Yosua 11 - AHYERƐLƐ KRONGRON

Yisrael di Kanaan sorɔ dɔ ahemvo mɔ so ngonim

¹ Mmerɛ bɔ Hasɔ hene Yabin tele sɔ dwirɛ nen, ɔsomane maa bɛɛbɔle ahemvo hemɔ amaneɛ: Madon hene Yobabo, Simron hene, Akisafe hene,

² ahemvo mɔ bɔ bɛwɔ sorɔ dɔ mmokaa aseɛ ne aso ne, bɛ bɔ bɛwɔ Araba ne anu wɔ Kinerote ngwaen dɔ ne, bɛ bɔ bɛwɔ aseɛ frɛtɛɛ ne aso, ɔne bɛ bɔ bɛwɔ Nafɔte Dɔɔ wɔ eyia atɔleɛ ne.

³ Bɛɛbɔle ɛhemɔ koso amaneɛ: Kanaanfoɛ bɔ bɛwɔ eyia afiteleɛ ne atɔleɛ, Amorifoɛ, Hitifoɛ, Perisifoɛ ne Yebusifoɛ bɔ bɛwɔ mmokaa aseɛ ne aso ne, ɔne Hiwifoɛ bɔ bɛwɔ Hɛmɔn bokaa ne nye abo wɔ Misepa aseɛ so ne.

⁴ Bɛ ne bɛ lɔen ne amukoraati bɛwale, ɛlɔen pembepembe bɔ bɛ somaa te kyɛ mboanoa anweaa ɔ, bɛ ne mbɔngɔ mɔ ne teaseɛnam pee wale.

⁵ Sɔ ahemvo ne amukoraa boaboale bɛ lɔen noa, na bɛbɔle nu bɛɛkyekyele asikyeleɛ wɔ Merom nzue nwo kyɛ bɛ ne Yisrael bɛkwaaho.

⁶ Na AWURADE sele Yosua kyɛ, “Nnɛsuro bɛ, ofikyɛ ɛhema bekye sɔa ala, ngohũhũ bɛ mukoraati ngɔma Yisrael. Na odi kyɛ ɛpepɛ bɛ mbɔngɔ mɔ gya ndii nu, ná ɛfa see yera bɛ teaseɛnam nemɔ.”

⁷ Yiti Yosua ne ye koɛhonɛfoɛ ne amukoraa bɛhɔle bɛ so mvum nu wɔ Merom nzue nwo, na bɛfale koɛ bɛtetale bɛ.

⁸ AWURADE fale bɛ wurale Yisrael sa. Behuhuni bɛ, na bɛfoane bɛ toonn beedwuli Sidon Piri ne Misrefote Maim nwo, ɔne Misepe bɔnza nu wɔ eyia afiteleɛ. Behuhuni bɛ toonn bɔ bɛ nu ko po anga ɔ.

⁹ Na kyɛbɔ AWURADE hyɛle Yosua kyɛ ɔyɔ ne, sɔ ala yeɛ ɔfa yɔle bɛ ɔ. Ɔpepɛle bɛ mbɔngɔ mɔ gya ndii nu, na ɔfale see yerale bɛ teaseɛnam nemɔ.

¹⁰ Sɔ mmerɛ ne, Yosua sale ye si, olili Hasɔ so ngonim, na ɔfale ngrandɛ huni berɛ hene ne. Ɔbaadwu sɔ mmerɛ nen, né Hasɔ yeɛ ɔte sɔ ahennie ne amukoraa b’ahenguro ɔ.

¹¹ Bɛfale ngrandɛ behuhuni kuro berɛ ama mukoraati. Behuhuni bɛ bɔkɔɔ; banyakyi nikyee ko po bɔ nwomeɛ wɔ ye nu ɔ, na bɛfale see bɛtole Hasɔ nu.

¹² Yosua lili sɔ nguro ne amukoraa ne bɛ hene amukoraa so ngonim, na ɔfale ngrandɛ huhuni bɛ; ohuhuni bɛ bɔkɔɔ kyɛbɔ AWURADE somvoɛ Mose hyɛle ne.

