Yohane 13 - AHYERƐLƐ KRONGRON

Yesu nwunzi asuafoɛ nemɔ gya bo

¹ Na Abɔtra aluolue ne ɔbaadwu ne, né Yesu se kyɛ ye dɔnhwere ne adwu kyɛ ofi wiase wa ɔkɔ Baba ne berɛ ɔ, na kyɛbɔ ohurole ye bɔbɔ ye deɛ bɔ bɛwɔ wiase dwirɛ nen, ohurole bɛ dwirɛ oodwuli ayieleɛ.

² Na nɔsoa bɔ bɛbaadidi nen, né abɔnzam anya afa awura Yudase Yiskariote, Simɔn awa ne, ye ti anu kyɛ ɔye Yesu ma.

³ Né Yesu se kyɛ Baba ne afa nningyein amukoraa wawura ye sa, kyɛ ofi Baba ne berɛ yeɛ ɔwale ɔ, na ɔ́kɔ Baba ne berɛ;

⁴ yiti odwɔsole yakyili adidie ne, ɔyele ye ataadeɛ guale berɛ; na ɔfale nzasrɛ pɛle ye bo.

⁵ Afei ohwiele nzue guale ayaa nu, na ɔhyɛle ye bo nwunzini asuafoɛ nemɔ bɛ gya bo, na ɔfale nzasrɛ bɔ ɔpɛ ye bo ne nununi bɛ gya bo.

⁶ Na odwuli Simɔn Petro so nen, Petro sele ye kyɛ, “Awurade, wɔ yeɛ afei enwunzi me gya bo ɔ?”

⁷ Na Yesu buale ye kyɛ, “Bɔ meyɔ ye, ɛnde ye bo kekesaala ye, na nziɛ ye ɛkɔte ye bo.”

⁸ Yeɛ Petro sele ye kyɛ, “Mengɔma engonwunzi me gya bo le!” Na Yesu buale ye kyɛ, “Sɛ mannwunzi wɔ gya bo a, né ɛnne me bue nu.”

⁹ Na Simɔn Petro sele ye kyɛ, “Awurade, nnɛnwunzi me gya bo ngome, na me sa ne me ti so koso.”

¹⁰ Yesu sele ye kyɛ, “Sona bɔ wabia ne, onhia ebialɛ, sana ye gya bo nwunzinɛ, na ye nwo amukoraa afi; na ɛmɔ nwo afi, nakoso nna ɛmɔ amukoraa ɔ.”

¹¹ Né Yesu se bɔ ɔbaaye ye ma ne; ye sɔ ati yeɛ ɔhane kyɛ, “Nna ɛmɔ amukoraa yeɛ ɛmɔ nwo afi ɔ.”

¹² Na oyiele bɛ gya bo nwunzini ne, ɔfale ye ataadeɛ ne wurale, osa tenane ase, na obisale bɛ kyɛ, “Naa ɛmɔanwu bɔ mayɔ mama ɛmɔ ne?

¹³ Ɛmɔfrɛ me Kyerɛkyerɛniɛ ne Awurade, na bɔ ɛmɔkã ne ɔte nahorɛ, ofikyɛ nde sɔ.

¹⁴ Na me bɔ nde ɛmɔ Awurade ne Kyerɛkyerɛniɛ ne, sɛ manwunzi ɛmɔ gya bo a, ye de ɔsɛ kyɛ ɛmɔnwunzinwunzi ɛmɔ nwo ɛmɔ nwo gya bo.

¹⁵ Ofikyɛ mama ɛmɔ ye nwo nhwɛsoɛ, na kyɛbɔ mayɔ mama ɛmɔ ne, ɛmɔ koso bɛ́yɔ sɔ ala.

¹⁶ Nahorɛ nu paa, mekã mekyire ɛmɔ kyɛ, akoaa ndra ye mene; yeɛ somafoɛ ndra bɔ ɔsomane ye ne.

¹⁷ Sɛ ɛmɔse hemɔ, ná ɛmɔyɔ a, ɔte saleɛ ma ɛmɔ.

¹⁸ “Nna ɛmɔ amukoraa bɛ nwo dwirɛ yeɛ mekã ɔ, na me de, mese bɛ bɔ maneanea nu maye bɛ ɔ. Na ɛhe yeɛ ɔkɔma Ahyerɛlɛ ne kɔwa nu kyɛ, ‘Sona bɔ ɔne me to asaa didi ne, ye yeɛ waye me wama ɔ.’

¹⁹ Afei mekã ɛhe mekyire ɛmɔ koraka né wasi, amaa sɛ osi a, ɛmɔale bali kyɛ me ole Ye.

²⁰ Nahorɛ nu paa, mekã mekyire ɛmɔ kyɛ, ebiala bɔ ode sona bɔ mesoma ye nen, ode me; na ebiala bɔ ode me nen, ode bɔ ɔsomane me ne.”

