Yohane 6 - AHYERƐLƐ KRONGRON

Yesu ma mmenia apee nnu aleɛ

¹ Ɛhe asi ne, Yesu pɛle Galilea ɛpo bɔ besa bɛfrɛ ye Tiberia ɛpo ne hɔle ye si dɔ.

² Na mmenia pembepembe lili ye si; ɔnate kyɛ né banwu nzɛngyerɛnneɛ bɔ ɔyɔ fa sale mmenia anwonyerɛ ne.

³ Yeɛ Yesu hɔle bokaa bie aso, na ɔne ye asuafoɛ nemɔ bɛɛtenane ase wɔ berɛ.

⁴ Né Yudafoɛ Abɔtra aluolue ne apingye.

⁵ Afei Yesu tole ye nye, na onwuni kyɛ mmenia pembepembe bɛba ye berɛ nen, obisale Filipo kyɛ, “Nisua yeɛ yɛkonya aleɛ yɛkɔtɔ yɛkɔma mmenia ye bekoli ɔ?”

⁶ Na ɛhe de, ɔhane fa sole ye neane, ofikyɛ né ye bɔbɔ ɔse bɔ ɔkɔyɔ ɔ.

⁷ Na Filipo buale ye kyɛ, “Denare ɛyaa nyɔ po ɔngɔso paanoo bɔ ebiala konya kaala koli ɔ tɔ.”

⁸ Na ye asuafoɛ nemɔ nu ko bɔ oli Andrea, Simɔn Petro aliɛma ne, osele ye kyɛ,

⁹ “Abɛɛmaa bie wɔ wa bɔ ole ayuo paanoo nnu ne tiré nyɔ ɔ; nakoso ɛhe de, aso ɔkɔso mmenia wora he di?”

¹⁰ Na Yesu hane kyɛ, “Ɛ́mɔma mmenia ne bɛ́tenatena ase!” Né nzenzaen pee wɔ berɛ. Na mmienzua bɔ bɛkɔyɛ apee nnu ɔ bɛtenatenane ase.

¹¹ Na Yesu fale paanoo ne, ɔlale ase, na ɔhyɛ mane bɛ bɔ bɛtete berɛ ne; na sɔ ala yeɛ ɔyɛle tiré ne koso ɔ, somaa biala bɔ behia ɔ.

¹² Na bɛ ko yili nen, osele ye asuafoɛ nemɔ kyɛ, “Ɛ́mɔboaboa mboporoka bɔ waha ne noa, ná ebie ammini.”

¹³ Yiti ayuo paanoo nnu bɔ mmenia ne bali maa waha ne, bɛboaboale ye boso mboporoka ne noa beguale ngɛndɛen buru ne nyɔ nu maa beyili fokyefokyee.

¹⁴ Na mmenia ne nwuni sɛngyerɛnneɛ bɔ ɔyɔle nen, bɛhane kyɛ, “Amba, ngɔmhyɛlɛniɛ bɔ ɔ́ba wiase ne, ye ɛhe!”

¹⁵ Yeɛ Yesu nwuni kyɛ bɛbaahye ye mbendene so bɛfa ye bedi hene, yiti ɔhwene ye nwo, na ye ngome ɔhɔle bokaa ne aso dɔ bieku.

Yesu nate ɛpo nye so

¹⁶ Na odwuli nɔsoa nen, ye asuafoɛ nemɔ hɔle mboanoa,

¹⁷ bɛtenane ɛlɛen nu, na bɛpɛle ɛpo ne kyɛ bɛkɔ Kapanɔm. Né aleɛ asa, na né Yesu onnya ɔwwale bɛ nwo berɛ.

¹⁸ Ɛpo ne aso yɛle bagyabagya, ɔnate kyɛ né mvrama serɛserɛ bie otu.

¹⁹ Na mmerɛ bɔ bɛhane ɛlɛen ne kɔyɛ kwanzii nza anaa nna nen, benwuni Yesu kyɛ ɔnate ɛpo n’anye so ɔba b’ɛlɛen ne nwo; na ɛserɛ hane bɛ.

