Yona 3 - AHYERƐLƐ KRONGRON

Ninewefoɛ nya adwenesakyera

¹ Yeɛ AWURADE lale ye dwirɛ ali hyirele Yona ye pɛen nyɔ so kyɛ,

² “Dwɔso kɔ Ninewe, sɔ kuro piri ne aso, ná kɔbɔ edwirɛ bɔ méka mékyire wɔ ne dawure kyire bɛ.”

³ Yiti Yona dwɔsole sili nu hɔle Ninewe, kyɛbɔ AWURADE hã hyirele ye ne ala. Né Ninewe te kuro piri paa, bɔ ɛlɛsa yeɛ bɛfa bɛnate befi ye ti bɛkɔka ye ti ɔ.

⁴ Yona hyɛle ye bo owurale kuro ne anu, ɔnatele ɛlɛho, na ɔteane nu sele kyɛ, “Waha eleburanna né Ninewe abɔ oo!”

⁵ Yeɛ Ninewefoɛ belele Nyameɛ dwirɛ ne belili. Bɛfa bɛtole dwaa kyɛ odi kyɛ ebiala obua da, na bɛherale ɛsɛen tena, ofi atitirefoɛ mɔ so bɔ ɔkwaadwu kwahweabaa mɔ so.

⁶ Na Ninewe hene tele edwirɛ bɔ wasi nen, ofili ye ahennie bia so dwɔsole, odwale ye ataadeɛ aguasoɛ guale, ɔfale ɛsɛen tena herale, na ɔtenane nzoen nu.

⁷ Afei ɔmaa bɛbɔle ye dawure bɛfa bɛtole dwaa wɔ Ninewe kyɛ, “Nana ne ye mbanyi mɔ bahyɛ mmeraa kyɛ, Nnɛma kuro sona anaa kaka, nandwie anaa boaen biala ɔfa nikye fee kã ye noa. Onni kyɛ bedidi, anaa bɛno nzue.

⁸ Ɔsɛ kyɛ mmenia ne ngaka bɛkera ɛsɛen tena, ná bɛyere bɛ nwo besu bɛfrɛ Nyameɛ. Ɔsɛ kyɛ ebiala yakyi ye bɔne yɔleɛ ɔne ye aminɛlilɛ bɔ ɔwɔ ye so ne.

⁹ Ebie nze, ebiaa Nyameɛ kɔsesã ye adwene ná wayakyi ye yaafɛlɛ piri ne, amaa ɔnate so yɛ boso wannua.”

¹⁰ Na Nyameɛ nwuni bɔ bɛyɔle ne, kyɛ bayakyi bɛ bɔne yɔleɛ ne, yiti Nyameɛ sesane ye adwene wɔ musue bɔ ɔhane kyɛ ɔkɔprapra kogua bɛ so ne anwo, na wamma wando bɛ.