Yohane 20 - AHYERƐLƐ KRONGRON

Yesu awu atingye

¹ Na dapɛn ne anu kyẽa bɔ oli moa ne, ngyerɛmɔ tutuutu bɔ né awosii tɛwɔ nu ne, Maria Magdalene wale asieleɛ ne aso, na onwuni kyɛ baye nyɔboɛ ne bafi asieleɛ ne noa.

² Yiti otuli amirika wale Simɔn Petro ne suaniɛ ko ne bɔ Yesu kuro ye dwirɛ paa ne berɛ, na osele bɛ kyɛ, “Baye Awurade bafi asieleɛ ne anu bahɔ, na yɛnze nekaa bɔ bafa ye baato ɔ.”

³ Yeɛ Petro ne sɔ suaniɛ ko ne besili nu kyɛ bɛkɔ asieleɛ ne aso.

⁴ Né bɛ munyɔ betu amirika, na suaniɛ ko ne sane Petro nwo, na olili moa oodwuli asieleɛ ne aso.

⁵ Ɔkotole huli ye nye ase neane nu, na onwuni nwera ne kyɛ ogua berɛ, nakoso wanwura nu.

⁶ Yeɛ Simɔn Petro lili ye si wale, owurale asieleɛ ne anu, na onwuni nwera ne kyɛ ogua berɛ ɔ,

⁷ ɔne eduku bɔ bɛfa bɛkyekyele ye ti ne, kyɛ ɔnne nwera ne anwo berɛ, na mmom babobɔ ye ngome bagua nekaa bie.

⁸ Yeɛ suaniɛ ko ne bɔ olili moa wɔ asieleɛ ne aso ne, ye koso owurale nu, na onwuni ye sɔ, na ole lili.

⁹ Né bennya bɛttele Ahyerɛlɛ ne abo, kyɛ odi kyɛ otingye fi awufoɛ nu ɔ.

¹⁰ Na afei asuafoɛ nemɔ besa bɛhɔle b’awuro.

Yesu ye ye nwo ali kyire Maria Magdalene

¹¹ Na Maria de, né ogyi asieleɛ ne anwo berɛ osũ. Na osũ nen, ohuli ye nye ase neane kumaa ne anu,

¹² na onwuni abɔfo nyɔ bɔ bewura ndaadeɛ fufue ɔ kyɛ bɛtete berɛ; ko te ye sorɔ, yeɛ ko te ye ngwaen, wɔ nekaa bɔ bɛfale Yesu bɛtole ne.

¹³ Na bebisale ye kyɛ, “Mmobraa, nzu ati yeɛ esu ye?” Na obuale bɛ kyɛ, “Bafa m’Awurade bahɔ ti ɔ, na menze nekaa bɔ bafa ye baato ɔ!”

¹⁴ Na ɔhane sɔ nen, ɔkakyili ye nwo, na onwuni Yesu kyɛ ogyi berɛ ɔ, nakoso wannwu kyɛ Yesu ɔ.

¹⁵ Yeɛ Yesu bisale ye kyɛ, “Mmobraa, nzu ati yeɛ esu ye? Ɛpena nwa?” Na ye de, osusuli kyɛ turo ne anu berɛ neafoɛ ne ɔ, yiti obuale ye kyɛ, “Me mene, sɛ afa ye afi wa a, kyire me nekaa bɔ afa ye aato ɔ, ná ngɔmva ye ngɔ.”

¹⁶ Na Yesu sele ye kyɛ, “Maria!” Na ɔkakyili ye nwo sele ye wɔ Hebri dwudwolɛ nu kyɛ, “Raboni!” (ye bo kyire Kyerɛkyerɛniɛ.)

¹⁷ Na Yesu sele ye kyɛ, “Nnɛsɔ me nu, ofikyɛ nnya nngɔle me Baba berɛ wɔ nyameɛso. Nakoso kɔ nniɛma nemɔ berɛ kɔhã kyire bɛ kyɛ, mékɔ nyameɛso, me Baba ne ɛmɔ Baba berɛ, me Nyameɛ ne ɛmɔ Nyameɛ ne berɛ.”

