Yosua 10 - AHYERƐLƐ KRONGRON

Eyia gyinane neka horɛ

¹ Yerusalem hene Adoni Sɛdɛke tele kyɛ Yosua aho afa Aye, na wasɛkye ye bɔkɔɔ, na nikyee bɔ ɔfa yɔle Yeriko ne ye hene ne, sɔ ala yeɛ wafa wayɔ Aye ne ye hene ɔ. Osa tele kyɛ Gibeonfoɛ ne Yisrael bayɛ asomdwee apam, na bɛ ne bɛ yeɛ bɛte ɔ.

² Na osurole paa, ofikyɛ Gibeon te kuro piri kyɛ ahenguro nemɔ ko. Ye piri tra Aye, afei koso ye mmienzua mukoraati bɛte koɛhonɛfoɛ.

³ Yiti Yerusalem hene Adoni Sɛdɛke somane maa beesele Hebron hene Hoham, Yamute hene Piram, Lakise hene Yafia ɔne Eglon hene Dɛbi kyɛ,

⁴ “Ɛmɔbra bɛɛboka me maa yɛɛhuhu Gibeonfoɛ; ofikyɛ bɛ ne Yosua ne Yisrael bayɛ apam.”

⁵ Na Amorifoɛ ahemvo nnu ne: Yerusalem hene, Hebron hene, Yamute hene, Lakise hene ɔne Eglon hene boaboale bɛ koɛhonɛfoɛ mukoraati noa, na bɛ ne koɛhonɛfoɛ ne amukoraa beetuale Gibeon kyɛ bɛ ne bɛ kwaaho.

⁶ Yeɛ Gibeonfoɛ somane maa bɛhɔle Gilgal asikyeleɛ ne anu beesele Yosua kyɛ, “Nnɛyakyi wɔ ngoaa mɔ nu; ma wɔ nwo yɛ nyera ná baale yɛ ngoa, baaboka yɛ; ofikyɛ Amorifoɛ bɔ bɛtete mmokaa aseɛ ne aso dɔ ne, bɛ hene mɔ amukoraa bayɛ ko bɛ ne yɛ baaho.”

⁷ Yiti Yosua ne ye koɛhonɛfoɛ amukoraa, yeɛ afei koɛhonɛfoɛ ahoneserɛfoɛ amukoraa befili Gilgal bɛfo bɛhɔle.

⁸ Na AWURADE sele Yosua kyɛ, “Nnɛsuro bɛ, ofikyɛ mafa bɛ mawura wɔ sa; na bɛ nu ko po ngɔhora ngogyina wɔ nyunu.”

⁹ Yiti Yosua fili Gilgal natele kɔngɔen toonn hɔle Gibeon, na ɔhɔle Amorifoɛ so mvum nu.

¹⁰ Na AWURADE mane bɛ nye so tanene bɛ wɔ Yisraelfoɛ nyunu. Yisraelfoɛ huhuni bɛ paa wɔ Gibeon, na bɛfoane bɛ maa bɛɛfale Bete Horon pambaa atee ne aso, na behuhuni bɛ alaa beedwuli Aseka ne Makeda.

¹¹ Na mmerɛ bɔ bɛ́nwati béfi Yisraelfoɛ nyunu, ná beedwuli Bete Horon ndoroleɛ nu ne, AWURADE yakyili asukɔtwea kungumaboɔ fili nyameɛso guale bɛ so toonn maa beedwuli Aseka, na bewuwuli. Na mmenia bɔ asukɔtwea ne huni bɛ ne, bɛsone bɛtra mmenia bɔ bɛtotɔle Yisraelfoɛ ngrandɛ noa ɔ.

¹² Kyẽa bɔ AWURADE mane Yisraelfoɛ lili Amorifoɛ so ngonim ne, Yosua srɛle AWURADE wɔ Yisraelfoɛ nyunu berɛ kyɛ, “Eyia, gyina neka horɛ wɔ Gibeon! Ɛsraen, gyina neka horɛ wɔ Ayalɔn bɔnza nu!”

¹³ Yiti eyia gyinane neka horɛ, na ɛsraen angɔ moa ko, kɔpem kyɛ Yisraelfoɛ tɔle bɛ pɔfoɛ mɔ so wereɛ ɔ. Sɔ dwirɛ he, aso bangyerɛ ye wɔ Yasa nwomaa ne anu? Eyia gyinane afia neka horɛ wɔ ewienu, na kɔyɛ kyẽa ko mumua, wambepere ye nwo kyɛ ɔkwaatɔ ɔ.

