Yosua 21 - AHYERƐLƐ KRONGRON

Lewifoɛ nguro nemɔ

¹ Afei Lewi abusua ne anu mbanyi mɔ, bɛwale ɔsɔfo Eleasa ne Nun awa Yosua ne abusua mbanyi bɔ bɛwɔ Yisrael mmusua kure nemɔ anu berɛ,

² wɔ Silo bɔ ɔwɔ Kanaan aseɛ so beesele bɛ kyɛ, “AWURADE fale Mose so hyɛle kyɛ, ɔsɛ kyɛ bɛma yɛ nguro maa yɛtena so, ɔne nguro nemɔ nwo aseɛ bɔ yɛ nyɛmmoa kodidi so ɔ.”

³ Yiti Yisraelfoɛ gyinane AWURADE noa dwirɛ ne aso, na bɛyele nguro hemɔ ne bɛ nwo aseɛ bɔ nyɛmmoa didi so ɔ befili b’agyapadeɛ nu bɛmane Lewifoɛ mɔ.

⁴ Serewagualɛ ne yele Kohatefoɛ mmusua nemɔ. Yiti Lewifoɛ bɔ bɛte ɔsɔfo Aarɔn bosofoɛ ne, serewagualɛ ne maa benyane nguro buru ne nza befili Yuda abusua kure, Simeon abusua kure ne Benyamin abusua kure ne berɛ.

⁵ Serewagualɛ ne mane Kohatefoɛ ngaa ne nyane nguro buru befili mmusua mɔ bɔ bɛwɔ abusua kure hemɔ anu dɔ: Efraim abusua kure, Dan abusua kure, yeɛ Manase abusua kure ne bue.

⁶ Serewagualɛ ne mane Gɛsɔn boso ama nyane nguro buru ne nza befili mmusua bɔ bɛwɔ abusua kure hemɔ anu dɔ: Yisaka abusua kure, Asɛ abusua kure, Nafetali abusua kure, yeɛ Manase abusua kure ne bue bɔ ɔwɔ Basan ne.

⁷ Merari boso ama ne, nu mmusua mmusua ne, bɛyele nguro buru ne nyɔ befili abusua kure hemɔ anu bɛmane bɛ: Ruben abusua kure, Gade abusua kure, yeɛ Sebulɔn abusua kure.

⁸ Sɔ nguro nemɔ ne bɛ nwo aseɛ bɔ nyɛmmoa didi so ne, Yisraelfoɛ nate serewagualɛ so yeɛ bɛfa bɛmane Lewifoɛ ɔ, kyɛbɔ AWURADE nate Mose so hyɛle ne.

⁹ Nguro hemɔ bɔ bɛ dumaa lili so ye, yeɛ bɛye befili Yuda abusua kure nu ɔne Simeon abusua kure nu ɔ.

¹⁰ Bɛfa bɛmane Aarɔn bosofoɛ, ofikyɛ bɛ yeɛ serewagualɛ ne lili moa yele bɛ ɔ. Befi Kohatefoɛ abusua nu, na sɔ abusua ne koso fi Lewi abusua kure nu.

¹¹ Bɛfale Kiriate Aba (Aba te Anake baba) bɔ besa bɛfrɛ ye Hebron ne, ɔne ye nwo aseɛ bɔ nyɛmmoa didi so ɔ bɛmane bɛ. Ɔwɔ Yuda mmokaa aseɛ ne aso.

¹² Nakoso kuro ne anwo mvofoen ne ye nwo namue mɔ de, né bali moa bafa bama Yefune awa Kalebo maa wayɛ ye agyapadeɛ.

¹³ Ɔsɔfo Aarɔn boso ama ne, bɛfale Hebron bɛmane bɛ. Ɔte mmenia bɔ bali awue nwo adwaabɔlɛ kuro, na ye nwo aseɛ bɔ nyɛmmoa didi so ɔ boka so. Besa bɛfale nguro hemɔ ne bɛ nwo aseɛ bɔ nyɛmmoa didi so ɔ bɛbokale bɛ so: Libina,

¹⁴ Yatiri, Ɛsetemoa,

¹⁵ Holon, Dɛbi,

¹⁶ Ayin, Yuta, yeɛ Bete Semese. Bɛyele nguro ngona befili sɔ abusua kure nyɔ ne anu.

¹⁷ Bɛyele nguro hemɔ ne bɛ nwo aseɛ bɔ nyɛmmoa didi so ɔ befili Benyamin abusua kure nu bɛmane bɛ: Gibeon, Geba,

¹⁸ Anatote, Almɔn: bɛte nguro nna.

¹⁹ Aarɔn bosofoɛ ne, bɔ bɛ yeɛ bɛte asɔfo ne, né bɛ nguro ne amukoraa te buru ne nza, bɛ ne bɛ nwo aseɛ bɔ nyɛmmoa didi so ɔ.

²⁰ Lewi abusua kure ne, nu mmenia bɔ bɛte Kohate boso ama ne, bɛ ngaa ne, bɛmane bɛ Efraim abusua kure nguro nemɔ bie.

²¹ Mmenia bɔ bali awue nwo adwaabɔlɛ kuro Sɛkem, bɔ ɔwɔ Efraim mmokaa aseɛ so ne, ɔne ye nwo aseɛ bɔ nyɛmmoa didi so ɔ yeɛ bɛfa bɛmane bɛ ɔ. Yeɛ bɛfale nguro hemɔ ne bɛ nwo aseɛ bɔ nyɛmmoa didi so ɔ bɛbokale bɛ so: Gɛsɛre,

²² Kibisaim, yeɛ Bete Horon: bɛte nguro nna.