¹³ Nakoso nguro mɔ bɔ bɛwɔ pambaa mɔ so ne de, Yisraelfoɛ anyera bɛ nu biala, sana Hasɔ ngome yeɛ Yosua yerale ɔ.

¹⁴ Koɛ nu nzesadeɛ mukoraa ne nyɛmmoa bɔ bɛwɔ sɔ nguro nemɔ anu ne, Yisraelfoɛ fale. Nakoso bɛfale ngrandɛ behuhuni nu mmenia mukoraati, kɔpem kyɛ behuhuni bɛ bɔkɔɔ ɔ, na banyakyi nikyee ko po bɔ nwomeɛ wɔ ye nu ɔ.

¹⁵ Na kyɛbɔ AWURADE hyɛle ye somvoɛ Mose nen, sɔ ala yeɛ Mose hyɛle Yosua ɔ, na sɔ ala yeɛ Yosua koso yɔle ɔ. Nikyee biala bɔ AWURADE hyɛle Mose kyɛ ɔyɔ nen, nu ko po nne berɛ bɔ Yosua anyɔ ɔ.

Yosua lili aseɛ ne amu so ngonim

¹⁶ Yiti Yosua ho fale aseɛ hemɔ amukoraati: mmokaa aseɛ ne, ngwaen dɔ aseɛ ne amukoraa, Gosen aseɛ ne amukoraa, aseɛ frɛtɛɛ ne, Araba ne, Yisrael mmokaa aseɛ ne ɔne ye aseɛ frɛtɛɛ ne;

¹⁷ fite Halake bokaa, bɔ ɔtrɛ kɔ Sɛre, bɔ ɔkwaadwu Baal Gade, wɔ Lebanon bɔnza nu, wɔ Hɛmɔn bokaa ne nye abo. Yosua hyehyele bɛ hene nemɔ amukoraa, na ohuhuni bɛ.

¹⁸ Yosua ne sɔ hene nemɔ bɛhone koɛ mmerɛ pee.

¹⁹ Kuro biala nne berɛ bɔ ɔne Yisraelfoɛ bɛyɛle asomdwee apam ɔ, sana Hiwifoɛ bɔ bɛte Gibeon ne ngome. Nguro ngaa ne de, Yisraelfoɛ lili bɛ so ngonim wɔ koɛ nu.

²⁰ Ofikyɛ AWURADE yeɛ ɔmaa bɛyɛle asoserɛ ɔ, kyɛbɔ ɔkɔyɛ bɔ bɛ ne Yisraelfoɛ bɛkɔho koɛ ɔ, amaa ɔnate so Yisraelfoɛ ahũhũ bɛ bɔkɔɔ bama bɛ boso anua, bɔ bengonwu bɛ anwumvoin ɔ, kyɛbɔ AWURADE hyɛle Mose nen.

²¹ Sɔ mmerɛ ne, Yosua hɔle oohuhuni Anakefoɛ. Na ɔmane bɛ boso nuane fili mmokaa aseɛ ne aso, Hebron, Dɛbi, Anabo, Yuda mmokaa aseɛ ne amukoraa so, ɔne Yisrael mmokaa aseɛ ne amukoraa so. Yosua huhuni bɛ bɔkɔɔ, na ɔsɛkyele bɛ nguro nemɔ bɔkɔɔ.

²² Banyakyi Anakeniɛ ko po wɔ Yisraelfoɛ aseɛ so; sana Gasa ne Gate ne Asedɔde ngome yeɛ ebiemɔ hale ɔ.

²³ Yiti Yosua ho fale aseɛ ne amukoraa, kyɛbɔ edwirɛ amukoraa bɔ AWURADE ha hyirele Mose te ne. Na Yosua hyehyɛle nu mane Yisraelfoɛ maa ɔyɛle b’agyapadeɛ, na ɔfale abusua kure biala ye bue deɛ mane ye. Na asomdwee wale aseɛ ne aso bɔ koɛ anzi ɔ.