Yosua 23 - AHYERƐLƐ KRONGRON

Yosua ne Yisraelfoɛ di ngraa

¹ Afoɛ pee asi ne, mmerɛ bɔ AWURADE mane Yisrael nyane asomdwee fili ye pɔfoɛ amukoraa bɔ bapɛ ye nwo bayia sa nu nen, mmerɛ bɔ né Yosua anyi wayɛ aworowaa ne,

² Yosua mane Yisraelfoɛ amukoraati, bɛ mbanyi ne bɛ mmusua mbanyi, bɛ ndɛenbualɛfoɛ ne b’atitirefoɛ beyiale, na osele bɛ kyɛ, “Kekesaala ye de, manyi, yeɛ mayɛ aworowaa.

³ Ɛmɔ bɔbɔ bɛ nye tua nikyee biala bɔ ɔnate ɛmɔ ti AWURADE ɛmɔ Nyameɛ wafa wayɔ sɔ maen hemɔ amukoraa ɔ, ofikyɛ AWURADE ɛmɔ Nyameɛ ne, ye yeɛ ɔho mane ɛmɔ ɔ.

⁴ Ɛ́mɔtie, maen maen mɔ bɔ baha bɔ yɛnnya yɛllili bɛ so ngonim ne, yeɛ afei maen maen amukoraa bɔ mali bɛ so ngonim ne, b’aseɛ bɔ ofi asue Yɔɔdan noa ɔkwaadwu Ɛpo piri ne wɔ eyia atɔleɛ ne, mahyɛ mama ɛmɔ abusua kure nemɔ maa bafa bayɛ b’agyapadeɛ.

⁵ AWURADE ɛmɔ Nyameɛ ne, ɔkɔmaa bɛkɔho bekosa, ɔkɔfoa bɛ kofi ɛmɔ nyunu; b’aseɛ ne kɔyɛ ɛmɔ deɛ, kyɛbɔ AWURADE ɛmɔ Nyameɛ hyɛle ɛmɔ bɔ ne.

⁶ Yiti ɛ́mɔmia ɛmɔ nye, ná ɛ́mɔnea kyɛ nikyee biala bɔ bahyerɛ ye Mose mmeraa nwomaa ne anu ne, ɛmɔkoli so ná ɛmɔkɔyɔ ɔ. Nnɛma ɛmɔdi ye nwo makyebu bɛkɔ famaa so anaa bɛen so;

⁷ amaa ɛmɔamva ɛmɔ nwo bammɔ maen maen mɔ bɔ baha wɔ ɛmɔ nwo wa ye, amaa ɛmɔammɔ bɛ nyameɛ nemɔ dumaa, amaa ɛmɔamva bɛ banda ndaen, amaa ɛmɔanzo bɛ, ná ɛmɔangoto bɛ.

⁸ Na mmom odi kyɛ ɛmɔfa ɛmɔ nwo bɛbɔ AWURADE ɛmɔ Nyameɛ, kyɛbɔ ɛmɔayɔ alaa maa waadwu ɛnɛ ye.

⁹ Ofikyɛ AWURADE afoa maen mbiri mbiri bɔ bɛ nwo yɛ se ɔ wafi ɛmɔ nyunu. Na ɛmɔ de, toonn bɔ ɔbaadwu ɛnɛ ye, ebiala nne berɛ bɔ wahora wagyina ɛmɔ nyunu ɔ.

¹⁰ Ɛmɔ nu sona ko kora foa mmenia apee, ofikyɛ AWURADE ɛmɔ Nyameɛ yeɛ ɔko ma ɛmɔ ɔ, kyɛbɔ ɔhyɛle ɛmɔ bɔ ne.

¹¹ Yiti ɛ́mɔnea ɛmɔ nwo yé, ná ɛmɔhuro AWURADE ɛmɔ Nyameɛ dwirɛ.

¹² Ofikyɛ sɛ ɛmɔanni nahorɛ, ná maen maen hemɔ anu mmenia bɔ baha wɔ ɛmɔ nwo wa ye, ɛmɔ ne bɛ bɔ afɛ, ná ɛmɔgyigya bɛ nwo, bɔ ɛmɔgya bɛ mmrasua ma bɛ koso begya ɛmɔ deɛ a,

¹³ ye de ɛ́mɔnwu ye kyɛ, AWURADE ɛmɔ Nyameɛ ne, ɔngɔfoa maen maen hemɔ ngofi ɛmɔ nyunu ko, na mmom bɛkɔkakyi ɛmɔ so ngaen ne atodum. Bɛkɔkakyi mbire bekofi ɛmɔ, ná bakakyi mmowue bawowɔ ɛmɔ nye, kɔpem kyɛ ɛmɔkowuwu bekofi aseɛ paa he bɔ AWURADE ɛmɔ Nyameɛ wafa wama ɛmɔ ne aso ɔ.

¹⁴ “Kekesaala ye de, waha kãa né matoa me mbanyi mɔ. Na ɛmɔ ahone nu ne ɛmɔ ti anu de, ɛmɔ amukoraa bɛse kyɛ, nningyein paa bɔ AWURADE ɛmɔ Nyameɛ ɔfa hyɛle ɛmɔ bɔ ne, nu ko po nne berɛ bɔ wali ɛmɔ ngasi wɔ nu ɔ; ye mukoraa awa nu ama ɛmɔ, ko po anni ngasi.

¹⁵ Nakoso, nningyein paa bɔ AWURADE ɛmɔ Nyameɛ fa hyɛle ɛmɔ bɔ ne, kyɛbɔ ye mukoraa awa nu ne, sɔ ala yeɛ (sɛ ɛmɔanni nahorɛ a), AWURADE kɔma edwirɛ tɛɛ amukoraa kɔto ɛmɔ ɔ, kɔpem kyɛ okohũhũ ɛmɔ kofi aseɛ paa he bɔ AWURADE ɛmɔ Nyameɛ wafa wama ɛmɔ ne aso ɔ.

¹⁶ AWURADE ɛmɔ Nyameɛ apam bɔ ɔhyehyɛ mane ɛmɔ ne, sɛ ɛmɔbu so, ná ɛmɔkɔso nyameɛ foforɛ biemɔ, ná ɛmɔkoto bɛ a, ye de AWURADE kɔfɛ ɛmɔ so yaa piri paa, na ɛmɔkowuwu ndɛndɛ bekofi aseɛ paa bɔ wafa wama ɛmɔ ne aso.”