¹⁴ Ofikyɛ AWURADE ho mane Yisraelfoɛ. Kyẽa bɔ ɔte sɔ de, né ebie ɔwwale le, yeɛ ofi sɔ kyẽa ne koso, sɔ kyẽa ne bie amma le, bɔ yeɛ AWURADE tiele kuro sona sufrɛ sɔa ɔ.

¹⁵ Afei Yosua ne Yisrael ɛlɔen ne amukoraa besa bɛwale Gilgal.

Yosua kye Amorifoɛ ahemvo nnu ne

¹⁶ Sɔ ahemvo nnu nemɔ nwatili, na bɛɛfeale nyɔboɛ bɔ wasi sua nu wɔ Makeda.

¹⁷ Na ebiemɔ bɔle Yosua amaneɛ kyɛ, “Yanwu ahemvo nnu nemɔ kyɛ baafea nyɔboɛ bɔ wasi sua nu wɔ Makeda.”

¹⁸ Na Yosua sele kyɛ, “Ɛ́mɔmunu nyɔbotaen bétua nyɔboɛ bɔ wasi sua ne noa, ná ɛ́mɔma mmenia gyinagyina ye nwo bɛ́wɛne.

¹⁹ Nakoso ɛmɔ ngaa ne de, nnɛma ɛmɔgyina berɛ. Ɛ́mɔfoa ɛmɔ pɔfoɛ nemɔ, ná ɛ́mɔfite bɛ si béhuhu bɛ. Nnɛmɔma bɛnwati bɛkɔ bɛ nguro nemɔ anu, ofikyɛ AWURADE ɛmɔ Nyameɛ wafa bɛ wawura ɛmɔ sa.”

²⁰ Yosua ne Yisraelfoɛ huhuni bɛ pasaa yiele nen, bɛ nu kãa bie yeɛ benyane bɛ ti bedidili nu ɔ, na bɛnwatili bɛhɔle nguro bɔ bato bɛ nwo fasue nemɔ anu bɛɛbɔle bɛ nwo adwaa.

²¹ Nakoso Yisraelfoɛ de, bɛ mukoraa besa bɛwale Yosua berɛ asomdwee nu wɔ asikyeleɛ ne anu wɔ Makeda. Na ebiala angora wamva ye dwirɛ wamma Yisraelfoɛ so.

²² Na Yosua sele kyɛ, “Ɛ́mɔye nyɔbotaen ne béfi nyɔboɛ bɔ wasi sua ne noa, ná ɛ́mɔye ahemvo nnu ne béfi nu bɛ́brɛ me.”

²³ Bɛyɔle sɔ, na bɛyele ahemvo nnu ne befili nyɔboɛ bɔ wasi sua ne anu bɛbrɛle ye. Bɛ ole Yerusalem hene, Hebron hene, Yamute hene, Lakise hene ɔne Eglon hene.

²⁴ Bɛfale ahemvo nemɔ bɛbrɛle Yosua nen, Yosua mane Yisraelfoɛ amukoraati beyiale, na osele koɛhonɛfoɛ mɔ so safohene mɔ bɔ bɛ ne ye hɔle koɛ ne kyɛ, “Ɛ́mɔpingye wa ná ɛ́mɔfa ɛmɔ gya bétia ahemvo hemɔ kɔme so.” Yiti bepingyele berɛ, na bɛfale bɛ gya betiale bɛ kɔme so.

²⁵ Na Yosua sele safohene nemɔ kyɛ, “Nnɛma ɛmɔsuro, yeɛ nnɛmɔma ɛmɔ kunu tete ɛmɔ; ɛ́mɔgyina pindinn ná ɛmɔma ɛmɔ ahone yɛ se; ofikyɛ ɛmɔ pɔfoɛ amukoraati bɔ ɛmɔ ne bɛ kɔho ne, sɔ yeɛ AWURADE kɔfa kɔyɔ bɛ ɔ.”

²⁶ Nziɛ ye, Yosua huhuni ahemvo nemɔ, na ɔfale bɛ sinzele mmakaa nnu so. Na besinzele mmakaa ne aso maa oodwuli nɔsoa.

²⁷ Na eyia kwaatɔ ne, Yosua maa bɛyele bɛ befili mmakaa ne aso bɛwale ase, na beegyili bɛ beguale nyɔboɛ bɔ wasi sua bɔ bɛɛfeale nu ne anu. Bɛfale nyɔbotaen betuale nyɔboɛ bɔ wasi sua ne noa, na nyɔboɛ ne tɛ wɔ berɛ maa waadwu ɛnɛ.