¹⁸ Yiti Maria Magdalene hɔle oosele asuafoɛ nemɔ kyɛ, “Manwu Awurade”; na ɔhane bɔ ɔhã hyirele ye ne hyirele bɛ.

Yesu ye ye nwo ali kyire ye asuafoɛ

¹⁹ Na sɔ kyẽa ne ala nɔsoa, bɔ ɔte dapɛn ne anu kyẽa bɔ oli moa ne, Yudafoɛ nemɔ nwo suronyi ti, asuafoɛ nemɔ totole anoa nemɔ anu wɔ nekaa bɔ bɛboale bɛ noa ne, na Yesu wale oogyinane b’afia berɛ, na osele bɛ kyɛ, “Asomdwee hã ɛmɔ oo!”

²⁰ Na ɔhane sɔ nen, ɔfale ye sa nu ne ye mvenu hyirele bɛ. Na asuafoɛ nemɔ nwuni Awurade nen, bɛ nye gyele.

²¹ Yeɛ Yesu hã hyirele bɛ bieku kyɛ, “Asomdwee hã ɛmɔ oo! Kyɛbɔ Baba ne asoma me ne, sɔ ala yeɛ me koso mesoma ɛmɔ ɔ.”

²² Na ɔhane sɔ nen, olele nwomeɛ guale bɛ so, na osele bɛ kyɛ, “Ɛmɔle Sunzum Krongron ne!

²³ Bɛ bɔ ɛmɔfa bɛ bɔne bɛkyɛ bɛ ne, bafa bahyɛ bɛ; na bɛ bɔ ɛmɔmva bɛ bɔne ngyɛ bɛ ne, bɛmva bɛngyɛ bɛ.”

Yesu ye ye nwo ali kyire Tɔmase

²⁴ Na Tɔmase (bɔ bɛfrɛ ye Ata ne), bɔ ɔte asuafoɛ buru ne nyɔ nemɔ anu ko ne, Yesu wale ne, né ɔnne bɛ nu berɛ bie.

²⁵ Yiti asuafoɛ ngaa nemɔ bɔle ye amaneɛ kyɛ, “Yanwu Awurade.” Nakoso obuale bɛ kyɛ, “Sɛ mannwu ye sa nu mberɛgoo ne boso, ná mamva me sa mmɛseka manga mberɛgoo ne boso, na mamva me sa manga ye mvenu a, mengole ngoli.”

²⁶ Na nziɛ ye, ye ɛlɛbɔtwɛ ne aso, né ye asuafoɛ nemɔ bɛwɔ awuro berɛ bieku, na né Tɔmase ɔboka bɛ so. Né batoto bɛ nwo anoa nu, nakoso Yesu wale oogyinane b’afia berɛ, na osele kyɛ, “Asomdwee hã ɛmɔ oo.”

²⁷ Yeɛ osele Tɔmase kyɛ, “Fa wɔ sa mmɛseka bra wa, ná nea me sa nu; ná fa wɔ sa baahã me mvenu, na nnɛsu aporowaa, na mmom dedi!”

²⁸ Na Tɔmase buale ye kyɛ, “M’Awurade ne me Nyameɛ!”

²⁹ Na Yesu sele ye kyɛ, “Tɔmase, anwu me ne ati yeɛ afei ale ali ɔ? Bɛ bɔ bennwuni ye, ná bale bali ne, ɔte saleɛ ma bɛ!”

Yohane nwomaa ne botaeɛ

³⁰ Na nzɛngyerɛnneɛ pee koso wɔ berɛ bɔ Yesu yɔle bɛ wɔ ye asuafoɛ nemɔ nyunu, bɔ bangyerɛ ye wɔ sɔ nwomaa he anu ɔ.

³¹ Nakoso ɛhemɔ yeɛ bahyerɛ ɔ, kyɛbɔ ɛmɔkole bekoli kyɛ Yesu ole Kristo ne, Nyameɛ Awa ne, na ɛmɔde bedi a, ɛmɔanya ngoa wɔ ye dumaa nu.