Yohane 4 - AHYERƐLƐ KRONGRON

Yesu ne Samarianiɛ braa bie

¹ Afei Yesu nwuni kyɛ Farasiifoɛ nemɔ bate kyɛ ye, Yesu, ogu so onya asuafoɛ pee, ná ɔbɔ mmenia pee asu ɔtra Yohane.

² (Ɔwɔ nu kyɛ Yesu bɔbɔ de, né ɔmmɔ asu, na mmom ye asuafoɛ nemɔ.)

³ Yiti ofili Yudea, na osa sili nu hɔle Galilea.

⁴ Né ɔsɛ kyɛ ɔkɔpɛ nu Samaria.

⁵ Na oodwuli Samaria kuro bie bɔ bɛfrɛ ye Sikare so. Opingye aseɛ bɔ Yakob fa mane ɔwa Yosef ne.

⁶ Né Yakob abura ne wɔ berɛ. Né Yesu afɛ wɔ ye ateetulɛ ne anu, yiti ɔɔtenane abura ne anwo berɛ. Né ɔte kɔyɛ eyia duabien.

⁷ Na Samaria braa bie wale berɛ kyɛ ɔbaato nzue. Na Yesu sele ye kyɛ, “Ma me nzue ne bie ma nno.”

⁸ Né ye asuafoɛ nemɔ bahɔ kuro ne anu dɔ bɛkwaatɔ aleɛ.

⁹ Na Samarianiɛ braa ne sele ye kyɛ, “Ɛte Yudaniɛ, yeɛ me koso nde Samarianiɛ brasua, osi sɛɛ bɔ ɛsrɛ me dɔ nzue bɔ ɛkɔno ɔ?” Ɔhane sɔ, ofikyɛ né Yudafoɛ bɛ ne Samariafoɛ bɛnga.

¹⁰ Na Yesu buale ye kyɛ, “Sɛ ɛse Nyameɛ akyɛdeɛ ne, ɔne bɔ ɔkã kyire wɔ kyɛ, ‘Ma me nzue ne bie ma nno’ a, ahaa asrɛ ye, ná wama wɔ ngoa nzue.”

¹¹ Na braa ne sele ye kyɛ, “Yɛ mene, elle nikyee bɔ bɛfa bɛto nzue ɔ, yeɛ abura ne anu koso wale; yiti nisua yeɛ ekonya sɔ ngoa nzue ne kofi ɔ?

¹² Yɛ nana Yakob bɔ ɔmane yɛ abura he, bɔ ye bɔbɔ ɔnone nu nzue ne bie, bɔ ye mma ne ye nyɛmmoa koso bɛnone bie ne, aso edi mu tra ye anaa?”

¹³ Yeɛ Yesu buale ye kyɛ, “Ebiala bɔ ɔno nzue he bie nen, nzuhɔen kohũ ye bieku.

¹⁴ Nakoso ebiala bɔ ɔkɔno nzue bɔ ngɔma ye bie ne de, nzuhɔen ngohũ ye le. Na nzue bɔ ngɔfa ngɔma ye ne, ɔkɔyɛ nzue abura wɔ ye nu bɔ opu kɔ daa ngoa nu ɔ.”

¹⁵ Braa ne sele ye kyɛ, “Yɛ mene, ma me sɔ nzue ye bie, ná nzuhɔen angu me, ná mamma wa kyɛ mebaato nzue.”

¹⁶ Na Yesu sele ye kyɛ, “Kɔfrɛ ehu, ná ɛne ye bɛbra.”

¹⁷ Braa ne buale ye kyɛ, “Nngya biaa.” Yesu sele ye kyɛ, “Ahã nahorɛ kyɛ, ‘Nngya biaa’ ɔ;

¹⁸ ofikyɛ ɛne mmienzua nnu yeɛ batena ɔ; na bɔ ɛne ye bɛwɔ berɛ kekesaala ye po ne, nna ehu ɔ. Ahã nahorɛ wɔ ɛhe anwo.”

¹⁹ Braa ne sele ye kyɛ, “Yɛ mene, menwu ye kyɛ ɛte ngɔmhyɛlɛniɛ.