²⁰ Na Yesu sele bɛ kyɛ, “Me ɔ, nnɛma ɛmɔsuro!”

²¹ Na bele anigye bɛmaa ɔɔtenane ɛlɛen ne anu; na berɛ ne ala, ɛlɛen ne dwuli mboanoa nekaa bɔ bɛkɔ ne.

Ɛlɔen ne pena Yesu

²² Aleɛ hyene nen, ɛlɔen bɔ bɛhale ɛpo ne asi dɔ ne, benwuni kyɛ ɛlɛen biala nne berɛ kyɛ ɛlɛen ko bɔ ye asuafoɛ nemɔ bɛfole ne, nakoso nna Yesu ne ye asuafoɛ nemɔ yeɛ bɛtenane ɛlɛen ne anu ɔ, na mmom ye asuafoɛ nemɔ angome yeɛ bɛhɔle ɔ.

²³ Nakoso ɛlɛen biemɔ fili Tiberia bɛwale bepingyele nekaa bɔ Awurade lale ase, ná belili paanoo ne.

²⁴ Na ɛlɔen ne nwuni kyɛ Yesu nne berɛ, ná ye asuafoɛ nemɔ koso bɛnne berɛ nen, bɛ koso bɛfofole ɛlɛen nemɔ anu bɛhɔle Kapanɔm bɛɛpenane Yesu.

Yesu ole ngoa paanoo ne

²⁵ Na beenwuni ye wɔ ɛpo ne asi dɔ nen, bebisale ye kyɛ, “Rabi, mmerɛ beni yeɛ ɛwale wa ɔ?”

²⁶ Na Yesu buale bɛ kyɛ, “Nahorɛ nu paa, mekã mekyire ɛmɔ kyɛ, nna kyɛ nzɛngyerɛnneɛ bɔ ɛmɔnwuni ye ne ati yeɛ ɛmɔpena me ɔ, na mmom paanoo bɔ ɛmɔlili mane ɛmɔ ko yili ne ati ɔ.

²⁷ Nnɛma ɛmɔyɔ aleɛ bɔ ɔsɛkye ɔ nwo adwuma, na mmom ɛ́mɔyɔ aleɛ bɔ ɔtena berɛ kɔ daa ngoa nu, bɔ Sona Awa ne kɔfa kɔma ɛmɔ ne nwo adwuma; ofikyɛ ye yeɛ Baba Nyameɛ wale ye wato nu wama ye tumi ɔ.”

²⁸ Yeɛ bebisale ye kyɛ “Nzikyɛ yeɛ odi kyɛ yɛyɔ, bɔ yɛyɔ a ɔte Nyameɛ nnwumaa ɔ?”

²⁹ Na Yesu buale bɛ kyɛ, “Bɔ ɔte Nyameɛ adwuma ɛhe, kyɛ ɛmɔkole bɔ wasoma ye ne bekoli ɔ.”

³⁰ Yeɛ besele ye kyɛ, “Nzaade, nzɛngyerɛnneɛ beni yeɛ ɛkɔyɔ, bɔ yɛkonwu ye, bɔ ɔkɔmaa yɛkole wɔ yɛkoli ɔ? Nzikyɛ yeɛ ɛkɔyɔ ɔ?

³¹ Yɛ nana mɔ belili mana wɔ ɛserɛ so, kyɛbɔ bahyerɛ ye kyɛ, ‘Ɔmane bɛ paanoo fili nyameɛso maa belili.’ ”

³² Yeɛ Yesu sele bɛ kyɛ, “Nahorɛ nu paa, mekã mekyire ɛmɔ kyɛ, nna Mose yeɛ ɔmane ɛmɔ paanoo bɔ ofi nyameɛso ne ɔ; na mmom me Baba yeɛ ɔma ɛmɔ nahorɛ paanoo bɔ ofi nyameɛso ɔ.

³³ Nyameɛ paanoo ne ole bɔ ofi nyameɛso ba ase, ná ɔma wiase ngoa ne.”

³⁴ Yeɛ besele ye kyɛ, “Awurade, ma yɛ paanoo he daa.”

