Yosua 3 - AHYERƐLƐ KRONGRON

Yisraelfoɛ pɛ asue Yɔɔdan

¹ Yosua ne Yisraelfoɛ amukoraati bedwɔsole ngyerɛmɔ tutututu, betuli bɛ bo befili Sitim, na beedwuli asue Yɔɔdan noa. Bɛkyekyele asikyeleɛ wɔ berɛ koraka yeɛ bɛpɛ asue ne ɔ.

² Ye ɛlɛsa ne ayieleɛ, mbanyi nemɔ hyinihyini asikyeleɛ ne anu,

³ na bɛhyɛle mmeraa bɛmane mmenia ne kyɛ, “Sɛ ɛmɔnwu AWURADE ɛmɔ Nyameɛ apam alaka ne kyɛ Lewifoɛ bɔ bɛte asɔfo ne basoa a, ye de ɔsɛ kyɛ ɛmɔtu ɛmɔ bo befi asikyeleɛ ne anu. Ɛ́mɔli ye si,

⁴ kyɛbɔ ɔkɔyɛ ná ɛmɔanwu atee bɔ odi kyɛ ɛmɔfa so ɔ, ofikyɛ ɛmɔffale atee ye aso le. Nakoso odi kyɛ ɛmɔyakyi atee kɔyɛ agyirɛ apee nyɔ bɛto ɛmɔ ne apam alaka ne afia; nnɛma ɛmɔpingye ye.”

⁵ Afei Yosua sele mmenia ne kyɛ, “Ɛ́mɔpete ɛmɔ nwo, ofikyɛ ɛhema AWURADE kɔyɔ anwanwadeɛ wɔ ɛmɔ nu.”

⁶ Na Yosua sele asɔfo nemɔ kyɛ, “Ɛ́mɔsoa apam alaka ne, ná ɛmɔse beli mmenia ne anyunu.” Yiti bɛsoale apam alaka ne, na belili mmenia ne nyunu moa.

⁷ AWURADE sele Yosua kyɛ, “Ɛnɛ kyẽa ye, ngɔhyɛ ye bo ngɔyɛ wɔ sona bɔ odi mu wɔ Yisraelfoɛ mukoraati bɛ nyunu, amaa ɔnate so banwu ye kyɛ, kyɛbɔ ngyinane Mose si nen, sɔ ala yeɛ ngogyina wɔ si ɔ.

⁸ Wɔ de, ka kyire asɔfo mɔ bɔ bɛsõ apam alaka ne kyɛ, ‘Sɛ ɛmɔdwu Yɔɔdan asue ne noa a, ɛmɔɔgyina asue ne anu dinn.’ ”

⁹ Afei Yosua sele Yisraelfoɛ kyɛ, “Ɛ́mɔpingye wa beetie AWURADE ɛmɔ Nyameɛ noa dwirɛ.”

¹⁰ Na Yosua sele kyɛ, “Ɛhe yeɛ ɔkɔmaa ɛmɔkonwu ye kyɛ Nyameɛ teasefoɛ ne ogyi ɛmɔ si ɔ, na ɔkɔfoa Kanaanfoɛ, Hitifoɛ, Hiwifoɛ, Perisifoɛ, Gɛgasifoɛ, Amorifoɛ, ne Yebusifoɛ kofi ɛmɔ nyunu amba:

¹¹ Ɛ́mɔtie! Aseɛ mukoraa Mene ne, ye apam alaka ne ódi ɛmɔ nyunu moa ɔ́kɔ asue Yɔɔdan nu.

¹² Yiti ɛ́mɔyeye Yisrael abusua kure nemɔ nu mmienzua buru ne nyɔ; abusua kure biala nu sona ko.

¹³ Asɔfo mɔ bɔ bɛsõ AWURADE bɔ ɔte aseɛ mukoraa Mene ye alaka nen, sɛ bɛ gya tia Yɔɔdan nzue ne anu pɛ a, Yɔɔdan nu nzue bɔ ɔtengyɛ fi ye sorɔ dɔ ne kɔpɛ, na ye noa kɔboa wɔ neka horɛ.”

¹⁴ Yiti mmerɛ bɔ mmenia ne tuli bɛ bo befili bɛ tena sua nemɔ anu kyɛ bɛkwaapɛ asue Yɔɔdan nen, né asɔfo mɔ bɔ bɛsõ apam alaka ne li mmenia ne nyunu moa.

¹⁵ Né ɔte atokoɔ telɛ mmerɛ, mmerɛ bɔ odwu a asue Yɔɔdan oyi bu fa ye boo amukoraati nu ɔ. Nakoso mmerɛ bɔ mmenia bɔ bɛsõ alaka ne dwuli Yɔɔdan noa, ná asɔfo mɔ bɔ bɛsõ alaka ne gya tiale nzue ne anu pɛ,

¹⁶ nzue bɔ ɔtengyɛ fi ye sorɔ dɔ ne gyinane. Ye noa boale ko wɔ nziɛ nziɛ, wɔ Adam, kuro bɔ opingye Saretan ne. Na nzue bɔ ɔtengyɛ kogua Araba ɛpo, bɔ bɛfrɛ ye Ngyee Po ne anu ne, ye koso ɔpɛle koraa. Yiti mmenia ne pɛle nu Yeriko ndendeneɛ so.

¹⁷ Mmerɛ bɔ né Yisraelfoɛ amukoraati bɛnate aseɛ wosee so bɛ́pɛ nu bɛ́kɔ nen, né asɔfo mɔ bɔ bɛsõ AWURADE apam alaka ne gyigyi aseɛ wosee so pindinn wɔ asue Yɔɔdan afia, kɔpem kyɛ maen ne amukoraati pɛle asue Yɔɔdan yiele ɔ.