Yosua 12 - AHYERƐLƐ KRONGRON

Ahemvo bɔ Mose lili bɛ so ngonim ne

¹ Aseɛ ne aso ahemvo bɔ Yisraelfoɛ lili bɛ so ngonim, bɔ Yisraelfoɛ fale b’aseɛ bɛtenane so wɔ asue Yɔɔdan si, wɔ eyia afiteleɛ bue nu dɔ, fite Anɔn Bɔnza ne anu bɔ ɔkwaadwu Hɛmɔn bokaa ne anwo, ɔne Araba bɔ ɔwɔ eyia afiteleɛ amukoraati ne, bɛ ɛhe:

² Amorifoɛ hene Sihon bɔ ɔtenane Hesebon, bɔ olili hene fite Aroye bɔ ɔwɔ Anɔn bɔnza ne noa, fite bɔnza ne afia ne, bɔ ɔkwaadwu asue Yabɔko, bɔ ɔte Amonfoɛ ɛwɛen ne. Sɔ aseɛ ne amukoraa te Gileade bue;

³ ɔne Araba ne bɔ ɔkwaadwu Kinerote ɛpo eyia afiteleɛ, bɔ ɔkwaadwu Araba ɛpo ne, bɔ ɔte Ngyee po ne, wɔ Bete Yesimote atee so dɔ, bɔ ɔwɔ Pisiga bokaa ne aseɛnwo, wɔ ngwaen dɔ ne;

⁴ ɔne Basan hene Ogo, bɔ ɔte Refaimfoɛ bɛ bosofoɛ bɔ baha ne ko. Ɔtenane Astarote ne Yedrei.

⁵ Olili hene wɔ Hɛmɔn bokaa ne aso bɔ ɔkwaadwu kuro Saleka so, ɔne Basan amukoraa bɔ ɔkwaadwu Gesurefoɛ ne Maakatifoɛ ɛwɛen so, ɔne Gileade bue bɔ ɔkwaadwu Hesebon hene Sihon ɛwɛen so.

⁶ AWURADE somvoɛ Mose ne Yisraelfoɛ lili bɛ so ngonim, na AWURADE somvoɛ Mose hyɛle b’aseɛ ne mane Rubenfoɛ, Gadefoɛ ne Manase abusua kure ne bue.

Ahemvo bɔ Yosua lili bɛ so ngonim ne

⁷ Ɛhemɔ ole aseɛ ne aso ahemvo bɔ Yosua ne Yisraelfoɛ lili bɛ so ngonim, wɔ asue Yɔɔdan eyia atɔleɛ, fite Baal Gade bɔ ɔwɔ Lebanon bɔnza ne anu bɔ ɔkwaadwu Halake bokaa bɔ ɔtrɛ kɔ Sɛre ne. (Yosua hyehyɛle b’aseɛ ne anu mane Yisrael abusua kure nemɔ maa ɔyɛle b’agyapadeɛ, na ɔfale abusua kure biala ye bue deɛ mane ye:

⁸ mmokaa aseɛ ne, aseɛ frɛtɛɛ ne, Araba ne, mmokaa nemɔ nye abo, ɛserɛ ne, ngwaen dɔ aseɛ ne, yeɛ Hitifoɛ, Amorifoɛ, Kanaanfoɛ, Perisifoɛ, Hiwifoɛ ne Yebusifoɛ b’aseɛ ne).

⁹ Ahemvo nemɔ ole: Yeriko hene, Aye bɔ opingye Betel ne hene;

¹⁰ Yerusalem hene, Hebron hene;

¹¹ Yamute hene, Lakise hene;

¹² Eglon hene, Gɛsɛre hene,

¹³ Dɛbi hene, Gɛdɛ hene;

¹⁴ Hɔma hene, Arade hene;

¹⁵ Libina hene, Adulam hene;

¹⁶ Makeda hene, Betel hene;

¹⁷ Tapua hene ko, Hefa hene;

¹⁸ Afeke hene, Lasaron hene;

¹⁹ Madon hene, Hasɔ hene;

²⁰ Simron Meron hene, Akisafe hene;

²¹ Taanake hene, Megido hene;

²² Kedese hene, Yokeneam bɔ ɔwɔ Kamɛl hene;

²³ Dɔɔ hene bɔ ɔwɔ Nafate Dɔɔ, Goyim hene bɔ ɔwɔ Gilgal;

²⁴ Tisa hene. Ahemvo ne amukoraati bɛte aburasa ne ko.