Yosua 14 - AHYERƐLƐ KRONGRON

Yɔɔdan eyia atɔleɛ aseɛ ne hyɛlɛ

¹ Agyapadeɛ hemɔ yeɛ Yisraelfoɛ nyane ye wɔ Kanaan aseɛ so ɔ. Ɔsɔfo Eleasa, Nun awa Yosua, yeɛ mbanyi bɔ bɛlela mmusua nemɔ noa wɔ Yisrael abusua kure nemɔ anu yeɛ bɛhyɛle aseɛ ne bɛmane Yisraelfoɛ ɔ.

² Bɛfale serewagualɛ so yeɛ bɛhyɛle b’aseɛ ne ɔ, kyɛbɔ AWURADE hyɛle Mose fale abusua ngona ne bue ne anwo ne.

³ Ofikyɛ abusua nyɔ ne bue bɔ bɛwɔ Yɔɔdan si dɔ ne, né Mose ali moa wafa b’agyapadeɛ deɛ wama bɛ; nakoso Lewifoɛ de, wamma bɛ agyapadeɛ biala.

⁴ Né Yosef mma nemɔ bɛte abusua kure nyɔ: Manase ne Efraim. Lewifoɛ nemɔ de, bannya aseɛ ne bie, sana nguro mɔ bɔ bɛkɔtena so ɔ, ɔne nguro nemɔ nwo aseɛ bɔ bɛ mmoaen ne nandwie kodidi so ɔ.

⁵ Kyɛbɔ AWURADE hyɛle Mose nen, sɔ ala yeɛ Yisraelfoɛ yɔle ɔ; bɛhyɛle aseɛ ne.

Bɛfale Hebron bɛmane Kalebo

⁶ Afei Yudafoɛ wale Yosua berɛ wɔ Gilgal, na Kalebo bɔ ɔse ole Kenisiniɛ Yefune ne, osele Yosua kyɛ, “Wɔ bɔbɔ ala ɛse edwirɛ bɔ AWURADE ha fale me ne wɔ nwo hyirele Nyameɛ sona Mose wɔ Kadese Banea ɔ.

⁷ Mmerɛ bɔ AWURADE somvoɛ Mose somane me fili Kadese Banea maa ngɔndetɛle aseɛ ne, né mali afoɛ aburanna; na nza mvale ye nwo amaneɛ turoloo mma mmɔle ye.

⁸ Aliɛmaa mɔ bɔ bɛ ne me hɔle ne, bɛmane ahunundetelɛ tɔle yɛ mmenia ne aso, nakoso me de, nnili nahorɛ turoloo mane AWURADE me Nyameɛ.

⁹ Na Mose tale ndaen sɔ kyẽa ne kyɛ, ‘Nahorɛ nu, aseɛ bɔ wɔ gya atia so ne, ɔkɔyɛ wɔ ne wɔ mma deɛ afebɔɔ, ofikyɛ ali nahorɛ turoloo ama AWURADE me Nyameɛ.’

¹⁰ Na wɔ bɔbɔ wɔ nye ta, kyɛbɔ AWURADE hyɛle bɔ nen, wamaa matena ngoa nu alaa afoɛ aburanna ne nnu ɛhe, fite mmerɛ bɔ AWURADE hane sɔ dwirɛ ne hyirele Mose ɔ, mmerɛ bɔ né Yisrael nate ɛserɛ ne aso ne. Na kekesaala ye, mali afoɛ aburawɔtwɛ ne nnu.

¹¹ Na kyẽa bɔ Mose somane me ne, kyɛbɔ né me nwo si yɛ se ne, sɔ ala yeɛ kekesaala ye me nwo tɛ yɛ se ɔ. M’anwoserɛ tɛ tua me, bɔ ngɔhora ngɔhɔ koɛ, ná mali akɔneaba ɔ.

¹² Yiti, mmokaa aseɛ he bɔ AWURADE hane ye nwo dwirɛ sɔ kyẽa nen, fa ma me. Sɔ kyẽa ne, ɛtele kyɛ né Anakefoɛ ne nguro mbiri bɔ bato bɛ nwo fasue mɔ wɔ berɛ. Nakoso ebiaa AWURADE kogyina me si maa ngɔfoa bɛ ngofi berɛ, kyɛbɔ AWURADE hane ne.”

¹³ Yeɛ Yosua yirale Yefune awa Kalebo, na ɔfale Hebron mane ye maa ɔyɛle ye agyapadeɛ.

¹⁴ Yiti Kalebo bɔ ɔse ole Kenisiniɛ Yefune ne, Hebron ayɛ ye agyapadeɛ maa waadwu ɛnɛ, ofikyɛ olili nahorɛ turoloo mane AWURADE Yisrael Nyameɛ.

¹⁵ Daa ne, né Hebron dumaa ole Kiriate Aba. Aba sɔ ne, né ye yeɛ ɔte branoa paa wɔ Anakefoɛ nu ɔ. Na asomdwee wale aseɛ ne aso bɔ koɛ anzi ɔ.