Yoel 3 - AHYERƐLƐ KRONGRON

AWURADE kobua maen maen mɔ ndɛen

¹ Yiti tie, sɔ ngyẽa nemɔ anu ne sɔ mmerɛ ne anu, bɔ ngosa ngɔfa Yuda ne Yerusalem ngofi nnurehyelɛ nu ngɔwa ne,

² ngɔboaboa maen maen amukoraa bɛ noa, ngɔfa bɛ ngɔwa Yehosafate bɔnza ne anu, na berɛ yeɛ ngɔbɔ bɛ kwaadu ɔ, ɔnate me maen ne m’agyapadeɛ Yisrael bɔ babɔ bɛ basande maen maen mɔ so, ɔne m’aseɛ bɔ bahyɛ ne ati.

³ Bagua serewa bahyɛ me maen, bafa abɛɛmaa bale gyanderaniɛ, yeɛ batɔne abaayaa bale nzaa bano.

⁴ Ɛmɔ, Tiro ne Sidon ne Filistia mboanoa amukoraa, nzikyɛ dwirɛ yeɛ ɛmɔafa bali me e? Aso ɛmɔtua me nikyee bie so kerɛ anaa? Na sɛ ɛmɔtua me so kerɛ a, ye de ngɔma ɛmɔ yɔleɛ ne kɔbɔ ɛmɔ ti so ndɛndɛ so ne amirika so,

⁵ ofikyɛ ɛmɔafa me dwetɛ ne me sikaa kɔkorɛ, na ɛmɔasoa me nningyein paa paa nyemene nemɔ baagua ɛmɔ asɔneyɛɛ sua mɔ nu.

⁶ Ɛmɔatɔne Yudafoɛ ne Yerusalemfoɛ bama Helafoɛ, kyɛbɔ ɔkɔyɛ bɔ ɛmɔkɔye bɛ kofi b’aseɛ so bɛkɔhɔ dedeede ɔ.

⁷ Ɛ́mɔtie, ngɔkanyane bɛ ngofi nekaa bɔ ɛmɔaatɔne bɛ maa bahɔ ne, na ngɔma ɛmɔ yɔleɛ ne kɔbɔ ɛmɔ bɔbɔ bɛ ti so.

⁸ Ngɔtɔne ɛmɔ mma mmienzua ne ɛmɔ mma mmrasua nemɔ ngɔfa bɛ ngowura Yudafoɛ sa, na bɛ koso bɛkɔtɔne bɛ bɛkɔma Sabeafoɛ bɔ bɛte maen bɔ bɛwɔ dedeede ne, ofikyɛ edwirɛ bɔ AWURADE ahã hɔ ɛne.”

⁹ “Ɛ́mɔbɔ ɛhe dawure wɔ Amaenmaensofoɛ mɔ nu kyɛ, Ɛ́mɔhyehyɛ koɛ, ɛ́mɔkanyane koɛhonɛfoɛ nemɔ. Ɛ́mɔma koɛhonɛfoɛ nemɔ amukoraa bɛbɔ bepingye; ɛ́mɔma bɛfo bɛbra.

¹⁰ Ɛ́mɔboro ɛmɔ kona mɔ bɛbɔ ngrandɛ, ná ɛ́mɔboro ɛmɔ asɔsɔaa mɔ bɛbɔ pealɛɛ; sona bɔ ɔyɛ mmerɛ ne, ɔhã kyɛ, Nde anwoserɛniɛ.

¹¹ Maen maen amukoraa bɔ ɛmɔapɛ ye nwo babra bayia ɔ, ɛ́mɔyɛ ndɛ bɛbra, ɛ́mɔboaboa ɛmɔ noa wɔ berɛ. Ao AWURADE, ma wɔ koɛhonɛfoɛ nemɔ bedwu bɛbra.

¹² Odi kyɛ maen maen mɔ bɛkanyane bɛ nwo bɛba Yehosafate bɔnza ne anu, ofikyɛ berɛ yeɛ ngɔtena ngobua maen maen amukoraa bɔ bapɛ ye nwo bayia ne ndɛen ɔ.

¹³ Ɛmɔ, ɛ́mɔfa dadeɛ koateɛ bɛhɔ, ofikyɛ buberɛ ne adwu; ɛ́mɔdwu bɛhɔ nu, ofikyɛ nekaa bɔ betwi nzaa ne wayi; angora nemɔ bayi babu bafa so, ofikyɛ b’amumuyɛɛ ne te piri.

¹⁴ Ɛlɔen, ɛlɔen wɔ ndɛenbualɛ bɔnza ne anu; ofikyɛ AWURADE kyẽa ne apingye wɔ ndɛenbualɛ bɔnza ne anu.

¹⁵ Eyia ne ɛsraen bakakyi awosii, ná nzramaa nemɔ bayakyi talɛ.

¹⁶ AWURADE bobɔ nu fi Sion, na ɔma ye komvi so fi Yerusalem; anwuro ne aseɛ bɛwoso, nakoso AWURADE te ye maen anyelasoɛ, ɔne ye mma Yisrael b’anwoserɛ afealeɛ.

¹⁷ “Ɔnate so ɛmɔkonwu kyɛ me ole AWURADE ɛmɔ Nyameɛ, bɔ nde Sion, me bokaa krongron ne aso ne. Afei, Yerusalem kɔyɛ nekaa krongron, na ɛwɔfoɛ mɔ ngɔpɛ nu berɛ ko.

¹⁸ “Na sɔ kyẽa ne, mmokaa nemɔ kɔpepe nzaa monɛ, nyɔfonesue kɔtengyɛ wɔ pambaa nemɔ aso, nzue kɔtengyɛ wɔ Yuda asue amukoraa nu, na asue ti kofite wɔ AWURADE awuro ne anu kɔɔloaloa Sitim bɔnza ne anu.

¹⁹ “Misraim kɔbɔ, na Edom kɔyɛ ɛserɛ pralaa, ɔnate akakabenzɛm bɔ bali ye wɔ Yudafoɛ so ne ati, ofikyɛ bahã mogya bɔ odi be ɔ bagua wɔ b’aseɛ ne aso.

²⁰ Nakoso Yuda de, ɔkɔtena berɛ afebɔɔ, yeɛ Yerusalem kɔtena berɛ aworɛ ndoatoasoɛ amukoraa nu.

²¹ Bɛ mogya bɔ mandɔ so wereɛ ne, ngɔtɔ so wereɛ, ofikyɛ AWURADE te Sion.”