³⁵ Na Yesu sele bɛ kyɛ, “Me ole ngoa paanoo ne; ebiala bɔ ɔba me berɛ nen, ɛhɔen ngohũ ye le; yeɛ ebiala bɔ ode me di ne, nzuhɔen ngohũ ye le.

³⁶ Nga ngyirele ɛmɔ kyɛ ɛmɔanwu me, nakoso ɛmɔnne benni.

³⁷ Bɛ bɔ Baba ne ɔfa bɛ ma me ne, bɛ mukoraa bɛkɔwa me berɛ; na ebiala bɔ ɔba me berɛ ne, mengɔto ye ngɔye le.

³⁸ Ɔnate kyɛ mvi nyameɛso mawa ase, nna kyɛ mebaayɔ me bɔbɔ m’apɛdeɛ, na mmom bɔ ɔsomane me n’apɛdeɛ.

³⁹ Na bɔ ɔsomane me n’apɛdeɛ ole kyɛ: bɔ ɔfa mane me ne amukoraa, mengɔma nu ko po ngomini ɔ, na mmom ngotingye ye wɔ ayieleɛ kyẽa ne.

⁴⁰ Ɛhe ole me Baba n’apɛdeɛ, kyɛ ebiala bɔ onwu Baa ne, ná ode ye di ne, okonya daa ngoa; na ngotingye ye wɔ ayieleɛ kyẽa ne.”

⁴¹ Yeɛ Yudafoɛ nemɔ bɛpenepenene bɛ komvi beguale ye so, ofikyɛ ɔhane kyɛ, “Me ole paanoo bɔ ofili nyameɛso wale ase ne.”

⁴² Na bɛhane kyɛ, “Aso nna ɛhe ole Yesu, Yosef awa ne, bɔ yɛse ye baba ne ye maame ɔ? Ɔyɛle sɛɛ bɔ afei ɔkã kyɛ, ‘Mvi nyameɛso yeɛ mmale ase ɔ?’ ”

⁴³ Yeɛ Yesu buale bɛ kyɛ, “Nnɛma ɛmɔpenepene ɛmɔ komvi.

⁴⁴ Na ebiala ngora mma me berɛ, sana Baba ne bɔ ɔsomane me ne ɔtwetwe ye ba; na ngotingye ye wɔ ayieleɛ kyẽa ne.

⁴⁵ Bahyerɛ ye wɔ ngɔmhyɛlɛfoɛ nwomaa ne anu kyɛ, ‘Bɛ mukoraa bɛkɔyɛ mmenia bɔ Nyameɛ ahyirehyire bɛ ɔ.’ Ebiala bɔ wate, ná wasua wafi Baba ne berɛ nen, ɔba me berɛ.

⁴⁶ Nna kyɛ sona bie anwu Baba ne, sana bɔ ofi Nyameɛ berɛ ne, na ye yeɛ wanwu Baba ne ɔ.

⁴⁷ Nahorɛ nu paa, mekã mekyire ɛmɔ kyɛ, ebiala bɔ ode di ne, ole daa ngoa.

⁴⁸ Me ole ngoa paanoo ne.

⁴⁹ Ɛmɔ nana mɔ belili mana wɔ ɛserɛ so, na bewuwuli.

⁵⁰ Ɛhe ole paanoo bɔ ofi nyameɛso ba ase ne, kyɛ sona oli bie, ná wanwu.

⁵¹ Me ole ngoa paanoo bɔ ofi nyameɛso wale ase ne; na sɛ ebie di paanoo he bie a, ɔkɔtena ase daa; na paanoo bɔ ngɔfa ngɔma wiase ngoa ne, ye ole me nwonaen.”

⁵² Na ɛhe mane Yudafoɛ nemɔ bɛpɛle bɛ nwo besuli bɛ nwo aporowaa kyɛ, “Ɔkɔyɛ sɛɛ né biaa he wahora wafa ye nwonaen wamaa yali?”

⁵³ Yeɛ Yesu sele bɛ kyɛ, “Nahorɛ nu paa, mekã mekyire ɛmɔ kyɛ, sɛ ɛmɔanni Sona Awa ne nwonaen, ná ɛmɔanno ye mogya a, ye de ɛmɔlle ngoa wɔ ɛmɔ nu.