Yosua di Kanaan ngwaen so ngonim

²⁸ Sɔ kyẽa ne ala, Yosua ho fale Makeda. Ɔfale ngrandɛ huhuni kuro berɛ ama ne berɛ hene; ohuhuni berɛ ama mukoraa bɔkɔɔ. Wanyakyi sona ko po. Na bɔ ɔfa yɔle Yeriko hene ne, sɔ ala yeɛ ɔfa yɔle Makeda hene ɔ.

²⁹ Afei Yosua ne Yisrael ɛlɔen ne amukoraa befili Makeda bɛhɔle Libina, na bɛɛfale koɛ bɛtetale Libinafoɛ.

³⁰ Na AWURADE fale Libina koso ne ye hene wurale Yisrael sa. Yisrael fale ngrandɛ huhuni kuro berɛ ama mukoraati. Wanyakyi sona ko po wɔ nu. Na bɔ ɔfa yɔle Yeriko hene ne, sɔ ala yeɛ ɔfa yɔle berɛ hene ne ɔ.

³¹ Ɛhe asi ne, Yosua ne Yisrael ɛlɔen ne amukoraa befili Libina bɛhɔle Lakise, betuale kuro ne, na bɛfale koɛ bɛtetale ye.

³² AWURADE fale Lakise wurale Yisrael sa. Ye elenyɔ ne aso yeɛ Yisrael lili so ngonim ɔ, na ɔfale ngrandɛ huhuni kuro berɛ ama mukoraati, kyɛbɔ ɔfa yɔle Libina kuro mma ne ala.

³³ Gɛsɛre hene Horam fo wale ɔɔbokale Lakisefoɛ, nakoso Yosua huhuni ye ne ye lɔen ne, na wanyakyi sona ko po.

³⁴ Afei Yosua ne Yisrael ɛlɔen ne amukoraa befili Lakise bɛhɔle Eglon; betuale kuro ne, na bɛfale koɛ bɛtetale ye.

³⁵ Belili so ngonim sɔ kyẽa ne, na bɛfale ngrandɛ behuhuni kuro berɛ ama mukoraati bɔkɔɔ sɔ kyẽa ne, kyɛbɔ ɔfa yɔle Lakisefoɛ ne ala.

³⁶ Afei Yosua ne Yisrael ɛlɔen ne amukoraa befili Eglon bɛhɔle Hebron, na bɛfale koɛ bɛtetale ye.

³⁷ Belili so ngonim. Bɛfale ngrandɛ behuhuni nu mmenia ne nu hene, mbɔtam berɛ nguro nemɔ nu mmenia, na behuni nu mmenia amukoraa. Wanyakyi sona ko po; na kyɛbɔ ɔfa yɔle Eglon nen, sɔ ala yeɛ ɔsɛkyele Hebron bɔkɔɔ ɔ, na ohuhuni nu mmenia mukoraati.

³⁸ Afei Yosua ne Yisrael ɛlɔen ne amukoraa besa bɛwale Dɛbi, na bɛfale koɛ bɛtetale ye.

³⁹ Olili kuro ne, nu hene, ɔne ye nwo nguro mɔ so ngonim. Bɛfale ngrandɛ behuhuni bɛ, na behuni kuro ne anu mmenia mukoraa bɔkɔɔ. Wanyakyi sona ko po. Na nikyee bɔ ɔfa yɔle Hebron, yeɛ Libina ne ye hene nen, sɔ ala yeɛ ɔfa yɔle Dɛbi ne ye hene ɔ.

⁴⁰ Yiti Yosua lili ngonim wɔ aseɛ ne aso amukoraati: mmokaa aseɛ ne ne ngwaen dɔ aseɛ ne, aseɛ frɛtɛɛ ne, mmokaa ndoroleɛ ne anu, ɔne b’ahemvo ne amukoraa so ngonim. Wanyakyi sona ko po, na mmom ohuhuni nikyee biala bɔ nwomeɛ wɔ ye nu ɔ, kyɛbɔ AWURADE Yisrael Nyameɛ hyɛle ne.

⁴¹ Yosua lili bɛ so ngonim alaa fite Kadese Banea oodwuli Gasa, fite Gosen mbɔtam mukoraati maa oodwuli Gibeon.

⁴² Yosua lili ahemvo hemɔ amukoraa ne b’aseɛ so ngonim wɔ koɛ komapɛ anu, ofikyɛ AWURADE Yisrael Nyameɛ yeɛ ɔho mane Yisrael ɔ.

⁴³ Afei Yosua ne Yisrael ɛlɔen ne amukoraa besa bɛwale asikyeleɛ ne anu wɔ Gilgal.