²⁰ Yɛ nana mɔ bɛsɔnene wɔ bokaa he aso; na ɛmɔ de, ɛmɔnwa Yerusalem ole nekaa bɔ odi kyɛ yɛsɔne ɔ.”

²¹ Yesu sele ye kyɛ, “Mmobraa, de me di, mmerɛ ne ɔ́ba bɔ nna bokaa he aso anaa Yerusalem yeɛ ɛmɔkɔsɔne Baba ne ɔ.

²² Ɛmɔ de, ɛmɔsɔne bɔ ɛmɔnze ye ɔ; nakoso yɛ de, yɛsɔne bɔ yɛse ye ɔ, ofikyɛ Yudafoɛ nu yeɛ ngoalelɛ ne ofi ɔ.

²³ Na mmerɛ ne ɔ́ba, na wawa, bɔ bɛ bɔ bɛsɔne nahorɛ nu ne, bɛkɔsɔne Baba ne wɔ sunzum nu ne nahorɛ nu; ofikyɛ sɔ mmenia ne yeɛ Nyameɛ pena kyɛ bɛsɔne ye ɔ.

²⁴ Nyameɛ te sunzum, na bɛ bɔ bɛsɔne ye ne, ɔsɛ kyɛ bɛsɔne ye wɔ sunzum nu ne nahorɛ nu.”

²⁵ Yeɛ braa ne sele ye kyɛ, “Mese kyɛ Mɛsaya (bɔ bɛfrɛ ye Kristo) ne ɔ́ba, na sɛ ɔba a, ye yeɛ okohyire yɛ nningyein amukoraa ɔ.”

²⁶ Yesu sele ye kyɛ, “Me bɔ me ne wɔ yɛdwudwo ye, me ole ye.”

²⁷ Sɔ mmerɛ ne ala yeɛ ye asuafoɛ nemɔ bɛwale ɔ, na ɔyɛle bɛ nwanwa kyɛ ɔne braa ne bedwudwo ɔ, nakoso ebiala ammisa kyɛ, “Ɛpena nzu?” Anaakyɛ, “Nzu ati yeɛ ɛne ye bedwudwo ɔ?”

²⁸ Yeɛ braa ne yakyili ye bua ne berɛ, osa hɔle kuro ne anu dɔ, na oosele berɛ ama kyɛ,

²⁹ “Ɛmɔbra bɛɛnea oo, biaa bie bɔ wahã bɔ mayɔ amukoraa wahyire me ɔ! Aso nna ye ole Kristo ne anaa?”

³⁰ Yiti befili kuro ne anu bɛwale Yesu berɛ.

³¹ Na sɔ mmerɛ ne anu, asuafoɛ nemɔ srɛle ye kyɛ, “Rabi, didi.”

³² Na obuale bɛ kyɛ, “Nne aleɛ bɔ medi bɔ ɛmɔnze ɔ.”

³³ Yiti asuafoɛ nemɔ bisabisale bɛ nwo kyɛ, “Ebie abrɛ ye aleɛ maa wali anaa?”

³⁴ Na Yesu sele bɛ kyɛ, “M’aleɛ ole kyɛ ngɔyɔ bɔ ɔsomane me n’apɛdeɛ, na ngoyie ye adwuma ne ɔ.

³⁵ Ɔyɛ a ɛmɔnga kyɛ, ‘Waha bosome nna né buberɛ adwu’? Ɛ́mɔtie, mekã mekyire ɛmɔ kyɛ, ɛ́mɔma ɛmɔ ti so, ná ɛ́mɔnea fieso, kyɛ nningyein nemɔ bati kyɛ bebu ɔ.

³⁶ Sona bɔ obu ne, onya akatuaa, na ɔboaboa mmaa ne noa kɔ daa ngoa nu; na sona bɔ odua ne ɔne bɔ obu ne, benya anigye bɛbɔ nu.

³⁷ Ofikyɛ, edwirɛ ne ɔte nahorɛ kyɛ, ‘Ebie dua, né ebie wora wabu.’