⁵⁴ Na ebiala bɔ odi me nwonaen ná ɔno me mogya nen, ole daa ngoa, na ngotingye ye wɔ ayieleɛ kyẽa ne.

⁵⁵ Ɔnate kyɛ me nwonaen te aleɛ amba, yeɛ me mogya te anonneɛ amba.

⁵⁶ Ebiala bɔ odi me nwonaen ná ɔno me mogya nen, ɔte me nu, na me koso nde ye nu.

⁵⁷ Kyɛbɔ Baba teasefoɛ ne ɔsomane me nen, sɔ ala yeɛ Baba ne ati nde ase ɔ; yiti ebiala bɔ odi me nwonaen nen, me ti ɔkɔtena ase.

⁵⁸ Ɛhe ole paanoo bɔ ofi nyameɛso wale ase ne. Bɔ ɛmɔ nana mɔ belili ná bewuwuli ne, nna sɔ yeɛ ɔte ɔ; na paanoo he de, ebiala bɔ odi ne, ɔkɔtena ngoa nu daa.”

⁵⁹ Mmerɛ bɔ né ɔ́yɛ ngyerɛkyerɛ wɔ Kapanɔm nyianu sua nu yeɛ ɔhane sɔ dwirɛ nemɔ ɔ.

Daa ngoa nwo dwirɛ

⁶⁰ Na ye asuafoɛ nemɔ anu pee bɛtele sɔ dwirɛ nen, bɛhane kyɛ, “Ngyerɛkyerɛ he de, ɔyɛ se; nwa yeɛ ɔkɔhora kotie ɔ?”

⁶¹ Nakoso Yesu nwuni kyɛ ye asuafoɛ nemɔ bɛ́penepene bɛ komvi wɔ ɛhe anwo nen, osele bɛ kyɛ, “Ɛhe to ɛmɔ sundidua anaa?

⁶² Né nzaade sɛ ɛmɔnwu Sona Awa ne kyɛ ɔ́kɔ anwuro, nekaa bɔ né ɔwɔ daa ne koso ɛ?

⁶³ Sunzum ne yeɛ ɔma ngoa ɔ; na anwoɔnaen ne de, ɔtte huu. Edwirɛ bɔ mahã mahyire ɛmɔ ne, ɔte sunzum ne ngoa.

⁶⁴ Nakoso ɛmɔ nu biemɔ wɔ berɛ bɔ benne benni ɔ.” Na ofi ahyɛaseɛ ne, né Yesu se bɛ bɔ benne benni ɔ; ɔne sona bɔ ɔkɔye ye kɔma ne.

⁶⁵ Na ɔhane kyɛ, “Ɔnate ɛhe ati yeɛ mahã mahyire ɛmɔ kyɛ, ebiala ngɔhora ngɔwa me berɛ, sana Baba ne afa ye wama me.”

⁶⁶ Na ofi sɔ mmerɛ ne, ye asuafoɛ nemɔ anu pee besale bɛ si, na bɛ ne ye annate ko.

⁶⁷ Yiti Yesu bisale mmenia buru ne nyɔ ne kyɛ, “Ɛmɔ koso, ɛmɔpena kyɛ ɛmɔkɔ bie anaa?”

⁶⁸ Na Simɔn Petro buale ye kyɛ, “Awurade, nwa berɛ yeɛ yɛkɔhɔ ɔ? Wɔ yeɛ ele daa ngoa dwirɛ ɔ;

⁶⁹ na yale yali, na yanwu ye kyɛ wɔ ole Nyameɛ ye Krongronniɛ ne.”

⁷⁰ Na Yesu buale bɛ kyɛ, “Aso nna me yeɛ maneanea nu maye ɛmɔ, mmenia buru ne nyɔ ye ɔ? Nakoso, aso ɛmɔ nu ko ɔtte abɔnzam?”

⁷¹ Né ɔne Yudase Yiskariote, Simɔn awa ne; ofikyɛ ye yeɛ né ɔbaaye ye ma ɔ, nakoso né ɔte asuafoɛ buru ne nyɔ nemɔ anu ko.