Yohane 2 - AHYERƐLƐ KRONGRON

Yesu kɔ Kana atɔmvorɛ bo

¹ Na ye ɛlɛsa ne aso, atɔmvorɛ bie hɔle sɔ wɔ Kana bɔ ɔwɔ Galilea; na né Yesu maame wɔ ye bo bie.

² Bɛtole bɛ sa bɛfrɛle Yesu ne ye asuafoɛ nemɔ maa bɛwale atɔmvorɛ ne abo bie.

³ Na bɛ nzaa ne yiele nen, Yesu maame sele ye kyɛ, “Bɛ nzaa ne ayie oo.”

⁴ Na Yesu buale ye kyɛ, “Mmobraa, aso wɔ yeɛ ekyire me bɔ odi kyɛ meyɔ ɔ? Me mmerɛ ne onnya oddwuli.”

⁵ Na Yesu maame sele asomvoɛ nemɔ kyɛ, “Bɔ ɔkɔhã kohyire ɛmɔ biala, ɛ́mɔyɔ.”

⁶ Né nyɔboɛ bua nzia gyigyi berɛ, na kyɛbɔ Yudafoɛ bɛ nwo petenɛ amanneɛ te ne, bua ko biala kora fa galɔn aburanyɔ anaa aburasa.

⁷ Yesu sele bɛ kyɛ, “Ɛ́mɔsa nzue bégua bua nemɔ anu ma beyiyi!” Na bɛsale nzue beguaguale nu maa beyiyili tɛkyɛtɛkyɛɛ.

⁸ Na osele bɛ kyɛ, “Ɛ́mɔsa bie, ná ɛmɔfa bɛɛma atɔmvorɛ bo aleɛ so neafoɛ ne!” Yiti bɛyɔle sɔ.

⁹ Na atɔmvorɛ bo aleɛ so neafoɛ ne, ɔfale ye noa bɔle nzue bɔ wakakyi nzaa ne aso nen, né ɔnze nekaa bɔ ofi ɔ, (nakoso né asomvoɛ nemɔ de bɛse), yiti atɔmvorɛ bo aleɛ so neafoɛ ne frɛle atɔmvorɛ biaa ne,

¹⁰ na osele ye kyɛ, “Sona biala, nzaa paa yeɛ odi moa fa basie berɛ maa besu ɔ; na sɛ bɛno maa ɔbo bɛ a, koraka yeɛ né afei wafa nzaa mbaen biala wawa ɔ; nakoso wɔ de, nzaa paa ne yeɛ afa asie maa wadwu bekye ɔ.”

¹¹ Yesu nzɛngyerɛnneɛ nemɔ anu bɔ oli moa hɔ ɛne, na ɔyɔle ye wɔ Kana bɔ ɔwɔ Galilea; na ɔyele ye animnyam hyirele, na ye asuafoɛ nemɔ lele ye lili.

¹² Na ɛhe asi ye, ɔhɔle Kapanɔm, ɔne ye maame ne oliɛma mɔ ne ye asuafoɛ nemɔ; na belili ngyẽa kãa wɔ berɛ.

Yesu foa dwadifoɛ fi asɔneyɛɛ sua ne anu

¹³ Né Yudafoɛ Abɔtra aluolue ne apingye, na Yesu hɔle Yerusalem.

¹⁴ Na asɔneyɛɛ sua ne anu berɛ, onwuni bɛ bɔ bɛtɔne nandwie ne mmoaen ne mmorɔnoma, yeɛ afei sikaasesãlɛfoɛ kyɛ bɛtete berɛ ɔ.

¹⁵ Na ɔfale nyamaa yɛle mbire foane bɛ mukoraa, bɛ ne mmoaen ne nandwie nemɔ fili asɔneyɛɛ sua nu berɛ; na ohwiele sikaasesãlɛfoɛ nemɔ bɛ sikaa ne guale, na ɔfale bɛ poen nemɔ butubutuli berɛ.

¹⁶ Na osele bɛ bɔ bɛtɔne mmorɔnoma ne kyɛ, “Ɛ́mɔfa ɛhemɔ befi wa! Nnɛma ɛmɔfa me Baba awuro bɛkakyi dwaalilɛ awuro!”

¹⁷ Na ye asuafoɛ nemɔ kayele kyɛ bahyerɛ kyɛ, “W’awuro nwo ɔdɔ bɔ nne ye ne, ɔte see bɔ ogye wɔ me nu ɔ.”

¹⁸ Yeɛ Yudafoɛ nemɔ bisale ye kyɛ, “Nzɛngyerɛnneɛ beni yeɛ ɛkɔyɔ kɔfa kohyire yɛ kyɛ ele ye nwo ate kyɛ ɛyɔ ɛhe ɔ?”

¹⁹ Na Yesu buale bɛ kyɛ, “Ɛ́mɔdwiri asɔneyɛɛ sua he bégua, na ngɔfa ɛlɛsa ngɔpagya ye ngosie berɛ bieku.”

²⁰ Yeɛ Yudafoɛ nemɔ bisale ye kyɛ, “Afoɛ aburanna ne nzia yeɛ bɛfa besili asɔneyɛɛ sua he ɔ, na wɔ de, ɛlɛsa yeɛ ɛkɔfa kɔpagya ye kosie berɛ bieku ɔ?”

²¹ Nakoso ye de, ye nipadua asɔneyɛɛ sua yeɛ né ɔkã ye nwo dwirɛ ɔ.

²² Yiti, odwɔsole fili awufoɛ nu nen, ye asuafoɛ nemɔ kayele kyɛ ɔhane sɔ dwirɛ ne, na belele Ahyerɛlɛ ne ne Yesu dwirɛ bɔ ɔhane ne belili.

Yesu se kuro sona suban

²³ Mmerɛ bɔ Yesu wɔ Yerusalem bɔ né bedi Abɔtra aluolue nen, mmeni pee lele ye dumaa lili, ɔnate nzɛngyerɛnneɛ bɔ benwuni kyɛ ɔyɔ ne ati.

²⁴ Nakoso Yesu de wamva ye nwo wando bɛ so, ofikyɛ ɔse mmenia mukoraa;

²⁵ yiti onhia kyɛ ebiala koli sona nwo adanzeɛ kohyire ye ɔ, ɔnate kyɛ ye bɔbɔ ɔse mmenia mukoraa ahone nu dwirɛ.