne Manase abusua kure ne bue pɛle asue ne. Né betiratira akodeɛ beli Yisraelfoɛ nyunu moa, kyɛbɔ Mose hyɛle bɛ ne.

¹³ Mmenia kɔyɛ apee aburanna, bɔ basiesie bɛ nwo bɛkɔ koɛ yeɛ bɛpɛle asue ne ɔ, na bɛhɔle koɛ wɔ Yeriko aseɛ frɛtɛɛ ne aso wɔ AWURADE nyunu.

¹⁴ Sɔ kyẽa ne, AWURADE yɛle Yosua sona bɔ odi mu wɔ Yisraelfoɛ amukoraa bɛ nyunu, na bebuli ye wɔ mmerɛ amukoraa bɔ né ɔte ngoa nu ɔ, kyɛbɔ bebuli Mose nen.

¹⁵ Na AWURADE sele Yosua kyɛ,

¹⁶ “Ma asɔfo mɔ bɔ bɛsõ Adanzeɛ alaka ne befi Yɔɔdan nu befite.”

¹⁷ Na Yosua ha hyirele asɔfo nemɔ kyɛ, “Ɛ́mɔfi Yɔɔdan nu béfite!”

¹⁸ Asɔfo mɔ bɔ bɛsõ AWURADE apam alaka nen, befili asue Yɔɔdan afia befite bɛwale, na mmerɛ bɔ bɛ gya tiale etii so pɛ, yeɛ Yɔɔdan nu nzue hyɛle ye bo kyɛ ɔse ɔ, na oyili bu fale so kyɛ ye daa ne ala.

¹⁹ Bosome bɔ oli moa ne anu, ye eleburu ne aso yeɛ mmenia ne fili asue Yɔɔdan nu befite bɛwale ɔ, na bɛkyekyele asikyeleɛ wɔ Gilgal, wɔ Yeriko eyia afiteleɛ.

²⁰ Na nyɔboɛ buru ne nyɔ ne, bɔ bɛsesale befili asue Yɔɔdan nu ne, Yosua fa penapenane Gilgal.

²¹ Na osele Yisraelfoɛ kyɛ, “Kyẽa bie sɛ ɛmɔ mma mɔ bisa bɛ baba mɔ kyɛ, ‘Sɔ nyɔboɛ hemɔ, bɛ bo kyire sɛɛ?’ a,

²² ɛ́mɔma bɛ́te ye bo kyɛ, ‘Yisrael fale aseɛ wosee so yeɛ ɔpɛle asue Yɔɔdan ɔ.’

²³ Ofikyɛ AWURADE ɛmɔ Nyameɛ mane Yɔɔdan nu nzue wewele mane ɛmɔ, kɔpem kyɛ ɛmɔpɛle asue ne ɔ, kyɛbɔ AWURADE ɛmɔ Nyameɛ yɛle Ɛpo Kɔkorɛ ne ala, bɔ ɔmaa ɔwewele mane yɛ kɔpem kyɛ yɛpɛle asue ne ɔ.

²⁴ AWURADE yɔle sɔ, kyɛbɔ aseɛ so mmenia mukoraati konwu ye kyɛ AWURADE le tumi ɔ, amaa ɔnate so ɛmɔasuro AWURADE ɛmɔ Nyameɛ mmerɛ biala.”