Yesu kyire sona bɔ ɔkɔye ye kɔma ɔ

²¹ Na Yesu hane sɔ yiele nen, ye wora bɔle sunzum nu, na ɔfa tole dwaa kyɛ, “Nahorɛ nu paa, mekã mekyire ɛmɔ kyɛ, ɛmɔ nu ko kɔye me kɔma.”

²² Yeɛ asuafoɛ nemɔ neaneane bɛ nyunu, na né bennwu sona horɛ bɔ ɔne ye ɔ.

²³ Na asuafoɛ nemɔ anu ko bɔ Yesu kuro ye dwirɛ paa ne, né watena wakisa Yesu.

²⁴ Yeɛ Simɔn Petro bɔle ye nye hyirele ye sele ye kyɛ, “Bisa ye sona horɛ bɔ ɔne ye ɔ.”

²⁵ Yiti, ye bɔ né watena wakisa Yesu ne, obisale ye kyɛ, “Awurade, nwa ɔ?”

²⁶ Yeɛ Yesu buale kyɛ “Sona bɔ ngɔfa paanoo sii ye ngɔbɔ nu ná ngɔfa ngɔma ye ne, ye ɛne.” Yiti ɔfale paanoo sii ne bɔle nu, na ɔfa mane Yudase Yiskariote, Simɔn awa ne.

²⁷ Na olele paanoo sii ne nen, yeɛ Abɔnzam oowurale ye nu ɔ. Yeɛ Yesu sele ye kyɛ, “Bɔ ɛbaayɔ ne, yɔ ye ndɛ!”

²⁸ Na bɛ bɔ né bɛte berɛ bedidi ne, bɛ nu biala wannwu bɔ yiti yeɛ ɔmaa ɔhane sɔ hyirele ye ɔ.

²⁹ Ebiemɔ susuli kyɛ, Yudase yeɛ osie sikaabɔtɔ ne ati, yiti yeɛ ɔmaa Yesu sele ye kyɛ: Nningyein bɔ yɛkohia ye aluolue ne, kɔtɔ fa sie; anaakyɛ ɔɔyɛ ehiafoɛ adɔeɛ ɔ.

³⁰ Yiti olele paanoo sii ne yiele nen, berɛ ne ala yeɛ ofite hɔle ɔ, na né aleɛ asa.

Yesu ma ye asuafoɛ ahyɛdeɛ foforɛ

³¹ Na ofite hɔle nen, Yesu hane kyɛ, “Afei yeɛ bahyɛ Sona Awa ne animnyam ɔ, na Nyameɛ anya ye nu animnyam.

³² Na sɛ Nyameɛ anya ye nu animnyam a, Nyameɛ koso kɔhyɛ ye animnyam wɔ ye bɔbɔ ye nu, na ɔkɔhyɛ ye animnyam ndɛndɛ.

³³ Me ngwadaammaa, mmerɛ kãa bie yeɛ waha bɔ me ne ɛmɔ yɛkɔtena ɔ. Ɛmɔkɔpena me, na kyɛbɔ nga ngyirele Yudafoɛ ne kyɛ, ‘Nekaa bɔ mekɔ ne, ɛmɔngɔhora berɛ bie ba’ nen, sɔ ala yeɛ mekã mekyire ɛmɔ koso kekesaala ye ɔ.

³⁴ Ahyɛdeɛ foforɛ yeɛ mefa mema ɛmɔ ɔ, kyɛ ɛmɔhurohuro ɛmɔ nwo dwirɛ; na kyɛbɔ mahuro ɛmɔ dwirɛ nen, sɔ ala yeɛ ɛmɔ koso ɛmɔhurohuro ɛmɔ nwo dwirɛ ɔ!

³⁵ Na sɛ ɛmɔkurokuro ɛmɔ nwo dwirɛ a, ɔnate ɛhe aso mmenia amukoraa bekonwu kyɛ ɛmɔte m’asuafoɛ.”

Yesu hyɛ ngɔm kyɛ Petro kɔpa ye si

³⁶ Na Simɔn Petro bisale ye kyɛ, “Awurade, nisua yeɛ ɛ́kɔ ɔ?” Yesu buale kyɛ, “Nekaa bɔ mékɔ ne, ɛngɔhora ngoli me si kekesaala ye; nakoso ekoli me si nziɛ ye.”

³⁷ Na Petro bisale ye kyɛ, “Awurade, nzu ati yeɛ mengɔhora mengoli wɔ si kekesaala ye ɔ? Ngɔfa me ngoa ngɔto berɛ ngɔma wɔ!”

³⁸ Yeɛ Yesu buale ye kyɛ, “Aso ɛkɔfa wɔ ngoa kɔto berɛ kɔma me? Nahorɛ nu paa, mekã mekyire wɔ kyɛ, akɔ ngɔbɔ né ahã ye pɛen nza kyɛ ɛnze me.”