Yohane 10 - AHYERƐLƐ KRONGRON

Yesu ole Mmoaenneafoɛ paa ne

¹ Nahorɛ nu paa, mekã mekyire ɛmɔ kyɛ, ebiala bɔ ɔmva anoa ne anu ngɔ mmoaennduin ne anu, ná mmom ɔfo fa nekaa bie ɔkɔ nu nen, ɔte awueniɛ ne awerɔm awueniɛ;

² nakoso bɔ ɔfa anoa ne anu ɔkɔ nu ne de, ɔte mmoaen nemɔ bɛ neafoɛ.

³ Ye yeɛ anoa wɛmvoɛ ne obukye ye ɔ; mmoaen nemɔ bɛte ye komvi, na ɔfa ye bɔbɔ ye mmoaen bɛ dumaa yeɛ ɔfa frɛ bɛ maa befite ɔ.

⁴ Na sɛ ɔma ye bɔbɔ ye mmoaen nemɔ befite a, odi bɛ nyunu, na mmoaen nemɔ di ye si, ofikyɛ bɛse ye komvi ngome.

⁵ Na ɛwɔfoɛ de, bengoli ye si, na mmom bɛkɔnwati bekofi ye nwo; ɔnate kyɛ bɛnze ɛwɔfoɛ mɔ komvi.

⁶ Yesu buli bɛ anyandera he, nakoso bande edwirɛ bɔ ɔhã hyirele bɛ ne abo.”

Yesu te mmoaennduin anoa ne.

⁷ Yeɛ Yesu sele bɛ bieku kyɛ, “Nahorɛ nu paa, mekã mekyire ɛmɔ kyɛ, me ole mmoaen nemɔ b’anoa ne.

⁸ Bɛ bɔ belili me nyunu moa bɛwale ne amukoraa bɛte awuefoɛ ne awerɔm awuefoɛ, na mmoaen nemɔ bandie bɛ.

⁹ Me ole anoa ne; na sɛ ebie fa me so kɔ nu a, bekole ye ngoa; na okoli nu akɔneaba, na okonya nekaa bɔ okodidi ɔ.

¹⁰ Awueniɛ ne ɔmma, sana ɔbaawua, ná oku, ná ɔsɛkye; nakoso me de, mmale kyɛ bekonya ngoa, ná banya ye mmorosoɛ ɔ.

¹¹ “Me ole mmoaenneafoɛ paa ne. Mmoaenneafoɛ paa ne, ɔfa ye ngoa to berɛ ma mmoaen ne.

¹² Nakoso paaniɛ bɔ nna ye ole mmoaenneafoɛ ne, bɔ mmoaen ne bɛtte ye deɛ nen, sɛ onwu kyɛ pataku ba a, ɔyakyi mmoaen ne berɛ nwati; na pataku ne bakye bɛ, na ɔbɔ bɛ sande.

¹³ Paaniɛ ne nwati, ofikyɛ ɔte paaniɛ, na mmoaen ne nwo nhia ye.

¹⁴ Me ole mmoaenneafoɛ paa ne; mese me deɛ, na me deɛ koso se me,

¹⁵ kyɛbɔ Baba ne se me, ná me koso mese Baba ne nen; na mefa me ngoa meto berɛ mema mmoaen ne.

¹⁶ Na nne mmoaen foforɛ biemɔ bɔ bɛ de nna mmoaen kure he anu yeɛ befi ɔ; na ɔsɛ kyɛ mefa bɛ koso meba ɔ, na bɛkɔte me komvi. Yiti mmoaen kure ne kɔyɛ komapɛ ɔne mmoaenneafoɛ ko.

¹⁷ “Na ye sɔ ati, Baba ne kuro me dwirɛ, ofikyɛ mefa me ngoa meto berɛ, amaa ɔnate so masa mafa ye bieku.

¹⁸ Ebie nne mvi me sa nu, na mmom me bɔbɔ yeɛ mefa meto berɛ ɔ. Ye nwo tumi wura me sa kyɛ mefa meto berɛ ɔ, yeɛ ye nwo tumi wura me sa kyɛ mesa mefa ye bieku ɔ; na ahyɛdeɛ he yeɛ nya mvili me Baba berɛ ɔ.”

¹⁹ Na ɔnate edwirɛ hemɔ ati, Yudafoɛ nemɔ anu hyehyɛle bieku.

²⁰ Bɛ nu pee hane kyɛ, “Ole sunzummɔne, na wabɔ laen. Nzu ati yeɛ ɛmɔtie ye ɔ?”