²³ Bɛyele nguro hemɔ ne bɛ nwo aseɛ bɔ nyɛmmoa didi so ɔ befili Dan abusua kure nu bɛmane bɛ: Ɛlteke, Gibeton,

²⁴ Ayalɔn ne Gate Rimon: bɛte nguro nna.

²⁵ Bɛyele nguro hemɔ ne bɛ nwo aseɛ bɔ nyɛmmoa didi so ɔ befili Manase abusua kure ne bue nu bɛmane bɛ: Taanake ne Gate Rimon: bɛte nguro nyɔ.

²⁶ Kohate mmusua ngaa ne, bɛ nguro ne amukoraa te buru, bɛ ne bɛ nwo aseɛ bɔ nyɛmmoa didi so ɔ.

²⁷ Gɛsɔn boso ama ne, bɛte Lewi mmusua mmusua ne anu ko. Bɛyele nguro hemɔ ne bɛ nwo aseɛ bɔ nyɛmmoa didi so ɔ befili Manase abusua kure ne bue nu bɛmane bɛ: Golan bɔ ɔte mmenia bɔ bali awue nwo adwaabɔlɛ kuro bɔ ɔwɔ Basan, yeɛ afei Beesetera. Bɛte nguro nyɔ.

²⁸ Bɛyele nguro hemɔ ne bɛ nwo aseɛ bɔ nyɛmmoa didi so ɔ befili Yisaka abusua kure nu bɛmane bɛ: Kision, Daberate,

²⁹ Yamute, Ɛn Ganim. Bɛte nguro nna.

³⁰ Bɛyele nguro hemɔ ne bɛ nwo aseɛ bɔ nyɛmmoa didi so ɔ befili Asɛ abusua kure nu bɛmane bɛ: Misal, Abedon,

³¹ Hɛlkate, yeɛ Rehobo. Bɛte nguro nna.

³² Bɛyele nguro hemɔ ne bɛ nwo aseɛ bɔ nyɛmmoa didi so ɔ befili Nafetali abusua kure nu bɛmane bɛ: Kedese bɔ ɔte mmenia bɔ bali awue nwo adwaabɔlɛ kuro bɔ ɔwɔ Galilea, Hamote Dɔɔ, yeɛ Katan. Bɛte nguro nza.

³³ Gɛsɔnfoɛ mmusua mmusua ne, bɛ nguro ne amukoraa te buru ne nza, bɛ ne bɛ nwo aseɛ bɔ nyɛmmoa didi so ɔ.

³⁴ Lewifoɛ ngaa ne, bɛ ole Merari mmusua mmusua ne. Bɛyele nguro hemɔ ne bɛ nwo aseɛ bɔ nyɛmmoa didi so ɔ befili Sebulɔn abusua kure nu bɛmane bɛ: Yokeneam, Kata,

³⁵ Dimina, yeɛ Nahalale. Bɛte nguro nna.

³⁶ Bɛyele nguro hemɔ ne bɛ nwo aseɛ bɔ nyɛmmoa didi so ɔ befili Ruben abusua kure nu bɛmane bɛ: Besɛre, Yahasa,

³⁷ Kedemote, yeɛ Mefaate. Bɛte nguro nna.

³⁸ Bɛyele nguro hemɔ ne bɛ nwo aseɛ bɔ nyɛmmoa didi so ɔ befili Gade abusua kure nu bɛmane bɛ: Ramote bɔ ɔte mmenia bɔ bali awue nwo adwaabɔlɛ kuro bɔ ɔwɔ Gileade, Mahanaim,

³⁹ Hesebon, Yasere. Bɛte nguro nna.

⁴⁰ Lewi abusua kure ngaa ne, bɔ bɛte Merari boso ama ahoroɔ nen, bɛ nguro bɔ benyane ye ne amukoraa te buru ne nyɔ.

⁴¹ Yisraelfoɛ agyapadeɛ ne, nguro amukoraa bɔ bɛye befili nu bɛmane Lewifoɛ te aburanna ne mmɔtwɛ, bɛ ne bɛ nwo aseɛ bɔ nyɛmmoa didi so ɔ.

⁴² Nguro nemɔ anu biala, né aseɛ bɔ nyɛmmoa didi so ɔ apɛ ye nwo ayia. Sɔ ala yeɛ nguro nemɔ amukoraa bɛte ɔ.

⁴³ Yiti aseɛ bɔ AWURADE tale ye nwo ndaen hyirele Yisraelfoɛ bɛ nana mɔ kyɛ ɔkɔfa kɔma bɛ ne, ɔfale ye mukoraa mane bɛ; na bɛfale aseɛ ne bɛtenane so.

⁴⁴ AWURADE bɔle bɛ atenaseɛ asomdwee nu wɔ aseɛ ne aso nekaa biala, kyɛbɔ ɔtale ye nwo ndaen hyirele bɛ nana mɔ ne. Bɛ pɔfoɛ amukoraa nu ko po wangora bɛ nyunu gyina, ofikyɛ AWURADE maa belili bɛ mukoraa so ngonim.

⁴⁵ Edwirɛ fɛɛ amukoraa bɔ AWURADE fa bɔle Yisrael awuro ama anohoba nen, wanni bɛ ngasi wɔ bɛ nu biala nu, na ye mukoraa wale nu.