Yohane 15 - AHYERƐLƐ KRONGRON

Yesu ole nahorɛ bobe ne

¹ “Me ole nahorɛ bobe ne, yeɛ me Baba ole kuaniɛ ne.

² Me nwo mmaen biala bɔ onzu mmaa ne, ɔpɛ to; na mmaen biala bɔ osu mmaa ne de, ɔye ye nwo, amaa ɔnate so wasu mmaa pee.

³ Ɔnate edwirɛ bɔ mahã mahyire ɛmɔ ne ati, ɛmɔ nwo afi dada.

⁴ Ɛ́mɔtena me nu, ná me koso ndena ɛmɔ nu. Na kyɛbɔ mmaen bɔbɔ ngora nzu mmaa, bɔ sana ɔtena bobe ne anu nen, sɔ ala yeɛ ɛmɔ koso ɛmɔngɔhora ɔ, sana ɛmɔtena me nu.

⁵ “Me ole bobe ne, na ɛmɔ ole mmaen nemɔ. Ebiala bɔ ɔtena me nu, ná me koso metena ye nu ne, ye yeɛ osu mmaa pee ɔ; ɔnate kyɛ ɛmɔkwati me a, ɛmɔngɔhora nikye fee yɔ.

⁶ Na sɛ ebie wandena me nu a, begyi ye bɛto kyɛ bakaa mmaen, na ɔkese; na bɛboaboa mmaen nemɔ noa begua see nu bɛyera bɛ.

⁷ Sɛ ɛmɔtena me nu, ná me dwirɛ tena ɛmɔ nu a, ɛmɔkobisa bɔ ɛmɔkuro biala, na ɔkɔyɛ berɛ kɔma ɛmɔ.

⁸ Na ɛhe anu yeɛ ɛmɔhyɛ me Baba animnyam ɔ, sɛ ɛmɔsu mmaa pee a, na ɛhe yeɛ ɔmaa ɛmɔyɛ m’asuafoɛ ɔ.

⁹ Kyɛbɔ Baba ne ahuro me dwirɛ nen, sɔ ala yeɛ me koso mahuro ɛmɔ dwirɛ ɔ; ɛmɔhɔ so bɛtena me dɔ nu!

¹⁰ Sɛ ɛmɔdi m’ahyɛdeɛ so a, ɛmɔkɔtena me dɔ nu, kyɛbɔ mali me Baba ahyɛdeɛ so ná nde ye dɔ nu ne.

¹¹ “Mahã ɛhemɔ mahyire ɛmɔ, kyɛbɔ m’anika kɔtena ɛmɔ nu, ná ɛmɔ anika wali mu ɔ.

¹² M’ahyɛdeɛ ne ɛhe: kyɛ ɛmɔhurohuro ɛmɔ nwo dwirɛ, kyɛbɔ mahuro ɛmɔ dwirɛ ne.

¹³ Ebiala nne berɛ bɔ ole ɔdɔ bɔ ɔtra ɛhe ɔ, kyɛ ebie kɔfa ye ngoa kɔto berɛ kɔma ye damvo mɔ ɔ.

¹⁴ Sɛ ɛmɔdi m’ahyɛdeɛ so a, ye de ɛmɔte me damvo mɔ.

¹⁵ Memvrɛ ɛmɔ ngoaa ko, ofikyɛ akoaa nze bɔ ye mene ɔyɔ ɔ; na mmom mafrɛ ɛmɔ me damvo mɔ, ɔnate kyɛ edwirɛ biala bɔ mate mafi me Baba berɛ ne, mala ye ali mahyire ɛmɔ.

¹⁶ Nna ɛmɔ yeɛ ɛmɔaneanea nu baye me ɔ, na mmom me yeɛ maneanea nu maye ɛmɔ ɔ. Na matu ɛmɔ masie berɛ kyɛ ɛmɔhɔ beesu mmaa, ná ɛmɔ mmaa ne bɛhɔ so bɛtena berɛ; na nikyee biala bɔ ɛmɔkobisa Baba ne wɔ me dumaa nu nen, ɔkɔfa kɔma ɛmɔ.

¹⁷ Ahyɛdeɛ he yeɛ mefa mema ɛmɔ ɔ, kyɛ ɛmɔhurohuro ɛmɔ nwo dwirɛ.

Ewiase ndaneanyeɛ ne ɛpɔlɛ

¹⁸ “Sɛ wiase pɔ ɛmɔ a, ɛ́mɔnwu ye kyɛ wali moa wapɔ me koraka yeɛ ɔpɔ ɛmɔ ɔ.

¹⁹ Sɛ ɛmɔfi wiase a, ahaa wiase kohuro ɛmɔ dwirɛ kyɛ ye bɔbɔ ye deɛ. Na ɔnate kyɛ nna wiase yeɛ ɛmɔfi ɔ, na mmom me yeɛ maneanea nu maye ɛmɔ mafi wiase ne ati, yiti yeɛ ɔma wiase pɔ ɛmɔ ne.

²⁰ Ɛ́mɔkaye edwirɛ bɔ nga ngyirele ɛmɔ ne, kyɛ, ‘Akoaa ndra ye mene.’ Sɛ bɛtanene me nye a, bɛkɔtane ɛmɔ koso bɛ nye; sɛ belili me dwirɛ so a, bekoli ɛmɔ deɛ so koso.

²¹ Na ɔnate me dumaa ti bɛkɔfa ɛhemɔ amukoraa bekoli ɛmɔ, ofikyɛ bɛnze bɔ ɔsomane me ne.

²² Sɛ mamma manga dwirɛ ne mangyire bɛ a, ahaa benni bɔne nwo foɛ; na afei de, belle bɛ bɔne nwo nyeanoɛ biala.

²³ Bɔ ɔpɔ me ne, ɔpɔ me Baba ne koso.

²⁴ Sɛ manyɔ nnwumaa bɔ ebiala ɔyyɔle bie le wɔ bɛ nu a, ahaa benni bɔne nwo foɛ; na afei de, banwu ye, nakoso bapɔ me ne me Baba.

²⁵ Na ɛhe ama edwirɛ bɔ bahyerɛ ye wɔ bɛ mmeraa ne anu ne wawa nu kyɛ, ‘Bɛpɔle me mbaen.’

²⁶ “Na Aworakyekyerɛniɛ ne, nahorɛ Sunzum bɔ ofi Baba ne berɛ, bɔ ngɔsoma ye ngɔbrɛ ɛmɔ ngofi Baba ne berɛ ne, sɛ ɔba a, ye yeɛ okoli me nwo adanzeɛ ɔ;

²⁷ na ɛmɔ koso ɛmɔkoli adanzeɛ, ofikyɛ ɛmɔ ne me anate alaa fi ahyɛaseɛ ne.”