²¹ Na ebiemɔ koso hane kyɛ, “Sona bɔ ole sunzummɔne ne, nna sɔ yeɛ ye noa dwirɛ te ɔ. Sunzummɔne kɔhora kɔte anyesiniwaafoɛ nye anaa?”

Yudafoɛ po Yesu

²² Na Asɔneyɛɛ sua nwo petenɛ aluolue ne dwuli wɔ Yerusalem, na né ɔte prakasua mmerɛ.

²³ Né Yesu natenate asɔneyɛɛ sua ne anu, wɔ Solomon abrannaa so.

²⁴ Yeɛ Yudafoɛ nemɔ bɛɛpɛle ye nwo beyiale, na bebisale ye kyɛ, “Ɛkɔmaa yɛkɔnwondɛ yɛkoodwu kyinzu? Sɛ wɔ ole Kristo ne a, kã ye pefee kyire yɛ.”

²⁵ Na Yesu buale bɛ kyɛ, “Mahã mahyire ɛmɔ, na ɛmɔnne benni. Nnwumaa bɔ meyɔ wɔ me Baba dumaa nu ne, bedi me nwo adanzeɛ.

²⁶ Nakoso ɛmɔ de, ɛmɔnne benni, ofikyɛ nna me mmoaen ne anu yeɛ ɛmɔfi ɔ.

²⁷ Me mmoaen nemɔ bɛte me komvi, mese bɛ, na bedi me si.

²⁸ Mema bɛ daa ngoa, na bengomini le; na ebiala ngofoti bɛ ngofi me sa nu.

²⁹ Me Baba bɔ ɔfale bɛ mane me ne, ɔte piri tra ebiala; na ebiala ngɔhora ngofoti bɛ ngofi me Baba sa nu.

³⁰ Me ne Baba ne yɛte ko.”

³¹ Yeɛ Yudafoɛ nemɔ sesale nyɔboɛ bieku kyɛ bɛkwaafa bɛboro ye.

³² Na Yesu buale kyɛ, “Nnwumaa paa pee bɔ ofi me Baba ne berɛ yeɛ mayɔ mahyire ɛmɔ ɔ; na bɛ nu beni ati yeɛ ɛmɔbaaboro me nyɔboɛ ye?”

³³ Na Yudafoɛ nemɔ buale kyɛ, “Nna adwuma paa bie ti yeɛ yɛbaaboro wɔ nyɔboɛ ɔ; na mmom musue dwirɛ ti ɔ; ofikyɛ ɛte kuro sona, nakoso ɛyɛ wɔ nwo kyɛ Nyameɛ.”

³⁴ Na Yesu buale bɛ kyɛ, “Aso nna ɛmɔ mmeraa ne anu yeɛ bahyerɛ ye kyɛ, ‘Ngane kyɛ, ɛmɔte nyameɛ mɔ?’

³⁵ Na sɛ ɔfrɛle bɛ bɔ Nyameɛ dwirɛ ne wale bɛ berɛ ne nyameɛ mɔ, bɔ ebie ngora nzɛkye Ahyerɛlɛ ne a,

³⁶ né nzu ati yeɛ bɔ Baba ne ayɛ ye krongron, ná wasoma ye maa wawa wiase ne, ɛmɔkã ye nwo dwirɛ kyɛ, ‘Ahã musue dwirɛ,’ ofikyɛ ngane kyɛ, ‘Nyameɛ Awa ne ole me?’

³⁷ Na sɛ nna me Baba nnwumaa yeɛ meyɔ hɔ a, ye de nnɛma ɛmɔde me bedi.

³⁸ Na sɛ meyɔ, ná ɛmɔnne me benni po a, nnwumaa ne de odi kyɛ ɛmɔde bedi, amaa ɔnate so ɛmɔanwu ye, ná ɛmɔale bali kyɛ Baba ne ɔte me nu, na me koso nde Baba ne nu.”

³⁹ Na bɛbɔle mmɔden bieku kyɛ bɛkɔhye ye ɔ, nakoso onyane ye nwo tetele fili bɛ sa nu hɔle.

⁴⁰ Na Yesu pɛle asue Yɔɔdan hɔle ye si dɔ bieku, nekaa bɔ Yohane lili moa bɔle asu ne, na ɔtenane berɛ.

⁴¹ Na mmenia pee bɛwale ye berɛ, na bɛhane kyɛ, “Yohane anyɔ nzɛngyerɛnneɛ biala de, nakoso edwirɛ biala bɔ Yohane hã fale biaa he nwo ne, ɔte nahorɛ.”

⁴² Na mmenia pee belele ye belili wɔ berɛ.