³⁸ Nzomane ɛmɔ kyɛ ɛmɔɔbu bɔ ɛmɔanyɔ ye nwo adwuma ɔ; ebiemɔ ayɔ adwuma ne, na ɛmɔate b’adwuma nwo nnɔbaeɛ ne.”

³⁹ Na Samariafoɛ pee bɔ befi kuro ne anu ne, belele ye belili, ɔnate braa n’adanzeɛ bɔ olili ye kyɛ, “Wahã bɔ mayɔ amukoraa wahyire me” ne ati.

⁴⁰ Yiti mmerɛ bɔ Samariafoɛ nemɔ bɛwale ye nwo berɛ nen, bɛsrɛle ye kyɛ ɔtena bɛ berɛ; na olili bɛ nwo berɛ elenyɔ.

⁴¹ Na ɔnate Yesu noa dwirɛ ne ati, mmenia pee bɔ bɛtra daa deɛ ne ɔ bele belili.

⁴² Na besele braa ne kyɛ, “Afei de, nna wɔ noa dwirɛ ne ati yeɛ ɔmaa yɛde yɛdi ɔ, na mmom yɛ bɔbɔ yate, na yanwu kyɛ amba, ye ole ewiase Ngoadefoɛ ne.”

Yesu sa panyi bie awa anwonyerɛ

⁴³ Yesu lili bɛ nwo berɛ elenyɔ; na ofili berɛ hɔle Galilea.

⁴⁴ Na Yesu bɔbɔ lili adanzeɛ kyɛ, ngɔmhyɛlɛniɛ olle anidie wɔ ye bɔbɔ ye kuro.”

⁴⁵ Na odwuli Galilea nen, Galileafoɛ yɛle ye awaawaatuu. Né banwu bɔ ɔyɔle amukoraa wɔ Yerusalem, wɔ aluolue ne abo ne, ofikyɛ bɛ koso bɛhɔle aluolue ne abo bie.

⁴⁶ Afei Yesu sa hɔle Kana bɔ ɔwɔ Galilea, nekaa bɔ ɔkakyili nzue nzaa nen. Né biaa titireniɛ bie wɔ Kapanɔm bɔ ɔwa nde apɔ ɔ.

⁴⁷ Na ɔtele kyɛ Yesu afi Yudea wawa Galilea nen, osili nu hɔle ye berɛ ɔɔsrɛle ye kyɛ ɔbra ɔɔsa ɔwa ne anwonyerɛ, ɔnate kyɛ né ɔla awusu.

⁴⁸ Yeɛ Yesu sele ye kyɛ, “Ɛmɔngole ngoli, sana ɛmɔanwu anwanwadeɛ ne nzɛngyerɛnneɛ koraka.”

⁴⁹ Na biaa titireniɛ ne sele ye kyɛ, “Yɛ mene, bra, nnɛma mma ne wu koraka.”

⁵⁰ Na Yesu sele ye kyɛ, “Kɔ, ɛwa ne ate apɔ!” Na biaa ne lele Yesu dwirɛ bɔ ɔhã hyirele ye ne lili, na ɔhɔle.

⁵¹ Na ɔ́kɔ nen, ye ngoaa mɔ wale beeyiale ye; na bɛhã behyirele ye kyɛ, “Ɛwa ne ate apɔ.”

⁵² Yeɛ obisale bɛ mmerɛ horɛ bɔ ye nwo hyɛle ye bo sandele ye ɔ. Na bebuale ye kyɛ, “Anoma eyia dɔngo yeɛ ɛfokyɛlɛ ne fili ye nwo ɔ.”

⁵³ Na ye baba ne nwuni kyɛ sɔ mmerɛ ne ala yeɛ Yesu sele ye kyɛ, “Ɛwa ne ate apɔ” ɔ. Yiti ɔne ye awuroama amukoraa bele belili.

⁵⁴ Ɛhe ole nzɛngyerɛnneɛ bɔ ɔtɔ so nyɔ bɔ Yesu yɔle ɔ, mmerɛ bɔ ofili Yudea wale Galilea nen.